ಇವತ್ತಿನ ಸೋಷಿಯಲ್ ಮೀಡಯಾದಲ್ಲೆಲ್ಲಾ ಕೆ ಎಲ್ ರಾಹುಲ್ ಅವರ ವಿಡಿಯೋ ವೈರಲ್ ಆಗುತ್ತಿದೆ. ಕನ್ನಡ ಪ್ರೇಮವನ್ನು ಮೆರೆದ ಕೆ ಎಲ್ ರಾಹುಲ್ ಗೆ ಬಹುಪರಾಕ್ ಹಾಕುತ್ತಿದ್ದಾರೆ. ಅವರಿಗಿರುವ ಕನ್ನಡ ಪ್ರೇಮದ ಬಗ್ಗೆ ಕನ್ನಡಿಗರು ಹೆಮ್ಮೆಯಿಂದ ಕೊಂಡಾಡುತ್ತಿದ್ದಾರೆ. ಕನ್ನಡ್ ಎಂದವನಿಗೆ ಕನ್ನಡ್ ಅಲ್ಲ ಕನ್ನಡ ಎಂದು ತಿದ್ದಿದ ವಿಡಿಯೋ ವೈರಲ್ ಆಗಿದ್ದು, ರಾಹುಲ್ ಮತ್ತೊಮ್ಮೆ ಕನ್ನಡಿಗರ ಮನಸ್ಸು ಗೆದ್ದಿದ್ದಾರೆ.
ವಿಡಿಯೋದಲ್ಲಿ ಇರುವ ಸತ್ಯವೇನು..? ಕೆ ಎಲ್ ರಾಹುಲ್ ಬಳಿ ನಿಂತ ಡೈರೆಕ್ಷನ್ ಡಿಪಾರ್ಟ್ಮೆಂಟ್ ಹುಡುಗ ಕನ್ನಡ್ ಎಂದಿದ್ದಾರೆ. ಆಗ ಕೆ ಎಲ್ ರಾಹುಲ್ ಆ ಹುಡುಗನ ಮುಖ ನೋಡಿ ಏನು ಹೇಳಿದೆ ಎಂದು ಪ್ರಶ್ನಿಸಿದ್ದಾರೆ. ಮತ್ತೆ ಅದನ್ನೆ ಉಚ್ಛರಿಸಿದ ಆ ಹುಡುಗ ಕನ್ನಡ್ ಎಂದಿದ್ದಾರೆ. ಆಗ ರಾಹುಲ್ ಆ ಪದವನ್ನು ತಿದ್ದಿದ್ದು, ಏ ಬಾಯ್ ಅದು ಕನ್ನಡ್ ಅಲ್ಲ ಕನ್ನಡ ಎಂದು ಹೇಳಿಕೊಟ್ಟು, ಮತ್ತೊಮ್ಮೆ ಉಚ್ಛರಿಸುವಂತೆ ಹೇಳಿದ್ದಾರೆ. ಸರಿಯಾಗಿ ಹೇಳುವಂತೆ ಹೇಳಿಕೊಟ್ಟಿದ್ದಾರೆ. ಈ ವಿಡಿಯೋ ಸದ್ಯಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಕನ್ನಡ ಪ್ರೇಮಕ್ಕೆ ಬಹುಪರಾಕ್ ಹಾಕಿದ್ದಾರೆ.
ಇನ್ನು ಮಾರ್ಚ್ 22ರಿಂದ ಐಪಿಎಲ್ ಶುರುವಾಗುತ್ತಿದೆ. ಅದರ ಪ್ರಮೋಷನ್ ವಿಡಿಯೋ ಇದಾಗಿದೆ ಎನ್ನಲಾಗುತ್ತಿದೆ. ಏನೇ ಆಗಲಿ ಪ್ರಮೋಷನ್ ವಿಚಾರಕ್ಕೂ ನಮ್ಮ ಕನ್ನಡವನ್ನೇ ತೆಗೆದುಕೊಂಡಿರುವುದು ಹೆಮ್ಮೆಯ ವಿಚಾರ. ಈ ಹಿಂದೆ ವಿಕ್ರಾಂತ್ ರೋಣ ಸಿನಿಮಾದ ಪ್ರಮೋಷನ್ ಸಮಯದಲ್ಲಿ ಕಿಚ್ಚ ಸುದೀಪ್, ಆ್ಯಂಕರ್ ಕನ್ನಡ್ ಎಂದಾಗ ಆ ಪದವನ್ನು ತಿದ್ದಿ, ಕನ್ನಡ್ ಅಲ್ಲ ಕನ್ನಡ ಎಂದು ಹೇಳಿಕೊಟ್ಟಿದ್ದರು. ಇದೀಗ ರಾಹುಲ್ ಅವರು ಅದೇ ರೀತಿ ನಡೆದುಕೊಂಡಿದ್ದು, ಇಬ್ಬರ ಕನ್ನಡ ಪ್ರೇಮಕ್ಕೆ ಕನ್ನಡಿಗರು ಹಾರ್ಟ್ ನೀಡಿದ್ದಾರೆ.
