ನವದೆಹಲಿ : ಪ್ರಸ್ತುತ ದಿನಗಳಲ್ಲಿ ಕ್ರೆಡಿಟ್ ಕಾರ್ಡ್ ಬಳಕೆದಾರರ ಸಂಖ್ಯೆ ಹೆಚ್ಚಾಗಿದೆ. ಆದರೆ, ಕಾರ್ಡ್‌ನ ಬಿಲ್ಲಿಂಗ್ ಸೈಕಲ್, ಕನಿಷ್ಠ ಬಾಕಿ (Minimum Due), ವಿಳಂಬ ಶುಲ್ಕ ಮತ್ತು ದಂಡದಂತಹ ನಿಯಮಗಳ ಬಗ್ಗೆ ಹಲವರಿಗೆ ಪೂರ್ಣ ಅರಿವಿರುವುದಿಲ್ಲ. ಇಂತಹ ಸಂದರ್ಭದಲ್ಲಿ, ಕ್ರೆಡಿಟ್ ಕಾರ್ಡ್ ಹೊಂದಿರುವ ವ್ಯಕ್ತಿ ಅಕಸ್ಮಾತ್ ಮೃತಪಟ್ಟರೆ, ಆ ಬಾಕಿ ಹಣವನ್ನು ಅವರ ಪತ್ನಿ ಅಥವಾ ಕುಟುಂಬದವರು ಪಾವತಿಸಬೇಕೇ ಎಂಬ ಗೊಂದಲ ಅನೇಕರಲ್ಲಿದೆ. ಇದಕ್ಕೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ನಿಯಮಗಳು ಹಾಗೂ ಬ್ಯಾಂಕಿಂಗ್ ಕಾನೂನುಗಳಲ್ಲಿ ಸ್ಪಷ್ಟ ಉತ್ತರವಿದೆ.
ಕುಟುಂಬಸ್ಥರ ಮೇಲೆ ನೇರ ಹೊಣೆ ಇರುವುದಿಲ್ಲ
ಕ್ರೆಡಿಟ್ ಕಾರ್ಡ್ ಎಂಬುದು ಯಾವುದೇ ಆಸ್ತಿಯನ್ನು ಅಡಮಾನವಾಗಿ ಇಡದೆ ನೀಡುವ ಅನ್‌ಸೆಕ್ಯೂರ್ಡ್ ಸಾಲ (Unsecured Loan). ಹೀಗಾಗಿ ಪ್ರಾಥಮಿಕ ಕಾರ್ಡ್‌ದಾರರು ಮೃತಪಟ್ಟಾಗ, ಆ ಬಾಕಿ ಮೊತ್ತವನ್ನು ಪಾವತಿಸುವಂತೆ ಅವರ ಪತ್ನಿ ಅಥವಾ ಕುಟುಂಬ ಸದಸ್ಯರಿಗೆ ಬ್ಯಾಂಕುಗಳು ಒತ್ತಡ ಹೇರುವಂತಿಲ್ಲ.
ಮೃತ ವ್ಯಕ್ತಿಯ ಹೆಸರಿನಲ್ಲಿ ಬ್ಯಾಂಕ್ ಬ್ಯಾಲೆನ್ಸ್, ಫಿಕ್ಸ್‌ಡ್ ಡೆಪಾಸಿಟ್ ಅಥವಾ ಸ್ಥಿರಾಸ್ತಿ ಇದ್ದರೆ, ಬ್ಯಾಂಕುಗಳು ಕಾನೂನುಬದ್ಧವಾಗಿ ಆ ಮೊತ್ತದಿಂದ ಬಾಕಿಯನ್ನು ವಸೂಲಿ ಮಾಡಿಕೊಳ್ಳಬಹುದು. ಕುಟುಂಬದವರಿಗೆ ಮೃತರ ಆಸ್ತಿ ಎಷ್ಟು ಪಾಲು ಸಿಕ್ಕಿದೆಯೋ, ಅಷ್ಟು ಮೊತ್ತದ ಮಿತಿಯಲ್ಲಿ ಮಾತ್ರ ಬಾಕಿ ತೀರಿಸುವ ಹೊಣೆ ಇರುತ್ತದೆ. ಮೃತರ ಹೆಸರಿನಲ್ಲಿ ಯಾವುದೇ ಆಸ್ತಿ ಇಲ್ಲದಿದ್ದರೆ, ಬ್ಯಾಂಕುಗಳು ಆ ಸಾಲವನ್ನು ವಸೂಲಾಗದ ಸಾಲ (ಬ್ಯಾಡ್ ಡೆಟ್) ಎಂದು ಪರಿಗಣಿಸಿ ರೈಟ್-ಆಫ್ (ಮನ್ನಾ) ಮಾಡುತ್ತವೆ.
ಯಾವ ಸಂದರ್ಭದಲ್ಲಿ ಪತ್ನಿ ಬಿಲ್ ಕಟ್ಟಬೇಕಾಗುತ್ತದೆ?
ಕೇವಲ ಕೆಲವೇ ನಿರ್ದಿಷ್ಟ ಸಂದರ್ಭಗಳಲ್ಲಿ ಮಾತ್ರ ಪತ್ನಿಯ ಮೇಲೆ ಸಾಲ ತೀರಿಸುವ ಹೊಣೆ ಬರುತ್ತದೆ:
ಜಾಯಿಂಟ್ ಅಕೌಂಟ್ ಹೋಲ್ಡರ್ (ಸಹ-ಖಾತೆದಾರರು): ಪತಿಯ ಜೊತೆಗೆ ಪತ್ನಿಯೂ ಸಮಾನ ಜವಾಬ್ದಾರಿಯ ಸಹ-ಖಾತೆದಾರರಾಗಿ ಕ್ರೆಡಿಟ್ ಕಾರ್ಡ್ ಪಡೆದಿದ್ದರೆ, ಪಾವತಿಯ ಹೊಣೆಗಾರಿಕೆ ಪತ್ನಿಯ ಮೇಲಿರುತ್ತದೆ.
ಖಾತರಿದಾರರಾಗಿದ್ದಲ್ಲಿ (Guarantor / Co-signer): ಕಾರ್ಡ್ ಪಡೆಯುವ ಸಮಯದಲ್ಲಿ ಪತಿ ಸಾಲ ತೀರಿಸದಿದ್ದರೆ ತಾನು ತೀರಿಸುವುದಾಗಿ ಪತ್ನಿ ಅಧಿಕೃತವಾಗಿ ಗ್ಯಾರಂಟಿ ನೀಡಿ ಸಹಿ ಹಾಕಿದ್ದರೆ ಮಾತ್ರ ಆಕೆಯಿಂದ ಹಣ ವಸೂಲಿ ಮಾಡಬಹುದು.
ಆಡ್-ಆನ್ ಕಾರ್ಡ್ (Add-on Card) ಹೊಂದಿರುವ ಪತ್ನಿಯ ಮೇಲೆ ಪ್ರಾಥಮಿಕ ಸಾಲ ತೀರಿಸುವ ನೇರ ಹೊಣೆ ಇರುವುದಿಲ್ಲ. ಈ ವಿಶೇಷ ಷರತ್ತುಗಳನ್ನು ಹೊರತುಪಡಿಸಿ, ಸಾಮಾನ್ಯ ಸಂದರ್ಭಗಳಲ್ಲಿ ಗಂಡನ ವೈಯಕ್ತಿಕ ಕ್ರೆಡಿಟ್ ಕಾರ್ಡ್ ಸಾಲವನ್ನು ಹೆಂಡತಿಯಿಂದ ಬಲವಂತವಾಗಿ ವಸೂಲಿ ಮಾಡಲು ಯಾವುದೇ ಬ್ಯಾಂಕ್ ಅಥವಾ ರಿಕವರಿ ಏಜೆಂಟ್‌ಗಳಿಗೆ ಅವಕಾಶವಿಲ್ಲ.
