ಇಂದಿನ ಧಾವಂತದ ಬದುಕಿನಲ್ಲಿ ಕೆಲಸದ ಒತ್ತಡ, ಸಮಯದ ಅಭಾವ ಹಾಗೂ ದೈನಂದಿನ ಅಭ್ಯಾಸಗಳಿಂದಾಗಿ ಹೆಚ್ಚಿನ ಜನರು ಅತ್ಯಂತ ವೇಗವಾಗಿ ಆಹಾರ ಸೇವಿಸುವುದನ್ನು ರೂಢಿಸಿಕೊಂಡಿದ್ದಾರೆ. ಆದರೆ, ನಾವು ಎಷ್ಟು ವೇಗವಾಗಿ ಆಹಾರ ತಿಂದರೂ ಅದು ನಮ್ಮ ಜೀರ್ಣಕ್ರಿಯೆ, ದೇಹದ ತೂಕ, ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಹಾಗೂ ಮಾನಸಿಕ ಸ್ಥಿತಿಯ ಮೇಲೆ ನೇರ ಪರಿಣಾಮ ಬೀರುತ್ತದೆ ಎಂಬ ಸತ್ಯವನ್ನು ಹಲವರು ಗಮನಿಸುವುದಿಲ್ಲ.
ವೇಗವಾಗಿ ಆಹಾರ ಸೇವಿಸುವುದರಿಂದ ಉಂಟಾಗುವ ತೊಂದರೆಗಳು:
ಆಹಾರವನ್ನು ಆತುರದಿಂದ ನುಂಗುವುದರಿಂದ ಜೀರ್ಣಕ್ರಿಯೆಗೆ ತೊಂದರೆಯಾಗುತ್ತದೆ. ತಿಂದ ಆಹಾರ ಸರಿಯಾಗಿ ಜಗಿಯಲ್ಪಡದೆ ಜೀರ್ಣಾಂಗ ವ್ಯೂಹದ ಮೇಲೆ ಹೆಚ್ಚಿನ ಒತ್ತಡ ಬೀಳುತ್ತದೆ. ಬೊಜ್ಜು ಮತ್ತು ತೂಕ ಹೆಚ್ಚಳಕ್ಕೆ ವೇಗದ ಊಟವೇ ಪ್ರಮುಖ ಕಾರಣ ಎಂದು ಹಲವು ಅಧ್ಯಯನಗಳು ದೃಢಪಡಿಸಿವೆ. ಆಹಾರ ತಿಂದ ನಂತರ ಹೊಟ್ಟೆ ತುಂಬಿದ ಅನುಭವವಾಗಲು ಮೆದುಳಿಗೆ ಕನಿಷ್ಠ ಇಪ್ಪತ್ತು ನಿಮಿಷಗಳು ಬೇಕಾಗುತ್ತವೆ. ಹೀಗಾಗಿ ವೇಗವಾಗಿ ತಿನ್ನುವವರು ಅಗತ್ಯಕ್ಕಿಂತ ಹೆಚ್ಚಿನ ಕ್ಯಾಲೊರಿಗಳನ್ನು ಸೇವಿಸಿ ತೂಕ ಹೆಚ್ಚಿಸಿಕೊಳ್ಳುತ್ತಾರೆ. ಜೊತೆಗೆ, ಇದು ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವನ್ನು ದಿಢೀರ್ ಹೆಚ್ಚಿಸಿ, ಟೈಪ್-2 ಮಧುಮೇಹ ಹಾಗೂ ಇನ್ಸುಲಿನ್ ಪ್ರತಿರೋಧದ ಅಪಾಯವನ್ನು ತಂದೊಡ್ಡುತ್ತದೆ. ಹೊಟ್ಟೆ ಉಬ್ಬರ, ಅಜೀರ್ಣ, ಗ್ಯಾಸ್ಟ್ರಿಕ್ ಮತ್ತು ಎದೆಉರಿ ಮುಂತಾದ ಜೀರ್ಣಾಂಗ ಸಂಬಂಧಿತ ಸಮಸ್ಯೆಗಳು ವೇಗವಾಗಿ ಉಣ್ಣುವವರಲ್ಲಿ ಸಾಮಾನ್ಯ.
ನಿಧಾನವಾಗಿ ಊಟ ಮಾಡುವುದರ ಆರೋಗ್ಯಕರ ಪ್ರಯೋಜನಗಳು:
ನಿಧಾನವಾಗಿ ಮತ್ತು ಸರಿಯಾಗಿ ಅಗಿದು ತಿನ್ನುವುದರಿಂದ ಜೀರ್ಣಕ್ರಿಯೆ ಸುಲಭವಾಗುತ್ತದೆ. ಹೀಗೆ ಮಾಡುವುದರಿಂದ ಆಹಾರದಲ್ಲಿರುವ ಅಗತ್ಯ ಪೋಷಕಾಂಶಗಳನ್ನು ಸಂಪೂರ್ಣವಾಗಿ ಹೀರಿಕೊಳ್ಳಲು ದೇಹಕ್ಕೆ ಸಾಧ್ಯವಾಗುತ್ತದೆ. ಮೆದುಳಿಗೆ ಹೊಟ್ಟೆ ತುಂಬಿದ ಸಂಕೇತ ತಲುಪಲು ಸಾಕಷ್ಟು ಸಮಯ ಸಿಗುವುದರಿಂದ ಅತಿಯಾಗಿ ತಿನ್ನುವುದು ತಪ್ಪಿ, ತೂಕ ನಿಯಂತ್ರಣದಲ್ಲಿರುತ್ತದೆ. ನಿಧಾನವಾಗಿ ಉಣ್ಣುವುದು ರಕ್ತದಲ್ಲಿನ ಸಕ್ಕರೆ ಪ್ರಮಾಣದ ಏರಿಳಿತವನ್ನು ತಡೆದು ಸ್ಥಿರವಾಗಿಡಲು ನೆರವಾಗುತ್ತದೆ. ಇದರಿಂದ ಊಟದ ತೃಪ್ತಿ ಹೆಚ್ಚುವುದಲ್ಲದೆ ದೇಹಕ್ಕೆ ಶಕ್ತಿ ಸಿಗುತ್ತದೆ.
ದೇಹ ಸ್ಪಂದಿಸುವ ರೀತಿ:
ವೇಗವಾಗಿ ತಿಂದಾಗ ಹೊಟ್ಟೆ ದಿಢೀರನೆ ಹಿಗ್ಗುತ್ತದೆ ಮತ್ತು ಜೀರ್ಣಕಾರಿ ಕಿಣ್ವಗಳ ಉತ್ಪತ್ತಿ ಸಾಲದೆ ದೇಹವು ತೊಂದರೆಗೆ ಸಿಲುಕುತ್ತದೆ. ಆದರೆ ನಿಧಾನವಾಗಿ ಉಣ್ಣುವಾಗ ನರಮಂಡಲವು ಪ್ರಶಾಂತಗೊಂಡು, ಜೀರ್ಣ ಪ್ರಕ್ರಿಯೆಯನ್ನು ಸರಿಹೊಂದಿಸಿ ಮೆದುಳಿಗೆ ತೃಪ್ತಿಯ ಸಂದೇಶವನ್ನು ರವಾನಿಸುತ್ತದೆ.
ಆರೋಗ್ಯಕರ ಊಟಕ್ಕೆ ಕನಿಷ್ಠ ಇಪ್ಪತ್ತು ನಿಮಿಷಗಳನ್ನು ವಿನಿಯೋಗಿಸುವುದು ಸೂಕ್ತ. ಸಣ್ಣ ಲಘು ತುಕಡಿಗಳನ್ನು ಚೆನ್ನಾಗಿ ಅಗಿದು ತಿನ್ನುವುದು, ಟಿವಿ ಅಥವಾ ಮೊಬೈಲ್ ವೀಕ್ಷಿಸುತ್ತಾ ಊಟ ಮಾಡದಿರುವುದು ಹಾಗೂ ಆಹಾರದ ರುಚಿಯನ್ನು ಸವಿಯುತ್ತಾ ಪ್ರಶಾಂತವಾಗಿ ತಿನ್ನುವುದು ಆರೋಗ್ಯಕ್ಕೆ ಅತ್ಯಂತ ಹಿತಕರ.
