ದೆಹಲಿ: ಸಿಬಿಎಸ್ಇ ಪಠ್ಯಕ್ರಮದ ಅಡಿಯಲ್ಲಿ ಪ್ರಸ್ತುತ 6ನೇ ತರಗತಿಯಲ್ಲಿ ಕಲಿಯುತ್ತಿರುವ ವಿದ್ಯಾರ್ಥಿಗಳಿಗೆ ಕಡ್ಡಾಯ ತ್ರಿಭಾಷಾ ನೀತಿಯಿಂದ ವಿನಾಯಿತಿ ನೀಡುವಂತೆ ಸುಪ್ರೀಂ ಕೋರ್ಟ್ ಮಹತ್ವದ ನಿರ್ದೇಶನ ನೀಡಿದೆ.
ಈಗಾಗಲೇ 7, 8 ಮತ್ತು 9ನೇ ತರಗತಿಗಳ ವಿದ್ಯಾರ್ಥಿಗಳಿಗೆ ನೀಡಿರುವಂತಹ ವಿನಾಯಿತಿಯ ಸೌಲಭ್ಯವನ್ನೇ ಈ ಬಾರಿಯ 6ನೇ ತರಗತಿ ವಿದ್ಯಾರ್ಥಿಗಳಿಗೂ ಅನ್ವಯಿಸಬೇಕು ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದ್ದು, ಈ ನೀತಿಯನ್ನು ಅವರಿಗೆ ಏಪ್ರಿಲ್ 1, 2027 ರಿಂದ ಜಾರಿಗೆ ತರಲು ಸೂಚಿಸಿದೆ.
ವಿಚಾರಣೆ ವೇಳೆ ಕೇಂದ್ರ ಸರ್ಕಾರದ ಪರವಾಗಿ ಹಾಜರಿದ್ದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಅವರು, ಪ್ರಸಕ್ತ ಸಾಲಿನಿಂದ 6ನೇ ತರಗತಿ ವಿದ್ಯಾರ್ಥಿಗಳಿಗೆ ವಿನಾಯಿತಿ ನೀಡಲು ಸರ್ಕಾರ ಸಿದ್ಧವಿಲ್ಲ ಎಂದು ತಿಳಿಸಿದರು. ಸಿಬಿಎಸ್ಇಯ ಶೇಕಡ 99ರಷ್ಟು ಶಾಲೆಗಳು ಈಗಾಗಲೇ ತ್ರಿಭಾಷಾ ಸೂತ್ರವನ್ನು ಅಳವಡಿಸಿಕೊಂಡಿದ್ದು, ಅಗತ್ಯ ಮೂಲಸೌಕರ್ಯಗಳನ್ನು ಕಲ್ಪಿಸಲಾಗಿದೆ; ಕೇವಲ ಶೇಕಡ 1.2ರಷ್ಟು ಶಾಲೆಗಳು ಮಾತ್ರ ಇದರಿಂದ ಬಾಧಿತವಾಗಿವೆ ಎಂದು ವಾದಿಸಿದರು. ಆದರೆ ಈ ವಾದವನ್ನು ಸಮ್ಮತಿಸದ ಪೀಠವು, 7ನೇ ತರಗತಿಯ ಮಕ್ಕಳಿಗೆ ನೀಡಲಾದ ಸಮಾಧಾನಕರ ವಿನಾಯಿತಿಯನ್ನು 6ನೇ ತರಗತಿಯ ಹಾಲಿ ಬ್ಯಾಚ್ಗೂ ವಿಸ್ತರಿಸಬೇಕು ಎಂದು ತಾಕೀತು ಮಾಡಿತು.
ಮಧ್ಯಂತರದಲ್ಲಿ ಭಾಷೆ ಬದಲಾವಣೆಗೆ ಪೋಷಕರ ಆಕ್ಷೇಪ
ಕಲಿಕೆಯ ಹಂತದಲ್ಲಿ ಅರ್ಧದಲ್ಲೇ ಹೊಸ ಭಾಷಾ ಚೌಕಟ್ಟನ್ನು ಬಲವಂತವಾಗಿ ಪರಿಚಯಿಸುವುದರಿಂದ ವಿದ್ಯಾರ್ಥಿಗಳಿಗೆ ಉಂಟಾಗುವ ಗೊಂದಲದ ಬಗ್ಗೆ ನ್ಯಾಯಾಲಯ ಕಳವಳ ವ್ಯಕ್ತಪಡಿಸಿತು. ಈ ಕುರಿತು ಸಮಿತಿ ರಚಿಸುವ ಪ್ರಸ್ತಾಪ ಬಂದಾಗ, ಪೋಷಕರ ಪರ ವಕೀಲರಾದ ಗೋಪಾಲ್ ಶಂಕರನಾರಾಯಣನ್ ಅವರು ಆಕ್ಷೇಪಿಸಿ, ಸಮಿತಿಗಳಿಂದ ಯಾವುದೇ ಪ್ರಯೋಜನವಾಗದು, ಸ್ಪಷ್ಟ ತೀರ್ಮಾನದ ಅಗತ್ಯವಿದೆ ಎಂದರು. 4ನೇ ತರಗತಿಯಿಂದಲೇ ವಿದೇಶಿ ಭಾಷೆಗಳನ್ನು ಕಲಿಯುತ್ತಿದ್ದ ಮಕ್ಕಳಿಗೆ ದಿಢೀರನೆ ಸಂಸ್ಕೃತದಂತಹ ಬೇರೆ ಭಾಷೆಗಳನ್ನು ಕಲಿಯುವಂತೆ ಒತ್ತಾಯಿಸಲಾಗುತ್ತಿದೆ ಎಂದು ಅವರು ಪೀಠದ ಗಮನಕ್ಕೆ ತಂದರು.
ಪಠ್ಯಪುಸ್ತಕಗಳ ಕೊರತೆಯ ಆತಂಕ
ಕೇಂದ್ರ ಸರ್ಕಾರದ ಅಫಿಡವಿಟ್ ಹೊರತಾಗಿಯೂ ಮಕ್ಕಳಿಗೆ ಭೌತಿಕವಾಗಿ ಪಠ್ಯಪುಸ್ತಕಗಳು ಲಭ್ಯವಿಲ್ಲ ಎಂದು ಪೋಷಕರ ಪರ ವಕೀಲರು ನ್ಯಾಯಪೀಠಕ್ಕೆ ವಿವರಿಸಿದರು. ರಾಷ್ಟ್ರೀಯ ಶಿಕ್ಷಣ ನೀತಿಯಲ್ಲೂ (NEP) ಯಾವುದೇ ಭಾಷೆಯನ್ನು ಬಲವಂತವಾಗಿ ಹೇರಬಾರದು ಎಂದು ಹೇಳಲಾಗಿದ್ದು, ಸಂವಿಧಾನಾತ್ಮಕ ನಿಯಮಗಳಿಗೆ ಅನುಗುಣವಾಗಿ ತೀರ್ಮಾನ ಕೈಗೊಳ್ಳಬೇಕು ಎಂದು ಅವರು ಮನವಿ ಮಾಡಿದರು. ವಾದ-ಪ್ರತಿವಾದಗಳನ್ನು ಆಲಿಸಿದ ನ್ಯಾಯಾಲಯ, ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಪ್ರಸ್ತುತ ಸಾಲಿಗೆ ಈ ವಿನಾಯಿತಿಯನ್ನು ನೀಡಿದೆ.
