ನವದೆಹಲಿ : ನೌಕರರ ಭವಿಷ್ಯ ನಿಧಿ ಸಂಸ್ಥೆಯು (ಇಪಿಎಫ್‌ಒ) ತನ್ನ ಚಂದಾದಾರರ ಅನುಕೂಲಕ್ಕಾಗಿ ಇಪಿಎಫ್ ಖಾತೆಯಿಂದ ಮುಂಗಡ ಹಣ ಹಿಂಪಡೆಯುವ ನಿಯಮಗಳನ್ನು ಇನ್ನಷ್ಟು ಸರಳಗೊಳಿಸಿದೆ. ನಿವೃತ್ತಿ ಉಳಿತಾಯದ ಹಣವನ್ನು ಅಗತ್ಯ ವೆಚ್ಚಗಳು, ಮನೆ ಖರೀದಿ, ನವೀಕರಣ ಹಾಗೂ ವಿಶೇಷ ಸಂದರ್ಭಗಳಲ್ಲಿ ಬಳಸಿಕೊಳ್ಳಲು ಇಪಿಎಫ್ ಯೋಜನೆ 2026ರ ಅಡಿಯಲ್ಲಿ ಹೊಸ ನಿಯಮಗಳನ್ನು ಜಾರಿಗೆ ತರಲಾಗಿದೆ.
ಈ ಹಿಂದೆ ಚಾಲ್ತಿಯಲ್ಲಿದ್ದ 13 ಬಗೆಯ ಭಾಗಶಃ ಹಣ ಹಿಂಪಡೆಯುವ ನಿಯಮಗಳನ್ನು ಒಟ್ಟುಗೂಡಿಸಿ ಪ್ರಮುಖ ಮೂರು ವಿಭಾಗಗಳನ್ನಾಗಿ ವಿಂಗಡಿಸಲಾಗಿದ್ದು, ಮುಂಗಡ ಪಡೆಯಲು ಇಪಿಎಫ್ ಸದಸ್ಯತ್ವದ ಕನಿಷ್ಠ ಅವಧಿಯನ್ನು ಎಲ್ಲದಕ್ಕೂ ಅನ್ವಯವಾಗುವಂತೆ 12 ತಿಂಗಳಿಗೆ ನಿಗದಿಪಡಿಸಲಾಗಿದೆ.
ವೈದ್ಯಕೀಯ ವೆಚ್ಚಗಳಿಗೆ ಮಿತಿಯಿಲ್ಲದೆ ಹಣ ಹಿಂಪಡೆಯುವ ಅವಕಾಶ
ಚಂದಾದಾರರು ತಮ್ಮ ಅಥವಾ ತಮ್ಮ ಕುಟುಂಬದ ಸದಸ್ಯರ ವೈದ್ಯಕೀಯ ತುರ್ತು ಪರಿಸ್ಥಿತಿಗಳಿಗೆ ಇಪಿಎಫ್ ಖಾತೆಯಿಂದ ಮುಂಗಡ ಹಣ ಪಡೆಯಬಹುದು. ಹೊಸ ನಿಯಮಗಳ ಪ್ರಕಾರ, ಅನಾರೋಗ್ಯದ ಕಾರಣಕ್ಕೆ ಹಣ ಹಿಂಪಡೆಯಲು ಯಾವುದೇ ಗರಿಷ್ಠ ಮಿತಿಯನ್ನು ನಿಗದಿಪಡಿಸಿಲ್ಲ. ಚಂದಾದಾರರು ತಮ್ಮ ಸದಸ್ಯತ್ವದ ಅವಧಿಯಲ್ಲಿ ಅಗತ್ಯ ಬಿದ್ದಾಗಲೆಲ್ಲಾ ನಿಯಮಗಳಿಗೆ ಒಳಪಟ್ಟು ವೈದ್ಯಕೀಯ ಮುಂಗಡಕ್ಕಾಗಿ ಅರ್ಜಿ ಸಲ್ಲಿಸಬಹುದು. ಇದು ತುರ್ತು ಸಂದರ್ಭಗಳಲ್ಲಿ ವೈಯಕ್ತಿಕ ಉಳಿತಾಯ ಮುಗಿಯುವ ಅಥವಾ ಹೆಚ್ಚಿನ ಬಡ್ಡಿಗೆ ಸಾಲ ಮಾಡುವ ಸಂಕಷ್ಟದಿಂದ ನೌಕರರನ್ನು ಪಾರು ಮಾಡಲಿದೆ.
ಶಿಕ್ಷಣದ ವೆಚ್ಚಕ್ಕಾಗಿ ಗರಿಷ್ಠ 10 ಬಾರಿ ಮುಂಗಡ
ತಮ್ಮ ಸ್ವಂತ ಉನ್ನತ ವ್ಯಾಸಂಗಕ್ಕೆ ಅಥವಾ ಕುಟುಂಬದ ಸದಸ್ಯರ ವಿದ್ಯಾಭ್ಯಾಸದ ವೆಚ್ಚಗಳನ್ನು ಭರಿಸಲು ಚಂದಾದಾರರು ಹಣ ಹಿಂಪಡೆಯಬಹುದು. ಪರಿಷ್ಕೃತ ನಿಯಮಾವಳಿಗಳ ಅನ್ವಯ, ನೌಕರರು ತಮ್ಮ ಒಟ್ಟು ಸೇವಾ ಅವಧಿಯಲ್ಲಿ ಶಿಕ್ಷಣಕ್ಕಾಗಿ ಗರಿಷ್ಠ 10 ಬಾರಿ ಮುಂಗಡ ಹಣ ಪಡೆಯಲು ಅನುಮತಿ ನೀಡಲಾಗಿದೆ. ಈ ಮೊದಲು ಶಿಕ್ಷಣ ಮತ್ತು ಮದುವೆ ಎರಡನ್ನೂ ಸೇರಿಸಿ ಕೇವಲ ಮೂರು ಬಾರಿ ಮಾತ್ರ ಹಣ ಹಿಂಪಡೆಯಲು ಅವಕಾಶವಿತ್ತು, ಆದರೆ ಈಗ ಶಿಕ್ಷಣಕ್ಕೆ ಪ್ರತ್ಯೇಕವಾಗಿ ಹತ್ತು ಬಾರಿ ಅವಕಾಶ ಕಲ್ಪಿಸಲಾಗಿದೆ.
ಮದುವೆ ವೆಚ್ಚಗಳಿಗಾಗಿ ಐದು ಬಾರಿ ಹಣ ಪಡೆಯುವ ಸೌಲಭ್ಯ
ಚಂದಾದಾರರು ತಮ್ಮ ಸ್ವಂತ ಮದುವೆ ಅಥವಾ ಕುಟುಂಬದ ಅರ್ಹ ಸದಸ್ಯರ ವಿವಾಹ ಸಮಾರಂಭದ ವೆಚ್ಚಗಳಿಗಾಗಿ ಇಪಿಎಫ್ ಖಾತೆಯ ಹಣವನ್ನು ಬಳಸಿಕೊಳ್ಳಬಹುದು. ಹೊಸ ಚೌಕಟ್ಟಿನಡಿಯಲ್ಲಿ, ಇಪಿಎಫ್ ಸದಸ್ಯತ್ವದ ಅವಧಿಯಲ್ಲಿ ಮದುವೆ ಸಂಬಂಧಿತ ಮುಂಗಡವನ್ನು ಗರಿಷ್ಠ ಐದು ಬಾರಿ ಪಡೆಯಲು ಅವಕಾಶವಿದೆ. ಈ ನಿಯಮವು ಕುಟುಂಬದ ಮಹತ್ವದ ಜವಾಬ್ದಾರಿಗಳನ್ನು ಸುಲಭವಾಗಿ ನಿಭಾಯಿಸಲು ನೌಕರರಿಗೆ ಹೆಚ್ಚಿನ ಆರ್ಥಿಕ ನೆರವು ನೀಡುತ್ತದೆ.
ವಸತಿ ಅಗತ್ಯಗಳಿಗಾಗಿ ಐದು ಬಾರಿ ಮುಂಗಡಕ್ಕೆ ಅನುಮೋದನೆ
ಫ್ಲಾಟ್, ಮನೆ ಅಥವಾ ನಿವೇಶನ ಖರೀದಿ, ನೂತನ ಮನೆ ನಿರ್ಮಾಣ, ಗೃಹ ಸಾಲದ ಮರುಪಾವತಿ ಹಾಗೂ ಪ್ರಸ್ತುತ ಇರುವ ಮನೆಯ ದುರಸ್ತಿ ಅಥವಾ ನವೀಕರಣದಂತಹ ವಸತಿ ಸಂಬಂಧಿತ ಅಗತ್ಯಗಳಿಗೂ ಮುಂಗಡ ಪಡೆಯಬಹುದು. ಅರ್ಹತಾ ಮಾನದಂಡಗಳು ಮತ್ತು ನಿಗದಿತ ಮಿತಿಗಳಿಗೆ ಒಳಪಟ್ಟು, ಚಂದಾದಾರರು ತಮ್ಮ ಸಂಪೂರ್ಣ ಸೇವಾ ಅವಧಿಯಲ್ಲಿ ವಸತಿ ಉದ್ದೇಶಗಳಿಗಾಗಿ ಒಟ್ಟು ಐದು ಬಾರಿ ಇಪಿಎಫ್ ಹಣವನ್ನು ಹಿಂಪಡೆಯಲು ಅವಕಾಶ ಕಲ್ಪಿಸಲಾಗಿದೆ.
ವಿಶೇಷ ಸಂದರ್ಭಗಳಲ್ಲಿ ವರ್ಷಕ್ಕೆ ಎರಡು ಬಾರಿ ಪಡೆಯಬಹುದು
ಇಪಿಎಫ್‌ಒ ಸೆಂಟ್ರಲ್ ಬೋರ್ಡ್ ಅಧಿಸೂಚಿಸುವ ವಿಶೇಷ ಸಂದರ್ಭಗಳ ವಿಭಾಗದಲ್ಲಿಯೂ ಚಂದಾದಾರರು ಮುಂಗಡ ಪಡೆಯಬಹುದು. ಯಾವುದೇ ಅನಿರೀಕ್ಷಿತ ಅಥವಾ ತುರ್ತು ಪರಿಸ್ಥಿತಿಗಳು ಎದುರಾದಾಗ ನೌಕರರು ಒಂದು ಹಣಕಾಸು ವರ್ಷದಲ್ಲಿ ಗರಿಷ್ಠ ಎರಡು ಬಾರಿ ಈ ಸೌಲಭ್ಯವನ್ನು ಬಳಸಿಕೊಳ್ಳಬಹುದಾಗಿದೆ.
ಖಾತೆಯಿಂದ ಎಷ್ಟು ಮೊತ್ತ ಹಿಂಪಡೆಯಲು ಸಾಧ್ಯ?
12 ತಿಂಗಳ ಸದಸ್ಯತ್ವ ಪೂರ್ಣಗೊಳಿಸಿದ ನೌಕರರು ತಮ್ಮ ಇಪಿಎಫ್ ಖಾತೆಯಲ್ಲಿರುವ ಒಟ್ಟು ಮೊತ್ತದ ಶೇಕಡಾ 75 ರಷ್ಟನ್ನು ಮುಂಗಡವಾಗಿ ಹಿಂಪಡೆಯಬಹುದು. ಈ ಮೊತ್ತದಲ್ಲಿ ನೌಕರನ ಪಾಲು, ಮಾಲೀಕರ ಪಾಲು ಮತ್ತು ಅದಕ್ಕೆ ಜಮೆಯಾದ ಬಡ್ಡಿ ಎಲ್ಲವೂ ಸೇರಿರುತ್ತದೆ. ಆದರೆ ದೀರ್ಘಾವಧಿಯ ನಿವೃತ್ತಿ ಉಳಿತಾಯ ಮತ್ತು ಚಕ್ರಬಡ್ಡಿಯ ಪ್ರಯೋಜನವನ್ನು ಕಾಪಾಡುವ ದೃಷ್ಟಿಯಿಂದ ಕನಿಷ್ಠ ಶೇಕಡಾ 25 ರಷ್ಟು ಮೊತ್ತವನ್ನು ಖಾತೆಯಲ್ಲೇ ಕಡ್ಡಾಯವಾಗಿ ಉಳಿಸಿಕೊಳ್ಳಲಾಗುತ್ತದೆ. 12 ತಿಂಗಳ ಸೇವೆ ಪೂರ್ಣಗೊಳಿಸಿದ ಮಾತ್ರಕ್ಕೆ ಅರ್ಜಿ ತಾನಾಗಿಯೇ ಅಂಗೀಕಾರವಾಗುವುದಿಲ್ಲ, ಬದಲಿಗೆ ಹಣ ಹಿಂಪಡೆಯುವ ಉದ್ದೇಶ ಮತ್ತು ಅದಕ್ಕೆ ಸಂಬಂಧಿಸಿದ ಷರತ್ತುಗಳು ಪೂರ್ಣಗೊಂಡಿರಬೇಕು.
