ಕಾಪಿರೈಟ್ ಉಲ್ಲಂಘನೆ ಆರೋಪ ಸಂಬಂಧ, ರಕ್ಷಿತ್ ಶೆಟ್ಟಿ ಅವರಿಗೆ ದೆಹಲಿ ಹೈಕೋರ್ಟ್ 25 ಲಕ್ಷ ರೂ. ದಂಡ ವಿಧಿಸಿದೆ. ‘ಬ್ಯಾಚುಲರ್ ಪಾರ್ಟಿ’ ಚಿತ್ರದಲ್ಲಿ ಅನುಮತಿ ಪಡೆಯದೆ ಹಾಡುಗಳನ್ನು ಬಳಸಿದ ಪ್ರಕರಣದಲ್ಲಿ ಈ ತೀರ್ಪು ಪ್ರಕಟವಾಗಿದೆ.ರಕ್ಷಿತ್ ಶೆಟ್ಟಿ ಒಡೆತನದ ಪರಂವಾ ಸ್ಟುಡಿಯೋಸ್ ವಿರುದ್ಧ MRT Music ಸಂಸ್ಥೆ ದೂರು ನೀಡಿತ್ತು. 2020ರ ಹಕ್ಕುಸ್ವಾಮ್ಯ ಒಪ್ಪಂದದ ಪ್ರಕಾರ ‘ನ್ಯಾಯ ಎಲ್ಲಿದೆ’ ಮತ್ತು ‘ಒಮ್ಮೆ ನಿನ್ನನ್ನು’ ಹಾಡುಗಳ ಹಕ್ಕು ತಮ್ಮದ್ದೆಂದು ಸಂಸ್ಥೆ ವಾದಿಸಿದ್ದು, ಚಿತ್ರದಲ್ಲಿ ಅವುಗಳನ್ನು ಅನುಮತಿ ಇಲ್ಲದೆ ಬಳಸಲಾಗಿದೆ ಎಂದು ಆರೋಪಿಸಿತ್ತು.
ಪ್ರಕರಣ ವಿಚಾರಣೆ ವೇಳೆ ರಕ್ಷಿತ್ ಶೆಟ್ಟಿ ಹಾಗೂ ಅವರ ತಂಡ, ಹಾಡುಗಳನ್ನು ಅತಿ ಕಡಿಮೆ ಅವಧಿಗೆ ಮಾತ್ರ ಬಳಸಲಾಗಿದೆ—‘ನ್ಯಾಯ ಎಲ್ಲಿದೆ’ 7 ಸೆಕೆಂಡ್ ಮತ್ತು ‘ಒಮ್ಮೆ ನಿನ್ನನ್ನು’ 31 ಸೆಕೆಂಡ್—ಆದ್ದರಿಂದ ಇದು ಕಾಪಿರೈಟ್ ಉಲ್ಲಂಘನೆಗೆ ಒಳಪಡುವುದಿಲ್ಲ ಎಂದು ವಾದಿಸಿತು.
ಆದರೆ, ಈ ವಾದವನ್ನು ತಿರಸ್ಕರಿಸಿದ ದೆಹಲಿ ಹೈಕೋರ್ಟ್ ಹಾಡುಗಳ ಬಳಕೆ ಯಾದೃಚ್ಛಿಕವಾಗಿಲ್ಲ, ಸಿನಿಮಾ ಕಥಾನಿರೂಪಣೆಗೆ ಪೂರಕವಾಗಿ ವಾಣಿಜ್ಯ ಉದ್ದೇಶದಿಂದ ಬಳಸಲಾಗಿದೆ ಎಂದು ಅಭಿಪ್ರಾಯಪಟ್ಟಿತು. ಹೀಗಾಗಿ, ಇದು ಸ್ಪಷ್ಟ ಕಾಪಿರೈಟ್ ಉಲ್ಲಂಘನೆ ಎಂದು ನ್ಯಾಯಾಲಯ ತೀರ್ಮಾನಿಸಿದೆ.ನ್ಯಾಯಾಲಯವು ಜೈಲು ಶಿಕ್ಷೆಯಿಂದ ವಿನಾಯಿತಿ ನೀಡಿದರೂ, ಕಾಪಿರೈಟ್ ಉಲ್ಲಂಘನೆಗೆ 20 ಲಕ್ಷ ರೂ. ಮತ್ತು ಕೋರ್ಟ್ ಆದೇಶ ಪಾಲನೆ ವಿಳಂಬಕ್ಕೆ 5 ಲಕ್ಷ ರೂ. ಸೇರಿ ಒಟ್ಟು 25 ಲಕ್ಷ ರೂ. ದಂಡ ವಿಧಿಸಿದೆ.
