ಪಾಕಿಸ್ತಾನದ ಬ್ಯೂಟಿ ಕ್ರೀಮ್‌ಗಳಲ್ಲಿ ಅಪಾಯಕಾರಿ ರಾಸಾಯನಿಕ ಪತ್ತೆ: ಭಾರತೀಯ ಗ್ರಾಹಕರಿಗೆ CDSCO  ಎಚ್ಚರಿಕೆ

ದೆಹಲಿ.ಸೆಪ್ಟೆಂಬರ್. 16: ಭಾರತೀಯ ಮಾರುಕಟ್ಟೆಯಲ್ಲಿ ಅನಧಿಕೃತವಾಗಿ ಮಾರಾಟವಾಗುತ್ತಿರುವ ಪಾಕಿಸ್ತಾನ ಮೂಲದ ಎರಡು ಸೌಂದರ್ಯವರ್ಧಕ ಕ್ರೀಮ್‌ಗಳ ವಿರುದ್ಧ ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ (ಸಿಡಿಎಸ್‌ಸಿಒ) ಸಾರ್ವಜನಿಕ ಆರೋಗ್ಯ ಎಚ್ಚರಿಕೆ ಹೊರಡಿಸಿದೆ. ಪಾಕಿಸ್ತಾನದಲ್ಲಿ ತಯಾರಾದ ‘ಚಾಂದಿನಿ ವೈಟ್ನಿಂಗ್ ಕ್ರೀಮ್’ (Chandni Whitening Cream) ಮತ್ತು ‘ಗೋರಿ ಬ್ಯೂಟಿ ಕ್ರೀಮ್’ (Goree Beauty Cream) ಎಂಬ ಉತ್ಪನ್ನಗಳಲ್ಲಿ ನಿಗದಿತ ಮಿತಿಗಿಂತ ಹೆಚ್ಚಿನ ಪ್ರಮಾಣದ ವಿಷಕಾರಿ ಭಾರ ಲೋಹಗಳು (ಹೆವಿ ಮೆಟಲ್ಸ್) ಇರುವುದು ಪತ್ತೆಯಾಗಿದ್ದು, ಇವುಗಳ ಬಳಕೆಯಿಂದ ತೀವ್ರ ಆರೋಗ್ಯ ಸಮಸ್ಯೆಗಳು ಎದುರಾಗಲಿವೆ ಎಂದು ಸಂಸ್ಥೆ ತಿಳಿಸಿದೆ.

ಈ ಎರಡೂ ಕ್ರೀಮ್‌ಗಳನ್ನು ಖರೀದಿಸದಂತೆ ಹಾಗೂ ಈಗಾಗಲೇ ಖರೀದಿಸಿರುವವರು ತಕ್ಷಣವೇ ಇವುಗಳ ಬಳಕೆಯನ್ನು ನಿಲ್ಲಿಸುವಂತೆ ನಿಯಂತ್ರಣ ಪ್ರಾಧಿಕಾರ ಗ್ರಾಹಕರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ನಿಗದಿತ ಮಿತಿಗಿಂತ ಅಧಿಕ ರಾಸಾಯನಿಕ ಮತ್ತು ಭಾರ ಲೋಹಗಳನ್ನು ಹೊಂದಿರುವ ಸೌಂದರ್ಯವರ್ಧಕಗಳನ್ನು ನಿರಂತರವಾಗಿ ಬಳಸುವುದರಿಂದ ಚರ್ಮಕ್ಕೆ ತೀವ್ರ ಹಾನಿಯಾಗುವುದರ ಜೊತೆಗೆ ದೇಹದ ಒಳಾಂಗಗಳ ಮೇಲೂ ಗಂಭೀರ ವಿಷಕಾರಿ ಪರಿಣಾಮಗಳು ಬೀರುವ ಸಾಧ್ಯತೆಯಿದೆ ಎಂದು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.

🚨Public Health Alert🚨

The Central Drugs Standard Control Organisation (CDSCO), Cosmetics Division, has issued an alert against the use of unauthorised cosmetic products, urging consumers to exercise caution.@MoHFW_INDIA @CDSCO_INDIA_INF pic.twitter.com/1KhkyhSMb7

— DD News (@DDNewslive) September 15, 2026

ದೇಶದಲ್ಲಿ ಮಾರಾಟವಾಗುವ ಯಾವುದೇ ಸೌಂದರ್ಯವರ್ಧಕ ಉತ್ಪನ್ನಗಳು ‘ಔಷಧ ಮತ್ತು ಸೌಂದರ್ಯವರ್ಧಕ ಕಾಯ್ದೆ, 1940’ ಹಾಗೂ ‘ಕಾಸ್ಮೆಟಿಕ್ಸ್ ನಿಯಮಗಳು, 2020’ರ ಅಡಿಯಲ್ಲಿ ನಿಗದಿತ ಸುರಕ್ಷತಾ ಮಾನದಂಡಗಳನ್ನು ಪೂರೈಸುವುದು ಕಡ್ಡಾಯವಾಗಿದೆ. ಭಾರತದಲ್ಲಿ ತಯಾರಾಗುವ ಸೌಂದರ್ಯವರ್ಧಕಗಳಿಗೆ ರಾಜ್ಯ ಪರವಾನಗಿ ಪ್ರಾಧಿಕಾರದಿಂದ ಮಾನ್ಯತೆ ಇರಬೇಕು, ಹಾಗೆಯೇ ವಿದೇಶಗಳಿಂದ ಆಮದು ಮಾಡಿಕೊಳ್ಳುವ ಉತ್ಪನ್ನಗಳು ಕೇಂದ್ರ ಪರವಾನಗಿ ಪ್ರಾಧಿಕಾರದಲ್ಲಿ ಕಡ್ಡಾಯವಾಗಿ ನೋಂದಣಿಯಾಗಿರಬೇಕು. ಆದರೆ ಈ ಎರಡೂ ಪಾಕಿಸ್ತಾನಿ ಕ್ರೀಮ್‌ಗಳು ಯಾವುದೇ ಮಾನ್ಯತೆ ಪಡೆಯದೆ ಅಕ್ರಮವಾಗಿ ಮಾರಾಟವಾಗುತ್ತಿವೆ.

ಸೌಂದರ್ಯವರ್ಧಕಗಳನ್ನು ಖರೀದಿಸುವಾಗ ಸಾರ್ವಜನಿಕರು ಎಚ್ಚರ ವಹಿಸಬೇಕು ಎಂದು ಸಿಡಿಎಸ್‌ಸಿಒ ತಿಳಿಸಿದೆ. ಪ್ಯಾಕೆಟ್ ಮೇಲೆ ತಯಾರಿಕಾ ಪರವಾನಗಿ ಸಂಖ್ಯೆ, ತಯಾರಕರ ಪೂರ್ಣ ವಿವರ, ಬ್ಯಾಚ್ ಸಂಖ್ಯೆ, ತಯಾರಾದ ದಿನಾಂಕ, ಮುಕ್ತಾಯದ ದಿನಾಂಕ ಹಾಗೂ ಆಮದು ಮಾಡಿಕೊಂಡ ಉತ್ಪನ್ನಗಳಾಗಿದ್ದರೆ ಅಧಿಕೃತ ನೋಂದಣಿ ಸಂಖ್ಯೆ ಇದೆಯೇ ಎಂಬುದನ್ನು ಪರಿಶೀಲಿಸುವುದು ಅತ್ಯಗತ್ಯ. ಕೇವಲ ಅಧಿಕೃತ ಮತ್ತು ಸುರಕ್ಷಿತ ಉತ್ಪನ್ನಗಳನ್ನು ಮಾತ್ರ ಬಳಸುವಂತೆ ಹಾಗೂ ಚಾಂದಿನಿ, ಗೋರಿ ಮತ್ತು ಇದೇ ಹೆಸರಿನ ಹೋಲಿಕೆಯ ಯಾವುದೇ ಅನಧಿಕೃತ ಉತ್ಪನ್ನಗಳಿಂದ ದೂರವಿರುವಂತೆ ನಾಗರಿಕರಿಗೆ ಸ್ಪಷ್ಟ ಎಚ್ಚರಿಕೆ ನೀಡಲಾಗಿದೆ.