ಜಪಾನ್‌ನಲ್ಲಿ ಭೀಕರ ಭೂಕಂಪ: 7.1 ತೀವ್ರತೆಯ ಕಂಪನ, ಸುನಾಮಿ ಎಚ್ಚರಿಕೆ ರವಾನೆ!

ಜಪಾನ್‌ನ ದಕ್ಷಿಣ ದ್ವೀಪವಾದ ಕ್ಯುಶುವಿನ ಕುಮಮೊಟೊ ಪ್ರಾಂತ್ಯದಲ್ಲಿ ಮಂಗಳವಾರ 7.1 ತೀವ್ರತೆಯ ಪ್ರಬಲ ಭೂಕಂಪ ಸಂಭವಿಸಿದ್ದು, ಕರಾವಳಿ ಪ್ರದೇಶಗಳಲ್ಲಿ ಸುನಾಮಿ ಮುನ್ನೆಚ್ಚರಿಕೆ ನೀಡಲಾಗಿದೆ. ಘಟನೆಯ ಬೆನ್ನಲ್ಲೇ ಹಲವು ಪ್ರಾಂತ್ಯಗಳಲ್ಲಿ ತುರ್ತು ಜಾಗೃತಿ ಎಚ್ಚರಿಕೆಗಳನ್ನು ಹೊರಡಿಸಲಾಗಿದ್ದು, ನೆಲೆ ನಡುಗಿದ ಭೀಕರ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.

ಜಪಾನ್ ಪವನಶಾಸ್ತ್ರ ಸಂಸ್ಥೆಯ (JMA) ಮಾಹಿತಿಯಂತೆ, ಸ್ಥಳೀಯ ಸಮಯ ಸಂಜೆ 4.27 ಕ್ಕೆ ಉಕಿ ನಗರದ ಆಗ್ನೇಯಕ್ಕೆ 4 ಕಿಲೋಮೀಟರ್ ದೂರದಲ್ಲಿ, ಭೂಮಿಯ ಆಳದ 10 ಕಿಲೋಮೀಟರ್ ಪ್ರದೇಶದಲ್ಲಿ ಈ ಭೂಕಂಪನದ ಕೇಂದ್ರಬindu ಪತ್ತೆಯಾಗಿದೆ. ಶಾಲೋ ಡೆಪ್ತ್‌ನಲ್ಲಿ ಭೂಕಂಪ ಸಂಭವಿಸಿರುವುದರಿಂದ ಅತ್ಯಂತ ತೀವ್ರವಾದ ಆಘಾತ ಅನುಭವಕ್ಕೆ ಬಂದಿದೆ.

ಜಪಾನ್‌ನ ಶಿಂಡೋ ತೀವ್ರತೆಯ ಮಾಪಕದಲ್ಲಿ ಈ ಭೂಕಂಪವು ಗರಿಷ್ಠ ‘ಲೆವೆಲ್ 7’ ರಷ್ಟು ದಾಖಲಾಗಿದೆ. ಇದು ದೇಶದ ಭೂಕಂಪನ ತೀವ್ರತೆ ವ್ಯವಸ್ಥೆಯಲ್ಲಿ ಅತ್ಯಂತ ಅಪಾಯಕಾರಿ ಮಟ್ಟವಾಗಿದ್ದು, ಪೀಡಿತ ಪ್ರದೇಶಗಳಲ್ಲಿ ಭೀಕರ ನಡುಕ ಉಂಟಾಗಿದೆ.

ಸುನಾಮಿ ಮುನ್ನೆಚ್ಚರಿಕೆ ಹಾಗೂ ತುರ್ತು ಪರಿಸ್ಥಿತಿ

ಭೂಕಂಪನದ ಬೆನ್ನಲ್ಲೇ ಕ್ಯುಶು ಕರಾವಳಿ ತೀರಕ್ಕೆ ಜಪಾನ್ ಪವನಶಾಸ್ತ್ರ ಸಂಸ್ಥೆಯು ಸುನಾಮಿ ಎಚ್ಚರಿಕೆ ನೀಡಿದ್ದು, ಸ್ಥಳೀಯ ಸಮಯ ಸಂಜೆ 5 ಗಂಟೆಯ ಸುಮಾರಿಗೆ 1 ಮೀಟರ್‌ವರೆಗೆ ಎತ್ತರದ ಸುನಾಮಿ ಅಲೆಗಳು ಅಪ್ಪಳಿಸುವ ಸಾಧ್ಯತೆಯಿದೆ ಎಂದು ತಿಳಿಸಿದೆ. ಈಗಾಗಲೇ ಕೆಲವು ಭಾಗಗಳಲ್ಲಿ ಅಲೆಗಳ ಏರಿಳಿತ ಕಂಡುಬಂದಿದೆ ಎಂದು ಸಾರ್ವಜನಿಕ ಪ್ರಸಾರಕ ಎನ್‌ಹೆಚ್‌ಕೆ ವರದಿ ಮಾಡಿದೆ.

ಪರಿಸ್ಥಿತಿಯ ಗಂಭೀರತೆಯನ್ನು ಪರಿಗಣಿಸಿ ಜಪಾನ್ ಸರ್ಕಾರವು ಕುಮಮೊಟೊ, ನಾಗಸಾಕಿ, ಕಾಗೋಶಿಮಾ, ಫುಕುವೋಕಾ, ಸಾಗಾ, ಒಯಿತಾ ಮತ್ತು ಮಿಯಾಜಾಕಿ ಪ್ರಾಂತ್ಯಗಳಲ್ಲಿ ಜಾಗರೂಕರಾಗಿರಲು ಹಾಗೂ ಅಗತ್ಯ ಬಿದ್ದರೆ ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಗೊಳ್ಳಲು ಸೂಚಿಸಿದೆ. ಸದ್ಯಕ್ಕೆ ಯಾವುದೇ ಪ್ರಾಣಹಾನಿ ಅಥವಾ ಭಾರಿ ಆಸ್ತಿಪಾಸ್ತಿ ನಷ್ಟದ ವರದಿಯಾಗಿಲ್ಲವಾದರೂ, ಅಧಿಕಾರಿಗಳು ಪರಿಸ್ಥಿತಿಯ ಮೇಲ್ವಿಚಾರಣೆ ನಡೆಸುತ್ತಿದ್ದಾರೆ.

ಪೆಸಿಫಿಕ್ ರಿಂಗ್ ಆಫ್ ಫೈರ್ ವಲಯದಲ್ಲಿರುವ ಜಪಾನ್, ವಿಶ್ವದಲ್ಲೇ ಅತ್ಯಂತ ಹೆಚ್ಚು ಭೂಕಂಪನಕ್ಕೆ ಒಳಗಾಗುವ ದೇಶಗಳಲ್ಲಿ ಒಂದಾಗಿದೆ. ಜಗತ್ತಿನಲ್ಲಿ ದಾಖಲಾಗುವ ಒಟ್ಟು ಭೂಕಂಪಗಳಲ್ಲಿ ಶೇಕಡಾ 18 ರಷ್ಟು ಘಟನೆಗಳು ಜಪಾನ್ ಒಂದರಲ್ಲೇ ಸಂಭವಿಸುತ್ತವೆ.