ದೆಹಲಿ: ಮೊಬೈಲ್ ಗ್ರಾಹಕರಿಗೆ ನಿರಂತರ ಕಿರಿಕಿರಿ ಉಂಟುಮಾಡುವ ಅನಗತ್ಯ ವಾಣಿಜ್ಯ ಕರೆಗಳು ಮತ್ತು ನಕಲಿ ಸ್ಪ್ಯಾಮ್ ಕರೆಗಳಿಗೆ ಕಡಿವಾಣ ಹಾಕಲು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಕಟ್ಟುನಿಟ್ಟಿನ ಹೆಜ್ಜೆ ಇಟ್ಟಿದೆ. ಈ ಸಂಬಂಧ ‘ದೂರಸಂಪರ್ಕ ವಾಣಿಜ್ಯ ಸಂವಹನ ಗ್ರಾಹಕರ ಆದ್ಯತೆ (ಮೂರನೇ ತಿದ್ದುಪಡಿ) ನಿಯಮಗಳು, 2026’ ಅನ್ನು ಜಾರಿಗೆ ತಂದಿದ್ದು, ಕೃತಕ ಬುದ್ಧಿಮತ್ತೆ (AI), ಸ್ವಯಂಚಾಲಿತ ಹಾಗೂ ರೋಬೋಕಾಲ್ಗಳ ನಿಯಂತ್ರಣಕ್ಕೆ ಕಠಿಣ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ.
ಹೊಸ ನಿಯಮಗಳ ಪ್ರಕಾರ, ಯಾವುದೇ ಸಾಫ್ಟ್ವೇರ್ ಅಥವಾ ಆ್ಯಪ್ ಮೂಲಕ ಮಾಡುವ ಅಪ್ಲಿಕೇಶನ್-ಟು-ಪರ್ಸನ್ (A2P) ಕರೆಗಳು, ರೋಬೋಕಾಲ್ಗಳು ಮತ್ತು ರೆಕಾರ್ಡ್ ಮಾಡಿದ ಧ್ವನಿ ಕರೆಗಳನ್ನು ಆರಂಭಿಸುವ ಮುನ್ನ ದೂರಸಂಪರ್ಕ ಸೇವಾ ಪೂರೈಕೆದಾರರಿಗೆ (ಟೆಲಿಕಾಂ ಕಂಪನಿಗಳಿಗೆ) ಮುಂಚಿತವಾಗಿಯೇ ಮಾಹಿತಿ ನೀಡುವುದು ಕಡ್ಡಾಯವಾಗಿದೆ. ಈ ಕರೆಗಳಿಗೆ ಬಳಸುವ ನಂಬರ್ಗಳ ವಿವರಗಳನ್ನು ಟೆಲಿಕಾಂ ಸಂಸ್ಥೆಗಳಿಗೆ ಘೋಷಿಸದೇ ಕರೆ ಮಾಡಿದರೆ, ಅದನ್ನು ನಿಯಮಬಾಹಿರ ಸ್ಪ್ಯಾಮ್ ಎಂದು ಪರಿಗಣಿಸಲಾಗುತ್ತದೆ. ಜತೆಗೆ ಇಂತಹ ಎ2ಪಿ ಕರೆಗಳಿಗೆ ಪ್ರತಿ ನಿಮಿಷಕ್ಕೆ ಗರಿಷ್ಠ 5 ಪೈಸೆ ಟರ್ಮಿನೇಷನ್ ಶುಲ್ಕವನ್ನೂ ವಿಧಿಸಲಾಗುತ್ತದೆ.
ಸ್ಪ್ಯಾಮ್ ಕರೆ ಮಾಡುವವರನ್ನು ಪತ್ತೆಹಚ್ಚಲು ಟೆಲಿಕಾಂ ಸಂಸ್ಥೆಗಳು ಎಐ ಮತ್ತು ಮಷಿನ್ ಲರ್ನಿಂಗ್ ತಂತ್ರಜ್ಞಾನವನ್ನು ಕಡ್ಡಾಯವಾಗಿ ಬಳಸಬೇಕು. ಯಾವುದೇ ಸಂಖ್ಯೆಯ ವಿರುದ್ಧ ಹತ್ತು ದಿನಗಳಲ್ಲಿ ಮೂರು ಅಥವಾ ಅದಕ್ಕಿಂತ ಹೆಚ್ಚು ದೂರುಗಳು ದಾಖಲಾಗಿ, ಎಐ ವ್ಯವಸ್ಥೆಯೂ ಅದನ್ನು ಸ್ಪ್ಯಾಮ್ ಎಂದು ಗುರುತಿಸಿದರೆ ತಕ್ಷಣವೇ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ. ಇಂತಹ ಪ್ರಕರಣಗಳಲ್ಲಿ ಕೆವೈಸಿ ಮರುಪರಿಶೀಲನೆ, ಹೊರಹೋಗುವ ಕರೆಗಳ ಸ್ಥಗಿತ ಅಥವಾ ಸಂಪರ್ಕವನ್ನೇ ಸಂಪೂರ್ಣವಾಗಿ ಕಡಿತಗೊಳಿಸಲು ಅವಕಾಶ ನೀಡಲಾಗಿದೆ.
ಅದೇ ವೇಳೆ ಸಾರ್ವಜನಿಕರಿಗೆ ಉಪಯುಕ್ತವಾಗುವ ಅಧಿಕೃತ ಬ್ಯಾಂಕಿಂಗ್, ವಾಣಿಜ್ಯ ಮತ್ತು ಸರ್ಕಾರಿ ಸೇವೆಗಳ ಕರೆಗಳಿಗೆ ಟ್ರಾಯ್ ರಕ್ಷಣೆ ನೀಡಿದೆ. 140, 1600 ಹಾಗೂ 1601 ಸರಣಿಯ ಸಂಖ್ಯೆಗಳಿಂದ ಬರುವ ಅಗತ್ಯ ಕರೆಗಳನ್ನು ಯಾವುದೇ ಕಾಲ್ ಮ್ಯಾನೇಜ್ಮೆಂಟ್ ಆ್ಯಪ್ಗಳು ಸಾರಾಸಗಟಾಗಿ ಸ್ಪ್ಯಾಮ್ ಎಂದು ಗುರುತಿಸುವುದನ್ನು ಅಥವಾ ನಿರ್ಬಂಧಿಸುವುದನ್ನು ನಿಷೇಧಿಸಲಾಗಿದೆ. ಹೆಡರ್ ಮತ್ತು ಕಂಟೆಂಟ್ ಟೆಂಪ್ಲೇಟ್ಗಳನ್ನು ದುರುಪಯೋಗಪಡಿಸಿಕೊಳ್ಳುವ ಟೆಲಿಮಾರ್ಕೆಟರ್ಗಳನ್ನು ಕಪ್ಪುಪಟ್ಟಿಗೆ ಸೇರಿಸಿ, ಒಂದು ವರ್ಷದವರೆಗೆ ಅವರ ಸಂಪರ್ಕ ಕಡಿತಗೊಳಿಸಲು ಮತ್ತು ಗ್ರಾಹಕರ ದೂರು ಪರಿಹಾರವಾಗದಿದ್ದಲ್ಲಿ ಮೇಲ್ಮನವಿ ಸಲ್ಲಿಸಲು 15 ದಿನಗಳ ಕಾಲಾವಕಾಶ ನೀಡಲು ಹೊಸ ನಿಯಮಾವಳಿಯಲ್ಲಿ ಸೂಚಿಸಲಾಗಿದೆ.
