ಇತ್ತೀಚಿನ ದಿನಗಳಲ್ಲಿ ನೀವು ಸೋಶಿಯಲ್ ಮೀಡಿಯಾ ಬಳಸುತ್ತಿದ್ದರೆ, ಫುಟ್ ಬಾಲ್ ಸೂಪರ್ ಸ್ಟಾರ್ ಅರ್ಲಿಂಗ್ ಹಾಲೆಂಡ್ ರಾತ್ರಿ ಮಲಗುವ ಮುನ್ನ ಕಿತ್ತಳೆ ಬಣ್ಣದ ಕನ್ನಡಕ ಧರಿಸಿರುವ ಫೋಟೋಗಳನ್ನು ಖಂಡಿತ ನೋಡಿರುತ್ತೀರಿ. ಈ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಕುತೂಹಲ ಮೂಡಿಸಿದ್ದು, “ಬ್ಲೂ ಲೈಟ್ ಗ್ಲಾಸ್ಗಳು” ನಿಜಕ್ಕೂ ಕ್ರೀಡಾಪಟುಗಳ ಅತ್ಯುತ್ತಮ ಪ್ರದರ್ಶನದ ರಹಸ್ಯವೇ ಅಥವಾ ಇದು ಕೇವಲ ಒಂದು ತಾತ್ಕಾಲಿಕ ಫ್ಯಾಷನ್ ಟ್ರೆಂಡ್ ಮಾತ್ರವೇ ಎಂಬ ಚರ್ಚೆ ಶುರುವಾಗಿದೆ.
ಖ್ಯಾತ ಫುಟ್ ಬಾಲ್ ಆಟಗಾರ ಹಾಲೆಂಡ್ ಅವರು ತಮ್ಮ ಫಿಟ್ನೆಸ್ ದಿನಚರಿಯಲ್ಲಿ ನಿದ್ದೆಗೆ ಅತಿ ಹೆಚ್ಚು ಪ್ರಾಮುಖ್ಯತೆ ನೀಡುತ್ತಾರೆ. ಮಲಗುವ ಕೆಲವು ಗಂಟೆಗಳ ಮುನ್ನ ಅವರು ಈ ಬ್ಲೂ ಲೈಟ್ ಫಿಲ್ಟರ್ ಕನ್ನಡಕಗಳನ್ನು ಧರಿಸುತ್ತಾರೆ. ಕೇವಲ ಹಾಲೆಂಡ್ ಮಾತ್ರವಲ್ಲ, ಒಲಿಂಪಿಕ್ಸ್ ಆಟಗಾರರಿಂದ ಹಿಡಿದು ಎನ್ಬಿಎ ತಾರೆಗಳವರೆಗೆ ಅನೇಕ ಗಣ್ಯ ಕ್ರೀಡಾಪಟುಗಳು ತಮ್ಮ ನಿದ್ದೆಯ ಗುಣಮಟ್ಟವನ್ನು ಕಾಯ್ದುಕೊಳ್ಳಲು ಈ ವಿಧಾನವನ್ನು ಅನುಸರಿಸುತ್ತಿದ್ದಾರೆ. ಏಕೆಂದರೆ ದೇಹದ ದಣಿವಾರಿಕೆ ಮತ್ತು ಚೇತರಿಕೆ ಜಿಮ್ನಲ್ಲಿ ಆಗುವುದಿಲ್ಲ, ಬದಲಿಗೆ ನಾವು ಗಾಢ ನಿದ್ದೆಯಲ್ಲಿದ್ದಾಗ ಆಗುತ್ತದೆ. ಆದರೆ, ಕ್ರೀಡಾಪಟುಗಳು ಬಳಸುತ್ತಾರೆ ಎಂದಾಕ್ಷಣ ನಾವೂ ಇದನ್ನು ಕೊಳ್ಳಬೇಕೇ ಎನ್ನುವುದನ್ನು ತಿಳಿಯುವುದು ಮುಖ್ಯ.
ಅಷ್ಟಕ್ಕೂ ‘ಬ್ಲೂ ಲೈಟ್’ ಎಂದರೇನು? ಅದು ನಿದ್ದೆಯನ್ನು ಹೇಗೆ ಕೆಡಿಸುತ್ತದೆ?
ಬ್ಲೂ ಲೈಟ್ ಅಂದರೆ ನೀಲಿ ಬೆಳಕು ಎನ್ನುವುದು ನೈಸರ್ಗಿಕವಾಗಿ ಸೂರ್ಯನ ಕಿರಣಗಳಿಂದ ಬರುವ ಒಂದು ದೃಶ್ಯ ಬೆಳಕಾಗಿದೆ. ಹಗಲಿನಲ್ಲಿ ಇದು ನಮಗೆ ತುಂಬಾ ಪ್ರಯೋಜನಕಾರಿ ಆಗಿದ್ದು, ನಮ್ಮನ್ನು ಚುರುಕಾಗಿಡಲು, ಏಕಾಗ್ರತೆ ಹೆಚ್ಚಿಸಲು ಮತ್ತು ನಮ್ಮ ದೇಹದ ಜೈವಿಕ ಗಡಿಯಾರವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ.
ಆದರೆ ಅಸಲಿ ಸಮಸ್ಯೆ ಶುರುವಾಗುವುದೇ ರಾತ್ರಿಯ ಸಮಯದಲ್ಲಿ. ನಮ್ಮ ಸ್ಮಾರ್ಟ್ಫೋನ್ಗಳು, ಲ್ಯಾಪ್ಟಾಪ್ಗಳು, ಟ್ಯಾಬ್ಲೆಟ್ಗಳು ಮತ್ತು ಟಿವಿ ಪರದೆಗಳು ಸಹ ಭಾರಿ ಪ್ರಮಾಣದಲ್ಲಿ ಬ್ಲೂ ಲೈಟ್ ಅನ್ನು ಹೊರಸೂಸುತ್ತವೆ. ರಾತ್ರಿ ತಡವಾಗಿ ಇವುಗಳನ್ನು ನೋಡುವುದರಿಂದ, ಮೆದುಳಿನಲ್ಲಿ ನಿದ್ದೆಯನ್ನು ಪ್ರೇರೇಪಿಸುವ ‘ಮೆಲಟೋನಿನ್’ ಎಂಬ ಹಾರ್ಮೋನ್ ಬಿಡುಗಡೆ ತಡವಾಗುತ್ತದೆ. ಪರಿಣಾಮವಾಗಿ, ತಡರಾತ್ರಿಯವರೆಗೆ ರೀಲ್ಸ್ ಸ್ಕ್ರಾಲ್ ಮಾಡುವ ಅಥವಾ ಸಿನಿಮಾ ನೋಡುವ ಜನರಿಗೆ ಬೇಗ ನಿದ್ದೆ ಬರುವುದಿಲ್ಲ.
ಈ ವಿಶೇಷ ಕನ್ನಡಕಗಳ ಲೆನ್ಸ್ ಗಳು ಡಿಜಿಟಲ್ ಪರದೆಗಳಿಂದ ಬರುವ ನೀಲಿ ಕಿರಣಗಳನ್ನು ಕಣ್ಣಿಗೆ ತಲುಪದಂತೆ ತಡೆಯುತ್ತವೆ. ಇದರಿಂದ ಮೆದುಳಿಗೆ ರಾತ್ರಿಯಾಗಿದೆ ಎಂಬ ಸ್ಪಷ್ಟ ಸಂದೇಶ ತಲುಪಿ, ಮೆಲಟೋನಿನ್ ಹಾರ್ಮೋನ್ ನೈಸರ್ಗಿಕವಾಗಿ ಬಿಡುಗಡೆಯಾಗಲು ಆರಂಭವಾಗುತ್ತದೆ. ಕ್ರೀಡಾಪಟುಗಳಿಗೆ ಉತ್ತಮ ನಿದ್ದೆ ಸಿಕ್ಕಾಗ, ಅವರ ಸ್ನಾಯುಗಳು ಬೇಗ ಚೇತರಿಸಿಕೊಳ್ಳುತ್ತವೆ, ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ ಮತ್ತು ಮರುದಿನ ಮೈದಾನದಲ್ಲಿ ಅವರ ಪ್ರತಿಕ್ರಿಯೆಯ ವೇಗ ಉತ್ತಮವಾಗಿರುತ್ತದೆ.
ಸಾಮಾನ್ಯ ಜನರಿಗೆ ಇದು ಪ್ರಯೋಜನಕಾರಿಯೇ?
ಇದು ಖಂಡಿತವಾಗಿಯೂ ಸಹಾಯ ಮಾಡಬಹುದು, ಆದರೆ ಸೋಶಿಯಲ್ ಮೀಡಿಯಾದಲ್ಲಿ ಬಿಂಬಿಸುವಷ್ಟು ಪವಾಡ ಸದೃಶವಾಗಿಯೇನೂ ಅಲ್ಲ. ರಾತ್ರಿ ಮಲಗುವ ಮುನ್ನ ಆಫೀಸ್ ಕೆಲಸ ಮಾಡುವವರಿಗೆ ಅಥವಾ ಫೋನ್ ಬಳಸುವ ಅಭ್ಯಾಸ ಇರುವವರಿಗೆ ಇದು ಸ್ವಲ್ಪ ಮಟ್ಟಿಗೆ ಬೇಗ ನಿದ್ದೆ ಬರಲು ಸಹಾಯ ಮಾಡಬಹುದು.
ಆದರೆ ವಿಜ್ಞಾನಿಗಳು ಮತ್ತು ಸಂಶೋಧನೆಗಳ ಪ್ರಕಾರ ಇದರ ಫಲಿತಾಂಶಗಳು ಎಲ್ಲರಲ್ಲೂ ಒಂದೇ ತರ ಇರುವುದಿಲ್ಲ. ಕೇವಲ ಬ್ಲೂ ಲೈಟ್ ಕನ್ನಡಕ ಧರಿಸುವುದರಿಂದಲೇ ನಿದ್ದೆಯ ಗುಣಮಟ್ಟ ಸಂಪೂರ್ಣ ಸುಧಾರಿಸುತ್ತದೆ ಅಥವಾ ಕಣ್ಣಿನ ಆಯಾಸ ಕಡಿಮೆಯಾಗುತ್ತದೆ ಎಂಬುದಕ್ಕೆ ಖಚಿತ ಪುರಾವೆಗಳಿಲ್ಲ. ಉತ್ತಮ ನಿದ್ದೆಯ ಹವ್ಯಾಸಗಳ ಜೊತೆಗೆ ಇದನ್ನು ಬಳಸಿದಾಗ ಮಾತ್ರ ಇದರ ಲಾಭ ಸಿಗುತ್ತದೆ.
ಕ್ರೀಡಾಪಟುಗಳು ಕೇವಲ ಈ ಕನ್ನಡಕದ ಮೇಲಷ್ಟೇ ಅವಲಂಬಿತರಾಗಿರುವುದಿಲ್ಲ. ಅವರು ಸರಿಯಾದ ಸಮಯಕ್ಕೆ ಮಲಗುತ್ತಾರೆ, ರಾತ್ರಿ ಲಘು ಆಹಾರ ಸೇವಿಸುತ್ತಾರೆ, ನಿಯಮಿತವಾಗಿ ವ್ಯಾಯಾಮ ಮಾಡುತ್ತಾರೆ, ರಾತ್ರಿ ಕಾಫಿ ಅಥವಾ ಚಹಾದಿಂದ ದೂರವಿರುತ್ತಾರೆ ಮತ್ತು ಕತ್ತಲೆಯಾದ ತಂಪಾದ ಕೋಣೆಯಲ್ಲಿ 7 ರಿಂದ 9 ಗಂಟೆಗಳ ಕಾಲ ತಡೆರಹಿತವಾಗಿ ಮಲಗುತ್ತಾರೆ. ಈ ಎಲ್ಲಾ ಶಿಸ್ತಿನ ಅಭ್ಯಾಸಗಳ ನಡುವೆ ಬ್ಲೂ ಲೈಟ್ ಗ್ಲಾಸ್ ಕೇವಲ ಒಂದು ಸಣ್ಣ ಪೂರಕ ಭಾಗವಷ್ಟೇ ಆಗಿದೆ.
ಇದನ್ನು ಖರೀದಿಸುವುದು ಯೋಗ್ಯವೇ?
ನಿಮ್ಮ ಇಡೀ ಸಂಜೆ ಮತ್ತು ರಾತ್ರಿಯ ಸಮಯ ಫೋನ್ ಅಥವಾ ಲ್ಯಾಪ್ಟಾಪ್ಗಳಲ್ಲೇ ಕಳೆಯುತ್ತಿದ್ದರೆ, ಮಲಗುವ ಮುನ್ನ 1 ರಿಂದ 3 ಗಂಟೆಗಳ ಕಾಲ ಈ ಕನ್ನಡಕವನ್ನು ಧರಿಸಿ ನೋಡುವುದು ತಪ್ಪಲ್ಲ. ಇದರಿಂದ ಯಾವುದೇ ಅಡ್ಡಪರಿಣಾಮಗಳಿಲ್ಲ. ಆದರೆ ನೀವು ರಾತ್ರಿ 2 ಗಂಟೆಯವರೆಗೆ ಫೋನ್ ನೋಡುತ್ತಾ, ಈ ಕನ್ನಡಕ ನನ್ನನ್ನು ಕಾಪಾಡುತ್ತದೆ ಎಂದುಕೊಂಡರೆ ಅದು ನಿಮ್ಮ ಭ್ರಮೆಯಷ್ಟೇ ಆಗಿರುತ್ತದೆ.
ನಿದ್ದೆಯ ವಿಷಯದಲ್ಲಿ ಇಂದಿಗೂ ಹಳೆಯ ಸೂತ್ರಗಳೇ ಅತ್ಯಂತ ಪ್ರಭಾವಶಾಲಿ ಎನ್ನುತ್ತಾರೆ ತಜ್ಞರು. ಮಲಗುವ ಕನಿಷ್ಠ ಒಂದು ಗಂಟೆಯ ಮುನ್ನ ಮೊಬೈಲ್ ಪಕ್ಕಕ್ಕಿಟ್ಟು, ಕೋಣೆಯ ದೀಪಗಳನ್ನು ಆರಿಸಿ, ಮೆದುಳಿಗೆ ವಿಶ್ರಾಂತಿಯ ಸಂದೇಶ ನೀಡುವುದು ಒಳ್ಳೆಯದು. ಅರ್ಲಿಂಗ್ ಹಾಲೆಂಡ್ ಅವರ ವೈರಲ್ ಕನ್ನಡಕ ನಮಗೆ ಕಲಿಸುವ ನಿಜವಾದ ಪಾಠವೆಂದರೆ, ಅವರ ದುಬಾರಿ ಕನ್ನಡಕವಲ್ಲ, ಬದಲಿಗೆ ಅವರು ನಿದ್ದೆಗೆ ನೀಡುವ ‘ಅತ್ಯುನ್ನತ ಆದ್ಯತೆ’ ಎನ್ನಬಹುದು.
