ಬೆಂಗಳೂರು ,ಅ.13 : ಹಬ್ಬ ಹರಿದಿನಗಳು ಅಥವಾ ಶುಭ ಸಮಾರಂಭಗಳು ಬಂದಾಗ ಮನೆಯಲ್ಲಿರುವ ಹಳೆಯ ಚಿನ್ನ(Gold) ವನ್ನು ಜ್ಯುವೆಲ್ಲರಿ ಅಂಗಡಿಗಳಿಗೆ (jewellery shops) ನೀಡಿ ಹೊಸ ವಿನ್ಯಾಸದ ಆಭರಣಗಳನ್ನು ಬದಲಿಸಿಕೊಳ್ಳುವುದು ಸಾಮಾನ್ಯ. ಹೊಸ ಆಭರಣ ಕೈಸೇರುತ್ತದೆ ಎಂಬ ಖುಷಿಯಲ್ಲಿ ಗ್ರಾಹಕರು ಈ ವಿನಿಮಯದಲ್ಲಿ ಆಗುವ ನಷ್ಟದ ಲೆಕ್ಕಾಚಾರವನ್ನು ಕಡೆಗಣಿಸುತ್ತಾರೆ.
ಮಾರುಕಟ್ಟೆಯಲ್ಲಿ ಬಂಗಾರದ ಬೆಲೆ ಏರಿಕೆಯಾಗುತ್ತಿರುವ ಸಮಯದಲ್ಲಿ ಹಳೆಯ ಬಂಗಾರಕ್ಕೆ ಹೆಚ್ಚಿನ ಬೆಲೆ ನೀಡುತ್ತೇವೆ ಎಂಬ ಆಕರ್ಷಕ ಜಾಹೀರಾತುಗಳು ಹೆಚ್ಚಾಗಿ ಕಾಣಸಿಗುತ್ತವೆ. ಆದರೆ ಇಂತಹ ವಹಿವಾಟುಗಳಲ್ಲಿ ಗ್ರಾಹಕರು ಜಾಗರೂಕರಾಗಿರಬೇಕಾದ ಅಗತ್ಯವಿದೆ.
ಗುಪ್ತ ಶುಲ್ಕಗಳು ಮತ್ತು ಹೆಚ್ಚುವರಿ ಹೊರೆ
ಹಳೆಯ ಬಂಗಾರವನ್ನು ಬದಲಾಯಿಸುವ ಸಂದರ್ಭದಲ್ಲಿ ಯಾವುದೇ ಕಡಿತ ಅಥವಾ ತೆರಿಗೆ ಇರುವುದಿಲ್ಲ ಎಂದು ಅಂಗಡಿಯವರು ಹೇಳಿದರೂ, ಹೊಸ ಆಭರಣ ಖರೀದಿಸುವಾಗ ಇತರ ಶುಲ್ಕಗಳು ಅನ್ವಯವಾಗುತ್ತವೆ. ಹೊಸ ಆಭರಣಕ್ಕೆ ಮೇಕಿಂಗ್ ಚಾರ್ಜಸ್ (ತಯಾರಿಕಾ ವೆಚ್ಚ), ಜಿಎಸ್‌ಟಿ ಹಾಗೂ ಶೇಕಡಾ 15 ರಿಂದ 18 ರಷ್ಟು ವೇಸ್ಟೇಜ್ ಸೇರಿ ಒಟ್ಟಾರೆಯಾಗಿ ಶೇಕಡಾ 15 ರಿಂದ 20 ರಷ್ಟು ಹೆಚ್ಚುವರಿ ವೆಚ್ಚ ಭರಿಸಬೇಕಾಗುತ್ತದೆ. ಉದಾಹರಣೆಗೆ, ಒಂದು ತೊಲ ಹಳೆಯ ಬಂಗಾರವನ್ನು ನೀಡಿ ಅಷ್ಟೇ ತೂಕದ ಹೊಸ ಆಭರಣ ಪಡೆಯಬೇಕೆಂದರೂ ಈ ಶುಲ್ಕಗಳ ಕಾರಣದಿಂದಾಗಿ ಗ್ರಾಹಕರು ಜೇಬಿನಿಂದ ಭಾರಿ ಮೊತ್ತವನ್ನು ಹೆಚ್ಚುವರಿಯಾಗಿ ಪಾವತಿಸಬೇಕಾಗುತ್ತದೆ.
ಬಂಗಾರಕ್ಕೆ ಎಂದಿಗೂ ಹಳೆಯದು ಎಂಬ ಹಣೆಪಟ್ಟಿ ಇಲ್ಲ
ಚಿನ್ನವು ಕೇವಲ ಅಲಂಕಾರಿಕ ವಸ್ತುವಲ್ಲದೆ ಒಂದು ಭದ್ರ ಆಸ್ತಿ ಮತ್ತು ಹೂಡಿಕೆಯಾಗಿದೆ. ಕಾಲ ಕಳೆದಂತೆ ಅದರ ಮೌಲ್ಯ ಹೆಚ್ಚುತ್ತಲೇ ಇರುತ್ತದೆ ಹೊರತು ಕಡಿಮೆಯಾಗುವುದಿಲ್ಲ. ಆದ್ದರಿಂದ ಅತ್ಯಂತ ಅನಿವಾರ್ಯ ಪರಿಸ್ಥಿತಿ ಇಲ್ಲದ ಹೊರತು ಹಳೆಯ ಬಂಗಾರವನ್ನು ಬದಲಾಯಿಸುವುದು ಆರ್ಥಿಕವಾಗಿ ಲಾಭದಾಯಕವಲ್ಲ ಎಂದು ಹಣಕಾಸು ತಜ್ಞರು ಎಚ್ಚರಿಸುತ್ತಾರೆ.
ಉತ್ತಮ ಹೂಡಿಕೆಯಾಗಿ ಚಿನ್ನದ ಪಾತ್ರ
ಹಣದುಬ್ಬರವನ್ನು ಎದುರಿಸುವಲ್ಲಿ ಬ್ಯಾಂಕ್ ಠೇವಣಿಗಳಿಗಿಂತ ಬಂಗಾರವು ಉತ್ತಮ ಆದಾಯವನ್ನು ನೀಡುತ್ತದೆ. ಬ್ಯಾಂಕ್ ಠೇವಣಿಗಳು ಶೇಕಡಾ 7 ರಿಂದ 8 ರಷ್ಟು ಬಡ್ಡಿ ನೀಡಿದರೂ, ಹಣದುಬ್ಬರದ ದರ ಹೆಚ್ಚಾದಾಗ ನೈಜ ಲಾಭ ಕಡಿಮೆಯಾಗುತ್ತದೆ. ಪಿಪಿಎಫ್ ಮತ್ತು ಅಂಚೆ ಕಚೇರಿ ಉಳಿತಾಯ ಯೋಜನೆಗಳಿಗೆ ಹೋಲಿಸಿದರೆ ದೀರ್ಘಾವಧಿಯಲ್ಲಿ ಚಿನ್ನದ ಮೌಲ್ಯ ಗಣನೀಯವಾಗಿ ವೃದ್ಧಿಯಾಗುತ್ತದೆ.
ಯಾವಾಗ ಬದಲಾಯಿಸುವುದು ಸರಿ?
ಮಕ್ಕಳ ಸಣ್ಣ ವಯಸ್ಸಿನ ಆಭರಣಗಳು ದೊಡ್ಡವರಾದ ಮೇಲೆ ಸರಿಹೊಂದದಿದ್ದಾಗ ಅಥವಾ ಗೃಹಪ್ರವೇಶದಂತಹ ಪ್ರಮುಖ ಸಮಾರಂಭಗಳಿಗೆ ಅನಿವಾರ್ಯವಾಗಿ ಹೊಸ ವಿನ್ಯಾಸ ಬೇಕಾದಾಗ ಮಾತ್ರ ಹಳೆಯ ಆಭರಣಗಳನ್ನು ವಿನಿಮಯ ಮಾಡಿಕೊಳ್ಳಬಹುದು. ಕೇವಲ ಭವಿಷ್ಯದ ಹೂಡಿಕೆಯ ಉದ್ದೇಶದಿಂದ ಚಿನ್ನ ಖರೀದಿಸುವುದಾದರೆ ಆಭರಣಗಳ ಬದಲಿಗೆ ಚಿನ್ನದ ನಾಣ್ಯಗಳು ಅಥವಾ ಬಿಸ್ಕೆಟ್‌ಗಳನ್ನು ಖರೀದಿಸುವುದು ಅತ್ಯಂತ ಸೂಕ್ತ.
ಸ್ಟ್ರಿಂಗ್ ಆಪರೇಷನ್ ವಿಡಿಯೋಗೂ ನನಗೂ ಯಾವುದೇ ಸಂಬಂಧ ಇಲ್ಲ : ಮಾಜಿ ಸಿಎಂ ಸಿದ್ದರಾಮಯ್ಯ
