WATCH : ‘ನಾನು ಮೊದಲು ಮಧುಮೇಹಿಯಾಗಿದ್ದೆ’: 20 ಕೆಜಿ ತೂಕ ಇಳಿಸಿ, ಮಾತ್ರೆಗಳಿಂದ ಮುಕ್ತಿ ಪಡೆದ ರಹಸ್ಯ ಬಿಚ್ಚಿಟ್ಟ ಅಮಿತ್ ಶಾ!

ದೆಹಲಿ.ಜೂನ್.23: ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರ ಆರೋಗ್ಯ ಬದಲಾವಣೆಯ ಕುರಿತಾದ ಹಳೆಯ ಭಾಷಣದ ತುಣುಕುಗಳು ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೊಮ್ಮೆ ವೈರಲ್ ಆಗುತ್ತಿದ್ದು, ಅವರ ಶಿಸ್ತುಬದ್ಧ ಜೀವನಶೈಲಿ ಮತ್ತು ಫಿಟ್ನೆಸ್ ಪಯಣ ಸಾರ್ವಜನಿಕರಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ದೆಹಲಿಯ ಇನ್ಸ್ಟಿಟ್ಯೂಟ್ ಆಫ್ ಲಿವರ್ ಅಂಡ್ ಬಿಲಿಯರಿ ಸೈನ್ಸಸ್ ನಲ್ಲಿ ಅವರು ನೀಡಿದ್ದ ಭಾಷಣದ ವೀಡಿಯೊ ತುಣುಕುಗಳು ಎಕ್ಸ್ (ಟ್ವಿಟರ್) ನಲ್ಲಿ ಮುನ್ನೆಲೆಗೆ ಬಂದಿದ್ದು, ಮಧುಮೇಹದಂತಹ ಆರೋಗ್ಯ ಸಮಸ್ಯೆಗಳನ್ನು ಮೆಟ್ಟಿ ನಿಂತು ತಮ್ಮ ದಿನಚರಿಯನ್ನು ಸಂಪೂರ್ಣವಾಗಿ ಬದಲಾಯಿಸಿಕೊಂಡಿದ್ದರ ಬಗ್ಗೆ ಶಾ ಮುಕ್ತವಾಗಿ ಮಾತನಾಡಿದ್ದಾರೆ.

ತಮ್ಮ ವೈಯಕ್ತಿಕ ಆರೋಗ್ಯದ ಬಗ್ಗೆ ಮಾತನಾಡಿದ ಅಮಿತ್ ಶಾ, ಕಳೆದ ಕೆಲವು ವರ್ಷಗಳಲ್ಲಿ ನಿಯಮಿತ ಜೀವನಶೈಲಿಯ ಮಾರ್ಪಾಡುಗಳ ಮೂಲಕ ಆರೋಗ್ಯವನ್ನು ಹೇಗೆ ಹತೋಟಿಗೆ ತಂದರು ಎಂಬುದನ್ನು ಹಂಚಿಕೊಂಡಿದ್ದಾರೆ. ಅವರ ಪ್ರಕಾರ, ಈ ಬದಲಾವಣೆಯು ಯಾವುದೇ ಶಾರ್ಟ್ ಕಟ್ ಅಥವಾ ಕಠಿಣ ಡಯಟ್ ಗಳಿಂದ ಬಂದಿದ್ದಲ್ಲ. ಬದಲಿಗೆ ನಿದ್ದೆ, ನೀರು ಕುಡಿಯುವುದು, ಆಹಾರ ಪದ್ಧತಿ ಮತ್ತು ನಿಯಮಿತ ವ್ಯಾಯಾಮದಲ್ಲಿ ತಂದ ಸುಸ್ಥಿರ ಬದಲಾವಣೆಗಳಿಂದ ಸಾಧ್ಯವಾಗಿದೆ.

HM SHAH : "I was diabetic earlier 🤯

I made a huge change in my life since May 2020 till today.

I fixed my sleep, improved water intake, diet & regular exercise 🔥

That has given me a lot.

Today, I am free from any kind of allopathic medicine and insulin.

I request Youths… pic.twitter.com/RzDBQVc8Dn

— News Algebra (@NewsAlgebraIND) June 21, 2026

ನನಗೆ ಮೊದಲು ಮಧುಮೇಹ ಇತ್ತು. ಮೇ 2020 ರಿಂದ ಇಂದಿನವರೆಗೆ ನಾನು ನನ್ನ ಜೀವನದಲ್ಲಿ ಒಂದು ದೊಡ್ಡ ಬದಲಾವಣೆಯನ್ನು ಮಾಡಿಕೊಂಡಿದ್ದೇನೆ. ನನ್ನ ನಿದ್ದೆಯ ಸಮಯವನ್ನು ಸರಿಪಡಿಸಿಕೊಂಡೆ, ನೀರಿನ ಸೇವನೆಯನ್ನು ಹೆಚ್ಚಿಸಿದೆ, ಆಹಾರ ಪದ್ಧತಿ ಮತ್ತು ನಿಯಮಿತ ವ್ಯಾಯಾಮವನ್ನು ರೂಢಿಸಿಕೊಂಡೆ. ಇದು ನನಗೆ ಉತ್ತಮ ಆರೋಗ್ಯವನ್ನು ನೀಡಿದೆ ಎಂದು ಶಾ ಹೇಳಿದ್ದಾರೆ.

ಈ ಶಿಸ್ತುಬದ್ಧ ಹವ್ಯಾಸಗಳು ಕೇವಲ ದೈಹಿಕ ಆರೋಗ್ಯವನ್ನು ಸುಧಾರಿಸುವುದಲ್ಲದೆ, ಔಷಧಿಗಳ ಮೇಲಿನ ಅವಲಂಬನೆಯನ್ನು ಸಂಪೂರ್ಣವಾಗಿ ಕಡಿಮೆ ಮಾಡಿದೆ ಎಂದು ಅವರು ತಿಳಿಸಿದ್ದಾರೆ. ನಾನು ಜೀವನದಲ್ಲಿ ಸಾಕಷ್ಟು ಸಾಧಿಸಿದ್ದೇನೆ. ಆದರೆ ಕಳೆದ 4.5 ವರ್ಷಗಳಲ್ಲಿ, ನಾನು ಎಲ್ಲಾ ರೀತಿಯ ಅಲೋಪತಿ ಮಾತ್ರೆಗಳಿಂದ ಸಂಪೂರ್ಣ ಮುಕ್ತಿ ಪಡೆದಿದ್ದೇನೆ ಎಂದು ಶಾ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ಆರೋಗ್ಯಕರ ಜೀವನಶೈಲಿಯು ಕೇವಲ ದೈಹಿಕವಾಗಿ ಮಾತ್ರವಲ್ಲದೆ, ಮಾನಸಿಕವಾಗಿಯೂ ಧನಾತ್ಮಕ ಪರಿಣಾಮ ಬೀರಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ. ಇದರಿಂದಾಗಿ ಕೆಲಸದ ದಕ್ಷತೆ, ಏಕಾಗ್ರತೆ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ಹೆಚ್ಚಾಗಿದೆ ಎಂದಿದ್ದಾರೆ. ಈ ಕ್ರಮೇಣ ಮತ್ತು ನಿರಂತರ ಪ್ರಯತ್ನದಿಂದಾಗಿ ಅವರು ಬರೋಬ್ಬರಿ 20 ಕಿಲೋಗ್ರಾಂಗಳಿಗಿಂತ ಹೆಚ್ಚು ತೂಕ ಇಳಿಸಿಕೊಂಡಿರುವುದಾಗಿ ಬಹಿರಂಗಪಡಿಸಿದ್ದಾರೆ. ದೇಶದಲ್ಲಿ ಮಧುಮೇಹ, ಬೊಜ್ಜು ಮತ್ತು ಒತ್ತಡದ ಜೀವನಶೈಲಿ ಹೆಚ್ಚುತ್ತಿರುವ ಈ ಸಮಯದಲ್ಲಿ ಅವರ ಈ ಮಾತುಗಳು ಜನರಲ್ಲಿ ಜಾಗೃತಿ ಮೂಡಿಸುತ್ತಿವೆ.

ಯುವ ಪೀಳಿಗೆಗೆ ದೈಹಿಕ ಚಟುವಟಿಕೆ ಮತ್ತು ಸರಿಯಾದ ವಿಶ್ರಾಂತಿಯ ಮಹತ್ವವನ್ನು ತಿಳಿಸಿದ ಗೃಹ ಸಚಿವರು, “ನಿಮ್ಮ ದೇಹಕ್ಕಾಗಿ ದಿನಕ್ಕೆ ಎರಡು ಗಂಟೆಗಳ ವ್ಯಾಯಾಮ ಮತ್ತು ನಿಮ್ಮ ಮೆದುಳಿಗಾಗಿ ಆರು ಗಂಟೆಗಳ ನಿದ್ದೆಯನ್ನು ಮೀಸಲಿಡಿ” ಎಂದು ಸಲಹೆ ನೀಡಿದ್ದಾರೆ. ಫಿಟ್ನೆಸ್, ನಿದ್ದೆ ಮತ್ತು ಶಿಸ್ತು ಕೇವಲ ದೈಹಿಕ ಆರೋಗ್ಯಕ್ಕೆ ಮಾತ್ರವಲ್ಲ, ಮಾನಸಿಕ ಸ್ಪಷ್ಟತೆ ಮತ್ತು ದೀರ್ಘಕಾಲದ ಯೋಗಕ್ಷೇಮಕ್ಕೆ ಅತ್ಯಂತ ಮುಖ್ಯ ಎಂಬುದನ್ನು ಅವರ ಮಾತುಗಳು ಸಾಬೀತುಪಡಿಸಿವೆ.