30ರ ಹರೆಯದ ವಯಸ್ಸು ವೃತ್ತಿಜೀವನ, ಕುಟುಂಬ ಮತ್ತು ಜವಾಬ್ದಾರಿಗಳಿಂದ ಕೂಡಿರುತ್ತದೆ. ಇದೇ ಸಮಯದಲ್ಲಿ ದೇಹದಲ್ಲೂ ಕೂಡ ಸಣ್ಣಪುಟ್ಟ ಬದಲಾವಣೆಗಳು ಹಾಗೂ ಶಾರೀರಿಕ ದಣಿವು ಕಾಣಿಸಿಕೊಳ್ಳಲು ಪ್ರಾರಂಭವಾಗುತ್ತದೆ. ಹೀಗಾಗಿ, ದೀರ್ಘಕಾಲದ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಮಹಿಳೆಯರು ಮುಂಜಾಗ್ರತಾ ಕ್ರಮವಾಗಿ ಕೆಲವು ಮುಖ್ಯ ವೈದ್ಯಕೀಯ ತಪಾಸಣೆಗಳನ್ನು (Preventive Screenings) ಮಾಡಿಸಿಕೊಳ್ಳುವುದು ಅತ್ಯಗತ್ಯ ಎಂದು ವೈದ್ಯರು ಸಲಹೆ ನೀಡುತ್ತಾರೆ.
30 ದಾಟಿದ ಮಹಿಳೆಯರು ನಿಯಮಿತವಾಗಿ ಮಾಡಿಸಿಕೊಳ್ಳಬೇಕಾದ 6 ಪ್ರಮುಖ ವೈದ್ಯಕೀಯ ಪರೀಕ್ಷೆಗಳ ವಿವರ ಇಲ್ಲಿದೆ:
ರಕ್ತದೊತ್ತಡ ತಪಾಸಣೆ (Blood Pressure Check):
ಉಧಿಕ ರಕ್ತದೊತ್ತಡ (ಹೈ ಬಿಪಿ) ಯಾವುದೇ ಸ್ಪಷ್ಟ ರೋಗಲಕ್ಷಣಗಳನ್ನು ತೋರಿಸುವುದಿಲ್ಲ, ಆದರೆ ಇದು ಹೃದಯಾಘಾತ ಮತ್ತು ಪಾರ್ಶ್ವವಾಯು (ಸ್ಟ್ರೋಕ್) ಅಪಾಯವನ್ನು ಹೆಚ್ಚಿಸುತ್ತದೆ. ಆದ್ದರಿಂದ ವರ್ಷಕ್ಕೊಮ್ಮೆಯಾದರೂ ಬಿಪಿ ತಪಾಸಣೆ ಮಾಡಿಸಿಕೊಳ್ಳಬೇಕು. ಅಧಿಕ ತೂಕ, ಮಧುಮೇಹ ಅಥವಾ ಕುಟುಂಬದಲ್ಲಿ ಬಿಪಿ ಹಿನ್ನೆಲೆ ಇದ್ದರೆ ಪದೇ ಪದೇ ತಪಾಸಣೆ ಅಗತ್ಯ.
ರಕ್ತದ ಸಕ್ಕರೆ ಪ್ರಮಾಣ ತಪಾಸಣೆ (Blood Sugar / Glucose Test):
ಯುವತಿಯರಲ್ಲಿ ಮತ್ತು ಮಹಿಳೆಯರಲ್ಲಿ ಇತ್ತೀಚೆಗೆ ಮಧುಮೇಹ ಹೆಚ್ಚಾಗಿ ಕಂಡುಬರುತ್ತಿದೆ. ಹೀಗಾಗಿ 1 ರಿಂದ 3 ವರ್ಷಗಳಿಗೊಮ್ಮೆ ರಕ್ತದಲ್ಲಿನ ಸಕ್ಕರೆ ಪ್ರಮಾಣವನ್ನು ಪರೀಕ್ಷಿಸಿಕೊಳ್ಳಬೇಕು. ಗರ್ಭಾವಸ್ಥೆಯಲ್ಲಿ ಮಧುಮೇಹ ಬಂದಿದ್ದರೆ ಅಥವಾ ಕುಟುಂಬದಲ್ಲಿ ಯಾರಿಗಾದರೂ ಮಧುಮೇಹವಿದ್ದರೆ ನಿಯಮಿತ ತಪಾಸಣೆ ಅತ್ಯಗತ್ಯ.
ಲಿಪಿಡ್ ಪ್ರೊಫೈಲ್ / ಕೊಲೆಸ್ಟ್ರಾಲ್ ತಪಾಸಣೆ (Lipid Profile Test):
ಅಧಿಕ ಕೊಲೆಸ್ಟ್ರಾಲ್ ನಿಧಾನವಾಗಿ ರಕ್ತನಾಳಗಳಿಗೆ ಹಾನಿ ಮಾಡುತ್ತದೆ. 4 ರಿಂದ 6 ವರ್ಷಗಳಿಗೊಮ್ಮೆ ಕೊಲೆಸ್ಟ್ರಾಲ್ ಪರೀಕ್ಷೆ ಮಾಡಿಸಿಕೊಳ್ಳುವುದು ಒಳ್ಳೆಯದು. ಧೂಮಪಾನ ಮಾಡುವವರು, ಅಧಿಕ ತೂಕ ಹೊಂದಿರುವವರು ಅಥವಾ ಹೃದಯಸಂಬಂಧಿ ಕಾಯಿಲೆಯ ಕುಟುಂಬದ ಹಿನ್ನೆಲೆ ಇದ್ದರೆ ಹೆಚ್ಚಾಗಿ ತಪಾಸಣೆ ಮಾಡಿಸಬೇಕು.
ಥೈರಾಯ್ಡ್ ಕಾರ್ಯನಿರ್ವಹಣೆ ಪರೀಕ್ಷೆ (Thyroid Function Test):
ಥೈರಾಯ್ಡ್ ಸಮಸ್ಯೆಗಳು ತೂಕದ ವೈಪರೀತ್ಯ, ಆಯಾಸ ಮತ್ತು ಮುಟ್ಟಿನ ಸಮಸ್ಯೆಗಳಿಗೆ ಕಾರಣವಾಗಬಹುದು. 30ರ ಹರೆಯದಲ್ಲಿ ಕನಿಷ್ಠ ಒಮ್ಮೆಯಾದರೂ ಥೈರಾಯ್ಡ್ ಪರೀಕ್ಷೆ ಮಾಡಿಸಿಕೊಳ್ಳಬೇಕು. ತೀವ್ರ ಆಯಾಸ, ಕೂದಲು ಉದುರುವುದು ಅಥವಾ ಅಕ್ರಮ ಮುಟ್ಟಿನ ಸಮಸ್ಯೆಗಳಿದ್ದರೆ ತಕ್ಷಣವೇ ತಪಾಸಣೆ ಮಾಡಿಸುವುದು ಸೂಕ್ತ.
ಪ್ಯಾಪ್ ಸ್ಮಿಯರ್ ಮತ್ತು ಎಚ್ಪಿವಿ ಪರೀಕ್ಷೆ (Pap Smear and HPV Test):
ಈ ಪರೀಕ್ಷೆಗಳು ಗರ್ಭಕಂಠದ ಕ್ಯಾನ್ಸರ್ (Cervical Cancer) ನ ಆರಂಭಿಕ ಲಕ್ಷಣಗಳನ್ನು ಪತ್ತೆಹಚ್ಚಲು ಸಹಾಯ ಮಾಡುತ್ತವೆ. 30 ವರ್ಷ ದಾಟಿದ ನಂತರ ಪ್ರತಿ ಎರಡು ವರ್ಷಗಳಿಗೊಮ್ಮೆ ಈ ಪರೀಕ್ಷೆ ಮಾಡಿಸಿಕೊಳ್ಳುವುದು ಉತ್ತಮ. ಗರ್ಭಕಂಠದ ಕ್ಯಾನ್ಸರ್ ತಡೆಗಟ್ಟಲು ಲಸಿಕೆ ಪಡೆಯುವುದೂ ಸಹ ಉಪಯುಕ್ತ.
ವಿಟಮಿನ್ ಡಿ ಮತ್ತು ಮೂಳೆ ಆರೋಗ್ಯ ತಪಾಸಣೆ (Vitamin D Check):
ದೇಹದಲ್ಲಿ ವಿಟಮಿನ್ ಡಿ ಕೊರತೆಯು ಮೂಳೆಗಳನ್ನು ದುರ್ಬಲಗೊಳಿಸುತ್ತದೆ. ಬಿಸಿಲಿಗೆ ಹೆಚ್ಚು ಹೋಗದಿದ್ದರೆ ಅಥವಾ ನಿರಂತರ ಆಯಾಸ ಅನುಭವಿಸುತ್ತಿದ್ದರೆ ರಕ್ತ ಪರೀಕ್ಷೆಯ ಮೂಲಕ ವಿಟಮಿನ್ ಡಿ ಮಟ್ಟವನ್ನು ತಿಳಿದುಕೊಂಡು ಸೂಕ್ತ ಚಿಕಿತ್ಸೆ ಪಡೆಯಬೇಕು.
ಇತರ ಹೆಚ್ಚುವರಿ ಪರೀಕ್ಷೆಗಳು:
ಸಕ್ತಹೀನತೆ (ಅನಿಮಿಯಾ) ತಡೆಗಟ್ಟಲು ‘ಸಿಬಿಸಿ’ (Complete Blood Count) ಪರೀಕ್ಷೆ, ಮುಟ್ಟಿನ ನೋವು ಅಥವಾ ಅಕ್ರಮ ಮುಟ್ಟಿನ ಸಮಸ್ಯೆ ಇದ್ದರೆ ‘ಪೆಲ್ವಿಕ್ ಅಲ್ಟ್ರಾಸೌಂಡ್’ ಪರೀಕ್ಷೆಗಳನ್ನು ಮಾಡಿಸಿಕೊಳ್ಳಬಹುದು. ಇದರೊಂದಿಗೆ ನಿಯಮಿತವಾಗಿ ಕಣ್ಣು ಮತ್ತು ಹಲ್ಲುಗಳ ತಪಾಸಣೆಯನ್ನೂ ಮರೆಯದೇ ಮಾಡಿಸುವುದು ಆರೋಗ್ಯಕ್ಕೆ ಒಳಿತು.
