ನವದೆಹಲಿ: ಜಾಗತಿಕ ಮಾರುಕಟ್ಟೆಯ ಏರಿಳಿತ ಮತ್ತು ಅಮೆರಿಕದ ಆರ್ಥಿಕ ಬದಲಾವಣೆಗಳ ನೇರ ಪರಿಣಾಮ ಇಂದು ಭಾರತೀಯ ಮಾರುಕಟ್ಟೆಯ ಮೇಲೆ ಬೀರಿದೆ. ಮೇ 15ರ ಶುಕ್ರವಾರದಂದು ಚಿನ್ನ ಮತ್ತು ಬೆಳ್ಳಿಯ ದರದಲ್ಲಿ ಭಾರಿ ಇಳಿಕೆ ಕಂಡುಬಂದಿದ್ದು, ಆಭರಣ ಪ್ರಿಯರಿಗೆ ಮತ್ತು ಹೂಡಿಕೆದಾರರಿಗೆ ಇದು ಅಚ್ಚರಿಯ ಸುದ್ದಿಯಾಗಿದೆ.
ಭಾರತೀಯ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ 3,000 ರೂಪಾಯಿಗಿಂತಲೂ ಹೆಚ್ಚು ಕುಸಿದಿದ್ದರೆ, ಬೆಳ್ಳಿಯ ದರ ಕೆಜಿಗೆ ಬರೊಬ್ಬರಿ 19,000 ರೂಪಾಯಿಗಳಷ್ಟು ಇಳಿಕೆಯಾಗಿದೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ನಡೆಯುತ್ತಿರುವ ಹಲವು ಬೆಳವಣಿಗೆಗಳು ಈ ಬೆಲೆ ಕುಸಿತಕ್ಕೆ ಪ್ರೇರೇಪಿಸಿವೆ. ಅಮೆರಿಕದಲ್ಲಿ ತೈಲ ಬೆಲೆ ಏರಿಕೆಯಿಂದಾಗಿ ಹಣದುಬ್ಬರದ ಭೀತಿ ಎದುರಾಗಿದೆ. ಇದರಿಂದ ಅಮೆರಿಕದ ಟ್ರೆಜರಿ ಇಳುವರಿ ಹೆಚ್ಚಾಗಿದ್ದು, ಹೂಡಿಕೆದಾರರು ಸುರಕ್ಷಿತ ಹೂಡಿಕೆಯಾದ ಚಿನ್ನದಿಂದ ದೂರ ಸರಿಯುತ್ತಿದ್ದಾರೆ.
ಇರಾನ್ ಯುದ್ಧದ ಭೀತಿಯ ನಡುವೆಯೂ ಕಚ್ಚಾ ತೈಲ ಬೆಲೆ ಏರಿಕೆಯಾಗುತ್ತಿರುವುದು ಡಾಲರ್ ಮೌಲ್ಯವನ್ನು ಹೆಚ್ಚಿಸಿದೆ. ಇದು ಸತತ ನಾಲ್ಕನೇ ದಿನವೂ ಚಿನ್ನದ ಬೆಲೆ ಇಳಿಕೆಗೆ ಕಾರಣವಾಗಿದೆ.ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ ಈ ವಾರ ಸುಮಾರು 3% ರಷ್ಟು ಕುಸಿದಿದೆ.
ದೇಶದ ಪ್ರಮುಖ ನಗರಗಳಲ್ಲಿನ 10 ಗ್ರಾಂ ಚಿನ್ನದ ಇಂದಿನ ದರಪಟ್ಟಿ ಹೀಗಿದೆ:
| ನಗರ | 22K ಚಿನ್ನ (10 ಗ್ರಾಂ) | 24K ಚಿನ್ನ (10 ಗ್ರಾಂ) |
|---|---|---|
| ಬೆಂಗಳೂರು | ₹ 1,46,750 | ₹ 1,60,090 |
| ದೆಹಲಿ | ₹ 1,46,900 | ₹ 1,60,290 |
| ಮುಂಬೈ | ₹ 1,46,750 | ₹ 1,60,090 |
| ಚೆನ್ನೈ | ₹ 1,46,750 | ₹ 1,60,090 |
| ಹೈದರಾಬಾದ್ | ₹ 1,46,750 | ₹ 1,60,090 |
| ಅಹಮದಾಬಾದ್ | ₹ 1,46,800 | ₹ 1,60,190 |
ಬೆಳ್ಳಿ ದರದಲ್ಲಿ ₹19,000 ಇಳಿಕೆ!
ಬೆಳ್ಳಿಯ ದರದಲ್ಲಿ ಕಂಡಿರುವ ಕುಸಿತವು ಚಿನ್ನಕ್ಕಿಂತಲೂ ಅಧಿಕವಾಗಿದೆ. ಮಲ್ಟಿ ಕಮಾಡಿಟಿ ಎಕ್ಸ್ಚೇಂಜ್ (MCX) ನಲ್ಲಿ ಬೆಳ್ಳಿಯ ಬೆಲೆ ಹಿಂದೆಂದೂ ಕಾಣದ ರೀತಿಯಲ್ಲಿ ಇಳಿಕೆಯಾಗಿದೆ:
ಹಿಂದಿನ ದರ: ₹ 2,91,100 (ಪ್ರತಿ ಕೆಜಿಗೆ)
ಇಂದಿನ ದರ: ₹ 2,72,267 (ಪ್ರತಿ ಕೆಜಿಗೆ)
ಒಟ್ಟು ಇಳಿಕೆ: ಸುಮಾರು ₹ 19,000
