1977ರ ಲೋಕಸಭಾ ಚುನಾವಣೆಯ ಸಮಯದಲ್ಲಿ ದೇಶದ ರಾಜಕೀಯ ಇತಿಹಾಸದಲ್ಲೇ ಅಪರೂಪದ ಘಟನೆಯೊಂದು ನಡೆದಿದೆ. ಬಿಹಾರದ ಮುಜಾಫರ್ಪುರ ಕ್ಷೇತ್ರದಲ್ಲಿ ಒಬ್ಬ ಅಭ್ಯರ್ಥಿ ಪರ ಭರ್ಜರಿ ಪ್ರಚಾರ ನಡೆದಿದ್ದರೂ, ಆ ಅಭ್ಯರ್ಥಿ ಮಾತ್ರ ಮತದಾರರ ಮುಂದೆ ಕಾಣಿಸಿಕೊಂಡಿರಲಿಲ್ಲ. ಅವರು ಭಾಷಣ ಮಾಡಲಿಲ್ಲ, ಜನರನ್ನು ನೇರವಾಗಿ ಭೇಟಿಯಾಗಲಿಲ್ಲ. ಕಾರಣ, ಅವರು ದೆಹಲಿಯ ತಿಹಾರ್ ಜೈಲಿನಲ್ಲಿ ಬಂಧಿತರಾಗಿದ್ದರು.ಆದರೂ ಚುನಾವಣಾ ಫಲಿತಾಂಶ ಹೊರಬಂದಾಗ ಇಡೀ ದೇಶವೇ ಬೆಚ್ಚಿಬಿದ್ದಿತು. ಜೈಲಿನಲ್ಲಿದ್ದ ಆ ಅಭ್ಯರ್ಥಿ ಮೂರು ಲಕ್ಷಕ್ಕೂ ಅಧಿಕ ಮತಗಳ ಅಂತರದಿಂದ ಗೆಲುವು ಸಾಧಿಸಿದರು. ಆ ಸಾಹಸಗಾಥೆಯ ನಾಯಕರು ಜಾರ್ಜ್ ಫರ್ನಾಂಡಿಸ್.
ತುರ್ತುಪರಿಸ್ಥಿತಿ ಕಾಲದಲ್ಲಿ ತಲೆಬಾಗದ ನಾಯಕ
1975ರಲ್ಲಿ ದೇಶದಲ್ಲಿ ತುರ್ತುಪರಿಸ್ಥಿತಿ ಘೋಷಣೆಯಾದಾಗ, ವಿರೋಧ ಪಕ್ಷದ ಹಲವಾರು ನಾಯಕರು ಬಂಧಿತರಾದರು. ಆದರೆ ಜಾರ್ಜ್ ಫರ್ನಾಂಡಿಸ್ ಅವರು ಸರ್ವಾಧಿಕಾರದ ವಿರುದ್ಧ ತಲೆಬಾಗದೆ ಭೂಗತ ಚಳುವಳಿ ನಡೆಸಿದರು. ಅವರ ಹೋರಾಟವೇ ‘ಬರೋಡಾ ಡೈನಮೈಟ್ ಪ್ರಕರಣ’ಕ್ಕೆ ಕಾರಣವಾಯಿತು. ಕೊನೆಗೆ ಅವರನ್ನು ಬಂಧಿಸಿ ಜೈಲಿನಲ್ಲಿ ಸರಪಳಿಗಳಿಂದ ಕಟ್ಟಿಹಾಕಲಾಗಿತ್ತು. ಅವರ ಆ ಚಿತ್ರ ದೇಶದಾದ್ಯಂತ ಪ್ರಜಾಪ್ರಭುತ್ವ ಪರ ಹೋರಾಟಕ್ಕೆ ಸ್ಪೂರ್ತಿಯಾಯಿತು.ಜೈಲಿನಿಂದಲೇ ಗೆಲುವು – ಜನರ ವಿಶ್ವಾಸದ ಪ್ರತೀಕ ಜೈಲಿನಲ್ಲಿದ್ದರೂ ಅವರ ಹೋರಾಟ ಮನೋಭಾವಕ್ಕೆ ಮಾರುಹೋದ ಬಿಹಾರದ ಜನತೆ, ಭಾಷಾ-ಪ್ರಾಂತ್ಯ ಭೇದವಿಲ್ಲದೆ ಅವರನ್ನು ಭಾರೀ ಬಹುಮತದಿಂದ ಗೆಲ್ಲಿಸಿದರು.
ಇದು ಆಗಿನ ಆಡಳಿತಕ್ಕೆ ದೊಡ್ಡ ಎಚ್ಚರಿಕೆಯಾಯಿತು.ಕೇಂದ್ರ ಸಚಿವರಾಗಿ ಸಾಧನೆ ತುರ್ತುಪರಿಸ್ಥಿತಿ ಬಳಿಕ ಅಧಿಕಾರಕ್ಕೆ ಬಂದ ಮೊರಾರ್ಜಿ ದೇಸಾಯಿ ಅವರ ಸರ್ಕಾರದಲ್ಲಿ ಜಾರ್ಜ್ ಫರ್ನಾಂಡಿಸ್ ರೈಲ್ವೆ ಸಚಿವರಾಗಿ ಜವಾಬ್ದಾರಿ ವಹಿಸಿಕೊಂಡರು. ಈ ಅವಧಿಯಲ್ಲಿ ದಶಕಗಳಿಂದ ನಿರೀಕ್ಷೆಯಲ್ಲಿದ್ದ ಕೊಂಕಣ ರೈಲ್ವೆ ಯೋಜನೆಗೆ ವೇಗ ನೀಡಿದರು. ಇದು ಕರಾವಳಿ ಕರ್ನಾಟಕ ಸೇರಿದಂತೆ ಪಶ್ಚಿಮ ಕರಾವಳಿ ಪ್ರದೇಶಗಳ ಅಭಿವೃದ್ಧಿಗೆ ಮಹತ್ವದ ದಾರಿ ತೆರೆದಿತು.ಸರಳ ಜೀವನ, ಅಸಾಧಾರಣ ನಾಯಕತ್ವಉನ್ನತ ಹುದ್ದೆಗಳಲ್ಲಿ ಇದ್ದರೂ ಜಾರ್ಜ್ ಫರ್ನಾಂಡಿಸ್ ಸರಳ ಜೀವನಶೈಲಿಯನ್ನು ಅನುಸರಿಸಿದ್ದರು.
ತಮ್ಮ ಕೆಲಸಗಳನ್ನು ತಾವೇ ಮಾಡಿಕೊಂಡು, ಸಾಮಾನ್ಯ ಜನರಂತೆ ಬದುಕುತ್ತಿದ್ದರು. ನಂತರ ರಕ್ಷಣಾ ಸಚಿವರಾಗಿದ್ದಾಗ, ಸಿಯಾಚಿನ್ ಗಡಿಗೆ ಅನೇಕ ಬಾರಿ ಭೇಟಿ ನೀಡಿ ಯೋಧರ ಪರಿಸ್ಥಿತಿಯನ್ನು ನೇರವಾಗಿ ತಿಳಿದುಕೊಂಡರು. ಮಂಗಳೂರಿನ ಸಾಮಾನ್ಯ ಕುಟುಂಬದಿಂದ ಹೊರಹೊಮ್ಮಿದ ಜಾರ್ಜ್ ಫರ್ನಾಂಡಿಸ್ ಅವರು, ಜೈಲಿನಿಂದಲೇ ಚುನಾವಣೆಯಲ್ಲಿ ಗೆದ್ದು, ದೇಶದ ರಾಜಕೀಯದಲ್ಲಿ ಅಮಿಟ ಗುರುತು ಮೂಡಿಸಿದ ಅಪರೂಪದ ನಾಯಕನಾಗಿ ಇತಿಹಾಸದಲ್ಲಿ ಉಳಿದಿದ್ದಾರೆ.
