ಟೋಲ್ ಪ್ಲಾಜಾದ 20 ಕಿ.ಮೀ ವ್ಯಾಪ್ತಿಯ ಸ್ಥಳೀಯರಿಗೆ ವಾರ್ಷಿಕ ಪಾಸ್: ರಸ್ತೆ ಸಾರಿಗೆ ಸಚಿವಾಲಯ

ದೆಹಲಿ.ಜೂನ್.17: ದೇಶದಲ್ಲಿ ವಾಹನ ಸವಾರರು ಟೋಲ್ ಪಾವತಿಗಾಗಿ ಕಾಯದೇ ನೇರವಾಗಿ ಚಲಿಸುವ ಬ್ಯಾರಿಯರ್ ರಹಿತ ಟೋಲ್ ವ್ಯವಸ್ಥೆಯನ್ನು ಜಾರಿಗೆ ತರಲು ಕೇಂದ್ರ ಸರ್ಕಾರ ಮುಂದಾಗಿದೆ. ಇದರ ಭಾಗವಾಗಿ, ಟೋಲ್ ಪ್ಲಾಜಾಗಳ ಸುತ್ತಮುತ್ತಲಿನ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸಿಸುವ ಸ್ಥಳೀಯ ನಿವಾಸಿಗಳಿಗಾಗಿ ಮುಂದಿನ ತಿಂಗಳಿನಿಂದ ಹೊಸ ಡಿಜಿಟಲ್ ಮಾಸಿಕ ಮತ್ತು ವಾರ್ಷಿಕ ಪಾಸ್ಗಳನ್ನು ವಿತರಿಸಲಾಗುವುದು ಎಂದು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಈ ಹೊಸ ಪಾಸ್ ಗಳನ್ನು ಫಾಸ್ಟ್ ಟ್ಯಾಗ್ (FASTag) ಜೊತೆಗೆ ಲಿಂಕ್ ಮಾಡಲಾಗುವುದು. ಆದರೆ, ಈ ಪಾಸ್ಗಳ ನಿಖರ ದರ ಎಷ್ಟು ಎಂಬುದರ ಕುರಿತು ಸದ್ಯ ಚರ್ಚೆಗಳು ನಡೆಯುತ್ತಿವೆ. ಹೊಸ ವ್ಯವಸ್ಥೆಯಡಿ, ಟೋಲ್ ಪ್ಲಾಜಾದ 20 ಕಿ.ಮೀ ವ್ಯಾಪ್ತಿಯಲ್ಲಿ ವಾಸಿಸುವ ವಾಹನ ಮಾಲೀಕರ ವಿಳಾಸವನ್ನು ಅವರ ಆಧಾರ್ ಸಂಖ್ಯೆಯ ಮೂಲಕ ಪರಿಶೀಲಿಸಿ ದೃಢೀಕರಿಸಲಾಗುತ್ತದೆ ಎಂದು ಅಧಿಕಾರಿ ಮಾಹಿತಿ ನೀಡಿದ್ದಾರೆ.

ಪ್ರಸ್ತುತ ಚಾಲ್ತಿಯಲ್ಲಿರುವ ಮಲ್ಟಿ-ಲೇನ್ ಫ್ರೀ-ಫ್ಲೋ (MLFF) ಟೋಲ್ ವ್ಯವಸ್ಥೆಯಲ್ಲಿ, ಟೋಲ್ ಸಿಬ್ಬಂದಿಯೊಂದಿಗೆ ಪರಿಚಯದ ಆಧಾರದ ಮೇಲೆ ತಾವೂ ಸ್ಥಳೀಯರು ಎಂದು ಹೇಳಿ ಪಾಸ್ ಇಲ್ಲದೆ ಸಂಚರಿಸುತ್ತಿದ್ದವರ ಸಂಖ್ಯೆ ಹೆಚ್ಚಾಗಿತ್ತು. ಇದು ನಿಯಮ ಉಲ್ಲಂಘನೆಗೆ ಕಾರಣವಾಗುತ್ತಿತ್ತು. ಆದರೆ ಹೊಸ ಬ್ಯಾರಿಯರ್ ರಹಿತ ತಂತ್ರಜ್ಞಾನದಲ್ಲಿ ಮನುಷ್ಯರ ಹಸ್ತಕ್ಷೇಪ ಇರುವುದಿಲ್ಲ. ಪಾಸ್ ಇಲ್ಲದೆ ಸಂಚರಿಸಿದರೆ ಸ್ವಯಂಚಾಲಿತವಾಗಿ ಇ-ನೋಟಿಸ್ ಜಾರಿಯಾಗುತ್ತದೆ. ಈ ಸಮಸ್ಯೆಯನ್ನು ನಿವಾರಿಸಲು ಸ್ಥಳೀಯರಿಗೆ ಡಿಜಿಟಲ್ ಪಾಸ್ ನೀಡಲು ನಿರ್ಧರಿಸಲಾಗಿದೆ.

ಸದ್ಯದ ನಿಯಮಗಳ ಪ್ರಕಾರ ಸ್ಥಳೀಯ ವಾಣಿಜ್ಯೇತರ ವಾಹನಗಳಿಗೆ ಮಾಸಿಕ 350 ರೂ. ದರದ ಭೌತಿಕ ಪಾಸ್ ನೀಡಲಾಗುತ್ತಿದೆ. ಆದರೆ ಹೊಸ ಡಿಜಿಟಲ್ ಪಾಸ್ನ ದರ ಇದಕ್ಕಿಂತ ಕಡಿಮೆ ಇರಲಿದ್ದು, ಇದು ‘ರಾಜಮಾರ್ಗ’ (Rajmarg) ಪೋರ್ಟಲ್ನಲ್ಲಿ ಲಭ್ಯವಿರಲಿದೆ. ಈ ಪಾಸ್ ಹೊಂದಿರುವ ಸ್ಥಳೀಯರು ಸಂಬಂಧಪಟ್ಟ ಟೋಲ್ ಗೇಟ್ಗಳ ಮೂಲಕ ಎಷ್ಟು ಬಾರಿಯಾದರೂ ಉಚಿತವಾಗಿ ಸಂಚರಿಸಬಹುದು.ಬ್ಯಾರಿಯರ್ ರಹಿತ ಟೋಲ್ನಲ್ಲಿ ಹಣ ಕಡಿತವಾಗದಿದ್ದರೆ ದುಪ್ಪಟ್ಟು ದಂಡ ವಿಧಿಸಲಾಗುತ್ತದೆ. ಆದರೆ, 72 ಗಂಟೆಗಳ ಒಳಗಾಗಿ ಪಾವತಿಸಿದರೆ ಸಾಮಾನ್ಯ ಟೋಲ್ ದರ ಮಾತ್ರ ಅನ್ವಯಿಸುತ್ತದೆ.

ಪ್ರಸ್ತುತ ಗುಜರಾತ್ ನ ಚೋರಸಿ ಮತ್ತು ನವದೆಹಲಿಯ ಮುಂಡ್ಕಾ-ಬಕ್ಕರ್ವಾಲಾ ಟೋಲ್ ಪ್ಲಾಜಾಗಳಲ್ಲಿ ಈ MLFF ವ್ಯವಸ್ಥೆ ಪ್ರಾಯೋಗಿಕವಾಗಿ ಜಾರಿಯಲ್ಲಿದೆ. ಮುಂದಿನ ದಿನಗಳಲ್ಲಿ ಹರಿಯಾಣ, ರಾಜಸ್ಥಾನ, ತಮಿಳುನಾಡು, ಆಂಧ್ರಪ್ರದೇಶ ಹಾಗೂ ಮಹಾರಾಷ್ಟ್ರ ಸೇರಿದಂತೆ ದೇಶದ ಹಲವು ಪ್ರಮುಖ ಟೋಲ್ ಪ್ಲಾಜಾಗಳಿಗೆ ಇದನ್ನು ವಿಸ್ತರಿಸಲು ಬಿಡ್ ಗಳನ್ನು ಆಹ್ವಾನಿಸಲಾಗಿದೆ.