ಬೆಂಗಳೂರು.ಆಗಸ್ಟ್.7: ಉದ್ಯೋಗ, ಶಿಕ್ಷಣ ಅಥವಾ ಇತರೆ ಕಾರಣಗಳಿಂದ ಹೊಸ ನಗರಕ್ಕೋ ಅಥವಾ ಬಾಡಿಗೆ ಮನೆಗೆ ಶಿಫ್ಟ್ ಆದಾಗ ದಾಖಲೆಗಳಲ್ಲಿ ವಿಳಾಸ ಬದಲಾಯಿಸುವುದು ದೊಡ್ಡ ಸವಾಲಾಗಿರುತ್ತದೆ. ಬ್ಯಾಂಕ್ ಖಾತೆ, ಪ್ಯಾನ್ ಕಾರ್ಡ್ ಅಥವಾ ಮಕ್ಕಳ ಶಾಲೆ—ಹೀಗೆ ಪ್ರತಿಯೊಂದಕ್ಕೂ ಆಧಾರ್ನಲ್ಲಿ ಹೊಸ ವಿಳಾಸ ಇರುವುದು ಕಡ್ಡಾಯ.
ಈ ಹಿಂದೆ ವಿಳಾಸ ತಿದ್ದುಪಡಿಗೆ ಆಧಾರ್ ಸೇವಾ ಕೇಂದ್ರಗಳಿಗೆ ಅಲೆಯಬೇಕಿತ್ತು. ಆದರೆ, ಈಗ ನೀವು ನಿಮ್ಮ ಮೊಬೈಲ್ ಅಥವಾ ಲ್ಯಾಪ್ಟಾಪ್ ಮೂಲಕ ಮನೆಯಲ್ಲೇ ಕುಳಿತು ಸುಲಭವಾಗಿ ಆನ್ಲೈನ್ನಲ್ಲಿ ವಿಳಾಸ ನವೀಕರಿಸಬಹುದು. ಪ್ರಕ್ರಿಯೆ ಇಲ್ಲಿದೆ:
ಆಧಾರ್ ಅಧಿಕೃತ ವೆಬ್ಸೈಟ್ ಮೂಲಕ ತಿದ್ದುಪಡಿ:
ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರದ (UIDAI) ಅಧಿಕೃತ ವೆಬ್ಸೈಟ್ಗೆ (uidai.gov.in) ಭೇಟಿ ನೀಡಿ.
‘My Aadhaar’ ವಿಭಾಗದಲ್ಲಿ ನಿಮ್ಮ ಆಧಾರ್ ಸಂಖ್ಯೆ ಮತ್ತು ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ (OTP) ಬಳಸಿ ಲಾಗಿನ್ ಆಗಿ.
‘Update Aadhaar Online’ ಆಯ್ಕೆಯನ್ನು ಆಯ್ದುಕೊಳ್ಳಿ.
ನಿಮ್ಮ ಹೊಸ ಬಾಡಿಗೆ ಮನೆಯ ವಿಳಾಸ, ಪಿನ್ ಕೋಡ್, ಜಿಲ್ಲೆ ಮತ್ತು ರಾಜ್ಯದ ಮಾಹಿತಿಯನ್ನು ನಿಖರವಾಗಿ ನಮೂದಿಸಿ.
ಆಧಾರ್ ಆ್ಯಪ್ ಮೂಲಕವೂ ವಿಳಾಸ ಬದಲಾವಣೆ:
ನಿಮ್ಮ ಮೊಬೈಲ್ನಲ್ಲಿ ‘mAadhaar’ ಆ್ಯಪ್ ಡೌನ್ಲೋಡ್ ಮಾಡಿ.
ಆ್ಯಪ್ನ ‘Services’ ವಿಭಾಗಕ್ಕೆ ಹೋಗಿ ‘Address Update’ ಮೇಲೆ ಕ್ಲಿಕ್ ಮಾಡಿ.
ಅಗತ್ಯ ದಾಖಲೆಗಳನ್ನು ಅಪ್ಲೋಡ್ ಮಾಡಿ, ಫೇಸ್ ಅಥೆಂಟಿಕೇಶನ್ (Mukha Authentication) ಮೂಲಕ ಪ್ರಕ್ರಿಯೆ ಪೂರ್ಣಗೊಳಿಸಿ.
ಅಗತ್ಯ ದಾಖಲೆಗಳು:
ಹೊಸ ವಿಳಾಸದ ದೃಢೀಕರಣಕ್ಕಾಗಿ ಮನೆ ಮಾಲೀಕರೊಂದಿಗೆ ಮಾಡಿಕೊಂಡ ಬಾಡಿಗೆ ಕರಾರು ಪತ್ರ (Rent Agreement) ಅಥವಾ ಇತರೆ ಮಾನ್ಯತೆ ಪಡೆದ ವಿಳಾಸದ ಪುರಾವೆಯನ್ನು ಸ್ಕ್ಯಾನ್ ಮಾಡಿ ಅಪ್ಲೋಡ್ ಮಾಡಬೇಕು.
ರೆಂಟ್ ಅಗ್ರಿಮೆಂಟ್ ಇಲ್ಲದಿದ್ದರೆ, UIDAI ನ ನಿಗದಿತ ಮಾದರಿಯಲ್ಲಿ ‘ಕುಟುಂಬದ ಮುಖ್ಯಸ್ಥರ’ (Head of Family) ಸಮ್ಮತಿ ಪತ್ರ ಅಥವಾ ಇತರೆ ಸಮ್ಮತಿತ ದಾಖಲೆಗಳನ್ನು ಬಳಸಬಹುದು.
ಆನ್ಲೈನ್ ಶುಲ್ಕ ಮತ್ತು ಟ್ರ್ಯಾಕಿಂಗ್:
ದಾಖಲೆಗಳನ್ನು ಅಪ್ಲೋಡ್ ಮಾಡಿದ ನಂತರ, ಯುಪಿಐ, ಡೆಬಿಟ್ ಅಥವಾ ಕ್ರೆಡಿಟ್ ಕಾರ್ಡ್ ಮೂಲಕ ನಿಗದಿತ ಶುಲ್ಕವನ್ನು (ಸುಮಾರು ₹75) ಪಾವತಿಸಬೇಕಾಗುತ್ತದೆ.
ಪಾವತಿ ಪೂರ್ಣಗೊಂಡ ನಂತರ ನಿಮಗೆ ‘ಅಪ್ಡೇಟ್ ರಿಕ್ವೆಸ್ಟ್ ನಂಬರ್’ (URN) ಸಿಗುತ್ತದೆ. ಇದರ ಸಹಾಯದಿಂದ ನಿಮ್ಮ ಅರ್ಜಿಯ ಸ್ಥಿತಿಯನ್ನು (Status) ಪರಿಶೀಲಿಸಬಹುದು.
