ರಾಜಸ್ಥಾನದಲ್ಲಿ ನಕಲಿ ಇಂಜೆಕ್ಷನ್ ನಿಂದ ಐವರು ಗರ್ಭಿಣಿ ಮಹಿಳೆಯರು ಸಾವು

ಸುದ್ದಿಒನ್,ಜೈಪುರ,ಮೇ.26: ರಾಜಸ್ಥಾನದ ಸರ್ಕಾರಿ ಆಸ್ಪತ್ರೆಯೊಂದರಲ್ಲಿ ಹೆರಿಗೆಯಾದ ಬೆನ್ನಲ್ಲೇ ಐವರು ಗರ್ಭಿಣಿಯರು ಮೃತಪಟ್ಟ ಘಟನೆಗೆ ಸಂಬಂಧಿಸಿದಂತೆ, ಆಸ್ಪತ್ರೆಯಲ್ಲಿ ಬಳಸಲಾದ ‘ಆಕ್ಸಿಟೋಸಿನ್’ (Oxytocin) ಇಂಜೆಕ್ಷನ್‌ಗಳು ಗುಣಮಟ್ಟದ ಪರೀಕ್ಷೆಯಲ್ಲಿ ವಿಫಲವಾಗಿರುವುದು ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ರಾಜಸ್ಥಾನದ ಔಷಧ ನಿಯಂತ್ರಣ ಇಲಾಖೆಯು ರಾಜ್ಯಾದ್ಯಂತ ಈ ಇಂಜೆಕ್ಷನ್ ಮಾರಾಟ ಮತ್ತು ಬಳಕೆಯನ್ನು ತುರ್ತಾಗಿ ನಿಷೇಧಿಸಿದೆ.

ಘಟನೆ ಹಿನ್ನೆಲೆ ಏನು?

ರಾಜಸ್ಥಾನದ ಕೋಟಾ ನಗರದ ‘ನ್ಯೂ ಮೆಡಿಕಲ್ ಕಾಲೇಜು ಆಸ್ಪತ್ರೆ’ಯಲ್ಲಿ ಇತ್ತೀಚಿನ ದಿನಗಳಲ್ಲಿ ಸಿಸೇರಿಯನ್ (C-section) ಹಾಗೂ ಗರ್ಭಾಶಯದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಕನಿಷ್ಠ ಐದು ಮಹಿಳೆಯರು ತೀವ್ರ ಆರೋಗ್ಯ ಸಮಸ್ಯೆಯಿಂದ ಮೃತಪಟ್ಟಿದ್ದರು. ಈ ಬೆನ್ನಲ್ಲೇ ಆಸ್ಪತ್ರೆಯ ವಿರುದ್ಧ ತನಿಖೆ ಆರಂಭಿಸಲಾಗಿತ್ತು.

ನಕಲಿ ಇಂಜೆಕ್ಷನ್ ಪತ್ತೆ

ಹೆರಿಗೆಯ ಸಮಯದಲ್ಲಿ ಮಹಿಳೆಯರಲ್ಲಿ ಅತಿಯಾದ ರಕ್ತಸ್ರಾವವನ್ನು ತಡೆಯಲು ಸಾಮಾನ್ಯವಾಗಿ ‘ಆಕ್ಸಿಟೋಸಿನ್’ ಇಂಜೆಕ್ಷನ್ ನೀಡಲಾಗುತ್ತದೆ. ಆದರೆ, ಕೋಟಾ ಆಸ್ಪತ್ರೆಯಲ್ಲಿ ಬಳಸಲಾದ ಇಂಜೆಕ್ಷನ್‌ಗಳು ನಕಲಿಯಾಗಿದ್ದವು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಯೋಗಾಲಯದ ಪರೀಕ್ಷೆಯಲ್ಲಿ, ಈ ಇಂಜೆಕ್ಷನ್‌ಗಳಲ್ಲಿ ರಕ್ತಸ್ರಾವ ನಿಯಂತ್ರಿಸುವ ಅಗತ್ಯ ಘಟಕಗಳೇ ಇರಲಿಲ್ಲ ಎಂಬುದು ದೃಢಪಟ್ಟಿದೆ.

‘ಜಾಕ್ಸನ್ ಲ್ಯಾಬೊರೇಟರೀಸ್’ (Jackson Laboratories) ಎಂಬ ಸಂಸ್ಥೆ ಈ ಇಂಜೆಕ್ಷನ್‌ಗಳನ್ನು ತಯಾರಿಸಿತ್ತು ಎನ್ನಲಾಗಿದ್ದು, ಸದ್ಯ ಕೋಟಾ ಆಸ್ಪತ್ರೆಯಲ್ಲಿದ್ದ ಇಡೀ ಸ್ಟಾಕ್ ಅನ್ನು ವಶಪಡಿಸಿಕೊಳ್ಳಲಾಗಿದೆ.

ಪ್ರಾಥಮಿಕ ವರದಿಗಳ ಪ್ರಕಾರ, ಶಸ್ತ್ರಚಿಕಿತ್ಸೆಯಾದ ಕೆಲವೇ ಗಂಟೆಗಳಲ್ಲಿ ಮಹಿಳೆಯರಲ್ಲಿ ಗಂಭೀರ ಲಕ್ಷಣಗಳು ಕಾಣಿಸಿಕೊಂಡಿದ್ದವು. ರಕ್ತದೊತ್ತಡ (Blood Pressure) ಮತ್ತು ಪ್ಲೇಟ್‌ಲೆಟ್‌ಗಳ ಸಂಖ್ಯೆ ದಿಢೀರನೆ ಕುಸಿತ ಕಂಡಿತ್ತು. ಶಸ್ತ್ರಚಿಕಿತ್ಸೆಯಾದ 8 ರಿಂದ 12 ಗಂಟೆಗಳ ಒಳಗೆ ಕೆಲವು ರೋಗಿಗಳಲ್ಲಿ ಕಿಡ್ನಿ ವೈಫಲ್ಯದ (Kidney Failure) ಲಕ್ಷಣಗಳು ಕಂಡುಬಂದಿದ್ದವು.ಇಂಜೆಕ್ಷನ್ ಮಾತ್ರವಲ್ಲದೆ, ಆಸ್ಪತ್ರೆಯಲ್ಲಿ ರೋಗಿಗಳಿಗೆ ನೀಡಲಾಗಿದ್ದ ಐವಿ ಫ್ಲೂಯಿಡ್ಸ್ (IV fluids – ಗ್ಲುಕೋಸ್ ಇತ್ಯಾದಿ) ಕೂಡ ಈ ಅಡ್ಡಪರಿಣಾಮಗಳಿಗೆ ಕಾರಣವಾಗಿರಬಹುದೇ ಎಂಬ ನಿಟ್ಟಿನಲ್ಲಿ ತನಿಖೆ ನಡೆಯುತ್ತಿದೆ.

ಇಂಜೆಕ್ಷನ್ ಸ್ಯಾಂಪಲ್ ಫೇಲ್ ಆಗುತ್ತಿದ್ದಂತೆ ರಾಜಸ್ಥಾನದ ಡ್ರಗ್ ಕಂಟ್ರೋಲರ್ ಅಜಯ್ ಫಾಟಕ್ ಅವರು ರಾಜ್ಯಾದ್ಯಂತ ಈ ಔಷಧಿಯ ಮಾರಾಟ ಮತ್ತು ಬಳಕೆಯನ್ನು ತಡೆದಿದ್ದಾರೆ.

ರಾಜಸ್ಥಾನ ಸರ್ಕಾರವು ಈ ಸಾವಿನ ಪ್ರಕರಣಗಳ ಕುರಿತು ಉನ್ನತ ಮಟ್ಟದ ತನಿಖೆಗೆ ಆದೇಶಿಸಿದೆ. ಜೈಪುರದ ಎಸ್‌ಎಂಎಸ್ ಮೆಡಿಕಲ್ ಕಾಲೇಜಿನ ವಿಶೇಷ ವೈದ್ಯಕೀಯ ತಂಡವನ್ನು ತನಿಖೆಗೆ ನೆರವಾಗಲು ಕೋಟಾ ಆಸ್ಪತ್ರೆಗೆ ಕಳುಹಿಸಲಾಗಿದೆ.ತನಿಖೆ ಬಾಕಿ ಇರುವ ಕಾರಣಕ್ಕೆ ಆರೋಗ್ಯ ಇಲಾಖೆಯು ಘಟನೆಗೆ ಸಂಬಂಧಿಸಿದ ಕೆಲವು ವೈದ್ಯಕೀಯ ಸಿಬ್ಬಂದಿಯನ್ನು ಅಮಾನತುಗೊಳಿಸಿದೆ.

ರಾಜಸ್ಥಾನದಲ್ಲಿ ಕಳೆದ 10 ದಿನಗಳಲ್ಲಿ ಒಟ್ಟು 11 ಔಷಧಿಗಳ ಸ್ಯಾಂಪಲ್‌ಗಳು ಗುಣಮಟ್ಟದ ಪರೀಕ್ಷೆಯಲ್ಲಿ ಫೇಲ್ ಆಗಿವೆ. ಜ್ವರ, ಅಲರ್ಜಿ, ಸೋಂಕು, ನೋವು ನಿವಾರಕ ಹಾಗೂ ಆಂಟಿಬಯೋಟಿಕ್ ಮಾತ್ರೆಗಳು ಇದರಲ್ಲಿ ಸೇರಿವೆ. ಹಿಮಾಚಲ ಪ್ರದೇಶ, ಗುಜರಾತ್, ದೆಹಲಿ, ಮಹಾರಾಷ್ಟ್ರ ಸೇರಿದಂತೆ ಹಲವು ರಾಜ್ಯಗಳ ಕಂಪನಿಗಳು ಇವುಗಳನ್ನು ತಯಾರಿಸಿದ್ದು, ನಕಲಿ ಔಷಧಿಗಳ ವಿರುದ್ಧ ರಾಜಸ್ಥಾನ ಸರ್ಕಾರ ಸದ್ಯ ದೊಡ್ಡ ಮಟ್ಟದ ಕಾರ್ಯಾಚರಣೆ ಕೈಗೊಂಡಿದೆ.