ಸಿಎ ವಿದ್ಯಾರ್ಥಿಗಳಿಗೆ ಸ್ಫೂರ್ತಿಯ ಸೆಲೆ: ಮಧು ಪ್ರಸಾದ್ ಕಿವಿಮಾತು ಮತ್ತು ಯಶಸ್ಸಿನ ಸೂತ್ರಗಳು

ಸುದ್ದಿಒನ್, ಚಿತ್ರದುರ್ಗ, ಜುಲೈ. 01 : ಚಾರ್ಟರ್ಡ್ ಅಕೌಂಟೆನ್ಸಿ (CA) ಎಂಬುದು ಕೇವಲ ಒಂದು ಪದವಿಯಲ್ಲ, ಅದು ಇಡೀ ಜೀವನವನ್ನು ರೂಪಿಸುವ ಒಂದು ಶೈಕ್ಷಣಿಕ ಅಸ್ತ್ರ. ಈ ಅತ್ಯುನ್ನತ ವೃತ್ತಿಪರ ಕೋರ್ಸ್ ವಿದ್ಯಾರ್ಥಿಗಳಲ್ಲಿ ಶಿಸ್ತು, ವ್ಯವಹಾರಿಕ ಚತುರತೆ, ನಾಯಕತ್ವದ ಗುಣ ಹಾಗೂ ಅತ್ಯುತ್ತಮ ಸಂವಹನ ಕಲೆಗಳನ್ನು ಬೆಳೆಸುತ್ತದೆ.

ಕಳೆದ 30 ವರ್ಷಗಳಿಂದ ಅನೇಕ ವಿದ್ಯಾರ್ಥಿಗಳನ್ನು ಸಿಎ ಸಾಧಕರನ್ನಾಗಿ ಬೆಳೆಸಿ, ದೇಶದ ಆರ್ಥಿಕ ಪ್ರಗತಿಗೆ ಕೊಡುಗೆ ನೀಡಿರುವ ಹಿರಿಯ ಮಾರ್ಗದರ್ಶಕ ಮಧು ಪ್ರಸಾದ್ ಅವರು ವಿದ್ಯಾರ್ಥಿಗಳಿಗೆ ಮಹತ್ವದ ಕಿವಿಮಾತನ್ನು ಹೇಳಿದ್ದಾರೆ. ಈ ಕೋರ್ಸ್ ಸ್ವಲ್ಪ ಕಷ್ಟವಾದರೂ, ಇದು ಜೀವನಪರ್ಯಂತ ನಿಮಗೆ ಗೌರವ ಮತ್ತು ಘನತೆಯನ್ನು ತಂದುಕೊಡುತ್ತದೆ. ಉತ್ತಮ ಮಾರ್ಗದರ್ಶನ, ನಿರಂತರ ಅಭ್ಯಾಸ ಮತ್ತು ಕಠಿಣ ಶಿಸ್ತಿನಿಂದ ಖಂಡಿತವಾಗಿಯೂ ಸಿಎ ಪದವಿ ಪಡೆಯಲು ಸಾಧ್ಯ ಎಂದು ಅವರು ಧೈರ್ಯ ತುಂಬಿದ್ದಾರೆ.

ಭಾರತದಲ್ಲೇ ಅತ್ಯಂತ ಕಠಿಣವಾದ ಕೋರ್ಸ್ ಗಳಲ್ಲಿ ಸಿಎ ಕೂಡ ಒಂದು. ಸುದೀರ್ಘ ಅಧ್ಯಯನ, ಕಠಿಣ ಪಠ್ಯಕ್ರಮ, ಮತ್ತು ನಿರಂತರ ಪರೀಕ್ಷೆಗಳಿಂದಾಗಿ ವಿದ್ಯಾರ್ಥಿಗಳು ಮಾನಸಿಕ ಒತ್ತಡ, ಆತಂಕ ಹಾಗೂ ವೈಫಲ್ಯದ ಭೀತಿಯನ್ನು ಎದುರಿಸುವುದು ಸಹಜ. ಇಂತಹ ಸಂದರ್ಭಗಳಲ್ಲಿ ಸಕಾರಾತ್ಮಕ ಚಿಂತನೆಗಳು ವಿದ್ಯಾರ್ಥಿಗಳನ್ನು ಮಾನಸಿಕವಾಗಿ ಗಟ್ಟಿಯಾಗಿಸುತ್ತವೆ. ಪ್ರೇರಣಾತ್ಮಕ ನುಡಿಗಳು ವಿದ್ಯಾರ್ಥಿಗಳಿಗೆ ಸಹಾಯ ಮಾಡುತ್ತವೆ. ಸುದೀರ್ಘ ಓದಿನ ಅವಧಿಯಲ್ಲಿ ಏಕಾಗ್ರತೆ ಕಳೆದುಕೊಳ್ಳದಂತೆ ನೋಡಿಕೊಳ್ಳುತ್ತವೆ.
ವೈಫಲ್ಯಗಳನ್ನು ಕಂಡು ಧೃತಿಗೆಡದೆ, ಮತ್ತೆ ಆತ್ಮವಿಶ್ವಾಸದಿಂದ ಮುನ್ನಡೆಯಲು ಶಕ್ತಿ ನೀಡುತ್ತವೆ. ಆರ್ಟಿಕಲ್ ಶಿಪ್ ಮತ್ತು ಪರೀಕ್ಷೆಯ ಸಮಯದ ಒತ್ತಡವನ್ನು ನಿವಾರಿಸಲು ಸಹಾಯ ಮಾಡುತ್ತವೆ.

ಸಿಎ ಸಾಧಕರ ಹಾದಿಗೆ ಬೆಳಕಾಗಬಲ್ಲ ಟಾಪ್ 10 ಪ್ರೇರಣಾತ್ಮಕ ನುಡಿಗಳು
ಯಶಸ್ಸು ಕೊನೆಯಲ್ಲ, ವೈಫಲ್ಯವು ಅಂತ್ಯವಲ್ಲ: ಮುಂದುವರಿಯುವ ಧೈರ್ಯವೇ ಎಲ್ಲಕ್ಕಿಂತ ಮುಖ್ಯ.
— ವಿನ್ ಸ್ಟನ್ ಚರ್ಚಿಲ್

(ಸಿಎ ಹಾದಿಯಲ್ಲಿ ಸೋಲು-ಗೆಲುವು ಸಹಜ, ಸೋತಾಗಲೂ ಪ್ರಯತ್ನ ನಿಲ್ಲಿಸಬಾರದು.)

“ಯಶಸ್ಸು (Success) ಎಂಬ ಪದವು ಕೆಲಸ (Work) ಕ್ಕಿಂತ ಮೊದಲು ಬರುವುದು ಕೇವಲ ನಿಘಂಟಿನಲ್ಲಿ (Dictionary) ಮಾತ್ರ!”
— ವಿಡಾಲ್ ಸಾಸೂನ್

(ಪರಿಶ್ರಮವಿಲ್ಲದೆ ಸಿಎನಲ್ಲಿ ಯಶಸ್ಸು ಸಾಧಿಸಲು ಯಾವುದೇ ಶಾರ್ಟ್ಕಟ್ ಇಲ್ಲ.)

“ಉತ್ಸಾಹವನ್ನು ಕಳೆದುಕೊಳ್ಳದೆ ಒಂದು ವೈಫಲ್ಯದಿಂದ ಮತ್ತೊಂದು ವೈಫಲ್ಯದ ಕಡೆಗೆ ಹೆಜ್ಜೆ ಇಡುವುದೇ ನಿಜವಾದ ಯಶಸ್ಸು.”
— ವಿನ್ಸ್ಟನ್ ಚರ್ಚಿಲ್

(ಕಡಿಮೆ ಉತ್ತೀರ್ಣ ಪ್ರಮಾಣ ಕಂಡು ಬೇಸರಗೊಳ್ಳದೆ, ತಪ್ಪುಗಳಿಂದ ಕಲಿಯುತ್ತಾ ಸಾಗಬೇಕು.)

“ನಿಮ್ಮ ಸಮಯ ಸೀಮಿತವಾಗಿದೆ, ಅದನ್ನು ಬೇರೆಯವರ ಜೀವನವನ್ನು ಬದುಕುವ ಮೂಲಕ ವ್ಯರ್ಥ ಮಾಡಬೇಡಿ.”
— ಸ್ಟೀವ್ ಜಾಬ್ಸ್

(ಇತರರೊಂದಿಗೆ ನಿಮ್ಮನ್ನು ಹೋಲಿಕೆ ಮಾಡಿಕೊಳ್ಳಬೇಡಿ; ಪ್ರತಿಯೊಬ್ಬರ ಕಲಿಕೆಯ ವೇಗ ಮತ್ತು ಯಶಸ್ಸಿನ ಸಮಯ ಬೇರೆಯದೇ ಆಗಿರುತ್ತದೆ.)

“ಯಶಸ್ಸು ಸಂತೋಷಕ್ಕೆ ಕೀಲಿ ಕೈ ಅಲ್ಲ. ಬದಲಿಗೆ ಸಂತೋಷವೇ ಯಶಸ್ಸಿನ ಕೀಲಿ ಕೈ.”
— ಆಲ್ಬರ್ಟ್ ಶ್ವಿಟ್ಜರ್

(ಕೇವಲ ರಿಸಲ್ಟ್ ಬಂದರಷ್ಟೇ ಸಂತೋಷ ಎಂದುಕೊಳ್ಳಬೇಡಿ, ಸಿಎ ಕಲಿಯುವ ಪ್ರಕ್ರಿಯೆಯನ್ನು ಸಂಭ್ರಮಿಸಿ.)

“ಯಶಸ್ಸಿನ ಹಾದಿ ಮತ್ತು ವೈಫಲ್ಯದ ಹಾದಿ ಎರಡೂ ಬಹುತೇಕ ಒಂದೇ ಆಗಿರುತ್ತವೆ.”
— ಕಾಲಿನ್ ಆರ್. ಡೇವಿಸ್

(ಎಲ್ಲರೂ ಒಂದೇ ಪುಸ್ತಕ, ಒಂದೇ ಪಠ್ಯಕ್ರಮ ಓದುತ್ತಾರೆ; ಆದರೆ ಅದನ್ನು ಎದುರಿಸುವ ಸಕಾರಾತ್ಮಕ ಮನೋಭಾವ ವ್ಯತ್ಯಾಸ ತರುತ್ತದೆ.)

“ಸಿಎ ಎಂಬುದು ಕೇವಲ ಒಂದು ಅರ್ಹತೆಯಲ್ಲ, ಇದು ನನ್ನ ಜೀವನದ ಹೆಮ್ಮೆ ಮತ್ತು ಗೌರವ.”
— ಕುಮಾರ್ ಮಂಗಳಂ ಬಿರ್ಲಾ

(ಇದು ಕೇವಲ ಪದವಿಯಲ್ಲ, ವೃತ್ತಿಪರ ನೈತಿಕತೆ ಮತ್ತು ಶಿಸ್ತಿನ ಸಂಕೇತ.)

“ಪ್ರಧಾನಮಂತ್ರಿಯ ಸಹಿಗಿಂತಲೂ ಒಬ್ಬ ಚಾರ್ಟರ್ಡ್ ಅಕೌಂಟೆಂಟ್ನ ಸಹಿ ಅತ್ಯಂತ ಮುಖ್ಯವಾದದ್ದು.”
— ನರೇಂದ್ರ ಮೋದಿ

(ಇದು ಸಿಎ ವೃತ್ತಿಗೆ ಸಮಾಜ ಮತ್ತು ದೇಶ ನೀಡುವ ಜವಾಬ್ದಾರಿ ಹಾಗೂ ಗೌರವವನ್ನು ಎತ್ತಿ ತೋರಿಸುತ್ತದೆ.)

“ಯಾರಿಗೂ ತಿಳಿಯದ ವಿಷಯವನ್ನು ತಿಳಿದುಕೊಳ್ಳುವುದೇ ಯಶಸ್ಸಿನ ರಹಸ್ಯ.”
— ಅರಿಸ್ಟಾಟಲ್ ಒನಾಸಿಸ್

(ತೆರಿಗೆ, ಆಡಿಟಿಂಗ್ ಮತ್ತು ಫೈನಾನ್ಸ್ನಲ್ಲಿ ಸಿಎ ವಿದ್ಯಾರ್ಥಿಗಳು ಪಡೆಯುವ ಆಳವಾದ ಜ್ಞಾನವೇ ಅವರ ಅತಿ ದೊಡ್ಡ ಶಕ್ತಿಯಾಗುತ್ತದೆ.)

“ಯಶಸ್ಸು ಎನ್ನುವುದು ತಲುಪಬೇಕಾದ ತಾಣವಲ್ಲ; ಅದೊಂದು ಪಯಣ.”
— ರಿಚರ್ಡ್ ಬ್ರಾನ್ಸನ್

(ಸಿಎ ಜರ್ನಿಯು ರಿಸಲ್ಟ್ ಗಿಂತ ಮುಂಚೆಯೇ ನಮಗೆ ತಾಳ್ಮೆ, ಸಮಯ ನಿರ್ವಹಣೆ ಮತ್ತು ಬದುಕಿನ ಪಾಠಗಳನ್ನು ಕಲಿಸಿಕೊಡುತ್ತದೆ.)

ಸಕಾರಾತ್ಮಕ ಮನೋಭಾವದ ಮಹತ್ವ ಮತ್ತು ಸವಾಲುಗಳು:
ವಿಶಾಲವಾದ ಪಠ್ಯಕ್ರಮ, ಆರ್ಟಿಕಲ್ಶಿಪ್ ಬ್ಯಾಲೆನ್ಸ್ ಮಾಡುವುದು ಮತ್ತು ಪರೀಕ್ಷೆಯ ತೀವ್ರ ಪೈಪೋಟಿ ಸಿಎ ವಿದ್ಯಾರ್ಥಿಗಳ ಮುಂದಿರುವ ಮುಖ್ಯ ಸವಾಲುಗಳು. ಆದರೆ, ಸಕಾರಾತ್ಮಕ ಮನೋಭಾವ ಹೊಂದಿರುವ ವಿದ್ಯಾರ್ಥಿಗಳು ದೀರ್ಘಾವಧಿಯ ಓದಿನಲ್ಲಿ ಸ್ಥಿರತೆ ಕಾಯ್ದುಕೊಳ್ಳುತ್ತಾರೆ ಹಾಗೂ ವೈಫಲ್ಯಗಳಿಂದ ಬೇಗನೆ ಚೇತರಿಸಿಕೊಂಡು ದುಪ್ಪಟ್ಟು ವೇಗದಲ್ಲಿ ಕೆಲಸ ಮಾಡುತ್ತಾರೆ.

ಇಂದು ಯಶಸ್ವಿಯಾಗಿರುವ ಪ್ರತಿಯೊಬ್ಬ ಚಾರ್ಟರ್ಡ್ ಅಕೌಂಟೆಂಟ್ ಕೂಡ ಒಮ್ಮೆ ನಿಮ್ಮಂತೆಯೇ ಒತ್ತಡ, ಭಯ ಮತ್ತು ಗೊಂದಲಗಳನ್ನು ಎದುರಿಸಿದವರೇ ಆಗಿದ್ದಾರೆ. ಅವರ ಯಶಸ್ಸಿನ ಹಿಂದಿನ ರಹಸ್ಯವೆಂದರೆ ಕಷ್ಟದ ಕಾಲದಲ್ಲೂ ಅವರು ಪ್ರಯತ್ನ ಕೈಬಿಡದೆ ಮುನ್ನಡೆದದ್ದು. ಆದ್ದರಿಂದ ವಿದ್ಯಾರ್ಥಿಗಳೇ, ನಿಮ್ಮ ಶ್ರಮದ ಮೇಲೆ ನಂಬಿಕೆಯಿರಲಿ, ನಿಮ್ಮ ಗುರಿಯತ್ತ ಮುನ್ನಡೆಯಿರಿ; ಭವಿಷ್ಯದ ಗೌರವಾನ್ವಿತ ಸ್ಥಾನ ನಿಮಗಾಗಿ ಕಾಯುತ್ತಿದೆ ಎಂದು ಸಿಎ ಮಧುಪ್ರಸಾದ್ ಅವರು ಸ್ಪೂರ್ತಿ ತುಂಬಿದ್ದಾರೆ.