ಮೊಹರಂ ಎಂದರೆ ಕೇವಲ ಹಬ್ಬವಲ್ಲ, ಅದೊಂದು ಮಹಾನ್ ಶೋಕದ ದಿನ : ಇಮಾಮ್ ಹುಸೇನ್ ಅವರ ಕರ್ಬಲಾ ತ್ಯಾಗದ ಕಥೆ

ಇಸ್ಲಾಮಿಕ್ ಕ್ಯಾಲೆಂಡರ್ ನ ಮೊದಲ ತಿಂಗಳಾದ ಮೊಹರಂ. ಮೊಹರಂ ತಿಂಗಳ ಅತ್ಯಂತ ಪವಿತ್ರ ದಿನವನ್ನು ‘ಆಶೂರಾ’ ಎಂದು ಕರೆಯಲಾಗುತ್ತದೆ. ಇದು ಮೊಹರಂ ತಿಂಗಳ 10ನೇ ದಿನವಾಗಿದ್ದು, ಈ ವರ್ಷ ಜೂನ್ 26, 2026 ರಂದು ‘ಯೌಮ್-ಎ-ಆಶೂರಾ’ ಆಚರಿಸಲಾಗುತ್ತಿದೆ. ಅರೇಬಿಕ್ ಭಾಷೆಯಲ್ಲಿ ‘ಆಶೂರಾ’ ಎಂದರೆ ಹತ್ತನೇ ದಿನ ಎಂದರ್ಥ. ಈ ದಿನದ ಮಹತ್ವ, ಇತಿಹಾಸ ಮತ್ತು ಕರ್ಬಲಾ ಯುದ್ಧದ ಹಿನ್ನೆಲೆ ಇಲ್ಲಿದೆ.

ಏನಿದು ಆಶೂರಾ?
ಅರೇಬಿಕ್ನಲ್ಲಿ ಮೊಹರಂ ಎಂದರೆ ದುಃಖ ಅಥವಾ ಶೋಕದ ತಿಂಗಳು ಎಂದರ್ಥ. ಮುಸ್ಲಿಂ ಸಮುದಾಯದಲ್ಲಿ ರಂಜಾನ್ ನಂತರ ಮೊಹರಂ ಅನ್ನು ಎರಡನೇ ಅತ್ಯಂತ ಪವಿತ್ರ ತಿಂಗಳು ಎಂದು ಪರಿಗಣಿಸಲಾಗುತ್ತದೆ. ಈ ದಿನ ಪ್ರವಾದಿ ಮೊಹಮ್ಮದ್ ಅವರ ಮೊಮ್ಮಗ ಇಮಾಮ್ ಹುಸೇನ್ ಇಬ್ನ್ ಅಲಿ ಅವರ ಹುತಾತ್ಮತೆಯನ್ನು ನೆನೆದು ಶಿಯಾ ಮುಸ್ಲಿಮರು ಔಪಚಾರಿಕವಾಗಿ ಶೋಕ ಆಚರಿಸುತ್ತಾರೆ. ಆಶೂರಾ ದಿನವನ್ನು ತಾಳ್ಮೆ, ತ್ಯಾಗ, ನಿಷ್ಠೆ ಮತ್ತು ಸತ್ಯದ ಹಾದಿಯಲ್ಲಿ ನಡೆಯುವುದರ ಸಂಕೇತವೆಂದು ಪರಿಗಣಿಸಲಾಗುತ್ತದೆ.

ಈ ದಿನದ ಇತಿಹಾಸ ಇರಾಕ್ ನ ಕರ್ಬಲಾ ಮೈದಾನದಲ್ಲಿ ಇಮಾಮ್ ಹುಸೇನ್ ಅವರು ತಮ್ಮ ಕುಟುಂಬ ಮತ್ತು ಸಖರೊಂದಿಗೆ ಸೇರಿ, ಅಂದಿನ ಕ್ರೂರ ದೊರೆ ಯಜೀದನ ದೌರ್ಜನ್ಯದ ವಿರುದ್ಧ ಧ್ವನಿ ಎತ್ತಿದ್ದರು. ಮಾನವೀಯತೆ, ಸತ್ಯ ಮತ್ತು ನ್ಯಾಯದ ರಕ್ಷಣೆಗಾಗಿ ಹೋರಾಡುತ್ತಾ ತಮ್ಮ ಪ್ರಾಣವನ್ನೇ ತ್ಯಾಗ ಮಾಡಿದರು. ಮೊಹರಂ ತಿಂಗಳ 10ನೇ ದಿನದಂದೇ (ಯೌಮ್-ಎ-ಆಶೂರಾ) ಇಮಾಮ್ ಹುಸೇನ್ ಹುತಾತ್ಮರಾಗಿದ್ದರು. ಹಾಗಾಗಿಯೇ ಈ ದಿನಕ್ಕೆ ಇಷ್ಟೊಂದು ಮಹತ್ವವಿದೆ. ಈ ದಿನ ಪ್ರಪಂಚದಾದ್ಯಂತದ ಮುಸ್ಲಿಮರು ಕರ್ಬಲಾ ತ್ಯಾಗವನ್ನು ಸ್ಮರಿಸುತ್ತಾ ಪ್ರಾರ್ಥನೆ, ಉಪವಾಸ ಮತ್ತು ಶೋಕ ಸಭೆಗಳನ್ನು ನಡೆಸುತ್ತಾರೆ.

ಕರ್ಬಲಾದಲ್ಲಿ ಇಮಾಮ್ ಹುಸೇನ್ ಅವರಿಗೆ ಏನಾಗಿತ್ತು?
ಪ್ರವಾದಿ ಹಜರತ್ ಮೊಹಮ್ಮದ್ ಅವರ ನಿಧನದ ನಂತರ, ಮುಸ್ಲಿಂ ಸಮುದಾಯವನ್ನು ಮುನ್ನಡೆಸಲು ಪರಸ್ಪರ ಒಪ್ಪಿಗೆಯಿಂದ ‘ಖಲೀಫಾ’ರನ್ನು ಆಯ್ಕೆ ಮಾಡಲಾಗುತ್ತಿತ್ತು. ಈ ಖಲೀಫರು ವಿಶ್ವಾದ್ಯಂತ ಮುಸ್ಲಿಮರ ಪ್ರಮುಖ ನಾಯಕರಾಗಿದ್ದರು. ಆದರೆ, ಒಂದು ಕಾಲಘಟ್ಟದಲ್ಲಿ ಸಿರಿಯಾದ ಆಡಳಿತಗಾರ ಯಜೀದ್ ತನ್ನನ್ನು ತಾನೇ ಖಲೀಫಾ ಎಂದು ಘೋಷಿಸಿಕೊಂಡನು. ಇಸ್ಲಾಮಿಕ್ ವಿದ್ವಾಂಸರ ಪ್ರಕಾರ, ಅವನ ಆಡಳಿತವು ಇಸ್ಲಾಮಿಕ್ ತತ್ವಗಳಿಗೆ ಸಂಪೂರ್ಣ ವಿರುದ್ಧವಾಗಿತ್ತು.

ಇಮಾಮ್ ಹುಸೇನ್ ಅವರು ಯಜೀದನನ್ನು ಖಲೀಫಾ ಎಂದು ಒಪ್ಪಿಕೊಳ್ಳಲು ನಿರಾಕರಿಸಿದರು. ಇಸ್ಲಾಂ ಮತ್ತು ಮಾನವೀಯತೆಯ ರಕ್ಷಣೆಗಾಗಿ ಅವರು ಯಜೀದನ ಮುಂದೆ ತಲೆಬಾಗಲಿಲ್ಲ. ಇದರಿಂದ ಕ್ರುದ್ಧನಾದ ಯಜೀದ್, ಇಮಾಮ್ ಹುಸೇನ್ ಮತ್ತು ಅವರ ಕುಟುಂಬದವರ ಮೇಲೆ ತೀವ್ರ ದೌರ್ಜನ್ಯ ಎಸಗಿದನು. ಕರ್ಬಲಾ ಮೈದಾನದಲ್ಲಿ ನಡೆದ ಯುದ್ಧದಲ್ಲಿ ಇಮಾಮ್ ಹುಸೇನ್ ಅವರ 72 ಸಂಗಾತಿಗಳು ಹುತಾತ್ಮರಾದರು. ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲೂ ಧೃತಿಗೆಡದೆ ಹೋರಾಡಿದ ಇಮಾಮ್ ಹುಸೇನ್ ಅಂತಿಮವಾಗಿ ವೀರಮರಣ ಹೊಂದಿದರು. ಈ ದಿನವನ್ನೇ ‘ಆಶೂರಾ’ ಎಂದು ಕರೆಯಲಾಗುತ್ತದೆ.

ಆಶೂರಾ ದಿನದಂದು ಏನು ಮಾಡಲಾಗುತ್ತದೆ?
ಸುನ್ನಿ ಸಂಪ್ರದಾಯ: ಸುನ್ನಿ ಮುಸ್ಲಿಮರು ಈ ದಿನದಂದು ಉಪವಾಸ (ರೋಜಾ) ಇರುತ್ತಾರೆ ಹಾಗೂ ವಿಶೇಷ ಪ್ರಾರ್ಥನೆಗಳನ್ನು ಸಲ್ಲಿಸುತ್ತಾರೆ.

ಶಿಯಾ ಸಂಪ್ರದಾಯ: ಶಿಯಾ ಮುಸ್ಲಿಮರು ಕರ್ಬಲಾದ ದುರಂತ ಘಟನೆಯನ್ನು ನೆನೆದು ತೀವ್ರ ಶೋಕ ವ್ಯಕ್ತಪಡಿಸುತ್ತಾರೆ.

ಮೆರವಣಿಗೆ: ಈ ದಿನ ಮುಸ್ಲಿಂ ಬಾಂಧವರು ದೊಡ್ಡ ಸಂಖ್ಯೆಯಲ್ಲಿ ಒಟ್ಟುಗೂಡಿ ಧಾರ್ಮಿಕ ಜುಲೂಸ್ (ಮೆರವಣಿಗೆ) ಹೊರಡಿಸುತ್ತಾರೆ.