ದೆಹಲಿ.ಸೆಪ್ಟೆಂಬರ್. 15: ಆನ್ಲೈನ್ ಶಾಪಿಂಗ್ನಲ್ಲಿ ಗ್ರಾಹಕರಿಗೆ ಆಗುತ್ತಿದ್ದ ವಂಚನೆ, ನಕಲಿ ರಿಯಾಯಿತಿ ಹಾಗೂ ಅನಗತ್ಯ ಶುಲ್ಕಗಳಿಗೆ ಕಡಿವಾಣ ಹಾಕಲು ಕೇಂದ್ರ ಸರ್ಕಾರ ಮುಂದಾಗಿದೆ. ‘ಗ್ರಾಹಕರ ಸಂರಕ್ಷಣಾ (ಇ-ಕಾಮರ್ಸ್) ನಿಯಮಗಳು, 2020’ಕ್ಕೆ ಮಹತ್ವದ ತಿದ್ದುಪಡಿ ತರಲಾಗಿದ್ದು, 2027ರ ಜನವರಿ 1ರಿಂದ Amazon, Flipkart ಸೇರಿದಂತೆ ಪ್ರಮುಖ ಇ-ಕಾಮರ್ಸ್ ವೇದಿಕೆಗಳಲ್ಲಿ 9 ಹೊಸ ನಿಯಮಗಳು ಕಡ್ಡಾಯವಾಗಿ ಜಾರಿಗೆ ಬರಲಿವೆ.
ಗ್ರಾಹಕರ ಹಿತದೃಷ್ಟಿಯಿಂದ ಜಾರಿಯಾಗುತ್ತಿರುವ ಆ 9 ಪ್ರಮುಖ ಬದಲಾವಣೆಗಳ ವಿವರ ಇಲ್ಲಿದೆ.
ಅಸಲಿ ಬೆಲೆಯ (Prior Price) ಮಾಹಿತಿ ಕಡ್ಡಾಯ: ಇನ್ಮುಂದೆ ವಸ್ತುಗಳ ದರವನ್ನು ದಿಢೀರ್ ಏರಿಸಿ, ನಂತರ ಅದರ ಮೇಲೆ ಭಾರಿ ಡಿಸ್ಕೌಂಟ್ ತೋರಿಸುವಂತಿಲ್ಲ. ಕಳೆದ 30 ದಿನಗಳಲ್ಲಿ ಆ ವಸ್ತುವಿಗೆ ಇದ್ದ ಅತ್ಯಂತ ಕಡಿಮೆ ಬೆಲೆಯನ್ನು (Prior Price) ಕಡ್ಡಾಯವಾಗಿ ನಮೂದಿಸಬೇಕು.
ಸರ್ಚ್ ರಿಸಲ್ಟ್ನಲ್ಲಿ ತಿರುಚುವಂತಿಲ್ಲ: ಗ್ರಾಹಕರು ಹುಡುಕುವ ಉತ್ಪನ್ನಗಳ ಬದಲಿಗೆ ತಮಗೆ ಲಾಭ ತರುವ ವಸ್ತುಗಳನ್ನು ಮೊದಲಿಗೆ ತೋರಿಸುವ ಕೃತಕ ಪ್ರಕ್ರಿಯೆಗೆ ಕಡಿವಾಣ ಬೀಳಲಿದೆ. ಬಳಕೆದಾರರಿಗೆ ಸೂಕ್ತವಾದ ಫಲಿತಾಂಶಗಳನ್ನಷ್ಟೇ ನೀಡಬೇಕು.
ಪ್ರಾಯೋಜಿತ (Sponsored) ವಸ್ತುಗಳ ಸ್ಪಷ್ಟ ಲೇಬಲ್: ಹಣ ಪಾವತಿಸಿ ಸರ್ಚ್ ಪಟ್ಟಿಯಲ್ಲಿ ಮೇಲೆ ಬರುವಂತೆ ಮಾಡಿದ ಉತ್ಪನ್ನಗಳ ಮೇಲೆ ಇನ್ಮುಂದೆ ‘Sponsored’ ಅಥವಾ ‘Ad’ ಎಂದು ಸ್ಪಷ್ಟವಾಗಿ ಕಾಣಿಸುವಂತೆ ನಮೂದಿಸಬೇಕು.
ಡಾರ್ಕ್ ಪ್ಯಾಟರ್ನ್ ವಾರ್ಷಿಕ ಆಡಿಟ್: ಗ್ರಾಹಕರ ಗಮನಕ್ಕೆ ಬಾರದಂತೆ ಹೆಚ್ಚುವರಿ ವಸ್ತು ಅಥವಾ ಸೇವೆಗಳನ್ನು ಕಾರ್ಟ್ಗೆ ಸೇರಿಸುವ ಮೋಸದ ತಂತ್ರಜ್ಞಾನಕ್ಕೆ (Dark Patterns) ತಡೆ ನೀಡಲಾಗಿದೆ. ಕಂಪನಿಗಳು ಈ ಕುರಿತು ಪ್ರತಿವರ್ಷ ಆಡಿಟ್ ನಡೆಸಿ, ಪ್ರಮಾಣಪತ್ರವನ್ನು ಆ್ಯಪ್ನಲ್ಲಿ ಪ್ರಕಟಿಸಬೇಕು.
ದೂರಿನ ಲಿಖಿತ ದಾಖಲೆ: ಗ್ರಾಹಕರು ಸಮಸ್ಯೆಗಳ ಬಗ್ಗೆ ದೂರು ನೀಡಿದಾಗ ಕೇವಲ ಟೋಕನ್ ನಂಬರ್ ನೀಡುವುದಷ್ಟೇ ಅಲ್ಲದೆ, ದಾಖಲಾದ ದೂರನ್ನು ಪೂರ್ಣ ವಿವರಗಳೊಂದಿಗೆ ಲಿಖಿತ ರೂಪದಲ್ಲಿ ಗ್ರಾಹಕರಿಗೆ ಒದಗಿಸಬೇಕು.
ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ (NCH) ಜೋಡಣೆ: ಎಲ್ಲಾ ಇ-ಕಾಮರ್ಸ್ ಕಂಪನಿಗಳು ‘ನ್ಯಾಷನಲ್ ಕನ್ಸ್ಯೂಮರ್ ಹೆಲ್ಪ್ಲೈನ್’ ಜೊತೆ ನೇರವಾಗಿ ಲಿಂಕ್ ಆಗಿರಬೇಕು. ಇದರಿಂದ ಗ್ರಾಹಕರ ದೂರುಗಳು ಸರ್ಕಾರಿ ವ್ಯವಸ್ಥೆಯ ನಿಗಾದಲ್ಲಿ ಶೀಘ್ರವಾಗಿ ಇತ್ಯರ್ಥವಾಗಲಿವೆ.
ಉತ್ಪನ್ನ ಮತ್ತು ಮಾರಾಟಗಾರರ ಪೂರ್ಣ ವಿವರ: ವಸ್ತುವಿನ ಎಕ್ಸ್ಪೈರಿ ದಿನಾಂಕ, ರಿಟರ್ನ್ ಮತ್ತು ರೀಫಂಡ್ ನೀತಿ, ವಾರಂಟಿ, ಡೆಲಿವರಿ ಸಮಯ ಹಾಗೂ ಪಾವತಿಯ ಸಂಪೂರ್ಣ ವಿವರಗಳನ್ನು ಖರೀದಿಗೆ ಮುನ್ನವೇ ಸ್ಪಷ್ಟವಾಗಿ ತೋರಿಸಬೇಕು.
ಹಿಡನ್ ಚಾರ್ಜ್ಗಳಿಗೆ ಬ್ರೇಕ್ & ಆಮದು ವಿವರ: ಬಿಲ್ಲಿಂಗ್ ಸಮಯದಲ್ಲಿ ಗ್ರಾಹಕರಿಗೆ ಗೊತ್ತಿಲ್ಲದಂತೆ ಅನಗತ್ಯ ಶುಲ್ಕಗಳನ್ನು ಸೇರಿಸುವಂತಿಲ್ಲ. ವಿದೇಶಿ ವಸ್ತುಗಳಿಗೆ ತಯಾರಾದ ದೇಶ (Country of Origin) ಮತ್ತು ಆಮದುದಾರರ ಪೂರ್ಣ ವಿವರ ಕಡ್ಡಾಯ.
ವೈಯಕ್ತಿಕ ಡೇಟಾಗೆ ರಕ್ಷಣೆ: ಗ್ರಾಹಕರ ಹುಡುಕಾಟ ಅಥವಾ ವೈಯಕ್ತಿಕ ಡೇಟಾವನ್ನು ಅವರ ಅನುಮತಿಯಿಲ್ಲದೆ ನಿರ್ದಿಷ್ಟ ಮಾರಾಟಗಾರರ ಲಾಭಕ್ಕಾಗಿ ಅಥವಾ ಪ್ರಚಾರಕ್ಕಾಗಿ ಬಳಸಿಕೊಳ್ಳುವುದನ್ನು ನಿಷೇಧಿಸಲಾಗಿದೆ.
ಈ ನಿಯಮಗಳು ಜಾರಿಗೆ ಬರುವುದರಿಂದ ಇ-ಕಾಮರ್ಸ್ ವಹಿವಾಟಿನಲ್ಲಿ ಹೆಚ್ಚಿನ ಪಾರದರ್ಶಕತೆ ಬರಲಿದ್ದು, ಆನ್ಲೈನ್ ವಂಚನೆಗಳಿಂದ ಗ್ರಾಹಕರಿಗೆ ಸೂಕ್ತ ರಕ್ಷಣೆ ದೊರೆಯಲಿದೆ.
