ನವದೆಹಲಿ: ವಾಹನಗಳ ಮಾಲಿನ್ಯ ನಿಯಂತ್ರಣ (ಪಿಯುಸಿ) ಪ್ರಮಾಣಪತ್ರದ ಮಾನ್ಯತಾ ಅವಧಿಗೆ ಸಂಬಂಧಿಸಿದ ನಿಯಮಗಳನ್ನು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಪರಿಷ್ಕರಿಸಿದೆ.
ಇಂದು ಪ್ರಕಟಿಸಲಾದ ಈ ಹೊಸ ವೇಳಾಪಟ್ಟಿಯ ಪ್ರಕಾರ, ಇನ್ಮುಂದೆ ವಾಹನದ ಹೊರಸೂಸುವಿಕೆ ಮಾನದಂಡ, ವಯಸ್ಸು ಮತ್ತು ವರ್ಗದ ಆಧಾರದ ಮೇಲೆ ಪಿಯುಸಿ ಪ್ರಮಾಣಪತ್ರದ ಅವಧಿ ನಿರ್ಧಾರವಾಗಲಿದೆ. ಹೊಸ ಬಿಎಸ್-6 ಖಾಸಗಿ ವಾಹನಗಳಿಗೆ ಗರಿಷ್ಠ ಮೂರು ವರ್ಷಗಳವರೆಗೆ ಮಾನ್ಯತೆ ವಿಸ್ತರಿಸಲಾಗಿದ್ದು, ಹಳೆಯ ವಾಹನಗಳಿಗೆ ಕಡಿಮೆ ಅವಧಿಯ ನವೀಕರಣ ನಿಯಮವನ್ನು ಮುಂದುವರಿಸಲಾಗಿದೆ.
ಪರಿಷ್ಕೃತ ನಿಯಮಗಳ ಅನ್ವಯ, ಬಿಎಸ್-1, ಬಿಎಸ್-2 ಮತ್ತು ಬಿಎಸ್-3 ಮಾನದಂಡದ ಹಳೆಯ ವಾಹನಗಳ ಪಿಯುಸಿ ಪ್ರಮಾಣಪತ್ರವು ಕೇವಲ ಮೂರು ತಿಂಗಳು ಮಾತ್ರ ಮಾನ್ಯತೆ ಹೊಂದಿರುತ್ತದೆ. ಇನ್ನು ಬಿಎಸ್-4 ವಾಹನಗಳಿಗೆ ಆರು ತಿಂಗಳ ಮಾನ್ಯತಾ ಅವಧಿಯನ್ನು ನಿಗದಿಪಡಿಸಲಾಗಿದೆ.
ಬಿಎಸ್-6 ಖಾಸಗಿ ವಾಹನಗಳ ಪಿಯುಸಿ ಅವಧಿಯು ಅವುಗಳ ವಯಸ್ಸನ್ನು ಅವಲಂಬಿಸಿರುತ್ತದೆ. ಆರು ವರ್ಷಗಳವರೆಗಿನ ಹೊಸ ಖಾಸಗಿ ವಾಹನಗಳಿಗೆ ಮೂರು ವರ್ಷಗಳ ಅವಧಿಯ ಪ್ರಮಾಣಪತ್ರ ಸಿಗಲಿದೆ. ಆರು ವರ್ಷಕ್ಕಿಂತ ಮೇಲ್ಪಟ್ಟು ಹತ್ತು ವರ್ಷಗಳವರೆಗಿನ ವಾಹನಗಳು ಪ್ರತಿ ವರ್ಷ ಪಿಯುಸಿ ನವೀಕರಿಸಿಕೊಳ್ಳಬೇಕು. ಹತ್ತು ವರ್ಷಕ್ಕಿಂತ ಹಳೆಯದಾದ ಖಾಸಗಿ ವಾಹನಗಳಿಗೆ ಪ್ರತಿ ಆರು ತಿಂಗಳಿಗೊಮ್ಮೆ ನವೀಕರಣ ಕಡ್ಡಾಯವಾಗಿದೆ.
ಬಿಎಸ್-6 ವಾಣಿಜ್ಯ ಅಥವಾ ಸಾರಿಗೆ ವಾಹನಗಳಿಗೆ ನಿಯಮಗಳು ಸ್ವಲ್ಪ ಭಿನ್ನವಾಗಿವೆ. ಆರು ವರ್ಷಗಳವರೆಗಿನ ಸಾರಿಗೆ ವಾಹನಗಳಿಗೆ ಎರಡು ವರ್ಷಗಳ ಮಾನ್ಯತೆ ಇರುವ ಪಿಯುಸಿ ಪ್ರಮಾಣಪತ್ರ ನೀಡಲಾಗುತ್ತದೆ. ಆರರಿಂದ ಹತ್ತು ವರ್ಷದೊಳಗಿನ ವಾಹನಗಳು ಪ್ರತಿ ವರ್ಷ ಹಾಗೂ ಹತ್ತು ವರ್ಷಕ್ಕಿಂತ ಹಳೆಯದಾದ ಸಾರಿಗೆ ವಾಹನಗಳು ಪ್ರತಿ ಆರು ತಿಂಗಳಿಗೊಮ್ಮೆ ಪ್ರಮಾಣಪತ್ರವನ್ನು ನವೀಕರಿಸಿಕೊಳ್ಳಬೇಕಾಗುತ್ತದೆ.
ವಾಹನಗಳ ವಯಸ್ಸು ಮತ್ತು ಮಾಲಿನ್ಯ ಮಾನದಂಡಗಳನ್ನು ಆಧರಿಸಿ ಈ ಹೊಸ ವ್ಯವಸ್ಥೆಯನ್ನು ರೂಪಿಸಲಾಗಿದೆ. ಹೊಸ ತಂತ್ರಜ್ಞಾನದ ಬಿಎಸ್-6 ವಾಹನಗಳಿಗೆ ದೀರ್ಘಾವಧಿಯ ಮಾನ್ಯತೆ ನೀಡುವ ಮೂಲಕ ವಾಹನ ಸವಾರರಿಗೆ ಅನುಕೂಲ ಮಾಡಿಕೊಡಲಾಗಿದೆ. ಅದೇ ಸಮಯದಲ್ಲಿ, ಹಳೆಯ ಮಾನದಂಡದ ಮತ್ತು ಹಳೆಯ ವಾಹನಗಳ ಮೇಲೆ ನಿಗಾ ಇಡಲು ಕಡಿಮೆ ಅವಧಿಯ ನವೀಕರಣ ನಿಯಮವನ್ನು ಉಳಿಸಿಕೊಳ್ಳಲಾಗಿದೆ. ತೀವ್ರ ವಾಯುಮಾಲಿನ್ಯದ ಬಿಕ್ಕಟ್ಟು ಎದುರಿಸುತ್ತಿರುವ ದೆಹಲಿ ಸೇರಿದಂತೆ ದೇಶದ ಹಲವು ನಗರಗಳಲ್ಲಿ ವಾಹನಗಳ ಹೊಗೆಯಿಂದಾಗುವ ಮಾಲಿನ್ಯ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಈ ಪರಿಷ್ಕೃತ ನಿಯಮಗಳನ್ನು ಜಾರಿಗೆ ತಂದಿದೆ.











