ಪುರುಷರೇ ಗಮನಿಸಿ! ಆರೋಗ್ಯವಾಗಿರಲು ಈ 5 ಸೂತ್ರಗಳನ್ನು ಎಂದಿಗೂ ಮರೆಯಬೇಡಿ

ಪುರುಷರು ಸಾಮಾನ್ಯವಾಗಿ ಇಡೀ ಕುಟುಂಬದ ಜವಾಬ್ದಾರಿಯನ್ನು ಹೆಗಲ ಮೇಲೆ ಹೊರುತ್ತಾರೆ. ಪ್ರೀತಿಪಾತ್ರರಿಗೆ ಉತ್ತಮ ಜೀವನವನ್ನು ನೀಡಲು ಹಗಲಿರುಳು ಶ್ರಮಿಸುತ್ತಾರೆ, ವೃತ್ತಿಪರ ಒತ್ತಡಗಳನ್ನು ನಿಭಾಯಿಸುತ್ತಾರೆ. ಆದರೆ, ಇವೆಲ್ಲವನ್ನೂ ಮಾಡಲು ಶಕ್ತಿ ನೀಡುವ ತಮ್ಮದೇ ಸ್ವಂತ ಆರೋಗ್ಯವನ್ನು ಮಾತ್ರ ಬಹುತೇಕ ಪುರುಷರು ನಿರ್ಲಕ್ಷಿಸುತ್ತಾರೆ.

ಹೆಚ್ಚಿನ ಪುರುಷರು ಕಾಯಿಲೆ ತೀವ್ರವಾದಾಗ ಅಥವಾ ಲಕ್ಷಣಗಳನ್ನು ತಡೆಯಲು ಸಾಧ್ಯವಾಗದಿದ್ದಾಗ ಮಾತ್ರ ವೈದ್ಯರ ಬಳಿ ಹೋಗುತ್ತಾರೆ. ಆದರೆ, ಅದೆಷ್ಟೋ ಆರೋಗ್ಯ ಸಮಸ್ಯೆಗಳು ಯಾವುದೇ ಮುನ್ಸೂಚನೆ ಇಲ್ಲದೆ ವರ್ಷಗಟ್ಟಲೆ ದೇಹದೊಳಗೆ ಸದ್ದಿಲ್ಲದೆ ಬೆಳೆಯುತ್ತಿರುತ್ತವೆ ಎಂಬುದು ಕಹಿ ಸತ್ಯ. ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಸ್ವಾರ್ಥವಲ್ಲ, ಅದು ಅನಿವಾರ್ಯ. ನೀವು ಆರೋಗ್ಯವಾಗಿದ್ದರೆ ಮಾತ್ರ ನಿಮ್ಮ ಕುಟುಂಬವನ್ನು ಚೆನ್ನಾಗಿ ನೋಡಿಕೊಳ್ಳಲು ಮತ್ತು ನಿಮ್ಮ ಗುರಿಗಳನ್ನು ತಲುಪಲು ಸಾಧ್ಯ.

ಪುರುಷರು ತಮ್ಮ ಜೀವನದಲ್ಲಿ ನೆನಪಿನಲ್ಲಿಡಬೇಕಾದ ಆ 5 ಪ್ರಮುಖ ಆರೋಗ್ಯ ಸೂತ್ರಗಳು

ನಿಯಮಿತ ಆರೋಗ್ಯ ತಪಾಸಣೆಗೆ ಆದ್ಯತೆ ನೀಡಿ
ರಕ್ತದೊತ್ತಡ (BP), ಮಧುಮೇಹ (Diabetes), ಕೊಲೆಸ್ಟ್ರಾಲ್, ಲಿವರ್ ಮತ್ತು ಕಿಡ್ನಿ ಸಮಸ್ಯೆಗಳು ಆರಂಭಿಕ ಹಂತದಲ್ಲಿ ಯಾವುದೇ ಪ್ರಮುಖ ಲಕ್ಷಣಗಳನ್ನು ತೋರಿಸುವುದಿಲ್ಲ. ಹೀಗಾಗಿ ವಾರ್ಷಿಕ ಆರೋಗ್ಯ ತಪಾಸಣೆ (Annual Health Checkup) ಮಾಡಿಸುವುದು ಅತ್ಯಗತ್ಯ. ವಯಸ್ಸು ಮತ್ತು ಕೌಟುಂಬಿಕ ಹಿನ್ನೆಲೆಗೆ ಅನುಗುಣವಾಗಿ ಕ್ಯಾನ್ಸರ್ ತಪಾಸಣೆಗಳ ಬಗ್ಗೆಯೂ ವೈದ್ಯರೊಂದಿಗೆ ಸಮಾಲೋಚಿಸಬೇಕು. ವಾಹನಕ್ಕೆ ಹೇಗೆ ನಿಯಮಿತ ಸರ್ವಿಸಿಂಗ್ ಅಗತ್ಯವೋ, ಹಾಗೆಯೇ ನಿಮ್ಮ ದೇಹಕ್ಕೂ ನಿಯಮಿತ ತಪಾಸಣೆ ಮುಖ್ಯ.

ಸ್ನಾಯುಗಳ ದ್ರವ್ಯರಾಶಿ (Muscle Mass) ಅತ್ಯಂತ ಮುಖ್ಯ
ವಯಸ್ಸಾಗುತ್ತಿದ್ದಂತೆ ಪುರುಷರಲ್ಲಿ ಸ್ನಾಯುಗಳ ಬಲವನ್ನು ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಸ್ನಾಯುಗಳು ದೇಹದ ಚಯಾಪಚಯ ಕ್ರಿಯೆಯನ್ನು (Metabolism) ಉತ್ತಮವಾಗಿಡಲು, ಇನ್ಸುಲಿನ್ ಸೂಕ್ಷ್ಮತೆಯನ್ನು ಸುಧಾರಿಸಲು ಮತ್ತು ಮೂಳೆಗಳ ಆರೋಗ್ಯವನ್ನು ರಕ್ಷಿಸಲು ಸಹಾಯ ಮಾಡುತ್ತವೆ. ಇದಕ್ಕಾಗಿ ಪ್ರತಿದಿನ ಜಿಮ್‌ನಲ್ಲಿ ಗಂಟೆಗಟ್ಟಲೆ ಕಳೆಯಬೇಕಾಗಿಲ್ಲ. ವಾರದಲ್ಲಿ 2 ರಿಂದ 4 ದಿನಗಳ ಕಾಲ ಶಕ್ತಿ ಸಾಮರ್ಥ್ಯ ಹೆಚ್ಚಿಸುವ ವ್ಯಾಯಾಮ (Strength Training) ಮಾಡಿದರೆ ಸಾಕು. ಇದು ಟೆಸ್ಟೋಸ್ಟೆರಾನ್ ಹಾರ್ಮೋನ್ ಮಟ್ಟವನ್ನು ಉತ್ತಮವಾಗಿಡಲು ಮತ್ತು ಮಧುಮೇಹದ ಅಪಾಯವನ್ನು ಕಡಿಮೆ ಮಾಡಲು ನೆರವಾಗುತ್ತದೆ.

ಆರೋಗ್ಯವಂತ ದೇಹಕ್ಕೆ ಸದೃಢ ಮನಸ್ಸು ಅಗತ್ಯ
ಸಾಮಾನ್ಯವಾಗಿ ಪುರುಷರು ತಾವು ಯಾವಾಗಲೂ ಬಲಿಷ್ಠರಾಗಿ ಕಾಣಿಸಿಕೊಳ್ಳಬೇಕು ಎಂಬ ಒತ್ತಡಕ್ಕೆ ಒಳಗಾಗುತ್ತಾರೆ. ಆದರೆ ಒತ್ತಡ, ಆತಂಕ ಮತ್ತು ಖಿನ್ನತೆ ಯಾರಿಗೆ ಬೇಕಾದರೂ ಬರಬಹುದು. ನಿರಂತರ ಆಯಾಸ, ಸಿಡುಕುತನ, ಏಕಾಗ್ರತೆಯ ಕೊರತೆ ಅಥವಾ ನಿದ್ರಾಹೀನತೆ ಇದರ ಲಕ್ಷಣಗಳಾಗಿರಬಹುದು. ಮನ ಬಿಚ್ಚಿ ಮಾತನಾಡುವುದು ದೌರ್ಬಲ್ಯವಲ್ಲ. ಮಾನಸಿಕ ಸಮಸ್ಯೆಗಳಿದ್ದಾಗ ಕುಟುಂಬದವರು, ಸ್ನೇಹಿತರು ಅಥವಾ ಮನೋವೈದ್ಯರ ಬಳಿ ಮುಕ್ತವಾಗಿ ಚರ್ಚಿಸುವುದು ಸೂಕ್ತ.

ಗುಣಮಟ್ಟದ ನಿದ್ದೆಯೇ ಅಸಲಿ ‘ಗೇಮ್ ಚೇಂಜರ್’
ಉತ್ತಮ ಆರೋಗ್ಯಕ್ಕೆ ನಿದ್ದೆಯೇ ರಾಮಬಾಣ. ಪ್ರತಿಯೊಬ್ಬ ಪುರುಷನಿಗೂ ರಾತ್ರಿ 7 ರಿಂದ 9 ಗಂಟೆಗಳ ಕಾಲ ಗುಣಮಟ್ಟದ ನಿದ್ದೆ ಅತ್ಯಗತ್ಯ. ಇದು ದೇಹದ ಅಂಗಾಂಶಗಳ ದುರಸ್ತಿಗೆ ಮತ್ತು ಹಾರ್ಮೋನ್‌ಗಳ ಸಮತೋಲನಕ್ಕೆ ಸಹಾಯ ಮಾಡುತ್ತದೆ. ನಿದ್ದೆಯ ಕೊರತೆಯು ತೂಕ ಹೆಚ್ಚಾಗಲು, ಮಾನಸಿಕ ಒತ್ತಡಕ್ಕೆ ಮತ್ತು ರೋಗನಿರೋಧಕ ಶಕ್ತಿ ಕುಂಠಿತಗೊಳ್ಳಲು ಕಾರಣವಾಗುತ್ತದೆ. ರಾತ್ರಿ ಮಲಗುವ ಮುನ್ನ ಮೊಬೈಲ್/ಟಿವಿ ಸ್ಕ್ರೀನ್ ನೋಡುವುದನ್ನು ಕಡಿಮೆ ಮಾಡಿ ಮತ್ತು ಸಂಜೆ ತಡವಾಗಿ ಕಾಫಿ-ಟೀ ಕುಡಿಯುವುದನ್ನು ತಪ್ಪಿಸಿ.

ಹೃದಯದ ಆರೋಗ್ಯವನ್ನು ಗಂಭೀರವಾಗಿ ಪರಿಗಣಿಸಿ
ವಿಶ್ವಾದ್ಯಂತ ಪುರುಷರಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಹೆಚ್ಚಾಗಿ ಕಂಡುಬರುತ್ತಿದೆ. ಆದರೆ, ಆರೋಗ್ಯಕರ ತೂಕ, ನಿಯಮಿತ ದೈಹಿಕ ಶ್ರಮ ಮತ್ತು ಸಮತೋಲಿತ ಆಹಾರ ಪದ್ಧತಿಯಿಂದ ಇದನ್ನು ತಡೆಯಬಹುದು. ತಂಬಾಕು ಮತ್ತು ಧೂಮಪಾನವನ್ನು ಸಂಪೂರ್ಣವಾಗಿ ತ್ಯಜಿಸಬೇಕು ಹಾಗೂ ಮದ್ಯಪಾನವನ್ನು ಮಿತಿಗೊಳಿಸಬೇಕು. ನಿಮ್ಮ ಆಹಾರದಲ್ಲಿ ಹಸಿರು ತರಕಾರಿಗಳು, ಹಣ್ಣುಗಳು, ಧಾನ್ಯಗಳು ಮತ್ತು ಆರೋಗ್ಯಕರ ಕೊಬ್ಬನ್ನು (Healthy Fats) ಅಳವಡಿಸಿಕೊಳ್ಳಿ. ಪ್ರತಿದಿನ ಕನಿಷ್ಠ ಅರ್ಧ ಗಂಟೆ ವೇಗದ ನಡಿಗೆ (Brisk Walk) ಮಾಡುವುದರಿಂದ ಬಿಪಿ ಮತ್ತು ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಬರುತ್ತದೆ.

ಗಮನಿಸಿ: ಆರೋಗ್ಯವೇ ನಿಜವಾದ ಸಂಪತ್ತು. ಇಂದಿನಿಂದಲೇ ನಿಮ್ಮ ಜೀವನಶೈಲಿಯಲ್ಲಿ ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳಿ, ಆರೋಗ್ಯಕರ ಭವಿಷ್ಯವನ್ನು ನಿಮ್ಮದಾಗಿಸಿಕೊಳ್ಳಿ.