“ಬಿಳಿ ಟವೆಲ್ ಹಿಂದಿರುವ ಕಥೆ: ಅಧಿಕಾರದ ಸಂಕೇತವೇ? ಅಥವಾ ಅಗತ್ಯವೇ?”

ಸರ್ಕಾರಿ ಕಚೇರಿಗಳಲ್ಲಿ ಅಧಿಕಾರಿಗಳ ಕುರ್ಚಿಗಳ ಮೇಲೆ ಕಾಣಿಸುವ ಬಿಳಿ ಟವೆಲ್ ಹಿಂದಿರುವ ಕಾರಣಗಳ ಬಗ್ಗೆ ಹಲವರಿಗೆ ಕುತೂಹಲ ಇರುತ್ತದೆ. ಇದು ಇತ್ತೀಚಿನ ಪದ್ಧತಿ ಅಲ್ಲ; ಇದರ ಬೇರುಗಳು ಬ್ರಿಟಿಷರ ಆಳ್ವಿಕೆಯ ಕಾಲಕ್ಕೆ ಸೇರಿದವು.ದೇಶದ ಯಾವುದೇ ಸರ್ಕಾರಿ ಕಚೇರಿಗೆ ಭೇಟಿ ನೀಡಿದರೂ, ಉನ್ನತ ಅಧಿಕಾರಿಗಳ ಕುರ್ಚಿಗಳ ಮೇಲೆ ಬಿಳಿ ಟವೆಲ್ ಹಾಸಿರುವುದು ಸಾಮಾನ್ಯ ದೃಶ್ಯ. ಐಎಎಸ್, ಐಪಿಎಸ್ ಅಧಿಕಾರಿಗಳಿಂದ ಹಿಡಿದು ತಹಶೀಲ್ದಾರ್ ಮಟ್ಟದ ಕಚೇರಿಗಳವರೆಗೆ ಈ ಪದ್ಧತಿ ಮುಂದುವರಿದಿದೆ. ಇಂದಿನ ಆಧುನಿಕ ಕುರ್ಚಿಗಳು, ಏಸಿ ಕೊಠಡಿಗಳು ಇದ್ದರೂ ಈ ಸಂಪ್ರದಾಯ ಇನ್ನೂ ಉಳಿದಿರುವುದು ಗಮನಾರ್ಹ.

ಬ್ರಿಟಿಷರ ಕಾಲದಲ್ಲಿ ಅಧಿಕಾರಿಗಳು ಕುದುರೆ ಅಥವಾ ಎತ್ತಿನ ಗಾಡಿಗಳಲ್ಲಿ ಪ್ರಯಾಣಿಸುತ್ತಿದ್ದರು. ಭಾರತದ ಬಿಸಿಲು ಮತ್ತು ಧೂಳಿನ ಪರಿಣಾಮವಾಗಿ ಅವರು ಕಚೇರಿಗೆ ತಲುಪುವಷ್ಟರಲ್ಲಿ ಬೆವರಿನಿಂದ ಒದ್ದೆಯಾಗುತ್ತಿದ್ದರು. ಆ ಬೆವರು ಕುರ್ಚಿಗೆ ತಾಗದಂತೆ ತಡೆಯಲು ಮತ್ತು ಸ್ವಲ್ಪ ಆರಾಮಕ್ಕಾಗಿ ಟವೆಲ್ ಬಳಸಲಾಗುತ್ತಿತ್ತು. ಕಾಲಕ್ರಮೇಣ ಇದು ಒಂದು ಪದ್ಧತಿಯಾಗಿ ಉಳಿದುಕೊಂಡಿತು.ಹಿಂದೆ ಬಳಸುತ್ತಿದ್ದ ಮರ ಅಥವಾ ಚರ್ಮದ ಕುರ್ಚಿಗಳನ್ನು ದಿನನಿತ್ಯ ಸ್ವಚ್ಛಗೊಳಿಸುವುದು ಕಷ್ಟವಾಗುತ್ತಿತ್ತು. ತಲೆಗೆ ಎಣ್ಣೆ ಹಚ್ಚುವ ಅಭ್ಯಾಸದಿಂದ ಕುರ್ಚಿಯ ಹಿಂಭಾಗ ಬೇಗನೆ ಜಿಡ್ಡಾಗುತ್ತಿತ್ತು. ಟವೆಲ್ ಬಳಸುವುದರಿಂದ ಈ ಕೊಳೆ ಹೀರಿಕೊಳ್ಳಲಾಗುತ್ತಿತ್ತು. ಅದನ್ನು ನಿಯಮಿತವಾಗಿ ತೊಳೆಯುವುದರಿಂದ ಕುರ್ಚಿಯ ಸ್ವಚ್ಛತೆ ಮತ್ತು ದೀರ್ಘಾಯುಷ್ಯ ಕಾಪಾಡಿಕೊಳ್ಳಲಾಗುತ್ತಿತ್ತು.

ಕಾಲಾಂತರದಲ್ಲಿ ಈ ಬಿಳಿ ಟವೆಲ್ ಕೇವಲ ಉಪಯೋಗಕ್ಕಾಗಿ ಮಾತ್ರವಲ್ಲದೆ, ಅಧಿಕಾರದ ಸಂಕೇತವಾಗಿಯೂ ಪರಿವರ್ತಿತವಾಯಿತು. ಯಾವ ಕುರ್ಚಿಯ ಮೇಲೆ ಟವೆಲ್ ಇರುತ್ತದೆಯೋ ಅದು ಅಧಿಕಾರಿಯ ಕುರ್ಚಿ ಎಂಬುದು ಸುಲಭವಾಗಿ ಗುರುತಿಸಲು ಸಾಧ್ಯವಾಗುತ್ತಿತ್ತು. ಕೆಲ ಸಂದರ್ಭಗಳಲ್ಲಿ ಟವೆಲ್ ಇಲ್ಲದಿರುವುದನ್ನು ಅವಮಾನವೆಂದು ಪರಿಗಣಿಸಿದ ಘಟನೆಗಳೂ ನಡೆದಿದ್ದು, ಇದಕ್ಕಾಗಿ ಶಿಷ್ಟಾಚಾರ ನಿಯಮಗಳನ್ನೂ ರೂಪಿಸಲಾಗಿದೆ.

ಬಿಳಿ ಬಣ್ಣವು ಶುದ್ಧತೆ ಮತ್ತು ಶಾಂತಿಯ ಪ್ರತೀಕ. ಅದರಲ್ಲಿ ಕೊಳೆ ತಕ್ಷಣವೇ ಗೋಚರಿಸುವುದರಿಂದ ಅದನ್ನು ನಿಯಮಿತವಾಗಿ ಬದಲಾಯಿಸುವುದು ಅಗತ್ಯವಾಗುತ್ತದೆ. ಇದರಿಂದ ಕಚೇರಿಯ ಶಿಸ್ತು ಹಾಗೂ ಅಧಿಕಾರಿಯ ಜವಾಬ್ದಾರಿತನವನ್ನು ಕೂಡ ಸೂಚಿಸುತ್ತದೆ.
ಇಂದಿನ ಆಧುನಿಕ ಸೌಲಭ್ಯಗಳ ನಡುವೆಯೂ ಈ ಪದ್ಧತಿ ನಿಲ್ಲದೇ ಮುಂದುವರಿದಿದೆ. ಹಳೆಯ ತಲೆಮಾರಿನಿಂದ ಹೊಸ ತಲೆಮಾರಿಗೆ ಬಂದಿರುವ ಈ ಸಂಸ್ಕೃತಿ, ಭಾರತೀಯ ಸರ್ಕಾರಿ ವ್ಯವಸ್ಥೆಯ ಒಂದು ಅವಿಭಾಜ್ಯ ಅಂಗವಾಗಿ ಉಳಿದುಕೊಂಡಿದೆ.