ನಿಮ್ಮ ಕೂದಲು ಅತಿಯಾಗಿ ಉದುರುತ್ತಿದೆಯೇ? ಈ ಮನೆಮದ್ದುಗಳನ್ನು ಬಳಸಿದರೆ ದಟ್ಟವಾದ ಕೇಶರಾಶಿ ನಿಮ್ಮದಾಗುವುದು ಖಚಿತ!

ಇತ್ತೀಚಿನ ದಿನಗಳಲ್ಲಿ ವಯಸ್ಸಿನ ಭೇದವಿಲ್ಲದೆ ಪ್ರತಿಯೊಬ್ಬರನ್ನೂ ಕಾಡುತ್ತಿರುವ ದೊಡ್ಡ ಸಮಸ್ಯೆ ಎಂದರೆ ಅದು ಕೂದಲು ಉದುರುವುದು. ಕೂದಲು ತೆಳುವಾಗುವುದು, ಕೂದಲಿನ ತುದಿ ಸೀಳಾಗುವುದು ಮತ್ತು ಸರಿಯಾಗಿ ಬೆಳೆಯದಿರುವುದು ಸಾಮಾನ್ಯ ಸಮಸ್ಯೆಯಾಗಿಬಿಟ್ಟಿದೆ. ನಮ್ಮ ಬದಲಾದ ಜೀವನಶೈಲಿ, ಮಾನಸಿಕ ಒತ್ತಡ ಮತ್ತು ದೇಹದಲ್ಲಿ ಸರಿಯಾದ ಪೋಷಕಾಂಶಗಳ ಕೊರತೆಯೇ ಇದಕ್ಕೆ ಪ್ರಮುಖ ಕಾರಣ.

ನಮ್ಮ ದೇಹಕ್ಕೆ ಅಗತ್ಯವಿರುವ ಪ್ರೋಟೀನ್ ಮತ್ತು ಕಬ್ಬಿಣದಂತಹ ಪೋಷಕಾಂಶಗಳು ಸಿಗದಿದ್ದಾಗ, ಅದರ ನೇರ ಪರಿಣಾಮ ಕೂದಲಿನ ಮೇಲೆ ಬೀಳುತ್ತದೆ. ಹಾಗೆಯೇ, ಕೂದಲನ್ನು ಅತಿಯಾಗಿ ತೊಳೆಯುವುದು ಅಥವಾ ದೀರ್ಘಕಾಲದವರೆಗೆ ಸ್ವಚ್ಛಗೊಳಿಸದಿರುವುದು ತಲೆಯ ಚರ್ಮದಲ್ಲಿನ ನೈಸರ್ಗಿಕ ಎಣ್ಣೆಯಂಶವನ್ನು ನಾಶಪಡಿಸಿ, ಕೂದಲನ್ನು ದೌರ್ಬಲ್ಯಗೊಳಿಸುತ್ತದೆ. ಹೀಗಾಗಿ, ಯಾವುದೇ ಖರ್ಚಿಲ್ಲದೆ ಮನೆಯಲ್ಲೇ ಸಿಗುವ ವಸ್ತುಗಳನ್ನು ಬಳಸಿ ಕೂದಲನ್ನು ಹೇಗೆ ಆರೋಗ್ಯಕರವಾಗಿ ಮತ್ತು ದಟ್ಟವಾಗಿ ಬೆಳೆಸಿಕೊಳ್ಳಬಹುದು ಎಂಬುದನ್ನು ಇಲ್ಲಿ ತಿಳಿಯೋಣ.

ಗಿಡದ ಬೇರು ಗಟ್ಟಿಯಾಗಿದ್ದರೆ ಮಾತ್ರ ಮರ ಚೆನ್ನಾಗಿ ಬೆಳೆಯುತ್ತದೆ. ಅದೇ ರೀತಿ ಕೂದಲಿನ ಬೆಳವಣಿಗೆಗೆ ತಲೆಯ ಚರ್ಮವೇ (ಸ್ಕಾಲ್ಪ್) ಅಡಿಪಾಯ. ತಲೆಯಲ್ಲಿ ಹೊಟ್ಟು ಮೂಡುವುದು, ರಾಸಾಯನಿಕ ಉತ್ಪನ್ನಗಳನ್ನು ಅತಿಯಾಗಿ ಬಳಸುವುದು ಮತ್ತು ರಕ್ತ ಪರಿಚಲನೆ ಸರಿಯಾಗಿ ಇಲ್ಲದಿರುವುದರಿಂದ ಕೂದಲಿನ ಬೇರುಗಳು ದುರ್ಬಲಗೊಳ್ಳುತ್ತವೆ. ಇದಕ್ಕೆ ಮುದ್ರೆ ಒತ್ತುವಂತೆ ಹೇರ್ ಸ್ಟ್ರೈಟನಿಂಗ್ ಮತ್ತು ಡ್ರೈಯರ್ನಂತಹ ಬಿಸಿ ಮಾಡುವ ಸಾಧನಗಳ ಅತಿಯಾದ ಬಳಕೆ ಹಾಗೂ ಬಿಗಿಯಾದ ಹೇರ್ಸ್ಟೈಲ್ಗಳು ಕೂದಲು ಬೇಗನೆ ಉದುರಲು ಕಾರಣವಾಗುತ್ತವೆ.

ಕೂದಲಿನ ಬೆಳವಣಿಗೆಗೆ ಪ್ರಮುಖವಾಗಿ ಮೂರು ಪೋಷಕಾಂಶಗಳು ಬೇಕಾಗುತ್ತವೆ. ನಮ್ಮ ಕೂದಲಿನಲ್ಲಿ ಶೇಕಡಾ 80 ರಿಂದ 85 ರಷ್ಟು ‘ಕೆರಾಟಿನ್’ ಎಂಬ ಪ್ರೋಟೀನ್ ಇರುತ್ತದೆ. ಆದ್ದರಿಂದ ಆಹಾರದಲ್ಲಿ ಬೇಳೆಕಾಲುಗಳು, ತೋಫು, ಒಣ ಹಣ್ಣುಗಳು ಮತ್ತು ಕ್ವಿನೋವಾಗಳನ್ನು ಹೆಚ್ಚಾಗಿ ಸೇವಿಸಬೇಕು. ಇದರೊಂದಿಗೆ ಕಬ್ಬಿಣ ಮತ್ತು ಸತುವು ಕೂದಲಿನ ಬೇರುಗಳಿಗೆ ಆಮ್ಲಜನಕವನ್ನು ಪೂರೈಸಿ ಬಲವನ್ನು ನೀಡುತ್ತವೆ. ಇದಕ್ಕಾಗಿ ಪಾಲಕ್ ಸೊಪ್ಪು, ಬಾದಾಮಿ, ಗೋಡಂಬಿ ಮತ್ತು ಕುಂಬಳಕಾಯಿ ಬೀಜಗಳನ್ನು ನಿಯಮಿತವಾಗಿ ತಿನ್ನಬೇಕು. ಇನ್ನು ಒಮೆಗಾ-3 ಫ್ಯಾಟಿ ಆಸಿಡ್ಗಳು ತಲೆಯ ಚರ್ಮ ಒಣಗದಂತೆ ಕಾಪಾಡುತ್ತವೆ. ಇವು ಚಿಯಾ ಬೀಜಗಳು ಮತ್ತು ವಾಲ್ನಟ್ಗಳಲ್ಲಿ ಸಮೃದ್ಧವಾಗಿವೆ.

ಕೂದಲಿನ ಬೆಳವಣಿಗೆಗೆ 4 ಅದ್ಭುತ ಮನೆಮದ್ದುಗಳು
ತೆಂಗಿನ ಎಣ್ಣೆಯು ಕೂದಲಿಗೆ ಉತ್ತಮ ತೇವಾಂಶವನ್ನು ನೀಡಿದರೆ, ಹರಳೆಣ್ಣೆಯಲ್ಲಿರುವ ರಿಸಿನೊಲಿಕ್ ಆಮ್ಲವು ತಲೆಯ ಚರ್ಮವನ್ನು ಆರೋಗ್ಯವಾಗಿಡುತ್ತದೆ. ಎರಡು ಚಮಚ ತೆಂಗಿನ ಎಣ್ಣೆಗೆ ಒಂದು ಚಮಚ ಹರಳೆಣ್ಣೆಯನ್ನು ಬೆರೆಸಿ, ಈ ಮಿಶ್ರಣವನ್ನು ಸ್ವಲ್ಪ ಉಗುರುಬೆಚ್ಚಗಾಗಿಸಿ ತಲೆಗೆ ಚೆನ್ನಾಗಿ ಮಸಾಜ್ ಮಾಡಬೇಕು. ಒಂದು ಗಂಟೆಯ ನಂತರ ರಾಸಾಯನಿಕ ಮುಕ್ತ ಮೈಲ್ಡ್ ಶಾಂಪೂ ಬಳಸಿ ತೊಳೆಯಬೇಕು.

ಲೋಳೆಯು (ಅಲೋವೆರಾ) ಕೂದಲಿಗೆ ನೈಸರ್ಗಿಕ ಕಂಡೀಷನರ್ ಆಗಿ ಕೆಲಸ ಮಾಡಿದರೆ, ರೋಸ್ಮೇರಿ ಆಯಿಲ್ ಹೊಸ ಕೂದಲು ಬೆಳೆಯಲು ಸಹಾಯ ಮಾಡುತ್ತದೆ. ಸ್ವಲ್ಪ ನೀರಿಗೆ ಎರಡು ಚಮಚ ಅಲೋವೆರಾ ಜೆಲ್ ಮತ್ತು ಕೆಲವು ಹನಿ ರೋಸ್ಮೇರಿ ಎಸೆನ್ಷಿಯಲ್ ಆಯಿಲ್ ಬೆರೆಸಿ, ಶಾಂಪೂ ಮಾಡಿದ ನಂತರ ಈ ನೀರಿನಿಂದ ಕೂದಲನ್ನು ನಾಲ್ಕರಿಂದ ಐದು ಬಾರಿ ಚೆನ್ನಾಗಿ ತೊಳೆದುಕೊಳ್ಳಬೇಕು.

ಕೂದಲಿನ ಬೇರುಗಳನ್ನು ಸಕ್ರಿಯಗೊಳಿಸಲು ನೈಸರ್ಗಿಕ ಸ್ಕಾಲ್ಪ್ ಸೀರಮ್ ಅದ್ಭುತವಾಗಿ ಕೆಲಸ ಮಾಡುತ್ತದೆ. ಒಂದು ಚಮಚ ಜೊಜೊಬಾ ಎಣ್ಣೆ, ಒಂದು ಚಮಚ ಬಾದಾಮಿ ಎಣ್ಣೆ, ಒಂದು ಚಮಚ ಅರ್ಗಾನ್ ಎಣ್ಣೆ ಮತ್ತು ಮೂರು ಹನಿ ಪುದೀನಾ ಎಣ್ಣೆಯನ್ನು ಮಿಶ್ರಣ ಮಾಡಿ, ರಾತ್ರಿ ಮಲಗುವ ಮುನ್ನ ಈ ಸೀರಮ್ ಅನ್ನು ತಲೆಗೆ ಹಚ್ಚಿ ನಿಧಾನವಾಗಿ ಮಸಾಜ್ ಮಾಡಿಕೊಳ್ಳಬೇಕು.

ಅಗಸೆಬೀಜದಲ್ಲಿರುವ (ಫ್ಲ್ಯಾಕ್ಸ್ ಸೀಡ್ಸ್) ಒಮೆಗಾ 3 ಕೊಬ್ಬಿನಾಮ್ಲಗಳು ಕೂದಲಿನ ಸ್ಥಿತಿಸ್ಥಾಪಕತ್ವವನ್ನು ಹೆಚ್ಚಿಸಿ, ಕೂದಲು ತುಂಡಾಗದಂತೆ ನೋಡಿಕೊಳ್ಳುತ್ತವೆ. ಎರಡು ಕಪ್ ನೀರಿಗೆ ಎರಡು ಚಮಚ ಅಗಸೆಬೀಜಗಳನ್ನು ಹಾಕಿ, ಅದು ಗಟ್ಟಿಯಾದ ಜೆಲ್ ತರಹ ಆಗುವವರೆಗೆ ಚೆನ್ನಾಗಿ ಕುದಿಸಬೇಕು. ಆರಿದ ನಂತರ ಆ ಜೆಲ್ ಅನ್ನು ಸೋಸಿಕೊಂಡು ಕೂದಲಿಗೆ ಹಚ್ಚಿ, ಸ್ವಲ್ಪ ಸಮಯದ ನಂತರ ಸಾಮಾನ್ಯ ನೀರಿನಿಂದ ತೊಳೆದುಕೊಳ್ಳಬೇಕು.

(ಗಮನಿಸಿ: ಈ ಮಾಹಿತಿಯು ಕೇವಲ ಪ್ರಾಥಮಿಕ ತಿಳುವಳಿಕೆಗಾಗಿ ಮಾತ್ರ. ಪ್ರತಿಯೊಬ್ಬರ ದೇಹದ ಪ್ರಕೃತಿ ವಿಭಿನ್ನವಾಗಿರುತ್ತದೆ, ಆದ್ದರಿಂದ ಯಾವುದೇ ಹೊಸ ಮನೆಮದ್ದನ್ನು ಪ್ರಯತ್ನಿಸುವ ತಜ್ಞರ ಸಲಹೆ ಪಡೆಯುವುದು ಉತ್ತಮ.)