ಅಡಿಕೆ ಬೆಳೆಗಾರರಿಗೆ ಹೊಸ ಸಂಕಷ್ಟ:  ರೈತರಲ್ಲಿ ಆತಂಕ

ರಾಜ್ಯದ ಕರಾವಳಿ ಹಾಗೂ ಮಲೆನಾಡು ಭಾಗಗಳ ಅಡಿಕೆ ಬೆಳೆಗಾರರನ್ನು ಈ ಬಾರಿ ಹೊಸ ಸಮಸ್ಯೆಯೊಂದು ತೀವ್ರವಾಗಿ ಕಾಡತೊಡಗಿದೆ. ಎಳೆ ಅಡಿಕೆ ಉದುರುವ ಸಮಸ್ಯೆಯ ನಡುವೆಯೇ, ಮರದಲ್ಲೇ ಬೆಳವಣಿಗೆಯ ಹಂತದಲ್ಲಿರುವ ಅಡಿಕೆ ಕಾಯಿಗಳು ಉದ್ದವಾಗಿ ಬಿರುಕು ಬಿಟ್ಟು ನೆಲಕ್ಕೆ ಬೀಳುತ್ತಿರುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಇದರಿಂದ ರೈತರು ಆತಂಕಕ್ಕೆ ಒಳಗಾಗಿದ್ದು, ಇಳುವರಿ ಮೇಲೆ ಗಂಭೀರ ಪರಿಣಾಮ ಬೀರುವ ಭೀತಿ ಎದುರಾಗಿದೆ.

ಕರಾವಳಿ ಮತ್ತು ಮಲೆನಾಡಿನ ವಿವಿಧ ಅಡಿಕೆ ತೋಟಗಳಿಂದ ಈ ಕುರಿತು ದೂರುಗಳು ಕೇಳಿಬರುತ್ತಿದ್ದು, ಇದು ಒಂದೆರಡು ಪ್ರದೇಶಗಳಿಗೆ ಸೀಮಿತವಾಗಿಲ್ಲ ಎಂಬುದು ರೈತರ ಅಭಿಪ್ರಾಯವಾಗಿದೆ. ಈಗಾಗಲೇ ಎಲೆಚುಕ್ಕಿ, ಕೊಳೆರೋಗ, ಹಿಂಗಾರ ಒಣಗುವಿಕೆ ಸೇರಿದಂತೆ ವಿವಿಧ ರೋಗಗಳ ನಿಯಂತ್ರಣಕ್ಕಾಗಿ ಔಷಧ ಸಿಂಪಡಣೆ ಮತ್ತು ಪೋಷಕಾಂಶ ನಿರ್ವಹಣೆಗೆ ಹೆಚ್ಚಿನ ವೆಚ್ಚ ಮಾಡಿರುವ ರೈತರಿಗೆ ಈ ಹೊಸ ಸಮಸ್ಯೆ ಮತ್ತಷ್ಟು ಚಿಂತೆಗೆ ಕಾರಣವಾಗಿದೆ.

ಅಡಿಕೆಗೆ ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆ ದೊರೆಯುತ್ತಿದ್ದರೂ, ಬೆಳೆ ಉಳಿಸಿಕೊಳ್ಳುವುದೇ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಅಡಿಕೆ ಕೃಷಿಯನ್ನೇ ಜೀವನಾಧಾರವಾಗಿಸಿಕೊಂಡಿರುವ ಸಾವಿರಾರು ಕುಟುಂಬಗಳು ಈ ಬೆಳವಣಿಗೆಯಿಂದ ಕಳವಳಗೊಂಡಿವೆ.

ಬೋರಾನ್ ಕೊರತೆಯೇ ಕಾರಣವೇ?
ಅಡಿಕೆ ಕಾಯಿ ಬಿರುಕು ಬಿಟ್ಟು ಉದುರುವ ಸಮಸ್ಯೆಯ ನಿಖರ ಕಾರಣ ಇನ್ನೂ ಪತ್ತೆಯಾಗಿಲ್ಲ. ಆದರೆ ಕೃಷಿ ತಜ್ಞರು ಬೋರಾನ್ ಸೂಕ್ಷ್ಮ ಪೋಷಕಾಂಶದ ಕೊರತೆಯನ್ನು ಪ್ರಮುಖ ಕಾರಣಗಳಲ್ಲಿ ಒಂದಾಗಿ ಪರಿಗಣಿಸುತ್ತಿದ್ದಾರೆ. ಸಸ್ಯಗಳ ಕೋಶಗಳ ಬೆಳವಣಿಗೆ ಹಾಗೂ ಹಣ್ಣಿನ ಸಮರ್ಪಕ ಅಭಿವೃದ್ಧಿಗೆ ಬೋರಾನ್ ಅತ್ಯಗತ್ಯವಾಗಿದ್ದು, ಇದರ ಕೊರತೆಯಿಂದ ಕಾಯಿಗಳಲ್ಲಿ ಬಿರುಕು ಮೂಡುವುದು, ಬೆಳವಣಿಗೆ ಅಸಮತೋಲನವಾಗುವುದು ಹಾಗೂ ಉದುರುವಿಕೆ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಹವಾಮಾನ ವೈಪರೀತ್ಯದ ಪರಿಣಾಮ
ಬೇಸಿಗೆಯ ತೀವ್ರ ಬಿಸಿಲಿನ ಬಳಿಕ ಏಕಾಏಕಿ ಸುರಿದ ಭಾರೀ ಮಳೆ, ನಂತರ ಮತ್ತೆ ಬಿಸಿಲು ಹಾಗೂ ಮಳೆಯ ಮರುಕಳಿಕೆಯಿಂದ ಅಡಿಕೆ ಕಾಯಿಯ ಒಳ ಮತ್ತು ಹೊರಭಾಗದ ಬೆಳವಣಿಗೆಯಲ್ಲಿ ವ್ಯತ್ಯಾಸ ಉಂಟಾಗಿ ಬಿರುಕು ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ ಎಂದು ಕೃಷಿ ಪರಿಣಿತರು ತಿಳಿಸಿದ್ದಾರೆ.ಇದಲ್ಲದೆ, ಕಳೆದ ಕೆಲವು ವರ್ಷಗಳಿಂದ ಮಳೆಯ ಮಾದರಿಯಲ್ಲಿ ಕಂಡುಬರುತ್ತಿರುವ ಬದಲಾವಣೆ, ಹೆಚ್ಚುತ್ತಿರುವ ಉಷ್ಣಾಂಶ ಹಾಗೂ ತೇವಾಂಶದ ಏರಿಳಿತಗಳು ಅಡಿಕೆ ಬೆಳೆಗೆ ಹೆಚ್ಚುವರಿ ಒತ್ತಡ ಉಂಟುಮಾಡುತ್ತಿವೆ. ಹವಾಮಾನ ಬದಲಾವಣೆಯ ಪರಿಣಾಮವೂ ಈ ಸಮಸ್ಯೆಯ ಹಿಂದೆ ಇರಬಹುದೆಂಬ ಶಂಕೆ ವ್ಯಕ್ತವಾಗಿದೆ.

ರೋಗ ಮತ್ತು ಪೋಷಕಾಂಶ ಕೊರತೆಯೂ ಕಾರಣ
ಎಲೆಚುಕ್ಕಿ ಹಾಗೂ ಇತರೆ ಶಿಲೀಂಧ್ರ ರೋಗಗಳ ಬಾಧೆಯಿಂದ ಮರಗಳ ಬೆಳವಣಿಗೆ ಕುಂಠಿತಗೊಂಡು, ಕಾಯಿಗಳ ಗುಣಮಟ್ಟದ ಮೇಲೂ ಪರಿಣಾಮ ಬೀಳಬಹುದು. ಕೆಲವೆಡೆ ಎಳೆ ಅಡಿಕೆ ಉದುರುವಿಕೆಗೆ ಪೆಂತಿ ಕೀಟದ ಬಾಧೆಯೂ ಕಾರಣವಾಗಿರಬಹುದು ಎಂದು ರೈತರು ತಿಳಿಸಿದ್ದಾರೆ.ಕ್ಯಾಲ್ಸಿಯಂ, ಪೊಟ್ಯಾಶ್ ಸೇರಿದಂತೆ ಇತರೆ ಸೂಕ್ಷ್ಮ ಪೋಷಕಾಂಶಗಳ ಕೊರತೆ ಅಥವಾ ಅಸಮತೋಲನದಿಂದಲೂ ಇಂತಹ ಲಕ್ಷಣಗಳು ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ ಎಂದು ತಜ್ಞರು ಹೇಳಿದ್ದಾರೆ.

ರೈತರಿಗೆ ತಜ್ಞರ ಸಲಹೆ
ಸಮಸ್ಯೆ ಕಂಡುಬಂದ ತಕ್ಷಣ ಊಹಾಪೋಹಗಳ ಆಧಾರದ ಮೇಲೆ ಔಷಧಿ ಅಥವಾ ಗೊಬ್ಬರ ಬಳಕೆ ಮಾಡುವ ಬದಲು ಕೃಷಿ ತಜ್ಞರ ಸಲಹೆ ಪಡೆಯುವುದು ಸೂಕ್ತ ಎಂದು ತಜ್ಞರು ಸೂಚಿಸಿದ್ದಾರೆ. ಮೊದಲಿಗೆ ಮಣ್ಣು ಹಾಗೂ ಎಲೆಗಳ ಪರೀಕ್ಷೆ ನಡೆಸಿ ಪೋಷಕಾಂಶಗಳ ಸ್ಥಿತಿಯನ್ನು ಪರಿಶೀಲಿಸಬೇಕು. ಅದರ ಆಧಾರದ ಮೇಲೆ ಬೋರಾನ್ ಸೇರಿದಂತೆ ಅಗತ್ಯ ಸೂಕ್ಷ್ಮ ಪೋಷಕಾಂಶಗಳನ್ನು ಪೂರೈಸುವ ಕ್ರಮ ಕೈಗೊಳ್ಳಬೇಕು.ಅಲ್ಲದೆ, ತೋಟಗಳಲ್ಲಿ ಎಲೆಚುಕ್ಕಿ ಅಥವಾ ಇತರೆ ರೋಗಗಳ ಲಕ್ಷಣಗಳು ಕಂಡುಬಂದರೆ ಕೂಡಲೇ ನಿಯಂತ್ರಣ ಕ್ರಮ ಜರುಗಿಸಬೇಕು. ಸಮಸ್ಯೆಯ ಮೂಲ ಕಾರಣವನ್ನು ವೈಜ್ಞಾನಿಕವಾಗಿ ಪತ್ತೆಹಚ್ಚಿ ಸೂಕ್ತ ಪರಿಹಾರ ಕ್ರಮಗಳನ್ನು ಕೈಗೊಂಡರೆ ಮಾತ್ರ ಹಾನಿಯನ್ನು ತಗ್ಗಿಸಲು ಸಾಧ್ಯ ಎಂದು ಕೃಷಿ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.