ನೀವು ತಿನ್ನುವ ಒಣ ಹಣ್ಣುಗಳು ಅಸಲಿಯೇ? ಕಲಬೆರಕೆ ಡ್ರೈ ಫ್ರೂಟ್ಸ್ ಪತ್ತೆಹಚ್ಚಲು ಇಲ್ಲಿದೆ ಟಿಪ್ಸ್!

ಬೆಂಗಳೂರು.ಜುಲೈ.22: ದೈನಂದಿನ ಜೀವನದಲ್ಲಿ ಅಾರೋಗ್ಯ ಮತ್ತು ಶಕ್ತಿಯ ಮೂಲವಾಗಿ ಬಳಸುವ ಒಣ ಹಣ್ಣುಗಳು (Dry Fruits) ಪ್ರತಿಯೊಬ್ಬರ ಅಡುಗೆಮನೆಯಲ್ಲೂ ಜಾಗ ಪಡೆದಿರುತ್ತವೆ. ಆದರೆ, ಮಾರುಕಟ್ಟೆಯಲ್ಲಿ ಸಿಗುವ ಎಲ್ಲಾ ಡ್ರೈ ಫ್ರೂಟ್ಸ್ಗಳು ಗುಣಮಟ್ಟದಿಂದ ಕೂಡಿರುತ್ತವೆ ಎಂದು ಹೇಳಲಾಗುವುದಿಲ್ಲ. ಕೃತಕ ಬಣ್ಣ, ಅತಿಯಾದ ಪಾಲಿಶ್, ಕಳಪೆ ದರ್ಜೆಯ ಸಾಮಗ್ರಿಗಳ ಬಳಕೆ ಹಾಗೂ ಸೂಕ್ತವಾಗಿ ಸಂಗ್ರಹಿಸದಿರುವುದು ಹೀಗೆ ಹಲವು ರೀತಿಯಲ್ಲಿ ಇವುಗಳ ಕಲಬೆರಕೆ ನಡೆಯುತ್ತಿರುತ್ತದೆ.

ಗ್ರಾಹಕರನ್ನು ಆಕರ್ಷಿಸಲು ಕೆಲವೊಮ್ಮೆ ಇಂತಹ ಕೆಟ್ಟ ಉತ್ಪನ್ನಗಳನ್ನೇ ಹೆಚ್ಚು ಹೊಳೆಯುವಂತೆ ಮಾಡಲಾಗುತ್ತದೆ. ಆದರೆ ಅಡುಗೆ ಮನೆಗೆ ಸೇರುವ ಮುನ್ನವೇ ಇವುಗಳನ್ನು ಪತ್ತೆಹಚ್ಚುವುದು ಹೇಗೆ? ಆಹಾರ ತಜ್ಞರು ನೀಡುವ ಕೆಲವು ಸರಳ ಸಲಹೆಗಳು ಇಲ್ಲಿವೆ:

1. ಕಣ್ಣಿಗೆ ಕಂಡದ್ದೆಲ್ಲವೂ ಅಸಲಿಯಲ್ಲ
ಕಲಬೆರಕೆ ಪತ್ತೆಹಚ್ಚಲು ಮೊದಲ ಹಂತವೆಂದರೆ ಅವುಗಳ ನೋಟ. ಅತಿಯಾಗಿ ಹೊಳೆಯುವ, ಒಂದೇ ರೀತಿಯ ಗಾತ್ರ ಮತ್ತು ಬಣ್ಣ ಹೊಂದಿರುವ ಒಣ ಹಣ್ಣುಗಳನ್ನು ಕೊಳ್ಳುವಾಗ ಎಚ್ಚರಿಕೆ ಅಗತ್ಯ. ನೈಸರ್ಗಿಕ ಡ್ರೈ ಫ್ರೂಟ್ಸ್ಗಳಲ್ಲಿ ಬಣ್ಣ ಮತ್ತು ಆಕಾರದಲ್ಲಿ ಕೊಂಚ ವ್ಯತ್ಯಾಸಗಳಿರುತ್ತವೆ. ಪ್ರಕಾಶಮಾನವಾಗಿ ಕಾಣುವಂತೆ ಮಾಡಲು ಕೃತಕ ಕೆಮಿಕಲ್ ಅಥವಾ ಪಾಲಿಶ್ ಬಳಸಿರುವ ಸಾಧ್ಯತೆ ಇರುತ್ತದೆ.

ವಾಸನೆ ಮತ್ತು ಸ್ಪರ್ಶದಿಂದ ಪತ್ತೆಹಚ್ಚಿ
ವಾಸನೆ: ತಾಜಾ ಡ್ರೈ ಫ್ರೂಟ್ಸ್ಗಳು ಹಗುರವಾದ ನೈಸರ್ಗಿಕ ಸುವಾಸನೆ ಹೊಂದಿರುತ್ತವೆ. ಆದರೆ ರಾಸಾಯನಿಕ ವಾಸನೆ, ದುರ್ವಾಸನೆ ಅಥವಾ ಹಳೆಯದಾದ (ಸೀದು ಹೋದ) ವಾಸನೆ ಬಂದರೆ ಅವುಗಳನ್ನು ಬಳಸಬಾರದು.

ಸ್ಪರ್ಶ (ಟಚ್): ಒಣ ಹಣ್ಣುಗಳು ಅತಿಯಾಗಿ ಜಿಗುಟಾಗಿದ್ದರೆ (Sticky), ತೇವದಿಂದ ಕೂಡಿದ್ದರೆ ಅಥವಾ ಅತಿಯಾಗಿ ಗಟ್ಟಿಯಾಗಿದ್ದರೆ ಅವುಗಳನ್ನು ಸರಿಯಾಗಿ ಸಂಗ್ರಹಿಸಿಲ್ಲ ಎಂದರ್ಥ.

3. ಮನೆಯಲ್ಲೇ ಮಾಡಿ ಸರಳ ಪರೀಕ್ಷೆ!
ನೀರಿನ ಪರೀಕ್ಷೆ: ಸ್ವಲ್ಪ ಡ್ರೈ ಫ್ರೂಟ್ಸ್ಗಳನ್ನು ಶುದ್ಧ ನೀರಿನಲ್ಲಿ ತೊಳೆಯಿರಿ. ನೀರು ತಕ್ಷಣವೇ ಬಣ್ಣ ಬದಲಾಯಿಸಿದರೆ, ಅದಕ್ಕೆ ಕೃತಕ ಬಣ್ಣ ಸೇರಿಸಲಾಗಿದೆ ಎಂದರ್ಥ.

ನೆನೆಸಿ ನೋಡಿ: ಒಣ ಹಣ್ಣುಗಳನ್ನು ನೀರಿನಲ್ಲಿ ಸ್ವಲ್ಪ ಸಮಯ ನೆನೆಸಿದಾಗ ಅತಿಯಾದ ಬಣ್ಣ ಬಿಡುವುದು ಅಥವಾ ನೀರಿನ ಮೇಲೆ ವಿಚಿತ್ರ ರೀತಿಯ ಪದರ/ತ್ಯಾಜ್ಯ ಕಾಣಿಸಿಕೊಂಡರೆ ಅವು ಸಂಶಯಾಸ್ಪದ ಉತ್ಪನ್ನಗಳಾಗಿವೆ.

4. ಖರೀದಿ ಮತ್ತು ಬಳಕೆ ವಿಚಾರದಲ್ಲಿ ಜಾಗರೂಕರಾಗಿರಿ
ಯಾವಾಗಲೂ ಸೀಲ್ ಮಾಡಿದ, ಸರಿಯಾದ ಲೇಬಲ್ ಹೊಂದಿರುವ ಮತ್ತು ವಿಶ್ವಾಸಾರ್ಹ ಬ್ರ್ಯಾಂಡ್ಗಳ ಉತ್ಪನ್ನಗಳನ್ನೇ ಖರೀದಿಸಿ.

ಮಾರುಕಟ್ಟೆಯ ದರಕ್ಕಿಂತ ತೀರ ಅಗ್ಗದ ದರದಲ್ಲಿ ಸಿಗುವ ಉತ್ಪನ್ನಗಳ ಬಗ್ಗೆ ಎಚ್ಚರವಿರಲಿ.

ಕವರ್ ಮೇಲಿರುವ ತಯಾರಿಕಾ ದಿನಾಂಕ ಹಾಗೂ ‘ಎಕ್ಸ್ಪೈರಿ ಡೇಟ್’ ಕಡ್ಡಾಯವಾಗಿ ಪರಿಶೀಲಿಸಿ.

ಮನೆಗೆ ತಂದ ನಂತರವೂ ಅವುಗಳನ್ನು ತೇವಾಂಶವಿಲ್ಲದ, ತಂಪಾದ ಜಾಗದಲ್ಲಿ ಸಂಗ್ರಹಿಸಿಡಿ.

ಒಂದು ವೇಳೆ ಬಣ್ಣ, ವಾಸನೆ ಅಥವಾ ರುಚಿಯಲ್ಲಿ ಸ್ವಲ್ಪವೇ ವ್ಯತ್ಯಾಸ ಕಂಡುಬಂದರೂ ಅಂತಹ ಒಣ ಹಣ್ಣುಗಳನ್ನು ಸೇವಿಸದಿರುವುದೇ ಆರೋಗ್ಯಕ್ಕೆ ಒಳ್ಳೆಯದು.