ಮೂಡಾ ಕೇಸ್ : ಸಿಎಂ ಹಾಗೂ ಕುಟುಂಬ ರಕ್ಷಣೆಗೆ ಲೋಕಾಯುಕ್ತ ಸುಳ್ಳು ರಿಪೋರ್ಟ್ : ಸಿಡಿದೆದ್ದ ಸ್ನೇಹಮಯಿ

ಬೆಂಗಳೂರು: ಮೂಡಾ ಪ್ರಕರಣ ಸಂಬಂಧ ಲೋಕಾಯುಕ್ತ ಬಿ ರಿಪೋರ್ಟ್ ಸಲ್ಲಿಕೆ ಮಾಡಿದೆ. ಈ ಸಂಬಂಧ ದೂರುದಾರ ಸ್ನೇಹಮಯಿ ಕೃಷ್ಣ ಅವರು ಪ್ರಶ್ನೆ ಮಾಡಿದ್ದರು‌‌. ಅದರ ಸಂಬಂಧ ಅರ್ಜಿ ವಿಚಾರಣೆ ಇಂದು ಇತ್ತು. ಹೀಗಾಗಿ ಲೋಕಾಯುಕ್ತದ ಮೇಲೆಯೇ ಸ್ನೇಹಮಯಿ ಕೃಷ್ಣ ಅವರು ಗರಂ ಆಗಿದ್ದಾರೆ.

ಲೋಕಾಯುಕ್ತ ಅಧಿಕಾರಿಗಳು ಸುಳ್ಳು ಬಿ ರಿಪೋರ್ಟ್ ಸಲ್ಲಿಕೆ ಮಾಡಿದ್ದಾರೆ. ಅದಕ್ಕೆ ಸಂಬಂಧ ಪಟ್ಟಂತೆ ತಕರಾರು ಅರ್ಜಿಯನ್ನು ಸಲ್ಲಿಕೆ ಮಾಡಿದೆ. ಸಾಕ್ಷ್ಯಾಧಾರಗಳು ಇದ್ದರು ಸಹ ಲೋಕಾಯುಕ್ತ ಅಧಿಕಾರಿಗಳು ಸಿದ್ದರಾಮಯ್ಯ ಅವರ ಕುಟುಂಬವನ್ನು ರಕ್ಷಣೆ ಮಾಡುವ ನಿಟ್ಟಿನಲ್ಲಿ, ಸುಳ್ಳು ವರದಿಯನ್ನ ಸಲ್ಲಿಕೆ ಮಾಡಿದ್ದಾರೆ. ನಾನು ಅದನ್ನ ಗಮನಕ್ಕೆ ತಂದು ಆ ಅರ್ಜಿಯನ್ನ ತಿರಸ್ಕಾರ ಮಾಡಿ, ಅವರ ಮೇಲೆ ಮಾಡಿರುವ ಆರೋಪವನ್ನ ಸಾಬೀತುಪಡಿಸುವುದಕ್ಕೆ ಅನುಮತಿ ಕೊಡಿ ಎಂದು ಕೇಳಿದ್ದೆ. ಅದಕ್ಕೆ ಸಂಬಂಧಿಸಿದಂತೆ ಇಂದು ಆದೇಶ ಇಟ್ಟುಕೊಂಡಿದ್ದಾರೆ.

ಇವತ್ತು ಆದೇಶ ಆಯ್ತು ಅಂದಾದರೆ ಸಿದ್ದರಾಮಯ್ಯ ಅವರ ವಿರುದ್ಧ ವಿಚಾರಣೆಗೆ ಅವಕಾಶ ಮಾಡಿಕೊಡ್ತಾರೆ. ಇವತ್ತು ಲೋಕಾಯುಕ್ತ ಅಧಿಕಾರಿಗಳಿಗೆ ಅಂತಿಮ ಅನುಮತಿ ಸಲ್ಲಿಕೆ ಮಾಡಲು ಹೇಳಿದೆ. 16ರ ಒಳಗೇನೆ ಸಲ್ಲಿಸುವುದಕ್ಕೆ ಹೇಳಿದ್ದರು, ಅವರು ಸಲ್ಲಿಸಿಲ್ಲ. ಇವತ್ತು ದುರುದ್ದೇಶಪೂರಕವಾಗಿ ಸಲ್ಲಿಸುತ್ತಾರೆ ಎಂಬ ಮಾಹಿತಿ ಬಂದಿದೆ. ಅವರು ಏನೇ ಸಲ್ಲಿಸಿದರು‌ ಮಾನ್ಯ ನ್ಯಾಯಾಲಯವು ಅವರು ಸಲ್ಲಿಕೆ ಮಾಡಿರುವ ಬಿ ರಿಪೋರ್ಟ್ ವರದಿ ಬಗ್ಗೆ ತೀರ್ಮಾನ ಮಾಡುತ್ತೆ ಎಂಬ ನಂಬಿಕೆ ಇದೆ. ತನಿಖೆಯಲ್ಲಿ ಸಾಕಷ್ಟು ಲೋಪದೋಷಗಳು ಕಾಣಿಸ್ತಾ ಇದೆ. ಪ್ರಮುಖವಾಗಿ ಎರಡು ದಾಖಲೆಗಳನ್ನ ನೋಡಿದರೇನೆ ಗೊತ್ತಾಗಿ ಬಿಡುತ್ತದೆ ಎಂದು ಸ್ನೇಹಮಯಿ ಕೃಷ್ಣ ಅವರು ಮತ್ತೆ ವಾದ ಮಾಡಿದ್ದಾರೆ.