ಹೋಟೆಲ್‌, ಗೆಸ್ಟ್‌ಹೌಸ್‌, ಹೋಮ್‌ಸ್ಟೇ ಅಥವಾ ಬಾಡಿಗೆ ಅಪಾರ್ಟ್‌ಮೆಂಟ್‌ನಲ್ಲಿ ತಂಗುವಾಗ ಬಹುತೇಕರು ಮೊದಲು ಸ್ವಚ್ಛತೆ ಮತ್ತು ಸೌಕರ್ಯಗಳ ಬಗ್ಗೆ ಗಮನಹರಿಸುತ್ತಾರೆ. ಆದರೆ ಇವುಗಳ ಜೊತೆಗೆ ವೈಯಕ್ತಿಕ ಹಾಗೂ ಡಿಜಿಟಲ್ ಸುರಕ್ಷತೆಗೂ ಆದ್ಯತೆ ನೀಡುವುದು ಅಗತ್ಯ.ಕೇವಲ ಹಣ, ಮೊಬೈಲ್‌ ಅಥವಾ ಇತರ ವಸ್ತುಗಳು ಸುರಕ್ಷಿತವಾಗಿರುವುದು ಮಾತ್ರವಲ್ಲ, ನಿಮ್ಮ ವೈಯಕ್ತಿಕ ಮಾಹಿತಿ, ಆನ್‌ಲೈನ್‌ ಖಾತೆಗಳು ಮತ್ತು ಡಿಜಿಟಲ್ ಡೇಟಾವೂ ಸುರಕ್ಷಿತವಾಗಿರಬೇಕು. ಹೋಟೆಲ್‌ನ ವೈ-ಫೈ, ಸ್ಮಾರ್ಟ್‌ ಟಿವಿ ಸೇರಿದಂತೆ ಇಂಟರ್‌ನೆಟ್‌ಗೆ ಸಂಪರ್ಕ ಹೊಂದಿರುವ ಸಾಧನಗಳನ್ನು ಎಚ್ಚರಿಕೆಯಿಂದ ಬಳಸುವುದು ಉತ್ತಮ.
ಹೋಟೆಲ್‌ಗಳಲ್ಲಿ ಸಾಮಾನ್ಯವಾಗಿ ಉಚಿತ ವೈ-ಫೈ ಸೌಲಭ್ಯವಿರುತ್ತದೆ. ಆದರೆ ಸಾರ್ವಜನಿಕ ವೈ-ಫೈ ಸಂಪೂರ್ಣ ಸುರಕ್ಷಿತವಾಗಿರುತ್ತದೆ ಎಂದು ಭಾವಿಸಬಾರದು. ಇಂತಹ ನೆಟ್‌ವರ್ಕ್‌ ಬಳಸುವಾಗ ಆನ್‌ಲೈನ್‌ ಬ್ಯಾಂಕಿಂಗ್‌, ಹಣಕಾಸಿನ ವಹಿವಾಟು ಅಥವಾ ಸೂಕ್ಷ್ಮ ಮಾಹಿತಿಯಿರುವ ಖಾತೆಗಳಿಗೆ ಲಾಗಿನ್‌ ಮಾಡುವುದನ್ನು ಸಾಧ್ಯವಾದಷ್ಟು ತಪ್ಪಿಸುವುದು ಉತ್ತಮ.ಅಗತ್ಯವಿದ್ದರೆ ಮೊಬೈಲ್‌ ಡೇಟಾ ಅಥವಾ ವಿಶ್ವಾಸಾರ್ಹ VPN ಬಳಸಬಹುದು. ವೈ-ಫೈಗೆ ಸಂಪರ್ಕಿಸುವ ಮೊದಲು ಅದರ ಅಧಿಕೃತ ನೆಟ್‌ವರ್ಕ್‌ ಹೆಸರನ್ನು ಹೋಟೆಲ್‌ ರಿಸೆಪ್ಷನ್‌ನಲ್ಲಿ ಖಚಿತಪಡಿಸಿಕೊಳ್ಳುವುದು ಸುರಕ್ಷಿತ ಕ್ರಮವಾಗಿದೆ.
ಹೋಟೆಲ್‌ ಕೊಠಡಿಯಲ್ಲಿ ಅಪರಿಚಿತ ಅಥವಾ ಅನುಮಾನಾಸ್ಪದ ಎಲೆಕ್ಟ್ರಾನಿಕ್‌ ವಸ್ತುಗಳು ಕಂಡುಬಂದರೆ ಗಮನಹರಿಸಿ. ಸ್ಮೋಕ್‌ ಡಿಟೆಕ್ಟರ್‌, ಅಲಾರಂ ಕ್ಲಾಕ್‌, USB ಚಾರ್ಜರ್‌, ವಿದ್ಯುತ್‌ ಸಾಕೆಟ್‌, ಫೋಟೋ ಫ್ರೇಮ್‌, ಕನ್ನಡಿ ಅಥವಾ ಅಲಂಕಾರಿಕ ವಸ್ತುಗಳಲ್ಲಿ ಅಕ್ರಮವಾಗಿ ಕ್ಯಾಮೆರಾ ಅಳವಡಿಸಿರುವ ಸಾಧ್ಯತೆಯ ಬಗ್ಗೆ ಎಚ್ಚರಿಕೆ ವಹಿಸಬೇಕು.ಯಾವುದೇ ವಸ್ತುವಿನ ಬಗ್ಗೆ ಅನುಮಾನ ಬಂದರೆ ಅದನ್ನು ಅನಗತ್ಯವಾಗಿ ಮುಟ್ಟದೆ, ಹೋಟೆಲ್‌ ಮ್ಯಾನೇಜ್‌ಮೆಂಟ್‌ಗೆ ಮಾಹಿತಿ ನೀಡಿ. ಅಗತ್ಯವಿದ್ದರೆ ಸ್ಥಳೀಯ ಪೊಲೀಸರಿಗೂ ದೂರು ನೀಡಬಹುದು.
Smart TV ಬಳಕೆ ಬಳಿಕ Logout ಮರೆಯಬೇಡಿ
ಇಂದಿನ ಹೋಟೆಲ್‌ ಕೊಠಡಿಗಳಲ್ಲಿ ಸ್ಮಾರ್ಟ್‌ ಟಿವಿ, ಸ್ಮಾರ್ಟ್‌ ಸ್ಪೀಕರ್‌ ಸೇರಿದಂತೆ ಹಲವು ಇಂಟರ್‌ನೆಟ್‌ ಸಂಪರ್ಕಿತ ಸಾಧನಗಳಿರುತ್ತವೆ. OTT ಅಥವಾ ಇತರ ಸ್ಟ್ರೀಮಿಂಗ್‌ ಸೇವೆಗಳನ್ನು ಬಳಸುವಾಗ ವೈಯಕ್ತಿಕ ಖಾತೆಯ ವಿವರಗಳನ್ನು ನಮೂದಿಸಿದ್ದರೆ, ಕೊಠಡಿಯಿಂದ ಹೊರಡುವ ಮೊದಲು ಕಡ್ಡಾಯವಾಗಿ Logout ಮಾಡಿಕೊಳ್ಳಿ.ಹೋಟೆಲ್‌ನ ಸ್ಮಾರ್ಟ್‌ ಸಾಧನಗಳಲ್ಲಿ ಬ್ಯಾಂಕಿಂಗ್‌ ಅಥವಾ ಇತರ ಸೂಕ್ಷ್ಮ ಮಾಹಿತಿಯನ್ನು ನಮೂದಿಸುವುದನ್ನು ತಪ್ಪಿಸುವುದು ಉತ್ತಮ.
ಪ್ರಯಾಣದ ವೇಳೆ ಮೊಬೈಲ್‌ ಮತ್ತು ಲ್ಯಾಪ್‌ಟಾಪ್‌ಗೆ ಸ್ಕ್ರೀನ್‌ ಲಾಕ್‌ ಹಾಗೂ ಬಲವಾದ ಪಾಸ್‌ವರ್ಡ್‌ ಬಳಸಿ. ಸಾಧನ ಕಳೆದುಹೋದ ಸಂದರ್ಭದಲ್ಲಿ ಪತ್ತೆಹಚ್ಚಲು Find My Device ಅಥವಾ ಇಂತಹ ಸುರಕ್ಷತಾ ಆಯ್ಕೆಗಳನ್ನು ಮುಂಚಿತವಾಗಿಯೇ ಸಕ್ರಿಯಗೊಳಿಸಿಕೊಳ್ಳಿ.
ಪ್ರಯಾಣಕ್ಕೂ ಮುನ್ನ ಮೊಬೈಲ್‌ ಮತ್ತು ಲ್ಯಾಪ್‌ಟಾಪ್‌ನ ಸಾಫ್ಟ್‌ವೇರ್‌ ಅಪ್ಡೇಟ್ ಮಾಡಿಕೊಳ್ಳುವುದು ಹಾಗೂ ಅಗತ್ಯವಿಲ್ಲದ ಸೂಕ್ಷ್ಮ ದಾಖಲೆಗಳನ್ನು ಸಾಧನದಲ್ಲಿ ಸಂಗ್ರಹಿಸದಿರುವುದು ಉತ್ತಮ.
ಹೊಸ ಸ್ಥಳದಲ್ಲಿ ತಂಗಿದಾಗ ಕೆಲವು ನಿಮಿಷಗಳನ್ನು ಸುರಕ್ಷತಾ ಪರಿಶೀಲನೆಗೆ ಮೀಸಲಿಡುವುದರಿಂದ ವೈಯಕ್ತಿಕ ಮಾಹಿತಿ, ಡಿಜಿಟಲ್ ಖಾತೆಗಳು ಮತ್ತು ವೈಯಕ್ತಿಕ ಗೌಪ್ಯತೆಯನ್ನು ಕಾಪಾಡಿಕೊಳ್ಳಲು ಸಹಾಯವಾಗಬಹುದು.
