ಮೊಬೈಲ್ ಬಳಕೆಯಿಂದ ಮೆದುಳು, ಕುತ್ತಿಗೆ ಕ್ಯಾನ್ಸರ್ ಬರುವುದಿಲ್ಲ: ಹೊಸ ಅಧ್ಯಯನ

ದೆಹಲಿ.ಜುಲೈ.18: ಮೊಬೈಲ್ ಫೋನ್ಗಳು ಮತ್ತು ಅವುಗಳಿಂದ ಹೊರಹೊಮ್ಮುವ ವಿದ್ಯುತ್ಕಾಂತೀಯ ಅಲೆಗಳು (Electromagnetic waves) ಮೆದುಳು, ತಲೆ ಅಥವಾ ಕುತ್ತಿಗೆಯ ಕ್ಯಾನ್ಸರ್ಗೆ ಕಾರಣವಾಗುವುದಿಲ್ಲ ಎಂದು ಹೊಸದೊಂದು ಸಮಗ್ರ ಅಧ್ಯಯನವು ಸ್ಪಷ್ಟಪಡಿಸಿದೆ. ಜಾಗತಿಕ ಆರೋಗ್ಯ ಸಂಸ್ಥೆ (WHO) ನಿಯೋಜಿಸಿದ್ದ ಪ್ರಮುಖ 13 ವಿಮರ್ಶೆಗಳ ದತ್ತಾಂಶಗಳನ್ನು ವಿಶ್ಲೇಷಿಸಿ ಈ ವರದಿಯನ್ನು ಸಿದ್ಧಪಡಿಸಲಾಗಿದೆ.

ಭೀತಿಗೆ ಯಾವುದೇ ಆಧಾರವಿಲ್ಲ
ರೇಡಿಯೋ ತರಂಗಗಳು, ವೈ-ಫೈ ಮತ್ತು ಮೊಬೈಲ್ ಸಿಗ್ನಲ್ಗಳು ವಿದ್ಯುತ್ಕಾಂತೀಯ ವರ್ಣಪಟಲದ ಅತ್ಯಂತ ಕಡಿಮೆ ಶಕ್ತಿ ಹಾಗೂ ದೀರ್ಘ ತರಂಗಾಂತರವನ್ನು ಹೊಂದಿರುವ ವಿಕಿರಣಗಳಾಗಿವೆ (Low-energy radiation). ಎಕ್ಸ್-ರೇಗಳಂತಹ ಹೆಚ್ಚಿನ ಶಕ್ತಿಯ ವಿಕಿರಣಗಳು ಕ್ಯಾನ್ಸರ್ಗೆ ಕಾರಣವಾಗುವುದರಿಂದ, ಮೊಬೈಲ್ ತರಂಗಗಳ ಬಗ್ಗೆಯೂ ದಶಕಗಳಿಂದ ಸಾರ್ವಜನಿಕರಲ್ಲಿ ಆತಂಕವಿತ್ತು. ವಿಶೇಷವಾಗಿ ಶೀತಲ ಸಮರದ (Cold War) ಅವಧಿಯಲ್ಲಿ ಮೈಕ್ರೋವೇವ್ ಓವನ್ ಮತ್ತು ಟೆಲಿವಿಷನ್ಗಳು ಮಾರುಕಟ್ಟೆಗೆ ಬಂದಾಗ ಈ ಭಯ ಶುರುವಾಗಿತ್ತು. ಆದರೆ, ಪ್ರಸ್ತುತ ಅಧ್ಯಯನವು ಈ ಎಲ್ಲಾ ಆತಂಕಗಳಿಗೆ ತೆರೆ ಎಳೆದಿದೆ.

ಅಧ್ಯಯನ ಬಹಿರಂಗಪಡಿಸಿದ ಪ್ರಮುಖ ಅಂಶಗಳು:
ಕ್ಯಾನ್ಸರ್ನೊಂದಿಗೆ ಯಾವುದೇ ಸಂಬಂಧವಿಲ್ಲ: 1994 ರಿಂದ 2022 ರ ನಡುವೆ ಪ್ರಕಟವಾದ 63 ವಿವಿಧ ಅಧ್ಯಯನಗಳನ್ನು ವಿಜ್ಞಾನಿಗಳು ಕೂಲಂಕಷವಾಗಿ ಪರಿಶೀಲಿಸಿದ್ದಾರೆ. ಮೊಬೈಲ್ ಫೋನ್ ಬಳಕೆಯಿಂದ ಮೆದುಳು, ತಲೆ ಅಥವಾ ಕುತ್ತಿಗೆಯ ಕ್ಯಾನ್ಸರ್ ಬರುವ ಯಾವುದೇ ಪುರಾವೆಗಳು ಇಲ್ಲಿ ಪತ್ತೆಯಾಗಿಲ್ಲ.

ಬಳಕೆಯ ಅವಧಿ ಮುಖ್ಯವಲ್ಲ: ಒಬ್ಬ ವ್ಯಕ್ತಿಯು ಮೊಬೈಲ್ ಅನ್ನು ದಿನದಲ್ಲಿ ಎಷ್ಟು ಸಮಯ ಬಳಸುತ್ತಾನೆ ಅಥವಾ ಎಷ್ಟು ವರ್ಷಗಳಿಂದ (10 ವರ್ಷ ಅಥವಾ ಅದಕ್ಕಿಂತ ಹೆಚ್ಚು) ಬಳಸುತ್ತಿದ್ದಾನೆ ಎನ್ನುವುದಕ್ಕೂ, ಕ್ಯಾನ್ಸರ್ ಬರುವುದಕ್ಕೂ ಯಾವುದೇ ಲಿಂಕ್ ಇಲ್ಲ ಎಂಬುದು ಸಾಬೀತಾಗಿದೆ.

ಮಕ್ಕಳಲ್ಲಿ ಲ್ಯುಕೇಮಿಯಾ ಭೀತಿ ಸುಳ್ಳು: ರೇಡಿಯೋ ಅಥವಾ ಟೆಲಿವಿಷನ್ ಪ್ರಸಾರ ಗೋಪುರಗಳಿಂದ (Transmitters) ಹೊರಹೊಮ್ಮುವ ತರಂಗಗಳಿಂದ ಮಕ್ಕಳಲ್ಲಿ ರಕ್ತದ ಕ್ಯಾನ್ಸರ್ (Leukaemia) ಬರುತ್ತದೆ ಎಂಬ ದೀರ್ಘಕಾಲದ ಭಯಕ್ಕೂ ಯಾವುದೇ ವೈಜ್ಞಾನಿಕ ಆಧಾರವಿಲ್ಲ ಎಂದು ವರದಿ ಹೇಳಿದೆ.

ಸ್ಥಿರವಾಗಿರುವ ಕ್ಯಾನ್ಸರ್ ಪ್ರಮಾಣ:
ಮೊಬೈಲ್ ಫೋನ್ಗಳ ಬಳಕೆ ವ್ಯಾಪಕವಾಗುವ ಮುನ್ನ, ಅಂದರೆ 1980ರ ದಶಕದಿಂದಲೂ ಮೆದುಳಿನ ಕ್ಯಾನ್ಸರ್ ಪ್ರಕರಣಗಳ ಪ್ರಮಾಣದಲ್ಲಿ ಯಾವುದೇ ದಿಢೀರ್ ಏರಿಕೆ ಕಂಡುಬಂದಿಲ್ಲ. ಮೊಬೈಲ್ ಬಳಕೆಯಿಂದ ಕ್ಯಾನ್ಸರ್ ಬರುವುದಾಗಿದ್ದರೆ ಪ್ರಕರಣಗಳ ಸಂಖ್ಯೆ ಹೆಚ್ಚಾಗಬೇಕಿತ್ತು, ಆದರೆ ಆಸ್ಟ್ರೇಲಿಯಾದಂತಹ ದೇಶಗಳ ದತ್ತಾಂಶದ ಪ್ರಕಾರ ಈ ಪ್ರಮಾಣ ಸ್ಥಿರವಾಗಿದೆ.

ಅಂತಿಮ ತೀರ್ಮಾನವೇನು?
ವಿಜ್ಞಾನದಲ್ಲಿ ಯಾವುದೇ ಅಪಾಯ ‘ಖಂಡಿತವಾಗಿಯೂ ಇಲ್ಲ’ ಎಂದು 100% ಸಾಬೀತುಪಡಿಸುವುದು ಕಷ್ಟಸಾಧ್ಯ. ಆದಾಗ್ಯೂ, ಪ್ರಸ್ತುತ ಲಭ್ಯವಿರುವ ಅತ್ಯುನ್ನತ ಗುಣಮಟ್ಟದ ಪುರಾವೆಗಳ ಪ್ರಕಾರ, ಮೊಬೈಲ್ ಬಳಕೆಯಿಂದ ಕ್ಯಾನ್ಸರ್ ಬರುವ ಸಾಧ್ಯತೆ ಇಲ್ಲ. ಪ್ರಸ್ತುತ ಎಲೆಕ್ಟ್ರಾನಿಕ್ ಸಾಧನಗಳಿಗೆ ವಿಧಿಸಲಾಗಿರುವ ವಿಕಿರಣ ಸೂಸುವಿಕೆಯ ಸುರಕ್ಷತಾ ಮಾನದಂಡಗಳು ಸಂಪೂರ್ಣ ಸುರಕ್ಷಿತವಾಗಿದ್ದು, ಸಾರ್ವಜನಿಕರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ ಎಂದು ಸಂಶೋಧಕರು ತಿಳಿಸಿದ್ದಾರೆ.