ಬೆಂಗಳೂರು : ಇಂದಿನ ದಿನಗಳಲ್ಲಿ ಸ್ಮಾರ್ಟ್‌ಫೋನ್ ಕೇವಲ ಕರೆ ಮಾಡಲು ಮಾತ್ರ ಸೀಮಿತವಾಗಿಲ್ಲ. ಬ್ಯಾಂಕಿಂಗ್ ವಹಿವಾಟು, ವೈಯಕ್ತಿಕ ಫೋಟೋಗಳು, ವಾಟ್ಸಾಪ್ ಸಂದೇಶಗಳು, ಇಮೇಲ್ ಹಾಗೂ ಅತಿ ಮುಖ್ಯವಾದ ದಾಖಲೆಗಳೆಲ್ಲವೂ ನಮ್ಮ ಮೊಬೈಲ್‌ನಲ್ಲೇ ಇರುತ್ತವೆ. ಇಂತಹ ಸಂದರ್ಭದಲ್ಲಿ ಫೋನ್‌ಗೆ ಸೂಕ್ತವಾದ ಲಾಕ್ ಹಾಕುವುದು ಅತ್ಯಂತ ಅಗತ್ಯ. ಆದರೆ ಫೋನ್ ಸುರಕ್ಷತೆಗೆ ಪಾಸ್‌ವರ್ಡ್, ಪಿನ್, ಪ್ಯಾಟರ್ನ್ ಲಾಕ್ ಅಥವಾ ಫಿಂಗರ್‌ಪ್ರಿಂಟ್ ಇವುಗಳಲ್ಲಿ ಯಾವುದು ಉತ್ತಮ ಎಂಬ ಗೊಂದಲ ಹಲವರಲ್ಲಿದೆ.
ಪ್ಯಾಟರ್ನ್ ಲಾಕ್ ನಿಜಕ್ಕೂ ಸುರಕ್ಷಿತವೇ?
ಬಹುತೇಕ ಮಂದಿ ಫೋನ್ ಅನ್‌ಲಾಕ್ ಮಾಡಲು ಪ್ಯಾಟರ್ನ್ ಲಾಕ್ ಬಳಸುತ್ತಾರೆ. ಸ್ಕ್ರೀನ್ ಮೇಲಿನ ಚುಕ್ಕೆಗಳನ್ನು ಜೋಡಿಸಿ ಆಕಾರ ರಚಿಸುವುದು ಸುಲಭವಾದರೂ ಇದರಲ್ಲಿ ಅಪಾಯಗಳೂ ಇವೆ. ನೀವು ಫೋನ್ ಅನ್‌ಲಾಕ್ ಮಾಡುವಾಗ ಅಕ್ಕಪಕ್ಕದಲ್ಲಿ ಇರುವವರು ಅದನ್ನು ಸುಲಭವಾಗಿ ಗಮನಿಸಿ ನೆನಪಿನಲ್ಲಿಟ್ಟುಕೊಳ್ಳುವ ಸಾಧ್ಯತೆ ಹೆಚ್ಚು. ಅಷ್ಟೇ ಅಲ್ಲದೆ, ಡಿಸ್‌ಪ್ಲೇ ಮೇಲಿರುವ ಬೆರಳಚ್ಚಿನ ಗುರುತುಗಳನ್ನು ನೋಡಿಯೇ ಕೆಲವೊಮ್ಮೆ ಪ್ಯಾಟರ್ನ್ ಪತ್ತೆಹಚ್ಚಬಹುದು. ಆದ್ದರಿಂದ ಸುಲಭವಾಗಿ ಊಹಿಸಬಹುದಾದ ಆಕಾರಗಳನ್ನು ಎಂದಿಗೂ ಆಯ್ಕೆ ಮಾಡಬೇಡಿ.
ಪಿನ್ ಅಥವಾ ಪಾಸ್‌ವರ್ಡ್: ಯಾವುದು ಹೆಚ್ಚು ಸುರಕ್ಷಿತ?
ಕನಿಷ್ಠ ಆರು ಅಥವಾ ಅದಕ್ಕಿಂತ ಹೆಚ್ಚಿನ ಅಂಕಿಗಳನ್ನು ಹೊಂದಿರುವ ಪಿನ್ ಆಯ್ಕೆ ಮಾಡುವುದು ಉತ್ತಮ ವಿಧಾನ. ಜನ್ಮದಿನಾಂಕ, ಸತತ ಸಂಖ್ಯೆಗಳು ಅಥವಾ ಒಂದೇ ಅಂಕಿಯನ್ನು ಪದೇಪದೇ ಬಳಸುವ ಸುಲಭ ಪಿನ್‌ಗಳನ್ನು ಎಂದಿಗೂ ಬಳಸಬಾರದು. ಇನ್ನು ಪಾಸ್‌ವರ್ಡ್ ವಿಷಯಕ್ಕೆ ಬಂದರೆ ಅಕ್ಷರಗಳು, ಸಂಖ್ಯೆಗಳು ಹಾಗೂ ವಿಶೇಷ ಚಿಹ್ನೆಗಳನ್ನು ಸೇರಿಸಿ ಬಲವಾದ ಪಾಸ್‌ವರ್ಡ್ ರಚಿಸುವುದು ಅತ್ಯಂತ ಸುರಕ್ಷಿತ. ಒಂದು ವೇಳೆ ತ್ವರಿತವಾಗಿ ಅನ್‌ಲಾಕ್ ಮಾಡಲು ಬಯಸುವುದಾದರೆ ಬಲಿಷ್ಠವಾದ ಪಿನ್ ಸೆಟ್ ಮಾಡುವುದು ಸೂಕ್ತ ಆಯ್ಕೆಯಾಗಿದೆ.
ಫಿಂಗರ್‌ಪ್ರಿಂಟ್ ಮತ್ತು ಫೇಸ್ ಅನ್‌ಲಾಕ್ ಬಳಕೆ ಹೇಗೆ?
ಫಿಂಗರ್‌ಪ್ರಿಂಟ್ ಹಾಗೂ ಫೇಸ್ ಅನ್‌ಲಾಕ್‌ನಂತಹ ಬಯೋಮೆಟ್ರಿಕ್ ವಿಧಾನಗಳು ಫೋನ್ ಅನ್‌ಲಾಕ್ ಮಾಡುವ ಪ್ರಕ್ರಿಯೆಯನ್ನು ಸುಲಭಗೊಳಿಸುತ್ತವೆ. ಆದರೆ ಇವುಗಳ ಜೊತೆಗೆ ಬಲವಾದ ಪಿನ್ ಅಥವಾ ಪಾಸ್‌ವರ್ಡ್ ಇಟ್ಟುಕೊಳ್ಳುವುದು ಅತ್ಯಗತ್ಯ. ಏಕೆಂದರೆ ಫೋನ್ ರೀಸ್ಟಾರ್ಟ್ ಆದಾಗ ಅಥವಾ ಕೆಲವು ಭದ್ರತಾ ಕಾರಣಗಳಿಗಾಗಿ ಪಿನ್ ಅಥವಾ ಪಾಸ್‌ವರ್ಡ್ ನಮೂದಿಸಲೇಬೇಕಾಗುತ್ತದೆ.
ಫೋನ್ ಭದ್ರತೆಗೆ ವಹಿಸಬೇಕಾದ ಮುನ್ನೆಚ್ಚರಿಕೆಗಳು
ಯಾರೂ ಸುಲಭವಾಗಿ ಊಹಿಸಲಾಗದ ಕನಿಷ್ಠ ಆರು ಅಂಕಿಗಳ ಪಿನ್ ಸೆಟ್ ಮಾಡಿಕೊಳ್ಳಿ. ಸಾರ್ವಜನಿಕ ಸ್ಥಳಗಳಲ್ಲಿ ಫೋನ್ ಅನ್‌ಲಾಕ್ ಮಾಡುವಾಗ ಇತರರು ಗಮನಿಸದಂತೆ ಎಚ್ಚರವಹಿಸಿ. ಸಾಧ್ಯವಾದಷ್ಟು ಫಿಂಗರ್‌ಪ್ರಿಂಟ್ ಅಥವಾ ಫೇಸ್ ಅನ್‌ಲಾಕ್ ಫೀಚರ್ ಸಕ್ರಿಯವಾಗಿಟ್ಟುಕೊಳ್ಳಿ. ಫೋನ್‌ನ ಸಾಫ್ಟ್‌ವೇರ್ ಅನ್ನು ಕಾಲಕಾಲಕ್ಕೆ ಅಪ್‌ಡೇಟ್ ಮಾಡುತ್ತಿರಿ. ಅಕಸ್ಮಾತ್ ಫೋನ್ ಕಳೆದುಹೋದರೆ ಟ್ರ್ಯಾಕ್ ಮಾಡಲು ಅನುಕೂಲವಾಗುವ ಭದ್ರತಾ ಫೀಚರ್‌ಗಳನ್ನು ಮೊದಲೇ ಆನ್ ಮಾಡಿಟ್ಟುಕೊಳ್ಳುವುದು ಜಾಣತನ.
ಒಟ್ಟಾರೆಯಾಗಿ ಪ್ಯಾಟರ್ನ್ ಲಾಕ್‌ಗೆ ಹೋಲಿಸಿದರೆ ಬಲಿಷ್ಠವಾದ ಪಿನ್ ಅಥವಾ ಪಾಸ್‌ವರ್ಡ್ ಆಯ್ಕೆ ಮಾಡುವುದು ಹೆಚ್ಚು ಸೂಕ್ತ. ಬಯೋಮೆಟ್ರಿಕ್ ಫೀಚರ್‌ಗಳ ಜೊತೆಗೆ ಬಲವಾದ ಪಿನ್ ಬಳಸುವುದರಿಂದ ಫೋನ್‌ಗೆ ಗರಿಷ್ಠ ಭದ್ರತೆ ಹಾಗೂ ಸುಲಭ ಬಳಕೆ ಎರಡೂ ಸಿಗಲಿವೆ.
