ದೆಹಲಿ.ಸೆಪ್ಟೆಂಬರ್.05: ರೈಲ್ವೆ ಉದ್ಯೋಗಾಕಾಂಕ್ಷಿಗಳಿಗೆ ಮಹತ್ವದ ಸುದ್ದಿಯೊಂದು ಹೊರಬಿದ್ದಿದೆ. ಮುಂಬರುವ RRB NTPC ನೇಮಕಾತಿ 2026ರಡಿ ಒಟ್ಟು 5,165 ಹುದ್ದೆಗಳಿಗೆ ರೈಲ್ವೆ ಮಂಡಳಿ ಅನುಮೋದನೆ ನೀಡಿದೆ. ಪದವಿ ಹಾಗೂ ಪದವಿಪೂರ್ವ ವಿದ್ಯಾರ್ಹತೆ ಹೊಂದಿರುವ ಅಭ್ಯರ್ಥಿಗಳಿಗೆ ಈ ನೇಮಕಾತಿಯಲ್ಲಿ ಅವಕಾಶ ಕಲ್ಪಿಸಲಾಗಿದೆ.
ಒಟ್ಟು 5,165 ಹುದ್ದೆಗಳಲ್ಲಿ 3,477 ಹುದ್ದೆಗಳು ಪದವಿ ಮಟ್ಟದ ಅಭ್ಯರ್ಥಿಗಳಿಗೆ ಹಾಗೂ 1,688 ಹುದ್ದೆಗಳು ಪದವಿಪೂರ್ವ ಮಟ್ಟದ ಅಭ್ಯರ್ಥಿಗಳಿಗೆ ಮೀಸಲಾಗಿವೆ. ಆದರೆ, ಈ ಹುದ್ದೆಗಳ ಅಂತಿಮ ವಿವರಗಳು ಅಧಿಕೃತ Centralised Employment Notification (CEN) ಪ್ರಕಟವಾದ ಬಳಿಕವೇ ಖಚಿತವಾಗಲಿದೆ.
ಪದವಿ ಮಟ್ಟದ 3,477 ಹುದ್ದೆಗಳು
ಪದವಿ ವಿದ್ಯಾರ್ಹತೆ ಹೊಂದಿರುವ ಅಭ್ಯರ್ಥಿಗಳಿಗಾಗಿ ವಿವಿಧ ಹುದ್ದೆಗಳನ್ನು ಗುರುತಿಸಲಾಗಿದೆ. ಇದರಲ್ಲಿ Goods Train Manager ಹುದ್ದೆಗೆ 2,750, Chief Commercial-cum-Ticket Supervisor ಹುದ್ದೆಗೆ 56, Junior Accounts Assistant-cum-Typist ಹುದ್ದೆಗೆ 300 ಹಾಗೂ Senior Clerk-cum-Typist ಹುದ್ದೆಗೆ 371 ಹುದ್ದೆಗಳು ಅನುಮೋದನೆಯಾಗಿವೆ.
ಈ ಎಲ್ಲಾ ಹುದ್ದೆಗಳನ್ನು ಸೇರಿಸಿದರೆ ಪದವಿ ಮಟ್ಟದಲ್ಲಿ ಒಟ್ಟು 3,477 ಹುದ್ದೆಗಳು ಲಭ್ಯವಿವೆ.
ಆದರೆ Station Master ಸೇರಿದಂತೆ ಕೆಲವು ಹುದ್ದೆಗಳ ಖಾಲಿ ಸ್ಥಾನಗಳ ವಿವರಗಳನ್ನು ಪ್ರತ್ಯೇಕವಾಗಿ ಪ್ರಕಟಿಸಲಾಗುವುದು ಎಂದು ತಿಳಿಸಲಾಗಿದೆ.
ಪದವಿಪೂರ್ವ ಅಭ್ಯರ್ಥಿಗಳಿಗೆ 1,688 ಹುದ್ದೆಗಳು
ಪದವಿಪೂರ್ವ ಮಟ್ಟದ ಅಭ್ಯರ್ಥಿಗಳಿಗೂ ರೈಲ್ವೆ ಇಲಾಖೆಯಲ್ಲಿ ಉದ್ಯೋಗ ಪಡೆಯಲು ಅವಕಾಶವಿದೆ. ಈ ವಿಭಾಗದಲ್ಲಿ Trains Clerk ಹುದ್ದೆಗೆ 188, Commercial-cum-Ticket Clerk (CCTC) ಹುದ್ದೆಗೆ 700, Accounts Clerk-cum-Typist ಹುದ್ದೆಗೆ 200 ಹಾಗೂ Junior Clerk-cum-Typist ಹುದ್ದೆಗೆ 600 ಹುದ್ದೆಗಳು ಅನುಮೋದಿಸಲಾಗಿದೆ.
ಈ ಮೂಲಕ ಪದವಿಪೂರ್ವ ಮಟ್ಟದಲ್ಲಿ ಒಟ್ಟು 1,688 ಹುದ್ದೆಗಳು ಲಭ್ಯವಾಗಲಿವೆ.
ಶೀಘ್ರದಲ್ಲೇ RRB NTPC ಅಧಿಕೃತ ಅಧಿಸೂಚನೆ
RRB NTPC Recruitment 2026ರ ವಿಸ್ತೃತ ಅಧಿಸೂಚನೆ ಇನ್ನಷ್ಟೇ ಬಿಡುಗಡೆಯಾಗಬೇಕಿದೆ. ಸಂಬಂಧಪಟ್ಟ ರೈಲ್ವೆ ವಲಯಗಳು ತಮ್ಮ ಅಂತಿಮ ಖಾಲಿ ಹುದ್ದೆಗಳ ವಿವರಗಳನ್ನು ಸೆಪ್ಟೆಂಬರ್ 7ರಿಂದ ಸೆಪ್ಟೆಂಬರ್ 26, 2026ರೊಳಗೆ ಸಲ್ಲಿಸುವ ನಿರೀಕ್ಷೆಯಿದೆ.
ಈ ಪ್ರಕ್ರಿಯೆ ಪೂರ್ಣಗೊಂಡ ನಂತರ ರೈಲ್ವೆ ನೇಮಕಾತಿ ಮಂಡಳಿಗಳು ಅಧಿಕೃತ CEN ಅಧಿಸೂಚನೆಯನ್ನು ಪ್ರಕಟಿಸಲಿವೆ. ಇದರಲ್ಲಿ ವಿದ್ಯಾರ್ಹತೆ, ವಯೋಮಿತಿ, ಅರ್ಜಿ ಸಲ್ಲಿಸುವ ದಿನಾಂಕ, ಆಯ್ಕೆ ಪ್ರಕ್ರಿಯೆ, ಪರೀಕ್ಷಾ ವಿಧಾನ, ಶುಲ್ಕ ಸೇರಿದಂತೆ ಸಂಪೂರ್ಣ ಮಾಹಿತಿಯನ್ನು ನೀಡಲಾಗುತ್ತದೆ.
ಆದ್ದರಿಂದ ಅಭ್ಯರ್ಥಿಗಳು ಅಧಿಕೃತ RRB ವೆಬ್ಸೈಟ್ಗಳನ್ನು ನಿಯಮಿತವಾಗಿ ಪರಿಶೀಲಿಸುವುದು ಉತ್ತಮ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ಅನಧಿಕೃತ ಅರ್ಜಿ ದಿನಾಂಕ ಅಥವಾ ಹುದ್ದೆಗಳ ಮಾಹಿತಿಯನ್ನು ನಂಬದಂತೆ ಸೂಚಿಸಲಾಗಿದೆ.
ಅರ್ಜಿ ಸಲ್ಲಿಸುವುದು ಹೇಗೆ?
ಅಧಿಕೃತ ಅಧಿಸೂಚನೆ ಬಿಡುಗಡೆಯಾದ ಬಳಿಕ ಅಭ್ಯರ್ಥಿಗಳು ತಮ್ಮ ಸಂಬಂಧಪಟ್ಟ RRB ಪ್ರಾದೇಶಿಕ ವೆಬ್ಸೈಟ್ಗೆ ಭೇಟಿ ನೀಡಬೇಕು.
ಅಲ್ಲಿ RRB NTPC Recruitment 2026ರ ಆನ್ಲೈನ್ ಅರ್ಜಿ ಲಿಂಕ್ ಆಯ್ಕೆ ಮಾಡಿಕೊಂಡು ನೋಂದಣಿ ಮಾಡಬೇಕು. ನಂತರ ಲಾಗಿನ್ ಮಾಡಿ ಅರ್ಜಿ ನಮೂನೆಯಲ್ಲಿ ಕೇಳಲಾಗುವ ವೈಯಕ್ತಿಕ ಹಾಗೂ ಶೈಕ್ಷಣಿಕ ಮಾಹಿತಿಯನ್ನು ಭರ್ತಿ ಮಾಡಬೇಕು.
ಅಭ್ಯರ್ಥಿಗಳು ಅಗತ್ಯವಿರುವ ಫೋಟೋ, ಸಹಿ ಸೇರಿದಂತೆ ದಾಖಲೆಗಳನ್ನು ಅಪ್ಲೋಡ್ ಮಾಡಬೇಕು. ಅರ್ಜಿಯಲ್ಲಿರುವ ಎಲ್ಲಾ ಮಾಹಿತಿಯನ್ನು ಪರಿಶೀಲಿಸಿದ ಬಳಿಕ ನಿಗದಿತ ಅರ್ಜಿ ಶುಲ್ಕವನ್ನು ಆನ್ಲೈನ್ ಮೂಲಕ ಪಾವತಿಸಿ ಅರ್ಜಿಯನ್ನು ಸಲ್ಲಿಸಬೇಕು.
ಅರ್ಜಿಯನ್ನು ಸಲ್ಲಿಸಿದ ನಂತರ ಅದರ ಪ್ರತಿಯನ್ನು ಡೌನ್ಲೋಡ್ ಮಾಡಿಕೊಂಡು ಭವಿಷ್ಯದ ಬಳಕೆಗಾಗಿ ಸುರಕ್ಷಿತವಾಗಿ ಇಟ್ಟುಕೊಳ್ಳುವುದು ಉತ್ತಮ.
