ಚಾರ್ಜ್ ಆಗುವಾಗ ಮೊಬೈಲ್‌ನಲ್ಲಿ ಮಾತನಾಡ್ತೀರಾ? ಈ ಒಂದು ತಪ್ಪು ಜೀವಕ್ಕೂ ಅಪಾಯ!

ಇಂದಿನ ಡಿಜಿಟಲ್ ಯುಗದಲ್ಲಿ ಮೊಬೈಲ್ ಫೋನ್ ಪ್ರತಿಯೊಬ್ಬರ ಜೀವನದ ಅತ್ಯಗತ್ಯ ಭಾಗವಾಗಿದೆ. ಇಂಟರ್ನೆಟ್ ಸಂಪರ್ಕವಿದ್ದರೆ ಸಾಕು, ಮೊಬೈಲ್ ಮೂಲಕವೇ ನಮ್ಮ ಬಹುತೇಕ ಕೆಲಸಗಳನ್ನು ಪೂರ್ಣಗೊಳಿಸಬಹುದು. ಇದರೊಂದಿಗೆ, ದೂರದಲ್ಲಿರುವವರೊಂದಿಗೆ ಸಂವಹನ ನಡೆಸಲು ಇದು ಪ್ರಮುಖ ಸಾಧನವಾಗಿದೆ.

ಆದರೆ, ಅನೇಕರು ಮೊಬೈಲ್‌ ಅನ್ನು ಚಾರ್ಜಿಂಗ್‌ಗೆ ಇಟ್ಟುಕೊಂಡೇ ಫೋನ್ ಕಾಲ್‌ನಲ್ಲಿ ಮಾತನಾಡುತ್ತಾರೆ. ಚಾರ್ಜ್ ಆಗುತ್ತಿರುವಾಗ ಫೋನ್ ಮಾತನಾಡುವುದು ಎಷ್ಟು ಅಪಾಯಕಾರಿ ಮತ್ತು ಇದರಿಂದ ಏನೆಲ್ಲಾ ತೊಂದರೆಗಳಾಗುತ್ತವೆ ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಚಾರ್ಜಿಂಗ್ ವೇಳೆ ಫೋನ್‌ನಲ್ಲಿ ಮಾತನಾಡಬಾರದು ಏಕೆ?

ಮೊಬೈಲ್ ಅತಿಯಾಗಿ ಕಾಯುವುದು (Overheating):

ಮೊಬೈಲ್ ಚಾರ್ಜ್ ಆಗುವಾಗ ಬ್ಯಾಟರಿ ಸಹಜವಾಗಿಯೇ ಬಿಸಿಯಾಗುತ್ತದೆ. ಇಂತಹ ಸಮಯದಲ್ಲಿ ನೀವು ಕಾಲ್‌ನಲ್ಲಿ ಮಾತನಾಡಿದರೆ ಅಥವಾ ಗೇಮ್ ಆಡಿದರೆ, ಬ್ಯಾಟರಿ ಜೊತೆಗೆ ಪ್ರೊಸೆಸರ್ ಹಾಗೂ ನೆಟ್‌ವರ್ಕ್ ಮೇಲೆಯೂ ಹೆಚ್ಚಿನ ಒತ್ತಡ ಬೀಳುತ್ತದೆ. ಇದರಿಂದ ಫೋನ್ ಶೀಘ್ರವಾಗಿ ಅತಿಯಾಗಿ ಬಿಸಿಯಾಗುತ್ತದೆ.

ಬ್ಯಾಟರಿ ಆಯುಷ್ಯ ಕ್ಷೀಣಿಸುತ್ತದೆ:

ಚಾರ್ಜಿಂಗ್ ವೇಳೆ ಕಾಲ್‌ನಲ್ಲಿ ಮಾತನಾಡುವುದರಿಂದ ಮೊಬೈಲ್ ಬ್ಯಾಟರಿಯ ಆರೋಗ್ಯ ಹಾಳಾಗುತ್ತದೆ. ಫೋನ್ ಪದೇ ಪದೇ ಅತಿಯಾಗಿ ಬಿಸಿಯಾಗುವುದರಿಂದ ಒಳಗಿರುವ ‘ಲಿಥಿಯಂ-ಐಯಾನ್’ (Lithium-ion) ಬ್ಯಾಟರಿ ಸೆಲ್‌ಗಳು ಬೇಗನೆ ಹಾಳಾಗುತ್ತವೆ. ಇದು ಬ್ಯಾಟರಿಯ ಆಯುಷ್ಯವನ್ನು (Battery Life) ಗಣನೀಯವಾಗಿ ಕಡಿಮೆ ಮಾಡುತ್ತದೆ.

ಬ್ಯಾಟರಿ ಸ್ಫೋಟಗೊಳ್ಳುವ ಅಪಾಯ!

ಫೋನ್ ಅತಿಯಾಗಿ ಬಿಸಿಯಾಗುವುದರಿಂದ ಅಥವಾ ಕಳಪೆ ಗುಣಮಟ್ಟದ (Local) ಚಾರ್ಜರ್ ಬಳಸಿ ಚಾರ್ಜಿಂಗ್ ಮಾಡುವಾಗ ಫೋನ್ ಬಳಸುವುದರಿಂದ ಬ್ಯಾಟರಿ ಸ್ಫೋಟಗೊಳ್ಳುವ (Explode) ಸಾಧ್ಯತೆ ಇರುತ್ತದೆ. ಇದು ತೀವ್ರ ಸ್ವರೂಪದ ಅನಾಹುತಕ್ಕೆ ದಾರಿ ಮಾಡಿಕೊಡಬಹುದು.

ಮೊಬೈಲ್ ಚಾರ್ಜ್ ಮಾಡುವ ಸರಿಯಾದ ವಿಧಾನ ಯಾವುದು?

ಬ್ಯಾಟರಿ ಲೋ ಆದಾಗಷ್ಟೇ ಚಾರ್ಜ್ ಮಾಡಿ: ಮೊಬೈಲ್ ಬ್ಯಾಟರಿ ಶೇಕಡಾವಾರು ತೀರ ಕಡಿಮೆಯಾದಾಗ ಮಾತ್ರ ಚಾರ್ಜಿಂಗ್‌ಗೆ ಹಾಕಿ. ಪದೇ ಪದೇ ಚಾರ್ಜ್‌ಗೆ ಹಾಕುವುದನ್ನು ತಪ್ಪಿಸಿ.

ಚಾರ್ಜಿಂಗ್ ವೇಳೆ ಫೋನ್ ಬಳಸಬೇಡಿ: ಮೊಬೈಲ್ ಚಾರ್ಜ್ ಆಗುತ್ತಿರುವಾಗ ಕರೆಗಳಲ್ಲಿ ಮಾತನಾಡುವುದು, ಗೇಮ್ ಆಡುವುದು ಅಥವಾ ಇತರ ಯಾವುದೇ ಕೆಲಸಗಳನ್ನು ಮಾಡಬೇಡಿ.

ಒರಿಜಿನಲ್ ಚಾರ್ಜರ್ ಬಳಸಿ: ಯಾವಾಗಲೂ ಫೋನ್‌ಗೆ ನೀಡಲಾದ ಅಧಿಕೃತ ಹಾಗೂ ಗುಣಮಟ್ಟದ ಚಾರ್ಜರ್ ಅನ್ನೇ ಬಳಸಿ.