WATCH : ಸಮೋಸಾಗೆ ಬಣ್ಣ ಬಳಿಯುತ್ತಿರುವ ವ್ಯಕ್ತಿಯ ವಿಡಿಯೋ ವೈರಲ್!

ದೆಹಲಿ.ಜೂನ್.21: ಸಮೋಸಾ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ? ಸಂಜೆಯ ಚಹಾ ಜೊತೆ ಬಿಸಿಬಿಸಿ ಸಮೋಸಾ ಸವಿಯುವುದೇ ಒಂದು ಗಮ್ಮತ್ತು. ಆದರೆ, ಸಾಮಾಜಿಕ ಜಾಲತಾಣದಲ್ಲಿ ಸದ್ಯ ವೈರಲ್ ಆಗುತ್ತಿರುವ ವಿಡಿಯೋವೊಂದು ಸಮೋಸಾ ಪ್ರಿಯರ ನಿದ್ದೆಗೆಡಿಸಿದೆ. ವ್ಯಕ್ತಿಯೊಬ್ಬ ಸಮೋಸಾ ಆಕಾರದ ವಸ್ತುಗಳಿಗೆ ಬಣ್ಣ ಬಳಿಯುತ್ತಿರುವ ವಿಡಿಯೋ ಎಕ್ಸ್ (ಟ್ವಿಟರ್) ತಾಣದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದ್ದು, ಆಹಾರ ಕಲಬೆರಕೆಯ ಆತಂಕವನ್ನು ಸೃಷ್ಟಿಸಿದೆ.

ವೈರಲ್ ಆಗಿರುವ ವಿಡಿಯೋದಲ್ಲಿ ವ್ಯಕ್ತಿಯೊಬ್ಬ ನೆಲದ ಮೇಲೆ ಕುಳಿತು ತನ್ನ ಸುತ್ತಲೂ ಇರುವ ಸಮೋಸಾ ಆಕಾರದ ವಸ್ತುಗಳಿಗೆ ಬ್ರಷ್‌ನಿಂದ ಬಣ್ಣ ಹಚ್ಚುತ್ತಿರುವುದನ್ನು ಕಾಣಬಹುದು. ಅದರಲ್ಲಿ ಕೆಲವು ವಸ್ತುಗಳು ಈಗಷ್ಟೇ ಎಣ್ಣೆಯಿಂದ ಕರೆದ ಸಮೋಸಾಗಳಂತೆ ಚಿನ್ನದ ಬಣ್ಣದಲ್ಲಿದ್ದರೆ, ಇನ್ನು ಕೆಲವು ಬಿಳಿ ಬಣ್ಣದಲ್ಲಿವೆ. ಆತನ ಪಕ್ಕದಲ್ಲಿ ಬಣ್ಣದ ದ್ರಾವಣವಿರುವ ಸಣ್ಣ ಕಪ್‌ಗಳು ಹಾಗೂ ಬಣ್ಣ ಬಳಿಯಲು ಕಾಯುತ್ತಿರುವ ರಾಶಿ ರಾಶಿ ತ್ರಿಕೋನಾಕಾರದ ವಸ್ತುಗಳಿವೆ. ಇದನ್ನು ನೋಡಿದ ಹಲವರು, ತಿನ್ನುವ ಸಮೋಸಾಗಳಿಗೆ ಈ ರೀತಿ ಅಪಾಯಕಾರಿ ಬಣ್ಣ ಬಳಿಯಲಾಗುತ್ತಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಅವರು ಸಮೋಸಾಗಳಿಗೆ ಬಣ್ಣ ಹಚ್ಚುತ್ತಿದ್ದಾರೆ. ಸಮೋಸಾಗಳಾದರೂ ಅಪ್ಪಟವಾಗಿರುತ್ತವೆ ಎಂದು ಕೊಂಡಿದ್ದೆ, ಆದರೆ ಇಲ್ಲೂ ಕಲಬೆರಕೆ ಶುರುವಾಗಿದೆ” ಎಂಬ ಅಡಿಬರಹದೊಂದಿಗೆ ನೆಟ್ಟಿಗರೊಬ್ಬರು ಈ ವಿಡಿಯೋ ಹಂಚಿಕೊಂಡಿದ್ದಾರೆ.

ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಭಿನ್ನ ಭಿನ್ನವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. ಇದು ತಿನ್ನುವ ಸಮೋಸಾ ಅಲ್ಲ, ಬದಲಿಗೆ ಪ್ರದರ್ಶನಕ್ಕಾಗಿ (Display) ಇಡುವ ಕೃತಕ ವಸ್ತುಗಳು ಎಂದು ಹಲವರು ವಾದಿಸಿದ್ದಾರೆ. ಸಮೋಸಾಗಳಿಗೆ ಬಣ್ಣ ಹಚ್ಚುವ ಅಗತ್ಯವೇನಿದೆ? ಇದರಿಂದ ಅವರಿಗೇನು ಲಾಭ? ಎಂದು ಒಬ್ಬರು ಪ್ರಶ್ನಿಸಿದರೆ, ಕೊನೆಗೆ ಸಮೋಸಾ ಕೂಡ ನಂಬಿಕೆ ದ್ರೋಹ ಮಾಡಿತು” ಎಂದು ಮತ್ತೊಬ್ಬರು ತಮಾಷೆ ಮಾಡಿದ್ದಾರೆ.
ಮತ್ತೊಬ್ಬರು ಪ್ರತಿಕ್ರಿಯಿಸಿ, ಈತ ಒಬ್ಬ ಕಲಾವಿದ. ಈ ಸಮೋಸಾಗಳು ತಿನ್ನಲು ಅಲ್ಲ, ಅಂಗಡಿಗಳ ಪ್ರದರ್ಶನದಲ್ಲಿ ಇಡುವ ನಕಲಿ ಹಣ್ಣುಗಳಂತೆ ಇವು ನಕಲಿ ಸಮೋಸಾಗಳು. ನಿಜವಾದ ಸಮೋಸಾದಂತೆಯೇ ಕಾಣುವಂತೆ ಮಾಡಿರುವ ಕಲಾವಿದನ ಕೈಚಳಕವನ್ನು ಮೆಚ್ಚಬೇಕು ಎಂದು ಕೊಂಡಾಡಿದ್ದಾರೆ.

ಈ ವಿಡಿಯೋದಲ್ಲಿರುವ ವಸ್ತುಗಳು ನಿಜವಾದ ಸಮೋಸಾಗಳೇ ಅಥವಾ ಅಲಂಕಾರಿಕ ಕರಕುಶಲ ವಸ್ತುಗಳೇ ಎಂಬುದು ಇನ್ನು ಅಧಿಕೃತವಾಗಿ ದೃಢಪಟ್ಟಿಲ್ಲ. ಆದಾಗ್ಯೂ, ಮೇಲ್ನೋಟಕ್ಕೆ ಇದು ಕ್ರಾಫ್ಟ್ ತಯಾರಿಕೆಯಂತೆ ಕಾಣುತ್ತಿರುವುದರಿಂದ, ಜನರು ಆತಂಕಪಡುವ ಅಗತ್ಯವಿಲ್ಲ ಎಂದು ಬಹುತೇಕರು ಅಭಿಪ್ರಾಯಪಟ್ಟಿದ್ದಾರೆ.

समोसो पर कलर किया जा रहा है मुझे लगता था कि समोसा तो शुद्ध होता है लेकिन यहां भी मिलावट है। pic.twitter.com/er9srPd4dQ

— Pushpraj sharma (@ThePushprajX) June 20, 2026