ಇಂದಿನ ದಿನಗಳಲ್ಲಿ ವ್ಯವಸಾಯ ಎಂದರೆ ಅಧಿಕ ಸಾಕು ವೆಚ್ಚ ಹಾಗೂ ಹವಾಮಾನದ ಏರಿಳಿತಗಳೇ ನೆನಪಿಗೆ ಬರುತ್ತವೆ. ಇಂತಹ ಸಂದರ್ಭದಲ್ಲಿ ಸಣ್ಣ ಮತ್ತು ಮಧ್ಯಮ ವರ್ಗದ ರೈತರು ನಷ್ಟದಿಂದ ತಪ್ಪಿಸಿಕೊಳ್ಳಲು ‘ಕಡಿಮೆ ಹೂಡಿಕೆ – ಹೆಚ್ಚು ಆದಾಯ’ ನೀಡುವ ಬೆಳೆಗಳತ್ತ ಮುಖ ಮಾಡುತ್ತಿದ್ದಾರೆ. ಕಡಿಮೆ ಅವಧಿಯಲ್ಲಿ ಫಸಲು ನೀಡುವುದು, ಮಾರುಕಟ್ಟೆಯಲ್ಲಿ ನಿರಂತರ ಬೇಡಿಕೆ ಇರುವುದು ಮತ್ತು ಸುಲಭವಾಗಿ ಮಾರಾಟ ಮಾಡಬಹುದಾದ 5 ಪ್ರಮುಖ ಬೆಳೆಗಳ ವಿವರ ಇಲ್ಲಿದೆ.
ಕೊತ್ತಂಬರಿ ಬೆಳೆ
ಸೊಪ್ಪುಗಳ ಪೈಕಿ ಕೊತ್ತಂಬರಿಗೆ ಮಾರುಕಟ್ಟೆಯಲ್ಲಿ ಸದಾ ಹೆಚ್ಚಿನ ಬೇಡಿಕೆ ಇರುತ್ತದೆ. ಮನೆ, ಹೋಟೆಲ್ ಹಾಗೂ ರೆಸ್ಟೋರೆಂಟ್ಗಳಲ್ಲಿ ನಿತ್ಯ ಬಳಕೆಯಾಗುವ ಇದನ್ನು ಕೇವಲ 30 ರಿಂದ 45 ದಿನಗಳಲ್ಲಿ ಕಟಾವು ಮಾಡಬಹುದು. ಸಣ್ಣ ಜಮೀನಿನಲ್ಲಿ ಅಥವಾ ಉಪಬೆಳೆಯಾಗಿಯೂ ಇದನ್ನು ಬೆಳೆಯಬಹುದು. ಸ್ಥಳೀಯ ಮಾರುಕಟ್ಟೆ, ಸೂಪರ್ ಮಾರ್ಕೆಟ್ ಮತ್ತು ಹೋಟೆಲ್ಗಳಿಗೆ ನೇರವಾಗಿ ಮಾರಾಟ ಮಾಡಿ ತಕ್ಷಣದ ನಗದು ಆದಾಯ ಪಡೆಯಬಹುದು.
ಮೆಂತ್ಯ ಬೆಳೆ
ಆರೋಗ್ಯ ಜಾಗೃತಿ ಹೆಚ್ಚುತ್ತಿರುವುದರಿಂದ ಮೆಂತ್ಯ ಸೊಪ್ಪು ಮತ್ತು ಬೀಜಗಳಿಗೆ ಬೇಡಿಕೆ ಹೆಚ್ಚಿದೆ. ಅತ್ಯಲ್ಪ ನೀರಿನಲ್ಲಿ ಹಾಗೂ ಕ್ರಿಮಿಕೀಟಗಳ ಕಾಟವಿಲ್ಲದೆ ಇದನ್ನು ಸುಲಭವಾಗಿ ಬೆಳೆಯಬಹುದು. ಸಾವಯವ ಕೃಷಿ ಮಾಡಲು ಬಯಸುವ ರೈತರಿಗೆ ಇದು ಸೂಕ್ತ ಆಯ್ಕೆ. ಸ್ಥಳೀಯ ಮಾರುಕಟ್ಟೆಗಳು ಹಾಗೂ ಆರ್ಗಾನಿಕ್ ಸ್ಟೋರ್ಗಳಲ್ಲಿ ಇದಕ್ಕೆ ಉತ್ತಮ ಬೆಲೆ ಸಿಗುತ್ತದೆ.
ತುಳಸಿ ಕೃಷಿ
ಔಷಧೀಯ ಗುಣಗಳುಳ್ಳ ತುಳಸಿಗೆ ಆಯುರ್ವೇದ ಮತ್ತು ಗಿಡಮೂಲಿಕೆ ಉತ್ಪನ್ನ ವಲಯದಲ್ಲಿ ನಿರಂತರ ಬೇಡಿಕೆಯಿದೆ. ಇದರ ನಿರ್ವಹಣೆ ಮತ್ತು ನೀರಿನ ಅಗತ್ಯತೆ ತುಂಬಾ ಕಡಿಮೆ. ಒಮ್ಮೆ ನೆಟ್ಟರೆ 3-4 ತಿಂಗಳಲ್ಲಿ ಇಳುವರಿ ಪ್ರಾರಂಭವಾಗಿ ನಿರಂತರ ಆದಾಯ ನೀಡುತ್ತದೆ. ಆಯುರ್ವೇದ ಮತ್ತು ಫಾರ್ಮಾ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಂಡು ಇದನ್ನು ನೇರವಾಗಿ ಮಾರಾಟ ಮಾಡಬಹುದು.
ಚೆಂಡು ಹೂವು ಕೃಷಿ
ದೇವಾಲಯಗಳು, ಮದುವೆ ಹಾಗೂ ಹಬ್ಬ-ಹರಿದಿನಗಳಲ್ಲಿ ಚೆಂಡು ಹೂವಿಗೆ ಭಾರಿ ಬೇಡಿಕೆ ಇರುತ್ತದೆ. ಕಡಿಮೆ ಅವಧಿಯಲ್ಲಿ ಫಸಲಿಗೆ ಬರುವ ಈ ಬೆಳೆಯಿಂದ ವಾರಕ್ಕೊಮ್ಮೆ ಕಟಾವು ಮಾಡಿ ನಿರಂತರ ಹಣ ಗಳಿಸಬಹುದು. ದಸರಾ, ದೀಪಾವಳಿ ಮತ್ತು ಸಂಕ್ರಾಂತಿ ಸಮಯದಲ್ಲಿ ಇದರ ಬೆಲೆ ದುಪ್ಪಟ್ಟಾಗುತ್ತದೆ. ಹೂವಿನ ಮಾರುಕಟ್ಟೆ ಮತ್ತು ಈವೆಂಟ್ ಮ್ಯಾನೇಜರ್ಗಳಿಗೆ ಇದನ್ನು ನೇರವಾಗಿ ಪೂರೈಸಬಹುದು.
ಮೆಣಸಿನಕಾಯಿ ಕೃಷಿ
ದೀರ್ಘಾವಧಿಯಲ್ಲಿ ಹೆಚ್ಚಿನ ಲಾಭ ನೀಡುವ ವಾಣಿಜ್ಯ ಬೆಳೆಗಳಲ್ಲಿ ಮೆಣಸಿನಕಾಯಿ ಪ್ರಮುಖವಾದುದು. ಇದಕ್ಕೆ ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಉತ್ತಮ ರಫ್ತು ಅವಕಾಶಗಳಿವೆ. ಹಸಿರು ಮೆಣಸಿನಕಾಯಿಯಾಗಿ ಅಥವಾ ಒಣಮೆಣಸಿನಕಾಯಿಯಾಗಿ ಮಾರಾಟ ಮಾಡುವ ಅವಕಾಶವಿದೆ. ಮಸಾಲೆ ಸಂಸ್ಕರಣಾ ಕಂಪನಿಗಳು ಮತ್ತು ರಫ್ತುದಾರರಿಗೆ ಇದನ್ನು ಮಾರಾಟ ಮಾಡಬಹುದು.
ಹೆಚ್ಚಿನ ಲಾಭಕ್ಕಾಗಿ ಪ್ರಮುಖ ಸಲಹೆಗಳು:
ಸಮಗ್ರ ನಿರ್ವಹಣೆ: ರೋಗಗಳು ಬರುವ ಮುನ್ನವೇ ಸೂಕ್ತ ರಕ್ಷಣಾ ಕ್ರಮಗಳನ್ನು ಕೈಗೊಳ್ಳುವುದರಿಂದ ಹೂಡಿಕೆ ವೆಚ್ಚವನ್ನು ಕಡಿಮೆ ಮಾಡಬಹುದು.
ಮಾರುಕಟ್ಟೆ ಯೋಜನೆ: ಬೆಳೆ ಬೆಳೆಯುವ ಮುನ್ನವೇ ಮಾರುಕಟ್ಟೆ ಬೇಡಿಕೆಯನ್ನು ಅಂದಾಜಿಸಿ, ಮಧ್ಯವರ್ತಿಗಳ ಹಸ್ತಕ್ಷೇಪವಿಲ್ಲದೆ ನೇರವಾಗಿ ವ್ಯಾಪಾರಿಗಳು ಅಥವಾ ಗ್ರಾಹಕರಿಗೆ ಮಾರಾಟ ಮಾಡುವುದರಿಂದ ಪೂರ್ಣ ಲಾಭ ಪಡೆಯಬಹುದು.
