ಚಾಣಕ್ಯ ನೀತಿ : ಜೀವನದಲ್ಲಿ ಯಶಸ್ಸಿಗೆ ಇವೇ ದೊಡ್ಡ ಶತ್ರುಗಳು: ಚಾಣಕ್ಯ ನೀತಿ ಹೇಳುವುದೇನು?

ಬೆಂಗಳೂರು.ಸೆಪ್ಟೆಂಬರ್.07: ಪ್ರತಿಯೊಬ್ಬ ವ್ಯಕ್ತಿಯೂ ಜೀವನದಲ್ಲಿ ಯಶಸ್ಸು ಗಳಿಸಬೇಕೆಂದು ಕಠಿಣ ಪರಿಶ್ರಮ ಪಡುತ್ತಾನೆ. ಆದರೆ ಕೆಲವರು ಎಷ್ಟೇ ಶ್ರಮಿಸಿದರೂ ನಿರೀಕ್ಷಿತ ಫಲಿತಾಂಶ ಸಿಗದೆ ನಿರಾಸೆ ಎದುರಿಸುತ್ತಾರೆ. ಇದಕ್ಕೆ ಹೊರಗಿನ ಕಾರಣಗಳಿಗಿಂತ ವ್ಯಕ್ತಿಯ ಸ್ವಂತ ನಡವಳಿಕೆ ಮತ್ತು ಕೆಲವು ಕೆಟ್ಟ ಅಭ್ಯಾಸಗಳೇ ಮುಖ್ಯ ಅಡ್ಡಿಯಾಗುತ್ತವೆ ಎಂದು ಮಹಾನ್ ರಾಜನೀತಿಜ್ಞ ಆಚಾರ್ಯ ಚಾಣಕ್ಯ ತಮ್ಮ ನೀತಿಶಾಸ್ತ್ರದಲ್ಲಿ ಸ್ಪಷ್ಟಪಡಿಸಿದ್ದಾರೆ.

ಚಾಣಕ್ಯರ ಪ್ರಕಾರ, ಯಶಸ್ಸಿಗೆ ಕೇವಲ ಶ್ರಮವಷ್ಟೇ ಸಾಲದು; ಮುಂದಾಲೋಚನೆ, ಶಿಸ್ತು, ಸಮಯಪಾಲನೆ ಹಾಗೂ ನಿರಂತರ ಅಭ್ಯಾಸ ಅತ್ಯಗತ್ಯ.

ಮುಂದಾಲೋಚನೆ ಇಲ್ಲದಿದ್ದರೆ ಅವನತಿ ಖಚಿತ

ಭವಿಷ್ಯದಲ್ಲಿ ಬರಬಹುದಾದ ಸಮಸ್ಯೆಗಳು ಅಥವಾ ಆಪತ್ತುಗಳನ್ನು ಮೊದಲೇ ಊಹಿಸಿ ಮುನ್ನೆಚ್ಚರಿಕೆ ವಹಿಸುವವರು ಮತ್ತು ಸಮಸ್ಯೆ ಎದುರಾದ ತಕ್ಷಣ ಬುದ್ಧಿವಂತಿಕೆಯಿಂದ ಸೂಕ್ತ ನಿರ್ಧಾರ ಕೈಗೊಳ್ಳುವವರು ಸದಾ ಸುಖ-ಶಾಂತಿಯಿಂದ ಇರುತ್ತಾರೆ. ಇದಕ್ಕೆ ವ್ಯತಿರಿಕ್ತವಾಗಿ, ಯಾವುದೇ ಪೂರ್ವಸಿದ್ಧತೆ ಮಾಡಿಕೊಳ್ಳದೆ ಕೇವಲ ಹಣೆಬರಹವನ್ನು ನಂಬಿಕೊಂಡು, “ಆಗುವುದು ಆಗಲಿ” ಎಂದು ಅಸಡ್ಡೆ ತೋರುವ ವ್ಯಕ್ತಿಯ ಪತನ ಖಚಿತ ಎಂದು ಚಾಣಕ್ಯರು ಎಚ್ಚರಿಸಿದ್ದಾರೆ.

ಯಶಸ್ಸಿಗೆ ಅಡ್ಡಿಯಾಗುವ 4 ಪ್ರಮುಖ ದುರಭ್ಯಾಸಗಳು:

ಕೆಲಸ ಮುಂದೂಡುವಿಕೆ (ಸೋಮಾರಿತನ):

ಯಾವುದೇ ಕೆಲಸವನ್ನು ನಿಗದಿತ ಸಮಯದಲ್ಲಿ ಮಾಡದೆ ಮುಂದೂಡುವ ಸ್ವಭಾವವಿರುವವರಿಗೆ ಯಶಸ್ಸು ಸಿಗುವುದು ಅಸಾಧ್ಯ. ಈ ಚಾಳಿಯು ಕೈಗೆ ಬಂದ ಅವಕಾಶಗಳನ್ನು ಕಸಿದುಕೊಳ್ಳುತ್ತದೆ.

ಕೇವಲ ಅದೃಷ್ಟವನ್ನೇ ನೆಚ್ಚಿಕೊಳ್ಳುವುದು:

ಶ್ರಮಪಡದೆ ಎಲ್ಲದಕ್ಕೂ ಹಣೆಬರಹ ಅಥವಾ ದೈವದ ಮೇಲೆ ಭಾರ ಹಾಕಿ ಕೂರುವುದು ತಪ್ಪು. ಕರ್ತವ್ಯ ಪ್ರಜ್ಞೆ ಇಲ್ಲದವರಿಗೆ ಅದೃಷ್ಟವೂ ಸಾಥ್ ನೀಡುವುದಿಲ್ಲ.

ಶಿಸ್ತು ಮತ್ತು ಸ್ಪಷ್ಟ ಗುರಿಯ ಕೊರತೆ:

ಜೀವನದಲ್ಲಿ ನಿರ್ದಿಷ್ಟ ಗುರಿ ಇಲ್ಲದಿರುವುದು ಮತ್ತು ದೈನಂದಿನ ಜೀವನದಲ್ಲಿ ಶಿಸ್ತಿನ ಕೊರತೆ ಇದ್ದರೆ ನಿಗದಿತ ಗಮ್ಯ ತಲುಪಲು ಸಾಧ್ಯವಿಲ್ಲ. ನಿರಂತರ ಪ್ರಯತ್ನವಿಲ್ಲದ ಸಂಕಲ್ಪಗಳು ಎಂದಿಗೂ ಈಡೇರುವುದಿಲ್ಲ.

ನಿರಂತರ ಅಭ್ಯಾಸದ ಕೊರತೆ:

ವ್ಯಕ್ತಿಯಲ್ಲಿ ಎಷ್ಟೇ ಪ್ರತಿಭೆ ಅಥವಾ ಜ್ಞಾನವಿದ್ದರೂ, ಅದನ್ನು ನಿರಂತರವಾಗಿ ಅಭ್ಯಾಸ ಮಾಡದಿದ್ದರೆ ಅದು ವಿಷಕ್ಕೆ ಸಮಾನವಾಗಿ ನಿಷ್ಪ್ರಯೋಜಕವಾಗುತ್ತದೆ. ಕೌಶಲಗಳಿಗೆ ನಿರಂತರವಾಗಿ ಸಾಣೆ ಹಿಡಿಯುತ್ತಿರಬೇಕು.