ಹಿರಿಯೂರು | ಮಣೇವು ಕುಣಿತದಲ್ಲಿ ಹೆಜ್ಜೆ, ಯಾರಿದು 3 ವರ್ಷದ ಪೋರ

ಸುದ್ದಿಒನ್, ಹಿರಿಯೂರು, ಮಾರ್ಚ್. 02 : ಮೂರು ವರ್ಷದ ಪೋರನೊಬ್ಬ ಮಣೇವು ಕುಣಿತದಲ್ಲಿ ಪರಂಪರೆ ಬೇರು ಎಂಬಂತೆ ತಾತ ದೊಡ್ಡಯ್ಯನೊಂದಿಗೆ ದೊಡ್ಡದಾಗಿ ಹೆಜ್ಜೆ ಹಾಕಿ ಗಮನ ಸೆಳೆದ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ತಾಲೂಕಿನ ಶ್ರವಣಗೆರೆ ಗೊಲ್ಲರಹಟ್ಟಿ ಗ್ರಾಮದ ರಮೇಶ್ ಮತ್ತು ಸುಧಾ ದಂಪತಿಯ ಪುತ್ರ ವಿಹಾನ್ (3) ವೈರಲ್ ಆಗಿರುವ ಪೋರ. ಧರ್ಮಪುರ ಹೋಬಳಿಯ ಸಕ್ಕರ ಗ್ರಾಮದಲ್ಲಿರುವ ಬುಡಕಟ್ಟು ಕಾಡುಗೊಲ್ಲ ಸಮುದಾಯ ಸಾಂಸ್ಕೃತಿಕ ದೇವರಾದ ವೀರಮಲ್ಲಯ್ಯ ಗುಡ್ಡೆ ಬಳಿ ಇತ್ತೀಚೆಗಷ್ಟೇ ನಡೆದ ಚೌಲೋಪನಯನ ಕಾರ್ಯಕ್ರಮ ಸಂಧರ್ಭದಲ್ಲಿ ದೇವರಿಗೆ ಪೂಜೆ ಸಲ್ಲಿಸಿದ ಬಳಿಕ ಮಣೇವು ಕಾರ್ಯ ನಡೆದಿದೆ. ಈ ಮಣೇವು ಕುಣಿತದಲ್ಲಿ ಉರಿಮೆ ಸದ್ದಿಗೆ ತಾತನೊಂದಿಗೆ ಪೋರ ಹೆಜ್ಜೆ ಹಾಕಿ ನೆರೆದಿದ್ದ ಭಕ್ತರನ್ನು ಮೂಕವಿಸ್ಮಿತರನ್ನಾಗಿಸಿದೆ.

ಸ್ಥಳದಲ್ಲಿದ್ದ ಭಕ್ತರು ಈತನ ವೀಡಿಯೋ ಸೆರೆ ಹಿಡಿದಿದ್ದಾರೆ. ಈ ವೀಡಿಯೋ “ನಮ್ಮ ಸಂಸ್ಕೃತಿ ನಮ್ಮ ಹೆಮ್ಮೆ” ಟ್ಯಾಗ್ ನೊಂದಿಗೆ ವಾಟ್ಸಪ್, ಫೇಸ್ಬುಕ್ ಹಾಗೂ ಇನ್ಸ್ಟಾಗ್ರಾಮ್ ಸೇರಿದಂತೆ ವಾಟ್ಸಪ್ ಸ್ಟೇಟಸ್ ಗಳಲ್ಲಿ ವೀಡಿಯೋ ಹರಿದಾಡುತ್ತಿದೆ.

ಆಧುನಿಕ ತಂತ್ರಜ್ಞಾನದ ಯುಗದಲ್ಲಿ ಜಾನಪದ ಸಂಸ್ಕೃತಿ ಕಣ್ಮರೆಯಾಗುತ್ತಿರುವ ಸಂಧರ್ಭದಲ್ಲಿ ನೆಲಮೂಲ ಸಂಸ್ಕೃತಿಯ ಕಲೆಯನ್ನು ಈಗಿನ ಕಾಲದ ಮಕ್ಕಳಿಗೆ ಪರಿಚಯಿಸುವ ಇಂತಹ ಕೆಲಸಗಳು ನಡೆಯಬೇಕಿವೆ.