ಆಸ್ಪತ್ರೆಯ ತಂದೆಯ ಶವ, ಮಂಟಪದಲ್ಲಿ ಮಗಳ ಮದುವೆ : ಚಿಕ್ಕಮಗಳೂರಲ್ಲೊಂದು ಹೃದಯವಿದ್ರಾವಕ ಘಟನೆ..!

ಚಿಕ್ಕಮಗಳೂರು : ಮಕ್ಕಳ ಮದುವೆ ಅಂದ್ರೆ ಪೋಷಕರಿಗೆ ದೊಡ್ಡ ಕನಸು. ಆ ಕನಸನ್ನ ನನಸು ಮಾಡಿಕೊಳ್ಳುವ ಮುನ್ನವೇ ತಂದೆಯನ್ನ ಕಳೆದುಕೊಂಡರೆ ಆ ನೋವು ಮಗಳಿಗೆ ಸಹಿಸಿಕೊಳ್ಳುವುದೇಗೆ..? ಆದರೆ ತಂದೆಯ ಸಾವನ್ನೇ ಮುಚ್ಚಿಟ್ಟು ಮಗಳ ಮದುವೆ ಮಾಡಿರುವ ಘಟನೆ ಚಿಕ್ಕಮಗಳೂರಿನಲ್ಲಿ ನಡೆದಿದೆ. ತಂದೆಯ ನಿಧನದ ಸುದ್ದಿ ತಿಳಿಯದೆ ಮಗಳು ಮದುವೆ ಆಗಿದ್ದಾರೆ.

ತರೀಕೆರೆಯ ಚಂದ್ರು ಮಗಳ ಮದುವೆಯನ್ನು ಮಾಡಬೇಕೆಂದು ಆಸೆ ಇಟ್ಟುಕೊಂಡಿದ್ದರು. ಅಷ್ಟೇ ಅಲ್ಲ ಅದ್ದೂರಿಯಾಗಿ ಮಾಡಬೇಕೆಂದು ಎಲ್ಲಾ ತಯಾರಿ ಮಾಡಿಕೊಂಡಿದ್ದರು. ಆದರೆ ಲಗ್ನ ಪತ್ರಿಕೆ ಕೊಟ್ಟು ಬರುವಾಗ ತಂದೆ ಚಂದ್ರು ಸಾವನ್ನಪ್ಪಿದ್ದಾರೆ. ಅಪಘಾತದಲ್ಲಿ ಚಂದ್ರು ನಿಧನರಾಗಿದ್ದು, ಮಗಳಿಗಾಗಲೀ, ಪತ್ನಿಗಾಗಲಿ ವಿಚಾರವನ್ನ ತಿಳಿಸದೆ ಮದುವೆ ಮಾಡಿದ್ದಾರೆ. ಇಂದು ದೀಕ್ಷಿತಾ ಅವರ ಮದುವೆ ನಿಶ್ಚಯವಾಗಿತ್ತು. ಆದರೆ ನಿನ್ನೆ ಹುಲಿತಿಮ್ಮಾಪುರದಿಂದ ಬರುವಾಗ ಅಪಘಾತವಾಗಿತ್ತು. ಆದರೆ ಈ ವಿಚಾರವನ್ನು ಅಮ್ಮ – ಮಗಳಿಗೆ ಬೇರೆ ರೀತಿಯೇ ಹೇಳಿದ್ದರು.

ಮದುವೆ ಕೆಲಸದಲ್ಲಿ ಓಡಾಡಿ ಓಡಾಡಿ ನಿಮ್ಮ ತಂದೆ ಸುಸ್ತಾಗಿದ್ದಾರೆ. ಹೀಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಮೊದಲು ಮದುವೆ ಮುಗಿಯಲಿ ಎಂದಿದ್ದಾರೆ. ಮದುವೆ ಮುಗಿದ ಮೇಲೆ ಬರುತ್ತಾರೆ. ಮದುವೆ ಮುಗಿದ ಮೇಲೆ ನಾವೇ ನೋಡಿಕೊಂಡು ಬರೋಣಾ ಎಂದು ಸುಳ್ಳು ಹೇಳಿ ದೀಕ್ಷಿತಾಳ ಮದುವೆ ಮಾಡಿದ್ದಾರೆ. ಆಮೇಲಷ್ಟೇ ಅಮ್ಮ, ಮಗಳಿಗೆ ಸತ್ಯ ಹೇಳಿದ್ದಾರೆ. ಇದು ಮಗಳಿಗೆ ದಿಗ್ಬ್ರಮೆಯನ್ನುಂಟು ಮಾಡಿದೆ. ಅಪ್ಪನ ಕನಸೇ ನನ್ನ ಮದುವೆಯಾಗಿತ್ತು ಎಂದು ಗೊತ್ತಿದ್ದ ಮಗಳು, ಈಗ ತಂದೆಯೇ ಇಲ್ಲ ಎಂಬ ಸತ್ಯವನ್ನ ಸಹಿಸಿಕೊಳ್ಳಲಾಗುತ್ತಿಲ್ಲ. ಮದುವೆಯ ಮನೆಯಲ್ಲಿದ್ದ ಖುಷಿ ಈಗ ಮಾಯವಾಗಿ ಸೂತಕದ ಛಾಯೆ ಆವರಿಸಿದೆ.