ಜೀವನದಲ್ಲಿ ಎಷ್ಟೇ ದೊಡ್ಡ ಸವಾಲುಗಳು ಎದುರಾದರೂ ಸರಿಯಾದ ಯೋಜನೆ ಇದ್ದರೆ ಅವುಗಳನ್ನು ಎದುರಿಸುವುದು ಸುಲಭವಾಗುತ್ತದೆ. ಹಣಕಾಸಿನ ವಿಚಾರದಲ್ಲೂ ಇದೇ ಸೂತ್ರ ಅನ್ವಯಿಸುತ್ತದೆ. ಯಾವ ವಯಸ್ಸಿನಲ್ಲಿ ಎಷ್ಟು ಉಳಿತಾಯ ಮಾಡಬೇಕು, ಎಷ್ಟು ಹೂಡಿಕೆ ಮಾಡಬೇಕು ಎಂಬುದನ್ನು ಮೊದಲೇ ಯೋಜಿಸಿಕೊಂಡರೆ ಭವಿಷ್ಯದ ಆರ್ಥಿಕ ಒತ್ತಡವನ್ನು ಸಾಕಷ್ಟು ಕಡಿಮೆ ಮಾಡಬಹುದು.
20ನೇ ವಯಸ್ಸಿನಲ್ಲಿ ಮಾಡಬೇಕಾದ ಹೂಡಿಕೆಯನ್ನು 40ನೇ ವಯಸ್ಸಿನಲ್ಲಿ ಆರಂಭಿಸಿದರೆ ಅದೇ ರೀತಿಯ ಲಾಭ ಸಿಗುತ್ತದೆ ಎನ್ನಲು ಸಾಧ್ಯವಿಲ್ಲ. ಹೀಗಾಗಿ ವಯಸ್ಸು, ಆದಾಯ, ಕುಟುಂಬದ ಜವಾಬ್ದಾರಿ ಮತ್ತು ಗುರಿಗಳಿಗೆ ಅನುಗುಣವಾಗಿ ಹಣಕಾಸಿನ ಯೋಜನೆಯನ್ನೂ ಬದಲಾಯಿಸುತ್ತಾ ಹೋಗಬೇಕು.
ಫೈನಾನ್ಷಿಯಲ್ ಪ್ಲಾನಿಂಗ್ ಆರಂಭಿಸುವ ಮೊದಲು ನಿಮ್ಮ ನೈಜ ಆರ್ಥಿಕ ಸ್ಥಿತಿಯನ್ನು ತಿಳಿದುಕೊಳ್ಳುವುದು ಮುಖ್ಯ. ಇದಕ್ಕಾಗಿ ಒಂದು ಕಡೆ ನಿಮ್ಮ ಎಲ್ಲಾ ಆಸ್ತಿಗಳಾದ ಮ್ಯೂಚುವಲ್ ಫಂಡ್, ಷೇರುಗಳು, ಮನೆ, ನಿವೇಶನ ಮತ್ತಿತರ ಹೂಡಿಕೆಗಳ ಮೌಲ್ಯವನ್ನು ಲೆಕ್ಕ ಹಾಕಿ.
ಮತ್ತೊಂದು ಕಡೆ ಕ್ರೆಡಿಟ್ ಕಾರ್ಡ್ ಬಾಕಿ, ವೈಯಕ್ತಿಕ ಸಾಲ, ವಾಹನ ಸಾಲ, ಗೃಹ ಸಾಲ ಸೇರಿದಂತೆ ನಿಮ್ಮ ಎಲ್ಲಾ ಸಾಲಗಳನ್ನು ಪಟ್ಟಿ ಮಾಡಿ.
ಒಟ್ಟು ಆಸ್ತಿಯ ಮೌಲ್ಯದಿಂದ ಒಟ್ಟು ಸಾಲವನ್ನು ಕಳೆದಾಗ ಸಿಗುವ ಮೊತ್ತವೇ ನಿಮ್ಮ ‘ನೆಟ್ ವರ್ತ್’.25ನೇ ವಯಸ್ಸಿನಲ್ಲಿ ಉದ್ಯೋಗಕ್ಕೆ ಸೇರಿದ ತಕ್ಷಣ ದೊಡ್ಡ ಮೊತ್ತದ ಹೂಡಿಕೆ ಮಾಡುವುದಕ್ಕಿಂತ ನಿಮ್ಮ ಕೌಶಲ್ಯವನ್ನು ಹೆಚ್ಚಿಸಿಕೊಳ್ಳುವುದಕ್ಕೆ ಹೆಚ್ಚಿನ ಆದ್ಯತೆ ನೀಡಿ. ನಿಮ್ಮ ಆದಾಯವನ್ನು ಭವಿಷ್ಯದಲ್ಲಿ ಹೆಚ್ಚಿಸುವ ಪ್ರಮುಖ ಹೂಡಿಕೆ ನಿಮ್ಮ ಕೌಶಲ್ಯವೇ ಆಗಿರುತ್ತದೆ.
ತುರ್ತು ಸಂದರ್ಭಗಳಿಗಾಗಿ ಕನಿಷ್ಠ ಮೊತ್ತದ ಲಿಕ್ವಿಡ್ ಕ್ಯಾಶ್ ಅಥವಾ ತುರ್ತು ನಿಧಿಯನ್ನು ಹೊಂದಿರುವುದು ಉತ್ತಮ. ಹೂಡಿಕೆಯ ಅಭ್ಯಾಸ ಬೆಳೆಸಲು ₹500 ಅಥವಾ ₹1,000ರಂತಹ ಸಣ್ಣ ಮೊತ್ತದಿಂದ SIP ಆರಂಭಿಸಬಹುದು.ಈ ಹಂತದಲ್ಲಿ ಅನಗತ್ಯ ಸಾಲಗಳಿಂದ ದೂರವಿರುವುದು ಬಹಳ ಮುಖ್ಯ. ವಿಶೇಷವಾಗಿ ಹೆಚ್ಚಿನ ಅಪಾಯದ ಟ್ರೇಡಿಂಗ್ ಮತ್ತು ಅತಿಯಾದ ಸಾಲದ ಮೂಲಕ ಜೀವನಶೈಲಿಯನ್ನು ಹೆಚ್ಚಿಸಿಕೊಳ್ಳುವ ಪ್ರವೃತ್ತಿಯನ್ನು ತಪ್ಪಿಸುವುದು ಉತ್ತಮ.
30ನೇ ವಯಸ್ಸು ವೃತ್ತಿ ಮತ್ತು ವೈಯಕ್ತಿಕ ಜೀವನದಲ್ಲಿ ಪ್ರಮುಖ ಘಟ್ಟ. ಮದುವೆ, ಮನೆ ಖರೀದಿ, ಮಕ್ಕಳ ಶಿಕ್ಷಣ ಸೇರಿದಂತೆ ಹಲವು ದೊಡ್ಡ ಆರ್ಥಿಕ ಗುರಿಗಳು ಈ ಹಂತದಲ್ಲಿ ಎದುರಾಗುತ್ತವೆ.
ಈ ವೇಳೆಗೆ ನಿಮ್ಮ ಆದಾಯಕ್ಕೆ ಅನುಗುಣವಾಗಿ ಹೂಡಿಕೆಯ ಪ್ರಮಾಣವನ್ನು ಹೆಚ್ಚಿಸುತ್ತಾ ಹೋಗಬೇಕು. ಕನಿಷ್ಠ 3ರಿಂದ 6 ತಿಂಗಳ ಜೀವನ ವೆಚ್ಚವನ್ನು ಒಳಗೊಂಡ ತುರ್ತು ನಿಧಿಯನ್ನು ಹೊಂದಿರುವುದು ಸೂಕ್ತ.ಕುಟುಂಬದ ಆರ್ಥಿಕ ಭದ್ರತೆಗಾಗಿ ಅಗತ್ಯವಿದ್ದರೆ ಟರ್ಮ್ ಇನ್ಶೂರೆನ್ಸ್ ಹಾಗೂ ಕುಟುಂಬದ ಆರೋಗ್ಯ ವೆಚ್ಚಗಳನ್ನು ನಿರ್ವಹಿಸಲು ಸೂಕ್ತ ಹೆಲ್ತ್ ಇನ್ಶೂರೆನ್ಸ್ ಹೊಂದಿರುವುದು ಮುಖ್ಯ.
ಮನೆ ಅಥವಾ ಶಿಕ್ಷಣದಂತಹ ದೀರ್ಘಾವಧಿಯ ಗುರಿಗಳಿಗೆ ಸಾಲ ಪಡೆಯುವುದಾದರೆ, EMI ನಿಮ್ಮ ಮಾಸಿಕ ಆದಾಯದ ಮೇಲೆ ಹೆಚ್ಚಿನ ಒತ್ತಡ ಉಂಟುಮಾಡದಂತೆ ನೋಡಿಕೊಳ್ಳಬೇಕು.
35ನೇ ವಯಸ್ಸಿನಲ್ಲಿ ಕುಟುಂಬದ ಜವಾಬ್ದಾರಿಗಳು ಹೆಚ್ಚಾಗುತ್ತವೆ. ಮಕ್ಕಳ ಶಿಕ್ಷಣ, ಮನೆ ಸಾಲ, ಪೋಷಕರ ಆರೈಕೆ ಸೇರಿದಂತೆ ಹಲವು ಖರ್ಚುಗಳು ಎದುರಾಗಬಹುದು.ಈ ಹಂತದಲ್ಲಿ ಆದಾಯ ಹೆಚ್ಚಾದಂತೆ ಜೀವನಶೈಲಿಯ ಖರ್ಚನ್ನು ಮಾತ್ರ ಹೆಚ್ಚಿಸುವ ಬದಲು ಹೂಡಿಕೆಯ ಮೊತ್ತವನ್ನೂ ಹೆಚ್ಚಿಸುವುದು ಉತ್ತಮ. ಇದಕ್ಕಾಗಿ ಪ್ರತಿವರ್ಷ SIP ಮೊತ್ತವನ್ನು ಹಂತಹಂತವಾಗಿ ಹೆಚ್ಚಿಸುವ ‘Step-up SIP’ ವಿಧಾನವನ್ನು ಪರಿಗಣಿಸಬಹುದು.ಹೊಸ ಸಾಲಗಳನ್ನು ಮಾಡುವುದಕ್ಕಿಂತ ಈಗಾಗಲೇ ಇರುವ ಸಾಲಗಳನ್ನು ಕಡಿಮೆ ಮಾಡುವತ್ತ ಗಮನ ಹರಿಸುವುದು ನಿವೃತ್ತಿ ಜೀವನದ ಆರ್ಥಿಕ ಭದ್ರತೆಗೆ ಸಹಾಯ ಮಾಡುತ್ತದೆ.
40ನೇ ವಯಸ್ಸಿನ ನಂತರ ಉದ್ಯೋಗ ಮತ್ತು ಆದಾಯದಲ್ಲಿ ಅನಿಶ್ಚಿತತೆ ಎದುರಾಗುವ ಸಾಧ್ಯತೆ ಇರುವುದರಿಂದ ತುರ್ತು ನಿಧಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಬೇಕು. ಸಾಧ್ಯವಾದರೆ 6ರಿಂದ 12 ತಿಂಗಳ ಅಗತ್ಯ ವೆಚ್ಚಗಳನ್ನು ನಿಭಾಯಿಸುವಷ್ಟು ತುರ್ತು ನಿಧಿಯನ್ನು ಹೊಂದಿರುವುದು ಉತ್ತಮ.ಈ ಹಂತದಲ್ಲಿ ನಿವೃತ್ತಿ ನಿಧಿ, ಮಕ್ಕಳ ಶಿಕ್ಷಣ, ಆರೋಗ್ಯ ವೆಚ್ಚ ಮತ್ತು ಇತರ ದೀರ್ಘಾವಧಿಯ ಗುರಿಗಳಿಗೆ ಪ್ರತ್ಯೇಕವಾಗಿ ಯೋಜನೆ ರೂಪಿಸಬೇಕು.ಹೊಸ ಅನಗತ್ಯ ಸಾಲಗಳನ್ನು ತಪ್ಪಿಸಿ, ಇರುವ ಸಾಲದ ಹೊರೆಯನ್ನು ಹಂತಹಂತವಾಗಿ ಕಡಿಮೆ ಮಾಡಿಕೊಳ್ಳುವುದರಿಂದ ಹೆಚ್ಚಿನ ಹಣವನ್ನು ನಿವೃತ್ತಿ ಮತ್ತು ಭವಿಷ್ಯದ ಗುರಿಗಳಿಗಾಗಿ ಹೂಡಿಕೆ ಮಾಡಲು ಸಾಧ್ಯವಾಗುತ್ತದೆ.
25ನೇ ವಯಸ್ಸಿನಲ್ಲಿ ಕೌಶಲ್ಯ ಮತ್ತು ಹೂಡಿಕೆಯ ಅಭ್ಯಾಸಕ್ಕೆ ಆದ್ಯತೆ ನೀಡಬೇಕು. 30ನೇ ವಯಸ್ಸಿನಲ್ಲಿ ಕುಟುಂಬದ ಗುರಿಗಳು ಮತ್ತು ತುರ್ತು ನಿಧಿಯತ್ತ ಗಮನ ಹರಿಸಬೇಕು. 35ನೇ ವಯಸ್ಸಿನಲ್ಲಿ ಹೂಡಿಕೆಯ ಪ್ರಮಾಣವನ್ನು ಹೆಚ್ಚಿಸಿ ಸಾಲದ ಹೊರೆಯನ್ನು ನಿಯಂತ್ರಿಸಬೇಕು. 40ನೇ ವಯಸ್ಸಿನ ನಂತರ ನಿವೃತ್ತಿ ಮತ್ತು ಕುಟುಂಬದ ದೀರ್ಘಾವಧಿಯ ಆರ್ಥಿಕ ಭದ್ರತೆಗೆ ಹೆಚ್ಚಿನ ಒತ್ತು ನೀಡಬೇಕು.ಹಣ ಗಳಿಸುವುದು ಎಷ್ಟು ಮುಖ್ಯವೋ, ಅದನ್ನು ಸರಿಯಾಗಿ ಉಳಿಸಿ, ಹೂಡಿಕೆ ಮಾಡಿ ಮತ್ತು ಭವಿಷ್ಯಕ್ಕಾಗಿ ಬಳಸುವುದೂ ಅಷ್ಟೇ ಮುಖ್ಯ. ವಯಸ್ಸು, ಆದಾಯ, ಸಾಲ, ಕುಟುಂಬದ ಜವಾಬ್ದಾರಿ ಮತ್ತು ಗುರಿಗಳಿಗೆ ಅನುಗುಣವಾಗಿ ರೂಪಿಸಿದ ಹಣಕಾಸಿನ ಯೋಜನೆಯೇ ನಿಮ್ಮ ಭವಿಷ್ಯವನ್ನು ಹೆಚ್ಚು ಸುರಕ್ಷಿತವಾಗಿಸಬಹುದು.
