ಕಠ್ಮಂಡು: ನೇಪಾಳದ ಪಶ್ಚಿಮ ಭಾಗದ ದಾರ್ಚುಲಾ ಜಿಲ್ಲೆಯಲ್ಲಿ ಸಂಭವಿಸಿದ ಭಾರಿ ಭೂಕುಸಿತದಿಂದಾಗಿ ಚೌಲಾನಿ ನದಿಯ ಹರಿವು ಭಾಗಶಃ ಸ್ಥಗಿತಗೊಂಡಿದ್ದು, ನದಿತೀರದ ಪ್ರದೇಶಗಳಲ್ಲಿ ದಿಢೀರ್ ಪ್ರವಾಹದ (ಫ್ಲ್ಯಾಶ್ ಫ್ಲಡ್) ಭೀತಿ ಎದುರಾಗಿದೆ. ಇತ್ತೀಚೆಗಷ್ಟೇ ಸಂಭವಿಸಿದ ಭೀಕರ ಪ್ರವಾಹ ಮತ್ತು ಭೂಕುಸಿತದ ದುರಂತಗಳಿಂದ ಚೇತರಿಸಿಕೊಳ್ಳುತ್ತಿರುವ ನೇಪಾಳಕ್ಕೆ ಈ ಘಟನೆ ಹೊಸ ಆತಂಕವನ್ನು ತಂದಿಟ್ಟಿದೆ.
ನದಿಗೆ ಮತ್ತಷ್ಟು ಮಣ್ಣು ಮತ್ತು ಕಲ್ಲುಬಂಡೆಗಳು ಬಿದ್ದರೆ ನೀರಿನ ಹರಿವು ಸಂಪೂರ್ಣ ಕಡಿತಗೊಂಡು ಅಪಾಯಕಾರಿ ಪ್ರವಾಹ ಸೃಷ್ಟಿಯಾಗುವ ಸಾಧ್ಯತೆ ಇರುವುದರಿಂದ, ನದಿತೀರದ ಜನವಸತಿ ಪ್ರದೇಶಗಳಿಗೆ ಆಡಳಿತವು ಹೈ ಅಲರ್ಟ್ ಘೋಷಿಸಿದೆ. ಪರಿಸ್ಥಿತಿಯ ಮೇಲೆ ನಿಗಾ ಇಡಲು ಭದ್ರತಾ ಪಡೆಗಳನ್ನು ನಿಯೋಜಿಸಲಾಗಿದೆ.
ಚೌಲಾನಿ ನದಿಯ ಹರಿವಿಗೆ ಅಡ್ಡಿ
ಅಪಿ ಹಿಮಾಲ್ ಗ್ರಾಮೀಣ ಪುರಸಭೆಯ ಭಟ್ಟರ್ ಪ್ರದೇಶದಲ್ಲಿ ಈ ಭೂಕುಸಿತ ಸಂಭವಿಸಿದೆ. ಬೆಟ್ಟದಿಂದ ಉರುಳಿಬಿದ್ದ ಭಾರಿ ಪ್ರಮಾಣದ ಮಣ್ಣು ಮತ್ತು ಕಲ್ಲುಗಳು ಚೌಲಾನಿ ನದಿಗೆ ಬಿದ್ದ ಪರಿಣಾಮ ನೀರಿನ ಸಹಜ ಹರಿವಿಗೆ ತಡೆಯುಂಟಾಗಿದೆ. ಹಾನಿಯ ಪ್ರಮಾಣವನ್ನು ಅಂದಾಜಿಸಲಾಗುತ್ತಿದ್ದು, ಪೀಡಿತ ಪ್ರದೇಶಕ್ಕೆ ಪೊಲೀಸರನ್ನು ಕಳುಹಿಸಲಾಗಿದೆ ಎಂದು ದಾರ್ಚುಲಾ ಮುಖ್ಯ ಜಿಲ್ಲಾಧಿಕಾರಿ ಬರ್ತರಾಜ್ ಪೌಡೆಲ್ ತಿಳಿಸಿದ್ದಾರೆ. ಭೂಕುಸಿತ ಮುಂದುವರಿದರೆ ನದಿಯ ನೀರು ಕೆಳಭಾಗದ ಪ್ರದೇಶಗಳಿಗೆ ನುಗ್ಗಿ ಭಾರಿ ಅನಾಹುತ ಸೃಷ್ಟಿಸಬಹುದು ಎಂದು ಜಿಲ್ಲಾಡಳಿತ ಎಚ್ಚರಿಸಿದೆ.
Fresh landslide in Nepal partially blocks a river
Water is already cutting through again
Reports say this is a localized event in far-western Nepal — unrelated to the much larger August 2026 flood disaster pic.twitter.com/e3Tte0Lgor
— Sabbir Ahmed (@Sabbiry5x) September 5, 2026
10 ಕುಟುಂಬಗಳ ಸ್ಥಳಾಂತರ
ಭೂಕುಸಿತದ ತೀವ್ರತೆಗೆ ಭಟ್ಟರ್ ಜನವಸತಿ ಪ್ರದೇಶಕ್ಕೂ ಅಪಾಯ ಎದುರಾಗಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ 10 ಕುಟುಂಬಗಳನ್ನು ಅವರ ಸಂಬಂಧಿಕರ ಮನೆಗಳಿಗೆ ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದೆ. ಸ್ಥಳೀಯ ಆಡಳಿತವು ಸಂತ್ರಸ್ತರಿಗೆ ಅಗತ್ಯ ಆಹಾರ ಮತ್ತು ಸಾಮಗ್ರಿಗಳನ್ನು ಒದಗಿಸುತ್ತಿದೆ. ನಿರಂತರ ಭೂಕುಸಿತದಿಂದಾಗಿ ರಸ್ತೆಗಳು ಮತ್ತು ಚಾರಣ ಮಾರ್ಗಗಳು (ಟ್ರೆಕ್ಕಿಂಗ್ ಟ್ರಯಲ್ಸ್) ಸಂಪೂರ್ಣ ಹಾಳಾಗಿವೆ.
ಸ್ಥಳೀಯ ಆಡಳಿತ ಮತ್ತು ಭದ್ರತಾ ಸಂಸ್ಥೆಗಳು ತುರ್ತು ರಕ್ಷಣಾ ಕಾರ್ಯಾಚರಣೆಗೆ ಸದಾ ಸನ್ನದ್ಧವಾಗಿರಬೇಕು ಎಂದು ಸುದೂರ್ಪಶ್ಚಿಮ ಪ್ರಾಂತ್ಯದ ಮುಖ್ಯಮಂತ್ರಿ ಖಗ್ರಾಜ್ ಭಟ್ಟ ನಿರ್ದೇಶನ ನೀಡಿದ್ದಾರೆ.
ಯಥಾಸ್ಥಿತಿಯತ್ತ ನದಿಯ ಹರಿವು
ಸದ್ಯದ ಪರಿಸ್ಥಿತಿಯಲ್ಲಿ ಕೊಂಚ ಸುಧಾರಣೆ ಕಂಡುಬಂದಿದ್ದು, ಸೆಪ್ಟೆಂಬರ್ 4ರ ವರದಿಗಳ ಪ್ರಕಾರ ನೀರಿನ ರಭಸಕ್ಕೆ ನದಿಗೆ ಅಡ್ಡಲಾಗಿದ್ದ ಅವಶೇಷಗಳು ಕೊಚ್ಚಿಹೋಗಿ ನೀರು ಸಹಜವಾಗಿ ಹರಿಯಲಾರಂಭಿಸಿದೆ ಎಂದು ಸಶಸ್ತ್ರ ಪೊಲೀಸ್ ಪಡೆ (ಎಪಿಎಫ್) ಮಾಹಿತಿ ನೀಡಿದೆ. ಆದರೂ ಯಾವುದೇ ಅನಾಹುತ ಸಂಭವಿಸದಂತೆ ಭದ್ರತಾ ಸಿಬ್ಬಂದಿ ಕಟ್ಟೆಚ್ಚರ ವಹಿಸಿದ್ದಾರೆ.
ಚಮೇಲಿಯಾ ಎಂದೂ ಕರೆಯಲ್ಪಡುವ ಈ ಚೌಲಾನಿ ನದಿಯು ಅಪಿ ಹಿಮಾಲ್ ಪ್ರದೇಶದಲ್ಲಿ ಹುಟ್ಟಿ, ಭಾರತ-ನೇಪಾಳ ಗಡಿಯಲ್ಲಿ ಹರಿಯುವ ಮಹಾಕಾಳಿ ನದಿಯನ್ನು ಸೇರುತ್ತದೆ. ಭಾರಿ ಮಳೆಯಿಂದಾಗಿ ನೇಪಾಳದ ಪರ್ವತ ಶ್ರೇಣಿಯ ಪ್ರದೇಶಗಳಲ್ಲಿ ಇಂತಹ ಪ್ರಾಕೃತಿಕ ವಿಕೋಪಗಳು ನಿರಂತರ ಸವಾಲಾಗಿ ಪರಿಣಮಿಸಿವೆ.
