ಬೆಂಗಳೂರು: ಮೊದಲೇ ಗ್ಯಾಸ್ ಸಿಕ್ತಾ ಇಲ್ಲ, ಸಿಕ್ಕಿದ ಕಡೆ ತೆಗೆದುಕೊಳ್ಳೋಣಾ ಅಂದ್ರೆ ಅದಕ್ಕೂ ಬೆಲೆ ಜಾಸ್ತಿ ಮಾಡಿ ಕುಳಿತಿರುವಾಗ ಈಗ ಪೆಟ್ರೋಲ್ ದರವೂ ಏರಿಕೆಯಾಗಿದೆ. ಖಾಸಗಿ ಕಂಪನಿಯಾದ ನಯಾರಾ ತೈಲ ಕಂಪನಿ ಪೆಟ್ರೋಲ್ ಹಾಗೂ ಡಿಸೇಲ್ ದರವನ್ನು ಏರಿಕೆ ಮಾಡಿದೆ. ನಯಾರಾ ಪೆಟ್ರೋಲ್ ಬಂಕ್ ಗಳಲ್ಲಿ ಇಂದು ಬೆಳಗ್ಗೆಯಿಂದಲೇ ಜಾರಿಗೆ ಬರುವಂತೆ ಇಂಧನ ದರದಲ್ಲಿ ಭಾರೀ ಏರಿಕೆ ಮಾಡಲಾಗಿದೆ. ಪೆಟ್ರೋಲ್ ಬೆಲೆಯಲ್ಲಿ ಪ್ರತಿ ಲೀಟರ್ ಗೆ 5 ರೂಪಾಯಿ ಹಾಗೂ ಡಿಸೇಲ್ ಬೆಲೆಯಲ್ಲಿ ಪ್ರತಿ ಲೀಟರ್ ಗೆ 3 ರೂಪಾಯಿ ಹೆಚ್ಚಳ ಮಾಡಲಾಗಿದೆ.
ಸರ್ಕಾರಿ ಸ್ವಾಮ್ಯದ ಪೆಟ್ರೋಲ್ ಬಂಕ್ ಗಳಿಗೆ ಹೋಲಿಕೆ ಮಾಡಿಕೊಂಡರೆ ನಯಾರಾ ಬಂಕ್ ಗಳಲ್ಲಿ ಈ ದರ ವ್ಯತ್ಯಾಸ ಎದ್ದು ಕಾಣುತ್ತಿದೆ. ಈಗ ನಯಾರಾ ಬಂಕ್ ನಲ್ಲಿ ದರ ಏರಿಕೆ ಮಾಡಿದ್ದರು ಸಹ ಮುಂದಿನ ದಿನಗಳಲ್ಲಿ ಬೇರೆ ಬೇರೆ ಬಂಕ್ ಗಳಲ್ಲೂ ಏರಿಕೆಯಾಗಬಹುದು ಎಂಬ ಚಿಂತೆ ಕಾಡುತ್ತಿದೆ. ಉತ್ತರ ಕರ್ನಾಟಕ ಭಾಗದಲ್ಲಿ ಅದಾಗಲೇ ಪೆಟ್ರೋಲ್ ಡಿಸೇಲ್ ಕಡಿಮೆಯಾಗಬಹುದು ಎಂಬ ಭಯಕ್ಕೆ ಜನ, ದೊಡ್ಡ ದೊಡ್ಡ ಕ್ಯಾನ್ ತೆಗೆದುಕೊಂಡು ಹೋಗಿ ತುಂಬಿಸಿಕೊಂಡು ಬಂದಿರುವ ಘಟನೆ ನಡೆದಿದೆ. ಇದರ ನಡುವೆ ಮತ್ತೊಂದು ಪ್ಯಾಂಡಮಿಕ್ ಗೆ ರೆಡಿಯಾಗಿ ಅಂತ ಪ್ರಧಾನಿ ಮೋದಿ ಅವರೇ ಮುನ್ಸೂಚನೆ ಕೊಟ್ಟಿರೋದು ಮುಂದಿನ ದಿನಗಳಲ್ಲಿ ಏನಾಗಬಹುದು ಎಂಬ ಕಲ್ಪನೆ ಶುರುವಾಗಿದೆ. ಮೊದಲೇ ಅದೆಷ್ಟೋ ಜನ ಕೆಲಸ ಕಳೆದುಕೊಂಡಿದ್ದಾರೆ, ಜೊತೆಗೆ ಬೆಲೆ ಏರಿಕೆಗಳ ನಡುವೆ ಪೆಟ್ರೋಲ್ ಡಿಸೇಲ್ ದರವೂ ಏರಿಕೆಯಾದರೆ ಜನರ ಜೀವನ ಅಧೋಗತಿ ಅಷ್ಟೇ.
