ದೆಹಲಿ: ನೌಕರರ ಭವಿಷ್ಯ ನಿಧಿ ಸಂಸ್ಥೆ ಪಿಎಫ್ ಗ್ರಾಹಕರಿಗೆ ದೊಡ್ಡ ಸಮಾಧಾನಕರ ಸುದ್ದಿಯೊಂದನ್ನು ನೀಡಿದೆ. ಇನ್ಮುಂದೆ ಯಾವುದೇ ಸಂಸ್ಥೆಯಲ್ಲಿ ಕನಿಷ್ಠ 1 ವರ್ಷದ ಸೇವೆ ಪೂರ್ಣಗೊಳ್ಳದಿದ್ದರೂ ಸಹ ಪಿಎಫ್ ಹಣವನ್ನು ಹಿಂಪಡೆಯಲು ಅವಕಾಶ ಕಲ್ಪಿಸುವ ಹೊಸ ನಿಯಮಗಳನ್ನು ಜಾರಿಗೆ ತರಲಾಗಿದೆ.
ಈ ಹೊಸ ಅಪ್ಡೇಟ್ ಪ್ರಕಾರ, ಪಿಎಫ್ ಹಣವನ್ನು ಹಿಂಪಡೆಯುವುದು ನೀವು ಎಷ್ಟು ಸಮಯ ಕೆಲಸ ಮಾಡಿದ್ದೀರಿ ಎನ್ನುವುದರ ಮೇಲೆ ನಿರ್ಧರಿತವಾಗುವುದಿಲ್ಲ. ಬದಲಿಗೆ, ಕೆಲಸ ಬಿಟ್ಟ ನಂತರ ನೀವು ಎಷ್ಟು ಸಮಯದವರೆಗೆ ‘ನಿರುದ್ಯೋಗಿ’ಯಾಗಿದ್ದೀರಿ ಎಂಬುದರ ಆಧಾರದ ಮೇಲೆ ನಿರ್ಧಾರವಾಗುತ್ತದೆ.
ಹೊಸ ನಿಯಮದ ಪ್ರಮುಖ ಅಂಶಗಳು:
1 ತಿಂಗಳು ನಿರುದ್ಯೋಗಿಯಾಗಿದ್ದರೆ (75% ಹಣ): ನೀವು ಒಂದು ಕಂಪನಿಯಲ್ಲಿ ಕೆಲಸ ಬಿಟ್ಟು, ಒಂದು ತಿಂಗಳು ಕಳೆದರೂ ನಿಮಗೆ ಯಾವುದೇ ಹೊಸ ಕೆಲಸ ಸಿಗದಿದ್ದರೆ, ನಿಮ್ಮ ಪಿಎಫ್ ಖಾತೆಯಲ್ಲಿರುವ ಒಟ್ಟು ಬ್ಯಾಲೆನ್ಸ್ನ ಶೇಕಡಾ 75 ರಷ್ಟು ಹಣವನ್ನು ಹಿಂಪಡೆಯಬಹುದು.
2 ತಿಂಗಳು ಅಥವಾ ಅದಕ್ಕಿಂತ ಹೆಚ್ಚು ನಿರುದ್ಯೋಗಿಯಾಗಿದ್ದರೆ (100% ಹಣ): ಕೆಲಸ ಬಿಟ್ಟ ನಂತರ ಎರಡು ತಿಂಗಳು ಅಥವಾ ಅದಕ್ಕಿಂತ ಹೆಚ್ಚು ಕಾಲ ನೀವು ನಿರುದ್ಯೋಗಿಯಾಗಿಯೇ ಉಳಿದಿದ್ದರೆ, ನಿಮ್ಮ ಪಿಎಫ್ ಖಾತೆಯಲ್ಲಿರುವ ಶೇಕಡಾ 100 ರಷ್ಟು (ಪೂರ್ಣ) ಹಣವನ್ನು ಹಿಂಪಡೆಯಲು ನೀವು ಅರ್ಹರಾಗಿರುತ್ತೀರಿ.
ಉದ್ದೇಶ ಮತ್ತು ಭದ್ರತೆ:
ನೌಕರರ ನಿವೃತ್ತಿ ನಿಧಿಯು (Retirement Fund) ಸಂಪೂರ್ಣವಾಗಿ ಖಾಲಿಯಾಗಬಾರದು ಎಂಬ ಉದ್ದೇಶದಿಂದ ಮೊದಲ ಹಂತದಲ್ಲಿ ಶೇ. 75 ರಷ್ಟು ಮಾತ್ರ ವಿತ್ಡ್ರಾ ಮಾಡಲು ಅವಕಾಶ ನೀಡಿ, ಉಳಿದ ಶೇ. 25 ರಷ್ಟು ಮೊತ್ತವನ್ನು ಆ ಬಳಿಕ ಹಿಂಪಡೆಯುವಂತೆ EPFO ಈ ಹೊಸ ನಿಯಮವನ್ನು ರೂಪಿಸಿದೆ.
ಕೇವಲ 3 ದಿನಗಳಲ್ಲಿ ಕ್ಲೈಮ್ ಸೆಟಲ್ಮೆಂಟ್!
EPFO ತನ್ನ ಪ್ರಕ್ರಿಯೆಗಳನ್ನು ಸಂಪೂರ್ಣವಾಗಿ ಡಿಜಿಟಲೀಕರಣಗೊಳಿಸಿದೆ. ಈಗ ಪಿಎಫ್ ಕ್ಲೈಮ್ಗಳನ್ನು ಕೇವಲ 3 ದಿನಗಳಲ್ಲಿ ಇತ್ಯರ್ಥಪಡಿಸುವ (Settlement) ಗುರಿಯನ್ನು ಹೊಂದಲಾಗಿದೆ. ಇದರಿಂದಾಗಿ ತುರ್ತು ಸಂದರ್ಭಗಳಲ್ಲಿ ಉದ್ಯೋಗಿಗಳಿಗೆ ತಕ್ಷಣವೇ ಹಣ ಕೈಸೇರಲಿದೆ.
ಅವಧಿಗೂ ಮುನ್ನ ಪಿಎಫ್ ತೆಗೆದರೆ ಆಗುವ ನಷ್ಟಗಳೇನು?
ಐದು ವರ್ಷಗಳ ಸೇವೆ ಪೂರ್ಣಗೊಳ್ಳುವ ಮುನ್ನವೇ ಪಿಎಫ್ ಹಣವನ್ನು ಹಿಂಪಡೆದರೆ ಟಿಡಿಎಸ್ (TDS) ತೆರಿಗೆ ಕಡಿತವಾಗುವ ಸಾಧ್ಯತೆ ಇರುತ್ತದೆ.
ನಿವೃತ್ತಿ ನಿಧಿಯ ಮೊತ್ತ ಕಡಿಮೆಯಾಗುವುದಲ್ಲದೆ, ದೀರ್ಘಾವಧಿಯಲ್ಲಿ ಸಿಗುವ ಚಕ್ರಬಡ್ಡಿಯ (Compounding Interest) ಲಾಭವನ್ನು ಕಳೆದುಕೊಳ್ಳಬೇಕಾಗುತ್ತದೆ.
ತಜ್ಞರ ಸಲಹೆ: ಪಿಎಫ್ ಎನ್ನುವುದು ತುರ್ತು ಪರಿಸ್ಥಿತಿಗೆ ನೆರವಾಗುವ ನಿಧಿಯಾಗಿದೆ. ನೀವು ಕೇವಲ ಕಂಪನಿಗಳನ್ನು ಬದಲಾಯಿಸುತ್ತಿದ್ದರೆ, ಹಣವನ್ನು ಹಿಂಪಡೆಯುವ ಬದಲು ಹಳೆಯ ಪಿಎಫ್ ಖಾತೆಯನ್ನು ಹೊಸ ಕಂಪನಿಯ ಖಾತೆಗೆ ‘ಟ್ರಾನ್ಸ್ಫರ್’ ಮಾಡಿಕೊಳ್ಳುವುದೇ ಅತ್ಯುತ್ತಮ ಮಾರ್ಗವಾಗಿದೆ.
