ಬೆಂಗಳೂರು. ಸೆಪ್ಟೆಂಬರ್. 19: ಒಬ್ಬ ವ್ಯಕ್ತಿಗೆ ಒಂದಕ್ಕಿಂತ ಹೆಚ್ಚು ಬ್ಯಾಂಕ್ ಖಾತೆಗಳಿದ್ದರೆ ಏನಾಗುತ್ತದೆ ಹಾಗೂ ಎಷ್ಟು ಖಾತೆಗಳನ್ನು ಹೊಂದುವುದು ಸೂಕ್ತ ಎಂಬ ಪ್ರಶ್ನೆ ಹಲವರನ್ನು ಕಾಡುತ್ತದೆ.
ಹಣಕಾಸು ತಜ್ಞರ ಪ್ರಕಾರ, ಪ್ರತಿಯೊಬ್ಬ ವ್ಯಕ್ತಿಗೂ ಒಂದು ಮುಖ್ಯ ಖಾತೆ ಮತ್ತು ಒಂದು ಉಳಿತಾಯ ಖಾತೆ ಇದ್ದರೆ ಸಾಕು. ವೈಯಕ್ತಿಕ ಅವಶ್ಯಕತೆ ಮತ್ತು ಆರ್ಥಿಕ ವಹಿವಾಟುಗಳನ್ನು ಆಧರಿಸಿ ಹೆಚ್ಚುವರಿಯಾಗಿ ಮತ್ತೊಂದು ಖಾತೆ ತೆರೆಯಬಹುದು. ಆದರೆ ಯಾವುದೇ ನಿರ್ದಿಷ್ಟ ಉದ್ದೇಶವಿಲ್ಲದೆ ಹಲವು ಖಾತೆಗಳನ್ನು ನಿರ್ವಹಿಸುವುದರಿಂದ ಯಾವುದೇ ದೊಡ್ಡ ಪ್ರಯೋಜನವಿಲ್ಲ ಎಂದು ತಜ್ಞರು ಎಚ್ಚರಿಸುತ್ತಾರೆ.
ಒಂದಕ್ಕಿಂತ ಹೆಚ್ಚು ಖಾತೆಗಳನ್ನು ಹೊಂದುವುದರಿಂದ ಹಣಕಾಸಿನ ವಿಭಜನೆ ಮತ್ತು ನಿರ್ವಹಣೆ ಸುಲಭವಾಗುತ್ತದೆ. ಉದಾಹರಣೆಗೆ, ಒಂದು ಖಾತೆಯನ್ನು ವೇತನ ಜಮೆಗೆ ಸೀಮಿತಗೊಳಿಸಿ, ಮತ್ತೊಂದು ಖಾತೆಯನ್ನು ಮನೆ ಖರ್ಚು ಮತ್ತು ದಿನನಿತ್ಯದ ವಹಿವಾಟುಗಳಿಗೆ ಬಳಸಬಹುದು. ಉಳಿತಾಯದ ಹಣವನ್ನು ಪ್ರತ್ಯೇಕ ಖಾತೆಯಲ್ಲಿ ಇಡುವುದರಿಂದ ಪ್ರತಿ ತಿಂಗಳ ಒಟ್ಟು ಆದಾಯ ಮತ್ತು ವೆಚ್ಚದ ನಿಖರ ಲೆಕ್ಕ ಸಿಗುತ್ತದೆ.
ಎರಡು ಖಾತೆಗಳನ್ನು ನಿರ್ವಹಿಸುವುದರಿಂದ ತಾಂತ್ರಿಕ ತುರ್ತು ಸಂದರ್ಭಗಳಲ್ಲಿ ಪರ್ಯಾಯ ವ್ಯವಸ್ಥೆ ಸಿಕ್ಕಂತಾಗುತ್ತದೆ. ಪ್ರಾಥಮಿಕ ಖಾತೆಯಲ್ಲಿ ಸರ್ವರ್ ಸಮಸ್ಯೆ ಅಥವಾ ತಾಂತ್ರಿಕ ಅಡಚಣೆ ಉಂಟಾದಾಗ ಎರಡನೇ ಖಾತೆಯ ಮೂಲಕ ಆರ್ಥಿಕ ವಹಿವಾಟುಗಳನ್ನು ಮುಂದುವರಿಸಬಹುದು. ಮುಖ್ಯವಾಗಿ ದಿನನಿತ್ಯದ ಖರ್ಚುಗಳಿಗೆ ಪ್ರತ್ಯೇಕ ಖಾತೆ ಇರುವುದರಿಂದ ಉಳಿತಾಯದ ಹಣ ಅನಗತ್ಯವಾಗಿ ಖರ್ಚಾಗದಂತೆ ಸುರಕ್ಷಿತವಾಗಿ ಉಳಿಯುತ್ತದೆ.
ವ್ಯಾಪಾರ-ವಹಿವಾಟು ನಡೆಸುವವರು ಅಥವಾ ವಿವಿಧ ನಗರಗಳಲ್ಲಿ ಆರ್ಥಿಕ ಚಟುವಟಿಕೆ ಹೊಂದಿರುವವರಿಗೆ ಮೂರನೇ ಖಾತೆಯ ಅಗತ್ಯವಿರಬಹುದು. ಇಂತಹವರು ದಿನನಿತ್ಯದ ಖರ್ಚು, ಉಳಿತಾಯ ಹಾಗೂ ವ್ಯಾಪಾರದ ತುರ್ತು ವಹಿವಾಟುಗಳಿಗೆ ತಲಾ ಒಂದೊಂದು ಖಾತೆಯನ್ನು ಬಳಸಿಕೊಳ್ಳಬಹುದು. ಆದರೆ ಪ್ರತಿಯೊಂದು ಖಾತೆಗೂ ಒಂದು ನಿರ್ದಿಷ್ಟ ಹಾಗೂ ಸ್ಪಷ್ಟ ಉದ್ದೇಶವಿರಬೇಕು. ಕೇವಲ ಆಫರ್ಗಳು, ಕ್ಯಾಶ್ಬ್ಯಾಕ್ ಅಥವಾ ಉಡುಗೊರೆಗಳ ಆಸೆಗೆ ಬಿದ್ದು ಹೊಸ ಖಾತೆಗಳನ್ನು ತೆರೆಯುವುದು ಜಾಣತನವಲ್ಲ.
ಹೊಸ ಬ್ಯಾಂಕ್ ಖಾತೆಯನ್ನು ತೆರೆಯುವ ಮುನ್ನ ಕೆಲವು ಪ್ರಮುಖ ಅಂಶಗಳನ್ನು ಪರಿಶೀಲಿಸುವುದು ಕಡ್ಡಾಯವಾಗಿದೆ. ಹಳೆಯ ಖಾತೆಗಳಿಗಿಂತ ಹೊಸ ಖಾತೆಯಲ್ಲಿ ಸಿಗುವ ಹೆಚ್ಚುವರಿ ಅನುಕೂಲಗಳು, ನಿರ್ವಹಿಸಬೇಕಾದ ಕನಿಷ್ಠ ಬ್ಯಾಲೆನ್ಸ್ ಮಿತಿ, ಕನಿಷ್ಠ ಬ್ಯಾಲೆನ್ಸ್ ಇಲ್ಲದಿದ್ದರೆ ವಿಧಿಸಲಾಗುವ ದಂಡ, ಡಿಜಿಟಲ್ ಬ್ಯಾಂಕಿಂಗ್ ಸೌಲಭ್ಯಗಳು ಹಾಗೂ ಆನ್ಲೈನ್ ಭದ್ರತಾ ವೈಶಿಷ್ಟ್ಯಗಳ ಬಗ್ಗೆ ಕೂಲಂಕಷವಾಗಿ ತಿಳಿದುಕೊಳ್ಳಬೇಕು. ಇವೆಲ್ಲವನ್ನೂ ಪರಿಶೀಲಿಸಿ, ಹೊಸ ಖಾತೆಯ ಅನಿವಾರ್ಯತೆ ಖಚಿತವಾದ ನಂತರವಷ್ಟೇ ಮುಂದುವರಿಯುವುದು ಆರ್ಥಿಕ ದೃಷ್ಟಿಯಿಂದ ಉತ್ತಮ.
