ವಿಶ್ವದಲ್ಲೇ ಮೊದಲು: ಮಾನವ ವಕೀಲರ ವಿರುದ್ಧ ನ್ಯಾಯಾಲಯದಲ್ಲಿ ಜಯಭೇರಿ ಬಾರಿಸಿದ AI ಚಾಲಿತ ಲಾ ಫರ್ಮ್!

ಲಂಡನ್: ತಂತ್ರಜ್ಞಾನ ಲೋಕದಲ್ಲಿ ಮತ್ತೊಂದು ಐತಿಹಾಸಿಕ ಮೈಲಿಗಲ್ಲು ಸ್ಥಾಪನೆಯಾಗಿದೆ. ವಿಶ್ವದಲ್ಲೇ ಮೊದಲ ಬಾರಿಗೆ, ಕೃತಕ ಬುದ್ಧಿಮತ್ತೆ (AI) ಚಾಲಿತ ಲಾ ಫರ್ಮ್ ಒಂದು ಮಾನವ ವಕೀಲರ ವಿರುದ್ಧ ನ್ಯಾಯಾಲಯದಲ್ಲಿ ಹೋರಾಡಿ ಅಭೂತಪೂರ್ವ ಜಯ ಸಾಧಿಸಿದೆ. ಯುಕೆ  ಮೂಲದ ‘ಗಾರ್ಫೀಲ್ಡ್ AI’ ಎಂಬ ಕಾನೂನು ಚಾಟ್ ಬಾಟ್ ಈ ಐತಿಹಾಸಿಕ ಸಾಧನೆ ಮಾಡಿದೆ.

ಫ್ರೀಲ್ಯಾನ್ಸ್ ಮಾನವ ಸಂಪನ್ಮೂಲ (HR) ಎಕ್ಸಿಕ್ಯೂಟಿವ್ ಆಗಿ ಕೆಲಸ ಮಾಡುವ ತಮಿರೆಸ್ ಕಮಲ್ ತಾಕ್ವಿದಿರ್ ಎಂಬಾಕೆಗೆ ಹೋಟೆಲ್ ಉದ್ಯಮ ಸಂಸ್ಥೆಯೊಂದು ಬರಬೇಕಾಗಿದ್ದ ಬಾಕಿ ಹಣವನ್ನು ನೀಡಿರಲಿಲ್ಲ. ಇದಕ್ಕಾಗಿ ಸಾಂಪ್ರದಾಯಿಕ ವಕೀಲರನ್ನು ಸಂಪರ್ಕಿಸಿದರೆ ಲಕ್ಷಾಂತರ ರೂಪಾಯಿ ಖರ್ಚಾಗುತ್ತಿತ್ತು. ಆದರೆ, ತಮಿರೆಸ್ ಅವರು ಕೇವಲ £400 (ಸುಮಾರು ₹43,800) ಪಾವತಿಸಿ ‘ಗಾರ್ಫೀಲ್ಡ್ AI’ ಸೇವೆಯನ್ನು ಪಡೆದುಕೊಂಡಿದ್ದರು. ಇದೀಗ ನ್ಯಾಯಾಲಯವು ತಮಿರೆಸ್ ಪರವಾಗಿ ತೀರ್ಪು ನೀಡಿದ್ದು, £7,000 (ಸುಮಾರು ₹7.6 ಲಕ್ಷ) ಪರಿಹಾರ ನೀಡುವಂತೆ ಆದೇಶಿಸಿದೆ. ಅಷ್ಟೇ ಅಲ್ಲದೆ, ಎದುರಾಳಿ ಸಂಸ್ಥೆ ಹೂಡಿದ್ದ ಪ್ರತಿ-ದಾವೆಯನ್ನು (Counterclaim) ಕೋರ್ಟ್ ವಜಾಗೊಳಿಸಿದೆ.

AI ಕೆಲಸ ಮಾಡಿದ್ದು ಹೇಗೆ?

ಕಳೆದ ವರ್ಷದ ಏಪ್ರಿಲ್ ನಲ್ಲಿ ಬ್ರಿಟನ್ ನ ‘ಸಾಲಿಸಿಟರ್ಸ್ ರೆಗ್ಯುಲೇಶನ್ ಅಥಾರಿಟಿ’ (SRA) ಇಂದ ಅಧಿಕೃತ ಅನುಮತಿ ಪಡೆದಿದ್ದ ಗಾರ್ಫೀಲ್ಡ್ AI, ಈ ಪ್ರಕರಣದ ಸಂಪೂರ್ಣ ಕಾನೂನು ಜವಾಬ್ದಾರಿಯನ್ನು ಹೊತ್ತುಕೊಂಡಿತ್ತು.ವಿಚಾರಣೆಗೆ ಮುಂಚಿತವಾಗಿ ಅಗತ್ಯವಿರುವ ಎಲ್ಲಾ ಕಾನೂನು ದಾಖಲೆಗಳನ್ನು ಇದು ಸಿದ್ಧಪಡಿಸಿತ್ತು.ನಾಲ್ಕು ಸಾಕ್ಷಿದಾರರ ಹೇಳಿಕೆಗಳು ಮತ್ತು ಅಗತ್ಯ ದಾಖಲೆಗಳ ಕಂತೆಯನ್ನು ಅಚ್ಚುಕಟ್ಟಾಗಿ ಸಿದ್ಧಪಡಿಸಿತ್ತು.ತದನಂತರ, ನ್ಯಾಯಾಲಯದಲ್ಲಿ ವಾದ ಮಂಡಿಸಲು ‘ಒನ್ ಎಸೆಕ್ಸ್ ಕೋರ್ಟ್’ನ ಜೂನಿಯರ್ ಬ್ಯಾರಿಸ್ಟರ್ ಡೊಮಿನಿಕ್ ಲಿ ಅವರನ್ನು ಈ AI ನೇಮಕ ಮಾಡಿತ್ತು.

ಲಂಡನ್ ನ ವ್ಯಾಂಡ್ಸ್ವರ್ತ್ ಕೌಂಟಿ ನ್ಯಾಯಾಲಯದಲ್ಲಿ ಸುಮಾರು ಮೂರು ಗಂಟೆಗಳ ಕಾಲ ಸುದೀರ್ಘ ವಿಚಾರಣೆ ನಡೆಯಿತು. ಎರಡೂ ಕಡೆ ವಕೀಲರು ವಾದ-ಪ್ರತಿವಾದ ಮಂಡಿಸಿದ ನಂತರ, ನ್ಯಾಯಾಲಯವು AI ಸಿದ್ಧಪಡಿಸಿದ್ದ ವಾದವನ್ನು ಪುರಸ್ಕರಿಸಿ ತೀರ್ಪು ಪ್ರಕಟಿಸಿತು.ವಿಚಾರಣೆಯ ಉದ್ದೇಶಕ್ಕಾಗಿ ಗಾರ್ಫೀಲ್ಡ್ AI ಸಿದ್ಧಪಡಿಸಿದ ದಾಖಲೆಗಳು ಅತ್ಯಂತ ಪರಿಣಾಮಕಾರಿ ಮತ್ತು ಸಮರ್ಪಕವಾಗಿದ್ದವು ಎಂದು ವಾದ ಮಂಡಿಸಿದ ಬ್ಯಾರಿಸ್ಟರ್ ಡೊಮಿನಿಕ್ ಲಿ ಪ್ರಶಂಸಿಸಿದ್ದಾರೆ.

ಗಾರ್ಫೀಲ್ಡ್ AI ಸಂಸ್ಥೆಯ ಸಹ-ಸಂಸ್ಥಾಪಕ ಫಿಲಿಪ್ ಯಂಗ್ ಈ ಯಶಸ್ಸನ್ನು ಐತಿಹಾಸಿಕ ಕ್ಷಣ ಎಂದು ಬಣ್ಣಿಸಿದ್ದಾರೆ. ಲಿಂಕ್ಡ್ ಇನ್ ನಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಅವರು, ಇದು ಕೇವಲ ಒಂದು ಗಂಟೆಯ ಸಣ್ಣ ವಿಚಾರಣೆಯಲ್ಲ, ಬದಲಿಗೆ ಮೂರು ಗಂಟೆಗಳ ಕಾಲ ಸಾಕ್ಷ್ಯಗಳ ತಪಾಸಣೆ ನಡೆದ ಸಂಕೀರ್ಣ ಪ್ರಕರಣವಾಗಿತ್ತು. ಇಂತಹ ಪ್ರಕರಣದಲ್ಲಿ ಮಾನವ ವಕೀಲರ ವಿರುದ್ಧ AI ಜಯಗಳಿಸಿರುವುದು ಜಾಗತಿಕ ಇತಿಹಾಸದಲ್ಲೇ ಮೊದಲು. ಇದು ಸಾಮಾನ್ಯ ಜನರಿಗೆ ಸುಲಭವಾಗಿ ಮತ್ತು ಕಡಿಮೆ ವೆಚ್ಚದಲ್ಲಿ ನ್ಯಾಯ ಸಿಗುವ ಹೊಸ ಯುಗದ ಆರಂಭ ಎಂದಿದ್ದಾರೆ.ಪ್ರಸ್ತುತ ಈ ಕಾನೂನು ಚಾಟ್ಬಾಟ್ £10,000 (ಸುಮಾರು ₹11 ಲಕ್ಷ) ವರೆಗಿನ ಸಣ್ಣ ಮೌಲ್ಯದ ಕ್ಲೈಮ್ಗಳನ್ನು ನಿರ್ವಹಿಸುತ್ತಿದ್ದು, ಸಾಂಪ್ರದಾಯಿಕ ವಕೀಲರ ಶುಲ್ಕಕ್ಕೆ ಹೋಲಿಸಿದರೆ ಅತ್ಯಂತ ಕಡಿಮೆ ವೆಚ್ಚದಲ್ಲಿ ಸೇವೆ ನೀಡುತ್ತಿದೆ.