ಇಂಟರ್ನೆಟ್ ಇಲ್ಲದೆಯೂ ಕೀಪ್ಯಾಡ್ ಮೊಬೈಲ್ ನಲ್ಲಿ ಯುಪಿಐ ಪಾವತಿ: ಫೋನ್‍ಪೇನಿಂದ ಹೊಸ ಫೀಚರ್ ಬಿಡುಗಡೆ!

ದೆಹಲಿ.ಸೆಪ್ಟೆಂಬರ್.01: ಇಂಟರ್‌ನೆಟ್ ಸಂಪರ್ಕವಿಲ್ಲದಿದ್ದರೂ ಯುಪಿಐ ಮೂಲಕ ಹಣ ಪಾವತಿ ಮಾಡಲು ಸಾಧ್ಯವಾಗುವ ಹೊಸ ಸೌಲಭ್ಯವನ್ನು ಫೋನ್‌ಪೇ ಪರಿಚಯಿಸಿದೆ. ಸದ್ಯ ಈ ಸೇವೆಯನ್ನು ಫೀಚರ್‌ ಫೋನ್‌ ಬಳಕೆದಾರರಿಗಾಗಿ ವಿಸ್ತರಿಸಲಾಗಿದ್ದು, ಇಂಟರ್‌ನೆಟ್ ಅಥವಾ ಸ್ಮಾರ್ಟ್‌ಫೋನ್ ಇಲ್ಲದ ಸಂದರ್ಭದಲ್ಲಿಯೂ ಡಿಜಿಟಲ್ ಪೇಮೆಂಟ್ ಮಾಡಲು ಅವಕಾಶ ಸಿಗಲಿದೆ.

ಫೋನ್‌ಪೇ ತನ್ನ UPI 123PAY ಸೇವೆಯ ಮೂಲಕ ಈ ಸೌಲಭ್ಯವನ್ನು ನೀಡುತ್ತಿದೆ. ವಿಶೇಷವಾಗಿ 2G ಸಂಪರ್ಕ ಕಡಿಮೆ ಇರುವ ಪ್ರದೇಶಗಳಲ್ಲಿ ವಾಸಿಸುವವರಿಗೆ ಡಿಜಿಟಲ್ ಪಾವತಿಗಳನ್ನು ಸುಲಭಗೊಳಿಸುವುದು ಇದರ ಉದ್ದೇಶವಾಗಿದೆ. ದೇಶದ 20 ಕೋಟಿಗೂ ಅಧಿಕ ಫೀಚರ್‌ ಫೋನ್‌ ಬಳಕೆದಾರರನ್ನು ಯುಪಿಐ ಸೇವೆಯ ವ್ಯಾಪ್ತಿಗೆ ತರಲು ಈ ಕ್ರಮ ಸಹಕಾರಿಯಾಗಲಿದೆ.

Nokia, HMD, Lava, itel ಫೋನ್‌ಗಳಲ್ಲೂ ಸೌಲಭ್ಯ

ಇಂಟರ್‌ನೆಟ್‌ ಇಲ್ಲದೆಯೇ ಯುಪಿಐ ಪಾವತಿ ಮಾಡಲು ಅನುಕೂಲವಾಗುವಂತೆ ಫೋನ್‌ಪೇ, Nokia, HMD, Lava ಹಾಗೂ itel ಸೇರಿದಂತೆ ಹಲವು ಫೀಚರ್‌ ಫೋನ್‌ ತಯಾರಿಕಾ ಕಂಪನಿಗಳೊಂದಿಗೆ ಕೈಜೋಡಿಸಿದೆ. SMS ಆಧಾರಿತ ವ್ಯವಸ್ಥೆ ಹಾಗೂ ತನ್ನದೇ ತಂತ್ರಜ್ಞಾನವನ್ನು ಬಳಸಿಕೊಂಡು ಈ ಸೇವೆಯನ್ನು ಒದಗಿಸಲಾಗುತ್ತಿದೆ.

ಸ್ಮಾರ್ಟ್‌ಫೋನ್‌ ಬಳಕೆದಾರರಿಗೆ ಮಾತ್ರ ಸೀಮಿತವಾಗಿರುವ ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ಫೀಚರ್‌ ಫೋನ್‌ ಬಳಕೆದಾರರಿಗೂ ತಲುಪಿಸುವುದು ಫೋನ್‌ಪೇಯ ಪ್ರಮುಖ ಉದ್ದೇಶವಾಗಿದೆ. ಒಟ್ಟು 30 ಕೋಟಿ ಜನರನ್ನು ಡಿಜಿಟಲ್ ಪಾವತಿ ವ್ಯವಸ್ಥೆಯ ವ್ಯಾಪ್ತಿಗೆ ತರಲು ಸಂಸ್ಥೆ ಗುರಿ ಹೊಂದಿದೆ.

ಫೀಚರ್‌ ಫೋನ್‌ನಲ್ಲಿ ಏನೆಲ್ಲಾ ಮಾಡಬಹುದು?

UPI 123PAY ಮೂಲಕ ಫೀಚರ್‌ ಫೋನ್ ಬಳಕೆದಾರರು ಹಲವು ರೀತಿಯ ವಹಿವಾಟುಗಳನ್ನು ನಡೆಸಬಹುದು. ಒಬ್ಬ ವ್ಯಕ್ತಿಯಿಂದ ಮತ್ತೊಬ್ಬರಿಗೆ ಹಣ ಕಳುಹಿಸುವುದು, ವ್ಯಾಪಾರಿಗಳಿಗೆ ಪಾವತಿ ಮಾಡುವುದು, ಕ್ಯಾಮೆರಾ ಹೊಂದಿರುವ ಫೀಚರ್‌ ಫೋನ್‌ಗಳಲ್ಲಿ QR ಕೋಡ್ ಸ್ಕ್ಯಾನ್ ಮಾಡಿ ಹಣ ಪಾವತಿಸುವುದು ಸಾಧ್ಯವಾಗಲಿದೆ.

ಇದರ ಜೊತೆಗೆ ಬ್ಯಾಂಕ್ ಖಾತೆಯ ಬ್ಯಾಲೆನ್ಸ್ ಪರಿಶೀಲನೆ ಹಾಗೂ ಹಿಂದಿನ ವಹಿವಾಟುಗಳ ವಿವರಗಳನ್ನು ಪಡೆಯುವ ಸೌಲಭ್ಯವೂ ಲಭ್ಯವಿದೆ.

ಹೊಸ ಬಳಕೆದಾರರಿಗೆ ನೆರವಾಗಲು ಫೋನ್‌ಪೇ ಕೃತಕ ಬುದ್ಧಿಮತ್ತೆ ಆಧಾರಿತ ಹೆಲ್ಪ್‌ಲೈನ್ ಸೇವೆಯನ್ನೂ ಪರಿಚಯಿಸಿದೆ. ಇಂಗ್ಲಿಷ್ ಸೇರಿದಂತೆ ಒಟ್ಟು 12 ಭಾರತೀಯ ಭಾಷೆಗಳಲ್ಲಿ ಈ ನೆರವು ಲಭ್ಯವಿದೆ. ಮುಂದಿನ ದಿನಗಳಲ್ಲಿ ಯುಟಿಲಿಟಿ ಬಿಲ್ ಪಾವತಿ ಹಾಗೂ ಮೊಬೈಲ್ ರೀಚಾರ್ಜ್ ಸೇವೆಗಳನ್ನು ಕೂಡ ಸೇರಿಸಲು ಫೋನ್‌ಪೇ ಯೋಜಿಸುತ್ತಿದೆ.

ಜುಲೈ ವೇಳೆಗೆ ಫೋನ್‌ಪೇ 71.5 ಕೋಟಿಗೂ ಅಧಿಕ ನೋಂದಾಯಿತ ಬಳಕೆದಾರರನ್ನು ಹೊಂದಿದ್ದು, 5 ಕೋಟಿಗೂ ಹೆಚ್ಚು ವ್ಯಾಪಾರಿಗಳು ವೇದಿಕೆಯಲ್ಲಿ ನೋಂದಾಯಿಸಿಕೊಂಡಿದ್ದಾರೆ ಎಂದು ಸಂಸ್ಥೆ ತಿಳಿಸಿದೆ.

UPI 123PAYಗೆ ನೋಂದಣಿ ಹೇಗೆ?

UPI 123PAY ಸೇವೆಯನ್ನು ಬಳಸಲು ಸ್ಮಾರ್ಟ್‌ಫೋನ್ ಅಗತ್ಯವಿಲ್ಲ. ಫೀಚರ್‌ ಫೋನ್‌ನಲ್ಲಿ ಮೊದಲೇ ಅಳವಡಿಸಲಾಗಿರುವ ಫೋನ್‌ಪೇ ಅಪ್ಲಿಕೇಶನ್‌ ತೆರೆಯಬೇಕು. ಬಳಿಕ ನಿಯಮ ಮತ್ತು ಷರತ್ತುಗಳಿಗೆ ಒಪ್ಪಿಗೆ ನೀಡಬೇಕು.

ನಂತರ ಲಭ್ಯವಿರುವ ಆಯ್ಕೆಗಳಿಂದ ತಮ್ಮ ಬ್ಯಾಂಕ್‌ ಅನ್ನು ಆಯ್ಕೆ ಮಾಡಿಕೊಂಡು ಅಗತ್ಯ ಪ್ರಕ್ರಿಯೆ ಪೂರ್ಣಗೊಳಿಸಿದರೆ UPI ಪಾವತಿ ಸೇವೆಯನ್ನು ಬಳಸಲು ಆರಂಭಿಸಬಹುದು.

ಇಂಟರ್‌ನೆಟ್‌ ಸಂಪರ್ಕದ ಸಮಸ್ಯೆ ಇರುವ ಪ್ರದೇಶಗಳಲ್ಲಿಯೂ ಡಿಜಿಟಲ್‌ ಪಾವತಿಗಳನ್ನು ಸುಲಭವಾಗಿ ಮಾಡಲು ಈ ಹೊಸ ಸೌಲಭ್ಯ ನೆರವಾಗುವ ನಿರೀಕ್ಷೆಯಿದೆ.