“ಹೆಚ್ಚು ಟಿವಿ ನೋಡಬೇಡ, ಮೆದುಳು ಹಾಳಾಗುತ್ತದೆ” ಎಂದು ಹಿರಿಯರು ಹೇಳುತ್ತಿದ್ದ ಮಾತನ್ನು ಹಲವರು ಕೇವಲ ಎಚ್ಚರಿಕೆ ಎಂದುಕೊಂಡಿದ್ದರು. ಆದರೆ ಆ ಮಾತಿನ ಹಿಂದೆ ವೈಜ್ಞಾನಿಕ ಸತ್ಯವಿದೆ ಎಂಬುದನ್ನು ಹೊಸ ಅಧ್ಯಯನವೊಂದು ಬಹಿರಂಗಪಡಿಸಿದೆ.
ಮಧ್ಯವಯಸ್ಸಿನಲ್ಲಿ ಅತಿಯಾಗಿ ಟಿವಿ ನೋಡುವ ಅಭ್ಯಾಸವು ವಯಸ್ಸಾದಂತೆ ಮೆದುಳಿನ ನೆನಪಿನ ಶಕ್ತಿ, ಕಲಿಕೆಯ ಸಾಮರ್ಥ್ಯ ಮತ್ತು ನಿರ್ಧಾರ ಕೈಗೊಳ್ಳುವ ಸಾಮರ್ಥ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ ಎಂದು ಸಂಶೋಧಕರು ಎಚ್ಚರಿಸಿದ್ದಾರೆ.
ಅಧ್ಯಯನ ಏನು ಹೇಳುತ್ತದೆ?
ಈ ಅಧ್ಯಯನವು ಜಾಗತಿಕ ವೈದ್ಯಕೀಯ ನಿಯತಕಾಲಿಕೆ Alzheimer’s & Dementiaನಲ್ಲಿ ಪ್ರಕಟವಾಗಿದೆ. ಸುಮಾರು 1,700 ಮಧ್ಯವಯಸ್ಕರ ಟಿವಿ ವೀಕ್ಷಣೆಯ ಅಭ್ಯಾಸವನ್ನು ವಿಶ್ಲೇಷಿಸಿದ ಸಂಶೋಧಕರು, 20 ವರ್ಷಗಳ ಬಳಿಕ ಅವರ ಮೆದುಳಿನ MRI ಸ್ಕ್ಯಾನ್ಗಳನ್ನು ಪರಿಶೀಲಿಸಿ ಮಹತ್ವದ ಮಾಹಿತಿ ಕಂಡುಹಿಡಿದಿದ್ದಾರೆ.
ಅತಿಯಾಗಿ ಟಿವಿ ನೋಡುವವರಲ್ಲಿ ಕಂಡುಬಂದ ಬದಲಾವಣೆಗಳು
ನೆನಪಿನ ಶಕ್ತಿ ಕುಸಿತ: ನೆನಪುಗಳನ್ನು ರೂಪಿಸುವ ಮೆದುಳಿನ ಭಾಗದ ಗಾತ್ರ ಕಡಿಮೆಯಾಗಿದೆ.
ಫ್ರಂಟಲ್ ಲೋಬ್ ಕುಗ್ಗುವಿಕೆ: ಯೋಜನೆ ರೂಪಿಸುವುದು, ನಿರ್ಧಾರ ತೆಗೆದುಕೊಳ್ಳುವುದು ಮತ್ತು ಸಮಸ್ಯೆ ಪರಿಹರಿಸುವ ಸಾಮರ್ಥ್ಯಕ್ಕೆ ನೆರವಾಗುವ ಭಾಗ ಸಣ್ಣದಾಗಿದೆ.
ಆಕ್ಸಿಪಿಟಲ್ ಲೋಬ್ ಮೇಲೆ ಪರಿಣಾಮ: ದೃಶ್ಯ ಮಾಹಿತಿಯನ್ನು ವಿಶ್ಲೇಷಿಸುವ ಭಾಗವೂ ಕುಗ್ಗಿರುವುದು ಕಂಡುಬಂದಿದೆ.
ವೈಟ್ ಮ್ಯಾಟರ್ ಹಾನಿ: ವಯೋಸಹಜ ಜ್ಞಾಪಕಶಕ್ತಿ ಸಮಸ್ಯೆ, ಪಾರ್ಶ್ವವಾಯು ಹಾಗೂ ಡಿಮೆನ್ಷಿಯಾ ಅಪಾಯಕ್ಕೆ ಸಂಬಂಧಿಸಿದ ಬದಲಾವಣೆಗಳು ಹೆಚ್ಚಾಗಿವೆ.
ಸಂಶೋಧನೆಯ ಪ್ರಮುಖ ಅಂಶವೆಂದರೆ, ದಿನವಿಡೀ ಕುಳಿತು ಕೆಲಸ ಮಾಡುವವರಿಗಿಂತ ಯಾವುದೇ ಮಾನಸಿಕ ಚಟುವಟಿಕೆ ಇಲ್ಲದೆ ದೀರ್ಘ ಸಮಯ ಟಿವಿ ನೋಡುವವರಲ್ಲಿ ಹೆಚ್ಚು ಹಾನಿಕರ ಪರಿಣಾಮಗಳು ಕಂಡುಬಂದಿವೆ. ಓದುವುದು, ಹೊಸ ವಿಷಯಗಳನ್ನು ಕಲಿಯುವುದು, ಸಂಭಾಷಣೆ ನಡೆಸುವುದು ಅಥವಾ ಒಗಟು ಬಿಡಿಸುವುದು ಮೆದುಳನ್ನು ಸಕ್ರಿಯವಾಗಿರಿಸುತ್ತದೆ. ಆದರೆ ಟಿವಿ ವೀಕ್ಷಣೆ ಹೆಚ್ಚಿನ ಮಾನಸಿಕ ಶ್ರಮವನ್ನು ಬೇಡದ ಕಾರಣ ಮೆದುಳಿನ ಚಟುವಟಿಕೆ ಕಡಿಮೆಯಾಗುತ್ತದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಟಿವಿ ನೋಡುವುದೇ ನೇರವಾಗಿ ಡಿಮೆನ್ಷಿಯಾಗೆ ಕಾರಣ ಎಂದು ಈ ಅಧ್ಯಯನ ಹೇಳಿಲ್ಲ. ಆದರೆ ಅತಿಯಾದ ಟಿವಿ ವೀಕ್ಷಣೆ ಮತ್ತು ಮೆದುಳಿನ ಗಾತ್ರ ಕುಗ್ಗುವಿಕೆಯ ನಡುವೆ ಸಂಬಂಧವಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಮೆದುಳಿನ ಆರೋಗ್ಯದ ಮೇಲೆ ವ್ಯಾಯಾಮ, ಸಮತೋಲನ ಆಹಾರ, ಉತ್ತಮ ನಿದ್ರೆ, ರಕ್ತದೊತ್ತಡ ನಿಯಂತ್ರಣ ಹಾಗೂ ಸಾಮಾಜಿಕ ಒಡನಾಟವೂ ಮಹತ್ವದ ಪಾತ್ರ ವಹಿಸುತ್ತವೆ.
ಮೆದುಳಿನ ಆರೋಗ್ಯ ಕಾಪಾಡಿಕೊಳ್ಳಲು ಏನು ಮಾಡಬೇಕು?
ಪ್ರತಿದಿನ ಪುಸ್ತಕ ಓದುವ ಅಭ್ಯಾಸ ಬೆಳೆಸಿಕೊಳ್ಳಿ.
ಸುಡೋಕು, ಒಗಟುಗಳಂತಹ ಮೆದುಳಿಗೆ ಕೆಲಸ ಕೊಡುವ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳಿ.
ಹೊಸ ಭಾಷೆ ಅಥವಾ ಸಂಗೀತ ವಾದ್ಯ ಕಲಿಯಿರಿ.
ಪ್ರತಿದಿನ ವ್ಯಾಯಾಮ ಅಥವಾ ವಾಕಿಂಗ್ ಮಾಡಿ.
ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಅರ್ಥಪೂರ್ಣ ಸಂಭಾಷಣೆ ನಡೆಸಿ.
ಅಗತ್ಯವಿಲ್ಲದಷ್ಟು ದೀರ್ಘ ಸಮಯ ಟಿವಿ ವೀಕ್ಷಿಸುವುದನ್ನು ಕಡಿಮೆ ಮಾಡಿ.
ಈ ಅಧ್ಯಯನವು ಮಧ್ಯವಯಸ್ಸಿನಲ್ಲಿಯೇ ಆರೋಗ್ಯಕರ ಜೀವನಶೈಲಿ ಅಳವಡಿಸಿಕೊಂಡರೆ ವೃದ್ಧಾಪ್ಯದಲ್ಲೂ ಮೆದುಳಿನ ಕಾರ್ಯಕ್ಷಮತೆಯನ್ನು ಉತ್ತಮವಾಗಿ ಕಾಪಾಡಿಕೊಳ್ಳಬಹುದು ಎಂಬುದನ್ನು ಮತ್ತೊಮ್ಮೆ ಒತ್ತಿ ಹೇಳಿದೆ.
