ಪರೀಕ್ಷೆಗಳಲ್ಲಿ ಅಕ್ರಮಕ್ಕೆ ‘ಎಐ ಸ್ಮಾರ್ಟ್ ಗ್ಲಾಸ್’ ಬಳಕೆ; ಏಷ್ಯಾದಾದ್ಯಂತ ಆತಂಕ ಮೂಡಿಸಿದ ಹೊಸ ತಂತ್ರಜ್ಞಾನ!

ದೆಹಲಿ.ಜೂನ್.28: ವಿದ್ಯಾರ್ಥಿಗಳು ಪರೀಕ್ಷೆಗಳಲ್ಲಿ ನಕಲು ಮಾಡಲು ಕೈಮೇಲೆ ಬರೆದುಕೊಳ್ಳುವುದು, ಚೀಟಿಗಳನ್ನು ಬಳಸುವುದು ಹಳೆಯ ಮಾತಾಯಿತು. ಆದರೆ ಈಗ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಪ್ರವೇಶದೊಂದಿಗೆ ಶೈಕ್ಷಣಿಕ ವಂಚನೆಯು ಸಂಪೂರ್ಣವಾಗಿ ಹೊಸ ಸ್ವರೂಪವನ್ನು ಪಡೆದುಕೊಂಡಿದೆ. ಪರೀಕ್ಷೆಗಳ ವೇಳೆ ಯಾರಿಗೂ ತಿಳಿಯದಂತೆ ಉತ್ತರಗಳನ್ನು ಹುಡುಕಲು ವಿದ್ಯಾರ್ಥಿಗಳು ಈಗ ಎಐ ಚಾಲಿತ ಸ್ಮಾರ್ಟ್ ಗ್ಲಾಸ್ ಗಳನ್ನು ಬಳಸುತ್ತಿದ್ದು, ಇದು ಏಷ್ಯಾದಾದ್ಯಂತ ತೀವ್ರ ಆತಂಕಕ್ಕೆ ಕಾರಣವಾಗಿದೆ.

ವಿಶೇಷವಾಗಿ ಪೂರ್ವ ಏಷ್ಯಾದ ದೇಶಗಳಲ್ಲಿ ವಿದ್ಯಾರ್ಥಿಗಳ ಭವಿಷ್ಯವನ್ನು ನಿರ್ಧರಿಸುವ ಅತ್ಯಂತ ಕಠಿಣ ಪ್ರವೇಶ ಪರೀಕ್ಷೆಗಳು ನಡೆಯುವುದರಿಂದ, ಈ ಹೊಸ ಮಾದರಿಯ ನಕಲು ಜಾಲವು ಅಧಿಕಾರಿಗಳ ನಿದ್ದೆಗೆಡಿಸಿದೆ.

ದಕ್ಷಿಣ ಕೊರಿಯಾದಲ್ಲಿ ಇಂಗ್ಲಿಷ್ ಭಾಷಾ ಪ್ರಾವೀಣ್ಯತೆಯ ಪರೀಕ್ಷೆಯೊಂದರಲ್ಲಿ ಇಬ್ಬರು ಅಭ್ಯರ್ಥಿಗಳು ಸ್ಮಾರ್ಟ್ ಗ್ಲಾಸ್ ಬಳಸಿ ನಕಲು ಮಾಡುತ್ತಿದ್ದಾಗ ಸಿಕ್ಕಿಬಿದ್ದಿದ್ದಾರೆ. ಎಐ ಕನ್ನಡಕ ಬಳಸಿ ನಡೆದ ಮೊದಲ ನಕಲು ಪ್ರಕರಣ ಇದಾಗಿದೆ.

ತೈವಾನ್ ನಲ್ಲಿ ಪ್ರತಿಷ್ಠಿತ ವೈದ್ಯಕೀಯ ಕಾಲೇಜು ಪ್ರವೇಶ ಪರೀಕ್ಷೆಯ ವೇಳೆ ವಿದ್ಯಾರ್ಥಿಯೊಬ್ಬನ ಕಣ್ಣಿನ ಅಸಹಜ ಚಲನೆಯನ್ನು ಗಮನಿಸಿದ ಮೇಲ್ವಿಚಾರಕರು ಆತನನ್ನು ತಪಾಸಣೆ ನಡೆಸಿದ್ದಾರೆ. ಈ ವೇಳೆ ಆತ ಧರಿಸಿದ್ದ ಸ್ಮಾರ್ಟ್ ಗ್ಲಾಸ್ ಅತಿಯಾಗಿ ಕಾಯುತ್ತಿರುವುದು ಕಂಡುಬಂದಿದ್ದು, ತಂತ್ರಜ್ಞಾನದ ದುರ್ಬಳಕೆ ಬಹಿರಂಗವಾಗಿದೆ.

ಈ ಪ್ರಕರಣಗಳ ಬೆನ್ನಲ್ಲೇ ವಿವಿಧ ದೇಶಗಳ ಪರೀಕ್ಷಾ ಮಂಡಳಿಗಳು ಕಠಿಣ ಕ್ರಮಗಳಿಗೆ ಮುಂದಾಗಿವೆ. ಚೀನಾವು ವಾರ್ಷಿಕವಾಗಿ 1 ಕೋಟಿಗೂ ಅಧಿಕ ವಿದ್ಯಾರ್ಥಿಗಳು ಬರೆಯುವ ಚೀನಾದ ಅತ್ಯಂತ ಕಠಿಣ ‘ಗಾವೊಕಾವೊ’ (Gaokao) ಕಾಲೇಜು ಪ್ರವೇಶ ಪರೀಕ್ಷೆಯ ವೇಳೆ, ವಿದ್ಯಾರ್ಥಿಗಳು ಧರಿಸುವ ಎಲ್ಲಾ ಕನ್ನಡಕಗಳನ್ನು ಕಡ್ಡಾಯವಾಗಿ ತಪಾಸಣೆಗೊಳಪಡಿಸಲು ಅಧಿಕಾರಿಗಳು ಆದೇಶಿಸಿದ್ದಾರೆ.

ದಕ್ಷಿಣ ಕೊರಿಯಾ ಹಾಗೂ ತೈವಾನ್ ಪರೀಕ್ಷಾ ಕೇಂದ್ರಗಳಲ್ಲಿ ಈಗಾಗಲೇ ಎಲೆಕ್ಟ್ರಾನಿಕ್ ಸಾಧನಗಳನ್ನು ನಿಷೇಧಿಸಲಾಗಿದ್ದರೂ, ಎಐ ಕನ್ನಡಕಗಳನ್ನು ಪತ್ತೆಹಚ್ಚಲು ಶಿಕ್ಷಣ ಸಚಿವಾಲಯದೊಂದಿಗೆ ಸೇರಿ ಹೊಸ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಲಾಗುತ್ತಿದೆ.

ವೇರಬಲ್ ಎಐ (ಧರಿಸಬಹುದಾದ ತಂತ್ರಜ್ಞಾನ) ಪರೀಕ್ಷಾ ವ್ಯವಸ್ಥೆಗೆ ದೊಡ್ಡ ಸವಾಲಾಗಿದೆ. ಮುಂಬರುವ ದಿನಗಳಲ್ಲಿ ಪರೀಕ್ಷೆಗಳನ್ನು ವಿಶ್ವಾಸಾರ್ಹವಾಗಿ ನಡೆಸುವುದು ಹೇಗೆ ಎಂಬುದೇ ಯಕ್ಷಪ್ರಶ್ನೆಯಾಗಿದೆ ಎಂದು ಡೀಕಿನ್ ವಿಶ್ವವಿದ್ಯಾಲಯ (ಆಸ್ಟ್ರೇಲಿಯಾ) ಉಪನ್ಯಾಸಕ ಥಾಮಸ್ ಕಾರ್ಬಿನ್ ಎಚ್ಚರಿಸಿದ್ದಾರೆ.

ಹಾಂಕಾಂಗ್ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಶ್ವವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕ ಮೆಂಗ್ ಜಿಲಿ ಅವರು ನಡೆಸಿದ ಪ್ರಾಯೋಗಿಕ ಪರೀಕ್ಷೆಯೊಂದರಲ್ಲಿ ಆಘಾತಕಾರಿ ಅಂಶಗಳು ಹೊರಬಂದಿವೆ.

ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಪರೀಕ್ಷೆಯೊಂದರಲ್ಲಿ ಮಾರುಕಟ್ಟೆಯಲ್ಲಿ ಸಿಗುವ ಸಾಮಾನ್ಯ ಸ್ಮಾರ್ಟ್ ಗ್ಲಾಸ್ ಬಳಸಿ ಅವರು ಪ್ರಯೋಗ ನಡೆಸಿದ್ದರು. ವಿದ್ಯಾರ್ಥಿ ಕೇವಲ ಪ್ರಶ್ನೆ ಪತ್ರಿಕೆಯನ್ನು ನೋಡಿದ ತಕ್ಷಣ, ಆ ಕನ್ನಡಕವು ಪ್ರಶ್ನೆಯನ್ನು ಇಂಟರ್ನೆಟ್ ಮೂಲಕ ‘ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್’ ಎಐಗೆ ರವಾನಿಸಿತ್ತು. ಕೇವಲ ಕೆಲವೇ ಸೆಕೆಂಡುಗಳಲ್ಲಿ ಎಐ ಸಿದ್ಧಪಡಿಸಿದ ನಿಖರ ಉತ್ತರಗಳು ನೇರವಾಗಿ ಕನ್ನಡಕದ ಗ್ಲಾಸ್ (Lens) ಮೇಲೆ ಮೂಡಿಬಂದಿದ್ದವು ಈ ಪ್ರಯೋಗದಲ್ಲಿ ಎಐ ಸಹಾಯ ಪಡೆದ ವಿದ್ಯಾರ್ಥಿ 100 ಜನರಿರುವ ತರಗತಿಯಲ್ಲಿ ಮೊದಲ 5 ರ್ಯಾಂಕ್ಗಳ ಒಳಗೆ ಸ್ಥಾನ ಪಡೆದಿದ್ದನು.

ಈ ಬೆಳವಣಿಗೆಯು ಶಿಕ್ಷಣ ತಜ್ಞರನ್ನು ಆಳವಾಗಿ ಯೋಚಿಸುವಂತೆ ಮಾಡಿದೆ. ಇಂದಿನ ಆಧುನಿಕ ಸ್ಮಾರ್ಟ್ ಗ್ಲಾಸ್ ಗಳು ತೀರಾ ತೆಳುವಾಗಿದ್ದು, ಸಾಮಾನ್ಯ ಕನ್ನಡಕಗಳಂತೆಯೇ ಕಾಣುವುದರಿಂದ ಇವುಗಳನ್ನು ಪತ್ತೆಹಚ್ಚುವುದು ಕಷ್ಟಸಾಧ್ಯ.ವಿದ್ಯಾರ್ಥಿಗಳು ಪರೀಕ್ಷೆಗಾಗಿ ಎಷ್ಟು ನೆನಪಿಟ್ಟುಕೊಳ್ಳಬೇಕು ಮತ್ತು ಎಐ ಲಭ್ಯವಿರುವ ಈ ಕಾಲದಲ್ಲಿ ಮೌಲ್ಯಮಾಪನ ವಿಧಾನಗಳು ಹೇಗಿರಬೇಕು ಎಂಬುದನ್ನು ನಾವು ಮರುಚಿಂತನೆ ನಡೆಸಬೇಕಿದೆ ಎಂದು ಸಂಶೋಧಕರು ಅಭಿಪ್ರಾಯಪಟ್ಟಿದ್ದಾರೆ.

ಎಐ ಅನ್ನು ಕೇವಲ ಭೀತಿಯಾಗಿ ನೋಡದೆ, ವಿದ್ಯಾರ್ಥಿಗಳಲ್ಲಿ ವಿಮರ್ಶಾತ್ಮಕ ಚಿಂತನೆ ಮತ್ತು ತಾರ್ಕಿಕ ಸಾಮರ್ಥ್ಯವನ್ನು ಬೆಳೆಸುವ ನಿಟ್ಟಿನಲ್ಲಿ ಶಿಕ್ಷಣ ವ್ಯವಸ್ಥೆ ಬದಲಾಗಬೇಕಿದೆ ಎಂದು ತಜ್ಞರು ಕರೆ ನೀಡಿದ್ದಾರೆ.