ಚಿತ್ರದುರ್ಗ | ತಂದೆಯನ್ನೇ ಕೊಲೆ ಮಾಡಿದ ಮಗನ ಬಂಧನ

ಸುದ್ದಿಒನ್, ಚಿತ್ರದುರ್ಗ, ಜುಲೈ. 20 : ತಾಲ್ಲೂಕಿನ ಭರಮಸಾಗರ ಹೋಬಳಿ ವ್ಯಾಪ್ತಿಯ ಕಲ್ಕುಂಟೆ ಗ್ರಾಮದಲ್ಲಿ ಜುಲೈ 19 ರಂದು ನಡೆದ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ತಂದೆಯನ್ನೇ ಕೊಲೆ ಮಾಡಿದ್ದ ಮಗನನ್ನು ಭರಮಸಾಗರ ಪೊಲೀಸರು ಬಂಧಿಸಿದ್ದಾರೆ.

ಪ್ರಸನ್ನ ಕುಮಾರ(33 ವರ್ಷ) ಬಂಧಿತ ಆರೋಪಿಯಾಗಿದ್ದು ಜುಲೈ 19 ರಂದು ಜಮೀನು ವಿಚಾರಕ್ಕೆ ಸಂಬಂಧಿಸಿದಂತೆ ತನ್ನ ತಂದೆಯನ್ನೆ ಕೊಂದಿದ್ದ.

ಘಟನೆ ಹಿನ್ನೆಲೆ :
ಚಿತ್ರದುರ್ಗ ತಾಲ್ಲೂಕು ಕಲ್ಕುಂಟೆ ಗ್ರಾಮದ ಚಂದ್ರಪ್ಪ, ಈತನ ಮಗ ಪ್ರಸನ್ನ ಕುಮಾರ್ ಹಾಗೂ ಚಂದ್ರಪ್ಪನ ತಮ್ಮ ಕರಿಬಸಪ್ಪ ಇವರ ನಡುವೆ ಜಮೀನಿನ ವಿಚಾರದಲ್ಲಿ ಚಂದ್ರಪ್ಪ ರವರ ಮಗನಾದ ಪ್ರಸನ್ನ ಕುಮಾರನಿಗೆ ಭಾಗ ಕೊಡುವ ವಿಚಾರಕ್ಕೆ ವೈಶಮ್ಯವಿದ್ದು ಈ ಹಿನ್ನೆಲೆಯಲ್ಲಿ ಕರಿಬಸಪ್ಪನು ತನ್ನ ಅಣ್ಣನ ಮಗ ಪ್ರಸನ್ನ ಕುಮಾರನಿಗೆ ಕೊಲೆ ಮಾಡುವಂತೆ ಕುಮ್ಮಕ್ಕು ನೀಡಿರುತ್ತಾನೆ.‌ ಇದೇ ಜುಲೈ 19 ರಂದು ಮದ್ಯಾಹ್ನ 1.10 ಗಂಟೆ ಸುಮಾರಿಗೆ ಚಂದ್ರಪ್ಪನವರಿಗೆ ಸೇರಿದ ಎನ್. ಬಳಿಗಟ್ಟೆ ಜಮೀನಿನಲ್ಲಿ ಚಂದ್ರಪ್ಪನು ಎಮ್ಮೆಗಳನ್ನು ಮೇಯಿಸುತ್ತಿದ್ದಾಗ ಆತನ ಮಗ ಪ್ರಸನ್ನ ಕುಮಾರನು ತನ್ನ ಚಿಕ್ಕಪ್ಪ ಕರಿಬಸಪ್ಪನ ಕುಮ್ಮಕ್ಕಿನಿಂದ ಚಂದ್ರಪ್ಪನ ಬಳಿ ಹೋಗಿ ಜಮೀನಿನ ಭಾಗದ ವಿಚಾರವಾಗಿ ಜಗಳ ತೆಗೆದು ಚಂದ್ರಪ್ಪನಿಗೆ ಪ್ರಸನ್ನಕುಮಾರನು ಕೋಲಿನಿಂದ ತಲೆಗೆ ಹಾಗೂ ಮೈ ಕೈಗೆ ತೀವ್ರವಾಗಿ ಹಲ್ಲೆ ಮಾಡಿ ಕೊಲೆ ಮಾಡಿರುತ್ತಾನೆ. ಕೊಲೆ ಮಾಡಿದ ನಂತರ ಆರೋಪಿತನು ಸ್ವತಃ ಭರಮಸಾಗರ ಪೊಲೀಸ್ ಠಾಣೆಗೆ ಬಂದು ತನ್ನ ತಂದೆಗೆ ಹೊಡೆದಿರುವ ಬಗ್ಗೆ ತಿಳಿಸಿರುತ್ತಾನೆ. ಕೊಲೆಯಾದ ಚಂದ್ರಪ್ಪನ ಹೆಂಡತಿ ಸರೋಜಮ್ಮ ರವರು ನೀಡಿದ ದೂರಿನಂತೆ ಭರಮಸಾಗರ ಪೋಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿರುತ್ತದೆ.

ವಿಶೇಷ ತನಿಖಾ ತಂಡ ರಚನೆ :
ಚಿತ್ರದುರ್ಗ ಜಿಲ್ಲಾ ಪೊಲೀಸ್ ಅಧೀಕ್ಷಕರಾದ ರಂಜಿತ್ ಕುಮಾರ್ ಭಂಡಾರು, ಐಪಿಎಸ್ ಅವರ ಮಾರ್ಗದರ್ಶನದಲ್ಲಿ ವಿಶೇಷ ತಂಡ ರಚಿಸಲಾಯಿತು. ಶಿವಕುಮಾರ್. ಕೆ.ಎಸ್.ಪಿ.ಎಸ್. ಹೆಚ್ಚುವರಿ ಪೊಲೀಸ್ ಅಧೀಕ್ಷಕರು. ಚಿತ್ರದುರ್ಗ ಜಿಲ್ಲೆ ರವರ ಮಾರ್ಗದರ್ಶನದಲ್ಲಿ ಅರುಣ್ ನಾಗೇಗೌಡ, ಪೊಲೀಸ್ ಉಪಾಧೀಕ್ಷಕರು. ಚಿತ್ರದುರ್ಗ ಉಪವಿಭಾಗ ರವರ ನೇತೃತ್ವದಲ್ಲಿ ಭರಮಸಾಗರ ಪೊಲೀಸ್ ಠಾಣೆಯ ಪೊಲೀಸ್ ನಿರೀಕ್ಷಕರಾದ ಪ್ರಸಾದ್. ಪಿ. ಹಾಗೂ ಸಿಬ್ಬಂದಿ ವರ್ಗದವರು ತನಿಖೆ ಕೈಗೊಂಡು ಆರೋಪಿತನಾದ ಪ್ರಸನ್ನ ಕುಮಾರನನ್ನು ವಿಚಾರಣೆಗೆ ಒಳಪಡಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿರುತ್ತಾರೆ.

ಪೊಲೀಸರ ಕಾರ್ಯಾಚರಣೆಗೆ ಶ್ಲಾಘನೆ :
ಪ್ರಕರಣವನ್ನು ಅತಿ ಕಡಿಮೆ ಅವಧಿಯಲ್ಲಿ ಭೇದಿಸಿದ ವಿಶೇಷ ತನಿಖಾ ತಂಡದ ಅಧಿಕಾರಿ ಹಾಗೂ ಸಿಬ್ಬಂದಿಯನ್ನು ಚಿತ್ರದುರ್ಗ ಜಿಲ್ಲಾ ಪೊಲೀಸ್ ಅಧೀಕ್ಷಕರು ಶ್ಲಾಘಿಸಿದ್ದಾರೆ.