ವಿಶ್ವ ರೋಯಿಂಗ್ ಕಪ್: ಭಾರತಕ್ಕೆ ಚೊಚ್ಚಲ ಚಿನ್ನದ ಪದಕ ತಂದುಕೊಟ್ಟು ಇತಿಹಾಸ ಸೃಷ್ಟಿಸಿದ ಭಾರತೀಯ ಸೇನೆಯ ಇಬ್ಬರು ಯೋಧರು!

ಲುಸರ್ನ್ : ಭಾರತೀಯ ಕ್ರೀಡಾ ಇತಿಹಾಸದಲ್ಲೇ ಸುವರ್ಣಾಕ್ಷರಗಳಲ್ಲಿ ಬರೆದಿಡುವಂತಹ ಅದ್ಭುತ ಸಾಧನೆಯೊಂದು ಮೂಡಿಬಂದಿದೆ. ಸ್ವಿಟ್ಜರ್ಲೆಂಡ್ನ ಲುಸರ್ನ್ನಲ್ಲಿ ನಡೆಯುತ್ತಿರುವ 2026ರ ‘ವಿಶ್ವ ರೋಯಿಂಗ್ ಕಪ್ III’ (World Rowing Cup III) ಟೂರ್ನಿಯಲ್ಲಿ ಭಾರತದ ಲಕ್ಷಯ್ ಮತ್ತು ಉಜ್ವಲ್ ಕುಮಾರ್ ಸಿಂಗ್ ಜೋಡಿ ಚೊಚ್ಚಲ ಚಿನ್ನದ ಪದಕವನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ. ವಿಶ್ವ ರೋಯಿಂಗ್ ಕಪ್ ಸರಣಿಯ ಇತಿಹಾಸದಲ್ಲೇ ಭಾರತಕ್ಕೆ ಚಿನ್ನದ ಪದಕ ಒಲಿದಿರುವುದು ಇದೇ ಮೊದಲು.

‘ಲೈಟ್ವೇಟ್ ಪುರುಷರ ಡಬಲ್ ಸ್ಕಲ್ಸ್’ ವಿಭಾಗದ ಫೈನಲ್ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಭಾರತೀಯ ಜೋಡಿ, ಕೇವಲ 6:26.09 ನಿಮಿಷಗಳಲ್ಲಿ ಗುರಿ ತಲುಪಿ ಪ್ರಥಮ ಸ್ಥಾನ ಪಡೆಯಿತು. ತೀವ್ರ ಪೈಪೋಟಿಯಿಂದ ಕೂಡಿದ್ದ ಈ ರೇಸ್ನಲ್ಲಿ ಹಾಂಕಾಂಗ್ (6:27.14) ಬೆಳ್ಳಿ ಪದಕ ಹಾಗೂ ನೆದರ್ಲ್ಯಾಂಡ್ಸ್ (6:27.36) ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡವು. ಈ ಋತುವಿನ ಮೊದಲ ವಿಶ್ವ ಕಪ್ ಗೆದ್ದಿದ್ದ ಹಾಂಕಾಂಗ್ನ ಬಲಿಷ್ಠ ಜೋಡಿಯನ್ನು ನಮ್ಮ ಯೋಧರು ಧೂಳೀಪಟ ಮಾಡಿದ್ದಾರೆ.

ಈ ಐತಿಹಾಸಿಕ ಸಾಧನೆ ಮಾಡಿದ ಲಕ್ಷಯ್ ಮತ್ತು ಉಜ್ವಲ್ ಕುಮಾರ್ ಸಿಂಗ್ ಇಬ್ಬರೂ ಭಾರತೀಯ ಸೇನೆಯಲ್ಲಿ (Indian Army) ಕರ್ತವ್ಯ ನಿರ್ವಹಿಸುತ್ತಿರುವ ಸೈನಿಕರಾಗಿದ್ದಾರೆ. ಪ್ರಸ್ತುತ ಈ ಟೂರ್ನಿಯಲ್ಲಿ ಭಾಗವಹಿಸಿರುವ 18 ಸದಸ್ಯರ ಭಾರತೀಯ ತಂಡದಲ್ಲಿ 17 ಕ್ರೀಡಾಪಟುಗಳು ಭಾರತೀಯ ಸೇನೆಗೆ ಹಾಗೂ ಒಬ್ಬರು ಭಾರತೀಯ ನೌಕಾಪಡೆಗೆ ಸೇರಿದವರಾಗಿದ್ದಾರೆ. ಇದು ಕ್ರೀಡಾ ರಂಗದಲ್ಲಿ ಭಾರತೀಯ ಸಶಸ್ತ್ರ ಪಡೆಗಳ ನಿರಂತರ ಹೂಡಿಕೆ ಮತ್ತು ಶ್ರಮಕ್ಕೆ ಸಿಕ್ಕ ದೊಡ್ಡ ಯಶಸ್ಸಾಗಿದೆ.

ಇದು ಭಾರತೀಯ ರೋಯಿಂಗ್ ಕ್ರೀಡೆಯಲ್ಲೇ ಅತ್ಯಂತ ಐತಿಹಾಸಿಕ ಕ್ಷಣ. ಲಕ್ಷಯ್ ಮತ್ತು ಉಜ್ವಲ್ ಕುಮಾರ್ ಅವರ ಈ ಯಶಸ್ಸು ಆರ್ಮಿ ರೋಯಿಂಗ್ ನೋಡ್ನಲ್ಲಿ (Army Rowing Node) ಅವರು ವರ್ಷಗಳ ಕಾಲ ನಡೆಸಿದ ಕಠಿಣ ಪರಿಶ್ರಮ ಮತ್ತು ಶಿಸ್ತಿನ ತರಬೇತಿಗೆ ಸಂದ ಜಯವಾಗಿದೆ. ಈ ಗೆಲುವು ಭಾರತೀಯ ಸೇನೆ ಹಾಗೂ ಇಡೀ ದೇಶಕ್ಕೆ ಹೆಮ್ಮೆಯ ವಿಷಯ ಎಂದು ಆರ್ಮಿ ರೋಯಿಂಗ್ ನೋಡ್ನ ಕಮಾಂಡಿಂಗ್ ಆಫೀಸರ್ ಕರ್ನಲ್ ರಾಮಕೃಷ್ಣನ್ ಎಂದು ಹೇಳಿದ್ದಾರೆ.