ಇನ್‌ಸ್ಟಾಗ್ರಾಂ ಬಳಕೆದಾರರಿಗೆ ಎಚ್ಚರಿಕೆ!  ಈ ಸೆಟ್ಟಿಂಗ್ ತಕ್ಷಣ ಬದಲಾಯಿಸಿ

ಇನ್‌ಸ್ಟಾಗ್ರಾಂ ಬಳಸುವ ಕೋಟ್ಯಂತರ ಬಳಕೆದಾರರಿಗೆ ಮಹತ್ವದ ಎಚ್ಚರಿಕೆ ನೀಡಲಾಗಿದೆ. ಮೆಟಾ (Meta) ಪರಿಚಯಿಸಿರುವ ಹೊಸ AI Image Generation ವೈಶಿಷ್ಟ್ಯದಿಂದ, ಸಾರ್ವಜನಿಕ (Public) ಖಾತೆಯಲ್ಲಿರುವ ನಿಮ್ಮ ಫೋಟೋಗಳನ್ನು ಆಧರಿಸಿ ನಿಮ್ಮನ್ನು ಹೋಲುವ ಕೃತಕ ಬುದ್ಧಿಮತ್ತೆ (AI) ಚಿತ್ರಗಳನ್ನು ರಚಿಸುವ ಸಾಧ್ಯತೆ ಇದೆ. ಈ ಪ್ರಕ್ರಿಯೆಗೆ ಪ್ರತ್ಯೇಕ ಅನುಮತಿ ಅಗತ್ಯವಿಲ್ಲ ಎಂಬ ಮಾಹಿತಿ ಬಳಕೆದಾರರಲ್ಲಿ ಗೌಪ್ಯತೆ ಕುರಿತ ಆತಂಕವನ್ನು ಹೆಚ್ಚಿಸಿದೆ.

ಮೆಟಾ ಇತ್ತೀಚೆಗೆ ‘Imagine Image’ ಎಂಬ ಹೊಸ AI ಚಿತ್ರ ರಚನೆ ತಂತ್ರಜ್ಞಾನವನ್ನು ಪರಿಚಯಿಸಿದೆ. ಸದ್ಯ ಈ ಸೇವೆ Meta AI, Instagram Stories ಹಾಗೂ WhatsApp ನಲ್ಲಿ ಲಭ್ಯವಿದ್ದು, ಮುಂದಿನ ದಿನಗಳಲ್ಲಿ Facebook ಮತ್ತು Messengerಗೂ ವಿಸ್ತರಿಸಲಾಗುತ್ತಿದೆ. ಬಳಕೆದಾರರು ಕೇವಲ ಪದಗಳಲ್ಲಿ ವಿವರಣೆ ನೀಡಿದರೆ AI ಹೊಸ ಚಿತ್ರಗಳನ್ನು ಸೃಷ್ಟಿಸುವ ಸಾಮರ್ಥ್ಯ ಹೊಂದಿದೆ. ಜೊತೆಗೆ ಹಲವು ಫೋಟೋಗಳನ್ನು ಸಂಯೋಜಿಸುವುದು, ಚಿತ್ರದ ಒಂದು ಭಾಗವನ್ನು ಬದಲಾಯಿಸುವುದು, ಪಠ್ಯ ಸೇರಿಸುವುದು ಸೇರಿದಂತೆ ಹಲವು ವೈಶಿಷ್ಟ್ಯಗಳನ್ನು ಇದು ಹೊಂದಿದೆ.
ಈ ಹೊಸ ವ್ಯವಸ್ಥೆಯ ವಿಶೇಷತೆ ಏನೆಂದರೆ, ಸಾರ್ವಜನಿಕ ಇನ್‌ಸ್ಟಾಗ್ರಾಂ ಖಾತೆಯಲ್ಲಿರುವ ಫೋಟೋಗಳನ್ನು ಆಧರಿಸಿ ಆ ವ್ಯಕ್ತಿಯ ಮುಖವನ್ನು ಹೋಲುವ AI ಚಿತ್ರಗಳನ್ನು ಸೃಷ್ಟಿಸಬಹುದು. ಈ ವೇಳೆ ಸಂಬಂಧಿತ ಬಳಕೆದಾರರ ಅನುಮತಿ ಪಡೆಯಲಾಗುವುದಿಲ್ಲ. ಅಲ್ಲದೆ, ಅವರ ಫೋಟೋಗಳನ್ನು AI ಬಳಸಿರುವ ಕುರಿತು ಯಾವುದೇ ಪ್ರತ್ಯೇಕ ಮಾಹಿತಿ ಅಥವಾ ಸೂಚನೆಯನ್ನೂ ನೀಡುವುದಿಲ್ಲ.

ಮೆಟಾ ನೀಡಿರುವ ಸ್ಪಷ್ಟನೆ
AI ಮೂಲಕ ಸೃಷ್ಟಿಯಾದ ಪ್ರತಿಯೊಂದು ಚಿತ್ರದಲ್ಲೂ Invisible Watermark ಎಂಬ ವಿಶೇಷ ಡಿಜಿಟಲ್ ಗುರುತು ಅಳವಡಿಸಲಾಗುತ್ತದೆ ಎಂದು ಮೆಟಾ ತಿಳಿಸಿದೆ. ಇದರಿಂದ ಆ ಚಿತ್ರ AI ಮೂಲಕ ರಚನೆಯಾಗಿದೆ ಎಂಬುದನ್ನು ಗುರುತಿಸಬಹುದು. ಆದರೆ, ಈಗಾಗಲೇ AI ರಚಿಸಿರುವ ಚಿತ್ರಗಳನ್ನು ಅಳಿಸುವ ಅವಕಾಶ ಬಳಕೆದಾರರಿಗೆ ಇರುವುದಿಲ್ಲ. ಜೊತೆಗೆ ತಮ್ಮ ಫೋಟೋಗಳನ್ನು AI ಸಂಪೂರ್ಣವಾಗಿ ಬಳಸಬಾರದು ಎಂಬ ನಿಯಂತ್ರಣವೂ ಎಲ್ಲ ಸಂದರ್ಭಗಳಲ್ಲಿ ಲಭ್ಯವಿಲ್ಲ.

ನಿಮ್ಮ ಫೋಟೋಗಳನ್ನು AI ಬಳಸದಂತೆ ತಡೆಯುವುದು ಹೇಗೆ?
ಇನ್‌ಸ್ಟಾಗ್ರಾಂ ಆಪ್ ತೆರೆಯಿರಿ.
ಮೇಲಿನ ಬಲಭಾಗದಲ್ಲಿರುವ ☰ (ಮೂರು ಗೆರೆಗಳು) ಆಯ್ಕೆಯನ್ನು ಟ್ಯಾಪ್ ಮಾಡಿ.
Sharing and Reuse ವಿಭಾಗಕ್ಕೆ ತೆರಳಿ.
Allow Meta AI to use your content ಆಯ್ಕೆಯನ್ನು ತೆರೆಯಿರಿ.
Posts ಮತ್ತು Reels ಎರಡಕ್ಕೂ ನೀಡಿರುವ ಅನುಮತಿಯನ್ನು Off ಮಾಡಿ.
ಈ ಸೆಟ್ಟಿಂಗ್ ಬದಲಿಸಿದ ಬಳಿಕ, ನೀವು ಮುಂದೆ ಅಪ್‌ಲೋಡ್ ಮಾಡುವ ಹೊಸ ಪೋಸ್ಟ್‌ಗಳು ಮತ್ತು ರೀಲ್ಸ್‌ಗಳನ್ನು AI ಚಿತ್ರ ರಚನೆಗಾಗಿ ಬಳಸುವುದನ್ನು ತಡೆಯಬಹುದು.

ಗಮನದಲ್ಲಿರಲಿ…
ಈ ಬದಲಾವಣೆ ಈಗಾಗಲೇ ಅಪ್‌ಲೋಡ್ ಮಾಡಿರುವ ಹಳೆಯ ಫೋಟೋಗಳಿಗೆ ಅನ್ವಯಿಸುವುದಿಲ್ಲ.
ನಿಮ್ಮ ಫೋಟೋಗಳನ್ನು ಬಳಸಿ ಈಗಾಗಲೇ ರಚಿಸಿರುವ AI ಚಿತ್ರಗಳನ್ನು ಅಳಿಸಲು ಸಾಧ್ಯವಿಲ್ಲ.
ನಂತರ ಖಾತೆಯನ್ನು Private Account ಆಗಿ ಬದಲಾಯಿಸಿದರೂ, ಈಗಾಗಲೇ ರಚನೆಯಾದ AI ಚಿತ್ರಗಳ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ.
ಈ ವೈಶಿಷ್ಟ್ಯ ಹಾಗೂ ನಿಯಂತ್ರಣ ಆಯ್ಕೆಯನ್ನು ಮೆಟಾ ಹಂತ ಹಂತವಾಗಿ ಎಲ್ಲ ಬಳಕೆದಾರರಿಗೆ ಬಿಡುಗಡೆ ಮಾಡುತ್ತಿದೆ.
ಹೊಸ AI ತಂತ್ರಜ್ಞಾನಗಳು ಬಳಕೆದಾರರಿಗೆ ಹೊಸ ಅನುಭವ ನೀಡುತ್ತಿದ್ದರೂ, ವೈಯಕ್ತಿಕ ಗೌಪ್ಯತೆಯನ್ನು ಕಾಪಾಡಿಕೊಳ್ಳಲು ತಮ್ಮ ಖಾತೆಯ ಸೆಟ್ಟಿಂಗ್‌ಗಳನ್ನು ನಿಯಮಿತವಾಗಿ ಪರಿಶೀಲಿಸುವುದು ಅಗತ್ಯವೆಂದು ತಜ್ಞರು ಸಲಹೆ ನೀಡಿದ್ದಾರೆ.